“Marso 13–19. Mateo 11–12; Lucas 11: ‘Papahulayon Ko Kamo,’” Dali, Sunod Kanako—Alang sa Primary: Bag-ong Tugon 2023 (2022)
“Marso 13–19. Mateo 11–12; Lucas 11,” Dali, Sunod Kanako—Alang sa Primary: 2023
Be Not Afraid [Ayaw og Kahadlok], ni Michael Malm
Marso 13–19
Mateo 11–12; Lucas 11
“Papahulayon Ko Kamo”
Ang mga ideya sa pagtudlo dinhi niini nga latid gituyo aron sa pagtabang sa pagdasig sa imong kaugalingon nga pagkamamugnaon. Ayaw pagpanagana sa pagpahiangay niini aron sa pagtubag sa mga panginahanglan sa mga bata nga imong gitudloan.
Dapita ang Pagpaambit
Awhaga ang mga bata sa pagpaambit sa unsay ilang mabuhat aron sa pagsimba sa Ginoo atol sa adlaw nga Igpapahulay.
Itudlo ang Doktrina: Mas Gagmay nga mga Bata
Si Jesus motabang kanako kon moduol ako Kaniya.
Ang mga bata mobati og kahupayan nga masayod nga si Jesus motabang kanila sa ilang mga palas-anon kon sila moduol ngadto Kaniya.
Posible nga mga Kalihokan
-
Basaha ang Mateo 11:28–30, ug ipakita ang hulagway sa giyugohan nga mga baka diha sa latid niini nga semana diha sa Dali, Sunod Kanako—Alang sa mga Indibidwal ug mga Pamilya. Hangyoa ang mga bata sa pagtudlo ngadto sa mga baka ug sa yugo. Ipasabot nga ang giyugohan nga mga baka mas bug-at ang mabira kon magdungan kay sa magtinagsa-tagsa og bira. Pagpamatuod nga kon kita mobati og kaguol, kabalaka, o kahadlok, mahimo natong tinguhaon si Jesus ug motabang Siya kanato.
-
Hangyoa ang usa ka bata sa pag-alsa og bug-at nga butang. Kon maglisod siya, tanyagi og tabang. Sa unsang paagi nga si Jesus motabang kanato sa pagbuhat sa lisod nga mga butang? Pagpaambit og kasinatian sa dihang gibati nimo nga si Jesus mitabang kanimo sa pagbuhat og lisod nga butang, ug hangyoa ang mga bata sa pagpaambit og ilang kaugalingon nga mga kasinatian.
Makahimo ako sa pagbalaan sa adlawng Igpapahulay.
Unsa ang pipila ka makalingaw nga mga paagi nga imong matudloan ang mga bata mahitungod sa adlaw nga Igpapahulay ug nganong ato kining ipabilin nga balaan?
Posible nga mga Kalihokan
-
Basaha og kusog ang Mateo 12:10–13. Dapita ang mga bata nga mobarog ug molingkod sa matag higayon nga moingon ka og “Igpapahulay,” ug isulti og balik uban kanila ang pulongan nga “[Insakto] ang pagbuhat og maayo sa adlaw nga igpapahulay” (Mateo 12:12). Sa ilang hunahuna unsa kaha ang ipasabot niana?
-
Ipakita ang usa ka kalendaryo ngadto sa mga bata, ug i-highlight ang adlaw nga Igpapahulay alang kanila. Unsay atong gibuhat sa ubang mga adlaw sa semana? Unsay atong mabuhat sa Igpapahulay aron mahimo kining lahi sa ubang mga adlaw? (tan-awa sa Isaias 58:13–14).
-
Hangyoa ang mga bata sa pagdrowing og maayong mga butang nga ilang mabuhat sa adlaw nga Igpapahulay (tan-awa ang pahina sa kalihokan karong semanaha).
-
Dapita ang mga bata sa paghimo og mga aksiyon nga motabang kanila nga makahinumdom sa mga paagi nga makapangandam kita alang sa Igpapahulay samtang ilang kantahon ang awit nga “Sabado” (Songbook sa mga Bata, 105).
-
Pagdrowing og mga mata, mga dunggan, baba, ug mga kamot diha sa pisara. Hangyoa ang mga bata sa pagsulti kanimo unsa ang mabuhat sa matag usa niini nga mga bahin sa atong mga lawas aron sa pagbalaan sa adlaw nga Igpapahulay.
Ang Langitnong Amahan naghatag kanato og maayo nga mga gasa.
Ang pagtulon-an sa Manluluwas diha sa Lucas 11:11–13 makatabang sa mga bata nga imong gitudloan nga makasabot nga ang Langitnong Amahan nahigugma kanila ug gusto nga mopanalangin kanila.
Posible nga mga Kalihokan
-
Gamita ang usa ka leksiyon nga naggamit og butang [object lesson] aron sa paghulagway sa mga pagtulon-an sa Manluluwas diha sa Lucas 11:11-13. Sama pananglit, mahimo nimong ibutang ang usa ka bato sulod sa bag nga sudlanan sa pan o ibutang ang usa ka hulagway sa tanga [scorpion] sulod sa karton sa itlog. Hangyoa ang mga bata sa pagtagna kon unsay anaa sa sulod, ug dayon ipakita kanila. Dapita sila nga ilisan ang bato o ang hulagway og piraso sa pan o itlog. Basaha ang Lucas 11:11–13, ug ipaambit ang imong pagpamatuod nga ang Langitnong Amahan nahigugma kanato, motubag sa atong mga pag-ampo, ug mohatag kanato og daghang panalangin pinaagi sa Iyang Espiritu.
