“2 Mga Taga-Corinto 8–13,” Mga Tabang sa Kasulatan: Bag-ong Tugon (2024)
Mga Tabang sa Kasulatan
2 Mga Taga-Corinto 8–13
Gitudlo ni Pablo nga si Jesukristo mao ang atong ehemplo sa paghatag. Nagpasalamat siya sa mga Santos sa Corinto alang sa ilang mga kontribusyon ngadto sa mga kabos sa Jerusalem ug nag-awhag kanila sa pagpadayon sa pagkamanggihatagon. Gamhanang namulong si Pablo batok sa mini nga apostoles ug gidepensahan ang iyang calling isip usa ka Apostol ni Jesukristo. Gihimaya usab niya ang Ginoo ug mipakigbahin og mga detalye sa iyang kinabuhi, iyang mga kalisdanan, ug iyang hugot nga pagtuo diha ni Jesukristo. Girekord ni Pablo ang iyang panan-awon sa ikatulong langit ug gidapit ang mga Santos sa pagsusi sa ilang mga kaugalingon ug sa pagmatuod sa ilang mga kaugalingon nga matinud-anon.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Background ug Konteksto
2 Mga Taga-Corinto 8–9
Giunsa sa mga Santos sa unang panahon sa Simbahan ang pag-amuma alang a mga kabos?
Usa sa nagpadayon nga mga paningkamot ni Pablo atol sa iyang mga misyon mao ang pagpundok og mga donasyon alang sa kabos sa Jerusalem. Misulat si Pablo ngadto sa mga Santos sa Corinto mahitungod niini nga paningkamot diha sa 2 Mga Taga-Corinto 8–9. Ang mga simbahan sa Macedonia nakahatag og ubay-ubay ngadto sa kawsa, ug si Pablo miawhag sa mga Santos sa Corinto sa pagbuhat usab sa ingon. Siya ingon og nagpasabot nga ang mga Santos sa Corinto anaa sa mas maayong pinansiyal nga sitwasyon kay sa niadtong atua sa Jerusalem. Si Pablo misulat sa wala madugay nga ang mga Taga-Corinto miuyon sa iyang hangyo.
2 Mga Taga-Corinto 9:6–13
Unsa ang tambag ni Pablo kabahin sa paghatag?
Gipasabot ni Pablo nga ang pagkaandam sa usa ka tawo sa paghatag mas labaw ka importante kay sa ilang abilidad sa paghatag. Misaad siya nga kadtong kinsa manggihatagon makadawat og dakong mga panalangin, samtang kadtong mihatag og gamay makadawat og gamay. Gikutlo ni Pablo ang usa ka Salmo mahitungod sa malipayong paghatag. Mipasidaan siya batok sa paghatag diha sa kasuko o gumikan kay usa ka obligasyon. Misaad si Pablo nga ang dili dinawo nga paghatag dili lamang mitabang niadtong nanginahanglan apan usab mipatubo sa hugot nga pagtuo diha sa Dios.
Ang kabalaka ni Pablo mao ang pagkaadunay panagsama taliwala sa mga Santos. Kini mao nganong siya miawhag niadtong kinsa adunay mas daghan nga mohatag ngadto niadtong kinsa adunay minos. Ang pagpadayag sa ulahing mga adlaw miklaro nga ang temporal nga panagsama gibase sa mga kahimtang, gusto, sa matag tawo, ug panginahanglan. Karon, ang mga miyembro sa Simbahan makahimo og ubay-ubay nga mga donasyon ngadto sa mga kabos pinaagi sa mga halad sa puasa, ingon man usab sa mga donasyon ngadto sa pundo sa Simbahan sa makitawhanong panabang.
2 Mga Taga-Corinto 10:3–6
Unsa ang gipasabot ni Pablo sa “ang mga hinagiban sa among pakiggubat”?
