“Mga Taga-Roma 7–16,” Mga Tabang sa Kasulatan: Bag-ong Tugon (2024)
Mga Tabang sa Kasulatan
Mga Taga-Roma 7–16
Samtang si Pablo nagpadayon sa iyang sulat ngadto sa mga Santos sa Roma, siya misulat mahitungod sa pakigbisog tali sa atong mahangtoron ug napukan nga mga kinaiyahan. Siya mitudlo nga pinaagi ni Jesukristo, kita makabuntog sa kahuyang sa unod. Siya mipahinumdom sa mga Santos nga isip matinud-anong mga anak sa pakigsaad, mahimo silang mga manununod sa Dios ug isig ka mga manununod uban ni Kristo. Si Pablo misulat mahitungod sa pagpili, o pag-orden nang daan. Siya mitudlo nga ang Dios mopili sa iyang katawhan sumala sa ilang pagkamatinud-anon, dili sa ilang kaliwat. Si Pablo mitambag sa mga miyembro sa Simbahan sa pagsunod sa ebanghelyo aron sila makamugna og kalinaw ug panaghiusa sa Simbahan. Si Pablo mitapos sa iyang sulat uban sa usa ka hangyo alang sa mga Santos nga magpadayon sa pagkamatinud-anon sa pagsunod sa ebanghelyo.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Background ug Konteksto
Mga Taga-Roma 7:1–4
Sa unsang paagi nga ang kaminyoon usa ka sumbingay alang sa balaod ni Moises?
Migamit si Pablo og sumbingay sa kaminyoon aron ipasabot nga ang Israel sa makausa nakabugkos ngadto sa balaod ni Moises, sama sa usa ka asawa nga nakabugkos ngadto sa iyang bana. Apan karon nga ang bana namatay na (ang balaod natuman), ang Israel mabugkos sa usa ka bag-ong pakigsaad nga relasyon ngadto ni Jesukristo.
Mga Taga-Roma 7:5–14; 8:3–4
Sa unsang paagi nga ang balaod ni Moises dili igo?
Pipila ka relihiyoso nga mga Judeo mipasangil ni Pablo sa pagpanamastamas nga pagpamulong batok sa balaod ni Moises. Sa Mga Taga-Roma 7–8, giklaro ni Pablo ang iyang posisyon pinaagi sa pagpasabot nga ang balaod ni Moises maayo apan adunay mga limitasyon. Si Pablo mitudlo nga ang balaod ni Moises “balaan” tungod kay nakatabang kini sa mga indibidwal nga makasabot kon unsa ang sala. Apan ang balaod ni Moises walay gahom sa pagbuntog sa mga epekto sa Pagkapukan o sa tawhanong kahuyang o sa paghatag og paagi alang sa mga tawo nga mabag-o pinaagi sa Espiritu Santo. Alang niana, nagkinahanglan kita sa grasya nga gihimong magamit pinaagi sa Pag-ula ni Jesukristo.
Ang propeta sa Basahon ni Mormon nga si Abinadi mipakigbahin og susama nga pagpamatuod sa dihang siya mitudlo, “Ang kaluwasan dili moabot pinaagi sa balaod lamang; ug kon dili pa tungod sa pag-ula, nga pagahimoon mismo sa Dios alang sa mga sala ug mga sayop nga binuhatan sa iyang katawhan, nga sila dili kapugngan nga malaglag gayod, bisan pa sa balaod ni Moises.”
Mga Taga-Roma 8:14–16
Unsay buot ipasabot sa pagkahimong gisagop nga mga anak nga lalaki ug mga anak nga babaye sa Dios?
Ang mga kasulatan naghisgot kanato isip mga anak sa Dios sa duha ka managlahing paagi. Una, ang matag tawo tinuod nga hinigugmang espiritu nga anak sa Langitnong Amahan. Ikaduha, kita matawo pag-usab isip mga anak sa Dios pinaagi ni Jesukristo ug sa Iyang Pag-ula.
Ang konteksto sa Mga Taga-Roma 8:16 miklaro nga si Pablo naghisgot sa ikaduha nga kahulogan sa dihang mipahayag siya, “Kita mga anak sa Dios.” Si Pablo mitudlo nga kadtong gigiyahan sa Espiritu sa Dios mamahimong gisagop nga mga anak, nga makapahimo kanila sa pagtuaw, “Abba, Amahan.” Tungod sa mahinungdanong tahas ni Jesukristo sa proseso sa pagkakabig, kadtong natawo pag-usab mahimo usab nga isipon nga Iyang mga anak nga lalaki ug babaye, kay sila sa espirituhanong paagi natawo pag-usab pinaagi Kaniya.