-
Kantaha og dungan ang usa ka awit mahitungod sa gugma sa Dios, sama sa “Gihigugma Ako sa Langitnong Amahan” (Songbook sa mga Bata, 16–17). Unsa ang pipila ka maayo nga mga gasa nga gihatag Niya kanato? Hangyoa ang mga bata sa pagdrowing og mga hulagway sa mga panalangin gikan sa Langitnong Amahan nga sila mapasalamaton.
Itudlo ang Doktrina: Mas Magulang nga mga Bata
Si Jesus motabang kanako kon moduol ako Kaniya.
Unsaon nimo pagtabang ang mga bata nga makasabot nga ang Manluluwas mohatag kanila og kapahulayan gikan sa ilang mga hagit kon sila moduol Kaniya?
Posible nga mga Kalihokan
-
Dapita ang mga bata sa pagpaambit og panahon nga nabalaka o nahingawa sila kabahin sa usa ka butang. Dapita sila sa pagsiksik sa Mateo 11:28–30 alang sa tambag nga makatabang kanila sa susama nga mga sirkumstansiya. Sa unsang paagi nga “papahulayon [kita]” sa Manluluwas? (bersikulo 28).
-
Dapita ang mga bata sa pagdrowing og mga hulagway sa mga butang nga ilang gibuhat aron moduol kang Jesus ug magkat-on bahin Kaniya.
-
Tabangi ang mga bata sa pagsag-ulo sa ikaupat nga artikulo sa hugot nga pagtuo. Hisgoti ngadto kanila kon sa unsang paagi nga ang matag usa sa unang mga baroganan ug mga ordinansa sa ebanghelyo motabang kanato sa pagdawat sa pagdapit ni Jesus nga, “Duol kamo kanako” (Mateo 11:28).
Ang Igpapahulay mao ang usa ka adlaw sa pagbuhat og maayong mga butang nga mas makapaduol kanako ngadto sa Dios.
Ang mga bata nga imong gitudloan malig-on samtang hatagan nimo og gibug-aton ang mga katuyoan ug mga panalangin sa pagbalaan sa adlawng Igpapahulay.
Posible nga mga Kalihokan
-
Dapita ang usa ka bata nga magpakaaron-ingnon nga mao ang tawo kansang kamot giayo sa Manluluwas (tan-awa sa Mateo 12:10–13). Laing bata ang mahimong mangutana kaniya mahitungod sa kasinatian.
-
Basaha og dungan ang Mateo 12:12. Unsa ang pipila ka maayong mga butang nga atong mabuhat sa Igpapahulay? Ipadrowing sa mga bata ang ilang mga ideya diha sa pahina sa kalihokan karong semanaha, guntingon ang mga piraso, ug magpuli-puli sa pagsulbad sa mga puzzle sa usag usa.
-
Tagoi ang pipila ka hulagway sa mga tawo nga nagbuhat og mga butang nga nagpakita og gugma alang sa Langitnong Amahan sa adlaw nga Igpapahulay. Hangyoa ang mga bata sa pagpangita sa mga hulagway ug sa pagpaambit kon sa unsang paagi ang pagbuhat sa mga butang diha sa mga hulagway nagpakita sa atong gugma sa Dios.
The Disciples Eat Wheat on the Sabbath [Ang mga Disipulo Nangaon og Trigo atol sa Igpapahulay], ni James Tissot
Kinahanglang putli ang akong mga aksiyon ug ang akong kasingkasing.
Ang Manluluwas mitudlo nga dili igo nga makita nga matarong ngadto sa uban. Kinahanglang putli usab ang atong mga hunahuna, pagbati, ug pribado nga mga aksiyon.
Posible nga mga Kalihokan
-
Aron sa paghulagway kon unsay gitudlo niini nga mga bersikulo, ipakita sa mga bata ang usa ka tasa o laing sudlanan nga limpyo sa gawas apan hugaw sa sulod. Tabangi sila sa paghunahuna kon unsa kaha ang girepresentar sa “gawas nga bahin sa tasa”. Unsa ang girepresentar sa “sulod [nga bahin]”? Nganong importante nga limpyohan ang gawas ug ang sulod?
-
Basaha og dungan ang pipila sa ubang mga kasulatan nga naghatag og gibug-aton sa pagkamatarong sa atong mga kasingkasing ug sa atong mga aksiyon—sama pananglit, Salmo 24:3–5; Mateo 15:7–8; Moroni 7:6–9. Hisgoti kon nganong gusto sa Manluluwas nga mahimong limpyo ang atong mga kasingkasing ug pribado nga mga aksiyon.
Awhaga ang Pagkat-on diha sa Panimalay
Dapita ang mga bata sa pagpaambit og mga ideya sa pagbalaan sa adlawng Igpapahulay ngadto sa ilang mga pamilya.
Pagpalambo sa Atong Pagtudlo
Pagpangutana. Ang “usa ka pangutana nga nagdapit sa mga tigkat-on sa pagpahayag sa usa ka baroganan sa ebanghelyo sa ilang kaugalingong mga pulong—ilabi na kon gipangutana sa pagsugod sa klase—makatabang kanimo nga mabanabana kon unsa ka dugay nimo nga gahinan og panahon ang pagtuon niana nga baroganan diha sa klase” (Pagtudlo sumala sa Pamaagi sa Manluluwas, 32).