Gitudlo ni Pablo nga bisan kita nagpuyo sa pisikal nga kalibotan, ang gubat nga atong gipakigbatokan espirituhanon. Isip resulta, dili kita mogamit og pisikal nga mga hinagiban apan espirituhanong mga hinagiban sa atong pagpakiggubat batok ni Satanas. Ang paghulagway ni Pablo sa “[paglumpag sa kota nga mga makagagahom]” ug “gilumpag … ang tanang mapahitas-ong babag” tingali nagpasumbingay sa usa ka kota sa tumoy sa bungtod nga nagdung-aw sa Corinto sa panahon ni Pablo. Gihatagan og gibug-aton ni Pablo nga ang mga Santos kinahanglan nga maggamit sa ilang espirituhanon nga mga hinagiban sa pagbuntog sa garbo. Daghan sa mga Santos nga Taga-Corinto ang migamit sa mga ideya, mga katarungan, ug mga panglantaw sa kalibotan sa ilang katilingban. Midapit si Pablo kanila sa pag-uban kaniya sa pagguba sa bisan unsa nga mopapahawa kanila gikan sa pagsunod sa Manluluwas.
Ang taas nga bungtod nga nagtambo sa karaang Corinto. Balage Balogh / archaeologyillustrated.com
2 Mga Taga-Corinto 10:7–18
Giunsa pagtubag ni Pablo ang mga pagsaway mahitungod sa iyang mga kakulangan?
Ang uban kinsa misupak ni Pablo misaway sa iyang pisikal nga hitsura ug abilidad sa pagsulti. Wala gilimod ni Pablo ang iyang mga kahuyang apan naningkamot sa pagtabang sa mga Santos sa Corinto sa paghunong sa paggamit og kalibutanong sundanan sa pagsukod sa usag usa.
Ang mga kasulatan naglangkob og daghang mga ehemplo nga nagpakita sa Ginoo nga naggamit “sa mahuyang nga mga butang sa kalibotan” sa pagtuman sa Iyang buhat. Mitabang siya sa mga indibidwal sama ni Enoch, Moises, Moroni, ug Joseph Smith sa pagbuntog sa ilang mga kakulangan ug sa pagtuman sa buluhaton nga Iyang ipabuhat alang kanila.
2 Mga Taga-Corinto 10:8, 13–17; 11:10, 18, 21
Nganong miapil si Pablo sa pagpanghambog?
Ang Gresyanhong pulong nga kauchaomai usahay gihubad isip “sa pagpanghambog” ug sa kinatibuk-an adunay negatibong kahologan. Sa 37 ka gidaghanon ang kauchaomai gigamit diha sa Bag-ong Tugon, ang 35 makaplagan sa kang Pablo nga mga sulat. Gibati ni Pablo nga ang iyang pagpanghambog maayo tungod kay kini mipunting diha ni Jesukristo. Kon si Pablo manghambog mahitungod sa iyang kaugalingon, kini sa tinuod mahitungod kon unsay iyang mahimo pinaagi sa Manluluwas. “Sa daklit, ang pagpanghambog ni Pablo nagagikan sa buhat nga siya naghimo alang sa Ginoo. Isip usa ka resulta, ang iyang pagpanghambog diha sa unsay gihimo ni Kristo ug dili sa unsay siya mismo ang naghimo.” Ang “pagpanghambog” ni Pablo mahimong matan-aw nga sama sa paghimaya ni Ammon diha sa Ginoo.
2 Mga Taga-Corinto 11:1–5, 13–15; 12:11–12
Sa unsang paagi naningkamot si Pablo sa pagpanalipod sa Simbahan batok sa bakak nga mga pagtulun-an?