Si Presidente Russell M. Nelson mitudlo: “Sa dihang atong gihangop ang ebanghelyo ug nabunyagan, kita natawo pag-usab ug gidala nato sa atong kaugalingon ang sagradong ngalan ni Jesukristo. Kita gisagop isip iyang mga anak nga lalaki ug mga anak nga babaye ug nailhan isip managsoon. Siya mao ang Amahan sa atong bag-ong kinabuhi.”
Si Elder Neil L. Andersen mipahayag: “Ang matag tawo sa yuta mao ang ‘mga anak’ [Mga Buhat 17:28] sa Dios, apan ang pagatawgon nga ‘mga anak sa Dios’ nagpasabot og mas labaw pa. Samtang kita moduol ngadto ni Jesukristo ug mohimo og mga pakigsaad uban Kaniya, kita mahimong ‘iyang binhi’ ug ‘mga manununod sa gingharian’ [Mosiah 15:11], ‘mga anak ni Kristo, ug iyang mga anak nga lalaki ug iyang mga anak nga babaye’ [Mosiah 5:7].”
Mga Taga-Roma 8:17
Unsa ang buot ipasabot nga mahimong “mga manununod sa Dios, ug mga isigkamanununod uban kang Kristo”?
Isip ang Unang Natawo sa Amahan ug Bugtong nga Anak diha sa unod, si Jesukristo mao ang natural nga manununod sa Langitnong Amahan. Siya “nakadawat sa usa ka kahingpitan sa himaya sa Amahan; ug siya nakadawat sa tanan nga gahom, diha sa langit ug diha sa yuta.”
Si Pablo mitudlo nga kadtong natawo pag-usab isip mga anak sa pakigsaad sa Dios mahimong “mga manununod sa Dios, ug mga isigkamanununod uban kang Jesukristo.” Pinaagi sa Manluluwas, atong madawat ang tanan nga anaa sa Amahan, lakip ang gasa sa kinabuhing dayon.
Mga Taga-Roma 8:29
Unsa ang buot ipasabot nga “mahisama sa iyang Anak”?
Si Propeta Joseph Smith mitudlo, “Pinaagi sa pag-ula ni Kristo ug sa pagkabanhaw, ug sa pagkamasulundon ngadto sa ebanghelyo, kita mahisama usab [mahimong sama] sa dagway sa iyang Anak, nga si Jesukristo; dayon kita makaangkon sa dagway, himaya, ug kinaiya sa Dios.”
Mga Taga-Roma 8:29–30
Unsa ang doktrina sa pag-orden nang daan?
Ang Griyego nga termino nga proorizō, nga gihubad ingong “predestinate” diha sa King James nga Bersiyon sa Biblia, nagkahulogang “pagtino daan sa usa ka butang.” Ang paggamit ni Pablo sa pulong nga proorizō sa Roma 8 nagtumong sa doktrina sa pag-orden nang daan. “Sa kalibotan sa espiritu nga wala pa dinhi sa yuta, ang Dios mitudlo og piho nga mga espiritu sa pagtuman sa piho nga mga misyon sa yuta. Gitawag kini og pag-orden nang daan. Ang pag-orden nang daan wala maggarantiya nga ang mga indibidwal makadawat sa pihong mga tawag [calling] o mga responsibilidad. Ang maong mga oportunidad moabot niining kinabuhia isip resulta sa matarong nga paggamit sa kabubut-on, sama nga ang pag-orden nang daan miabot isip resulta sa pagkamatarong didto sa kinabuhi nga wala pa dinhi sa yuta.”
Mga Taga-Roma 9–11
Unsa ang gitudlo ni Pablo sa mga Judeo mahitungod sa balay ni Israel?
Daghang mga Judeo nga mga Kristiyano sa panahon ni Pablo adunay mga kabalaka mahitungod sa pagbiya gikan sa balaod ni Moises. Ang uban nagduhaduha usab sa pagdawat sa hentil nga mga kinabig ngadto sa Simbahan. Ang duha nga mga kabalaka may kalabotan sa ilang mga gituohan kon unsa ang gipasabot nga mahimong kabahin sa balay ni Israel. Ang mga Judeo nagtuo nga ang Dios mipili sa Israel nga mahimong Iyang pinili nga katawhan ug nga ang pagsunod sa balaod ni Moises miila niadtong mga gipili. Dugang pa, gitan-aw sa pipila ka Judeo ang mga Hentil nga may mas menos nga tahas sa gingharian sa Dios tungod kay dili sila orihinal nga sakop sa balay ni Israel.