Misulat si Pablo ngadto sa mga Santos sa Corinto isip simbolo sa usa ka amahan sa pangasaw-onon nga sinayoran ngadto ni Kristo—usa ka pangasaw-unon nga gibati niya nga responsable sa pagpabilin nga putli. Mipahimangno siya mahitungod sa mini nga mga magtutudlo kinsa ingon og matarong nga mga ministro ug mitandi kanila ngadto sa bitin kinsa milingla ni Eva didto sa tanaman. Nangatarungan si Pablo nga sama lamang nga si Satanas mismo makapakita sama sa usa ka anghel sa kahayag, mini nga apostoles sa Corinto nagtakuban sa ilang mga kaugalingon isip mga ministro sa pagkamatarong. Kini nga mga indibidwal nagsangyaw og “laing” Kristo. Bisan og dili klaro unsa ang gitudlo niining mini nga apostoles mahitungod ni Jesukristo, kita nahibalo nga sa laing okasyon kinahanglan nga ipanghimakak ni Pablo ang mga pangangkon diha sa Corinto nga si Kristo wala mabanhaw gikan sa patay.
Agi og kalahi ngadto sa mini nga mga propeta sa Corinto, mipamatuod si Pablo nga siya usa ka tinuod nga Apostol. Gidapit ni Pablo ang mga miyembro sa Corinto sa paghunahuna kon ang iyang mga buhat taliwala kanila mga timailhan ba sa usa ka tinuod nga Apostol ug gipamatud-an ang iyang pagpangalagad.
2 Mga Taga-Corinto 11:7–9; 12:13–17
Nganong namulong si Pablo mahitungod sa dili pagpabug-at sa mga Santos?
Samtang nangalagad didto sa Corinto, si Pablo maingon og misalig sa mga kontribusyon gikan sa mga miyembro sa Simbahan sa Macedonia, apan siya usab mitrabaho sa pagsuporta sa iyang kaugalingon sa pinansyal nga paagi. Dili siya gusto nga ang iyang kaugalingong temporal nga mga panginahanglan makapabug-at ngadto sa Simbahan.
2 Mga Taga-Corinto 12:2–4
Kinsa ang tawo nga gisakgaw dala ngadto sa ikatulong langit?
Nagpasabot si Pablo ngadto sa iyang kaugalingon mismo diha sa ikatulong tawo sa dihang siya namulong kabahin sa usa ka tawo nga gisakgaw dala ngadto sa ikatulong langit, nga mao ang celestial nga gingharian. Mahimong si Pablo adunay kalabotan nga bahin sa kasinatian sa pagsupak sa mini nga mga magtutudlo ug sa ilang mga pagpangangkon.
2 Mga Taga-Corinto 12:4
Nganong si Pablo dili makapakigbahin og dugang pa mahitungod sa iyang kasinatian sa panan-awon?
Dili lamang nga kini mahimong malisod alang ni Pablo sa paghulagway sa iyang kasinatian; siya gidid-an sa pagbuhat sa ingon. Ang Ginoo mahimong magpadayag og mga butang ngadto sa Iyang mga disipulo nga dili gituyo alang sa kalibotan. Sama ni Pablo, kita usab mahimong adunay espirituhanong mga kasinatian nga kinahanglan nga atong ipakigbahin lamang kon gimandoan sa Espiritu.
2 Mga Taga-Corinto 12:7–9
Unsa ang tunok nga nakasamok ni Pablo?
Ang Gresyanhon nga pulong gihubad isip tunok mahimong nagkahulogan og bisan unsa nga talinis—usa ka tunok, usa ka tipak, o gani, sa pinasumbingay nga paagi, usa ka sakit nga midagsang. Migamit si Pablo sa pulong sa pagsugyot og wala hinganli nga kakulangan nga nakapahimo niya nga mapainubsanon.
2 Mga Taga-Corinto 12:8–10
Giunsa kita sa paghimo nga malig-on diha sa kahuyang?
Ang Gresyanhon nga pulong gihubad isip “huyang” nga adunay daghang kahulogan. Kini mahimong nagpasabot ngadto sa usa ka tawo kinsa sa pisikal nga paagi nasakit o huyang. Sa ubang panahon ang pulong gigamit alang niadtong kinsa sa moral nga paagi huyang o sa espirituhanong paagi linghod. Gigamit ni Pablo ang pulong niini nga higayon sa pagtubag sa panaway sa iyang dili makapadani nga pakigpulong o hitsura.
Si Pablo ug si Moroni miasoy og usa ka importante nga pagpadayag nga tagsa nilang gidawat gikan sa Ginoo bisan paman sa tawhanong kahuyang. Ang grasya sa Manluluwas igo alang niadtong kinsa nag-ila sa ilang kahuyang ug moduol ngadto Kaniya. Ang gahom ni Kristo nagdagayday ngadto sa mahuyang kinsa mapainubsanon. Alang niini nga katarongan, si Pablo nagmaya diha sa iyang kahuyang.
2 Mga Taga-Corinto 12:12
Unsa ang mga timailhan sa usa ka Apostol?
Gitudloan ni Pablo ang mga Santos sa Corinto nga sila kinahanglang moila sa iyang apostolikanhong awtoridad tungod kay siya mipakita sa mga timailhan sa usa ka Apostol. Si Elder Bruce R. McConkie mitudlo nga ang mga timailhan sa usa ka Apostol “mao ang pag-ayo sa masakiton, pagsalikway sa mga yawa, pagbuhi sa mga patay; nagsangyaw ug nagtudlo ug nag-antos sila sa Kawsa ni Kristo; naglakaw sila nga matarong atubangan sa tanang mga tawo ug ingon nga gisagop ngadto sa pamilya sa Dios isip iyang mga anak nga lalaki, nahimong isig ka manununod uban sa iyang kinaiyanhong Anak. Kini tukma sa samang balaan nga mga pagtuga nga kinahanglang anaa sa tanang mga elder sa gingharian, diha sa tanang tawo kinsa nakadawat sa katungod sa kanunay nga pakig-uban sa Balaang Espiritu.”
2 Mga Taga-Corinto 12:15
Nganong gibati ni Pablo nga siya wala higugmaa?
Gisultihan ni Pablo ang mga Santos sa Corinto nga siya mobisita kanila sa ikatulong higayon, ug misaad nga dili magpabug-at diha kanila. Ingon og adunay tono sa pagdepensa dinhi niini nga sulat, ingon nga si Pablo nangutana kon siya kinahanglan bang minos nga higugmaon tungod sa paghiguma kanila og mas labaw pa. Usa ka malisod nga bahin nga mahimong disipulo ni Jesukristo mao ang pagkabahin ug ang pagkasuko nga nahimong resulta samtang kita naninguha sa pagpakita og gugma alang sa uban pinaagi sa pagpakigbahin sa kamatuoran. Mipahayag si Pablo og kahadlok nga sa dihang siya mibisita sa mga Santos sa Corinto, dihay nagpabilin nga dili maayong mga pagbati tali kanila.
Gitudlo ni Presidente Nelson: “Usahay kami isip mga lider sa Simbahan gisaway tungod sa hugot nga paghupot sa mga balaod sa Dios, pagpanalipod sa doktrina sa Manluluwas, ug sa paglahutay sa katilingbanong mga pagpamugos sa atong panahon. Apan ang among sugo isip gi-orden nga apostoles mao ang ‘pagpanglakaw ngadto sa tibuok kalibotan sa pagsangyaw sa [Iyang] ebanghelyo ngadto sa matag linalang’ [Doktrina ug mga Pakigsaad 18:28]. Kana nagpasabot nga kami gimandoan sa pagtudlo sa kamatuoran.”
Pagkat-on pa og Dugang
Pag-atiman alang sa mga Kabos ug Uban nga Nanginahanglan
-
Linda K. Burton, “Nadumuluong Ako,” Liahona, Mayo 2016, 13–15
-
Jeffrey R. Holland, “Dili ba Kitang Tanan Makililimos?,” Liahona, Nob. 2014, 40–42
Mini nga mga Propeta
-
M. Russell Ballard, “Beware of False Prophets and False Teachers,” Ensign,, Nob. 1999, 62–64
Media
Mga Imahe
Glory by Degrees [Himaya pinaagi sa mga Ang-ang], ni Annie Henrie Nader
Except for These Chains [Gawas Niining mga Kadena], © Pacific Press, licensed from GoodSalt.com