Si Pablo mitubag niini nga mga pangutana diha sa Mga Taga-Roma 9–11. Siya mihatag og gibug-aton nga dili ang kaliwatan ang nakapasarang sa usa ka tawo nga mahimong kabahin sa mga katawhan sa pakigsaad sa Dios; kini mao ang pagkamatinud-anon ngadto ni Jesukristo ug sa Iyang mga sugo. Siya mitudlo nga ang Dios mipili sa Israel nga mahimong Iyang katawhan sa pakigsaad sa karaan nga mga panahon, apan sila mipatig-a sa ilang mga kasingkasing batok Kaniya. Si Pablo misaad usab nga ang pagsalikway sa Israel sa pakigsaad dili mahimong permanente. Mipamatuod siya nga ang Ginoo mahinumdom sa Iyang pakigsaad ug nga ang Israel—lakip ang mga Hentil kinsa midawat sa ebanghelyo—maluwas.
Mga Taga-Roma 9:11–24; 11:5, 7, 28
Unsa ang pagpili?
Ang pagpili nagpasabot sa “pagpili sa Dios sa balay ni Israel nga mahimong katawhan sa pakigsaad uban sa mga pribilihiyo ug mga responsibilidad, nga sila unta mahimo nga usa ka paagi nga panalangin ngadto sa tibuok kalibotan. …
“Ang pinili mao ang napili ‘sa wala pa ang katukoran sa kalibotan’, apan walay usa nga walay kondisyon nga napili ngadto sa kinabuhing dayon. Ang matag usa kinahanglan gayod, sa iyang kaugalingon, mopatalinghog sa ebanghelyo ug modawat sa mga ordinansa niini ug mga pakigsaad gikan sa mga kamot sa mga sulugoon sa Ginoo aron maangkon ang kaluwasan. Kon ang usa napili apan dili moserbisyo, ang iyang pagkapili maingon nga nahimong kawang lamang.”
Mga Taga-Roma 10:4–13
Unsa ang gikinahanglan aron maluwas?
Kon walay konteksto, ang mga pulong ni Pablo sa Mga Taga-Roma 10:9 mahimong masaypan og sabot nga ang kinahanglang buhaton lamang sa usa ka tawo aron maluwas mao ang pagsulti og pagtuo ni Jesukristo. Apan, sama sa natala sa ubang mga tudling, si Pablo mitudlo nga ang paghinulsol, pagpabunyag, pagdawat sa Espiritu Santo, ug pagpaningkamot sa pagsunod sa mga pagtulun-an ni Jesukristo mahinungdanon usab.
Sa Mga Taga-Roma 10:4–13, ang katuyoan ni Pablo dili ang paghatag og tibuok nga paghulagway sa proseso sa kaluwasan. Hinuon, si Pablo nagsuporta sa unsay iyang gipahayag sa bersikulo 4: “Si Kristo mao ang kataposan sa Balaod aron himoong matarong sa Dios ang tanan nga may pagtuo.” Gihimong pakisayran ni Pablo ang Deuteronomio 30:12–14 sa paghimo sa punto nga ang usa ka tawo dili kinahanglan nga “mosaka sa langit” o “mokanaog sa bung-aw” aron sa pagpangita ni Kristo. Hinuon, ang tanang mga tawo—Judeo man og Griyego—makakaplag sa Manluluwas diha sa ilang kaugalingong mga kasingkasing samtang sila mokumpisal nga Siya mao ang Manluluwas ug adunay hugot nga pagtuo diha Kaniya.
Mga Taga-Roma 12:1–2
Unsa ang gipasabot sa paghatag sa atong mga lawas isip usa ka buhing halad?
Sa dihang si Pablo naghisgot sa paghatag sa atong mga lawas isip usa ka “buhing halad,” gitandi niya kini sa binuhatan sa Daang Tugon sa pagsakripisyo og mga hayop. Si Presidente Russell M. Nelson mitudlo: “Gisugo gihapon kita sa pagsakripisyo, apan dili sa pagpaagas og dugo sa mga hayop. Ang atong labing taas nga panabot sa pagsakripisyo makab-ot samtang atong gihimo ang atong kaugalingon nga mas sagrado o balaan.
“Kini atong gihimo pinaagi sa pagkamasulundon sa mga sugo sa Dios. Sa ingon, ang mga balaod sa kamasulundon ug sakripisyo mahangtoron nga magkauban. … Samtang magtuman kita niini ug sa ubang mga sugo, usa ka talagsaong butang ang mahitabo kanato. Mahimo kitang disiplinado! Mahimo kitang mga disipulo! Mahimo kitang mas sagrado ug balaan—sama sa atong Ginoo!”
Mga Taga-Roma 14:1–15:3
Unsa ang gitudlo ni Pablo mahitungod sa mga panagsumpaki mahitungod sa mga diyeta, mga kostumbre, ug mga holiday?
Samtang ang Simbahan mitubo sa panahon ni Pablo, ang mga kalainan sa pamaagi sa kinabuhi tali sa mga Judeo ug sa hentil nga mga kinabig nahimong dayag. Giila ni Pablo ang mga panaglahi sa mga ganahan nga diyeta, mga kostumbre, mga binuhatan, ug mga holiday. Kining lainlain nga mga pamaagi sa kinabuhi miresulta sa pagkabahin-bahin taliwala sa mga Santos sa Roma ug sa ubang mga lokasyon.
Si Pablo mitudlo sa mga Santos nga ang ilang kadasig alang sa mga pagpili kalabot sa diyeta ug ubang mga binuhatan kinahanglan mao ang pagserbisyo ug pagpahimuot sa Ginoo. Siya usab mitudlo nga sila kinahanglan nga dili mohukom niadtong kinsa nagpuyo sa lahi nga paagi. Siya midugang nga ang mga Santos kinahanglang andam sa pagbiya sa pipila ka binuhatan kon kini mahimong hinungdan sa laing tawo nga makahimo og sayop nga makaapekto kanila sa espirituhanong paagi. Ang pagpasiugda og kalinaw ug pagpalig-on sa Simbahan mas taas nga prayoridad kay sa pagsunod sa personal nga mga gusto.
Mga Taga-Roma 16:1–2
Kinsa si Febe?
Sa pagtapos sa iyang sulat, gidayeg pag-ayo ni Pablo ang usa ka miyembro sa Simbahan nga ginganlan og Febe, kinsa midala sa sulat ni Pablo ngadto sa mga Santos sa Roma. Gikan sa paghulagway ni Pablo kang Febe, atong makat-onan nga siya miserbisyo sa Simbahan ug misuporta sa daghan nga mga Santos, lakip ni Pablo. Ang sinulat nga pagtugot ni Pablo ni Febe usa ka ehemplo sa unang Kristiyano nga binuhatan sa pagdala og mga sulat rekomendasyon kon mopanaw ngadto sa laing Kristiyano nga kongregasyon.
Mga Taga-Roma 16:22
Si Pablo ba ang nagsulat sa iyang kaugalingong mga sulat?
Sa kataposan sa Sulat ngadto sa mga Taga-Roma, ang tigsulat kinsa misulat sa sulat ubos sa direksiyon ni Pablo misukip sa iyang kaugalingon nga pagtimbaya ngadto sa mga Santos sa Roma. Mahimong migamit si Pablo og mga tigsulat sa paghimo sa daghan o sa tanan niyang mga sulat. Ang karaang mga tigsulat adunay lainlaing mga gidak-on sa impluwensiya sa unsay ilang gisulat.
Pipila sa mga eskolar sa Bag-ong Tugon nagdebate kon ang pipila sa mga sulat nga adunay ngalan ni Pablo gisulat ba gayod ni Pablo. Kasagaran niini nga debate naghisgot sa gagmay nga mga kalainan sa estilo ug sa pinulongan taliwala sa mga sulat. Hinuon, pipila niini nga mga kalainan mahimong mapasabot ni Pablo gamit ang lainlaing mga tigsulat sa lainlaing mga okasyon nga dunay nagkadaiyang lebel sa personal nga tampo [input].
Pagkat-on pa og Dugang
Pagbuntog sa mga Tinguha sa Unod
-
M. Russell Ballard, “Tuguti ang Atong Espiritu sa Pagkontrolar sa Atong Lawas,” Liahona, Nob. 2019, 106–9
“Matag-usa ka Butang Magabuhat og Maayo uban Kanila nga Nahigugma sa Dios”
-
James B. Martino, “Matag Usa ka Butang Nagabuhat og Maayo,” Liahona, Mayo 2010, 101–3
Ang Ehemplo ni Febe sa Debosyon
-
Camille Fronk Olsen, “Phebe,” Ensign, Aug. 2019, 38–39
Media
Si Pablo nga nagdiktar og usa ka sulat gikan sa bilanggoan
Mga lalaki nga nag-atiman sa kahoy nga oliba
Here Bring Your Wounded Hearts [Dinhi Dad-a ang Inyong Nasamdan nga mga Kasingkasing], ni Elspeth Young. Si Febe nga naghupay sa laing babaye