“1 Mga Taga-Corinto 14–16,” Mga Tabang sa Kasulatan: Bag-ong Tugon (2024)
Mga Tabang sa Kasulatan
1 Mga Taga-Corinto 14–16
Gitudlo ni Apostol Pablo nga ang gasa sa panagna mas labaw pa kay sa gasa sa mga dila [pinulongan]. Ang gasa sa panagna gihatag aron ang mga miyembro makapalig-on sa uban sa espirituhanong paagi. Usa si Pablo sa daghang mga saksi sa katinuod sa Pagkabanhaw ni Jesukristo. Tungod kay nabuntog ni Jesukristo ang kamatayon, ang tanan pagabanhawon. Ang gihimo nga pagbunyag sa mga patay nagmatuod nga adunay Pagkabanhaw. Ang mga lawas nga nabanhaw mga lawas nga dili madunot ug managlahi diha sa ilang himaya. Giawhag ni Pablo ang mga miyembro sa Simbahan sa pagmangihatagon samtang nangolekta siya og mga donasyon alang sa mga kabos sa Jerusalem. Giawhag usab niya ang nagkahuyang sa espirituhanong paagi nga mga Santos sa Corinto sa “pagbarog nga lig-on diha sa pagtuo” ug sa pagbuhat sa tanang mga butang uban sa gugma nga putli.
Mga Kapanguhaan
Pahinumdom: Ang pagkutlo sa usa ka tinubdan nga wala gimantala sa Ang Simbahan ni Jesukristo sa mga Santos sa Ulahing mga Adlaw wala magpasabot nga kini o ang tagsulat niini gi-endorso sa Simbahan o nagrepresentar sa opisyal nga posisyon sa Simbahan.
Background ug Konteksto
1 Mga Taga-Corinto 14:1–6
Unsa ang gasa sa panagna?
Ang berbo nga panagna nagagikan sa usa ka Gresyanhong pulong nga nagpasabot sa “pagpamulong og dinasig nga mensahe” o sa “pagpadayag sa kabubut-on sa Dios.” Bisan og ang pipila sa mga tawo maghunahuna nga ang gasa sa panagna gireserba lamang alang sa propeta sa Ginoo, ang mga kasulatan nagpadayag nga kini nga gasa anaa ngadto sa tanang matinud-anon nga mga sumusunod ni Kristo, sa mga lalaki ug sa mga babaye.
Si Elder Robert D. Hales mitudlo:
“Ang gasa sa panagna … lahi gikan sa pagkapari nga katungdanan sa propeta. Ang gasa sa panagna mao ang pagpamatuod ni Jesus.
“Si Apostol Pablo mitudlo nga ang mga Kristiyano kinahanglang ‘magtinguha sa espirituhanong mga gasa, apan ilabi nga ikaw mahimong managna [nagpasabot sa pagpamatuod kabahin sa Manluluwas]’ (1 Cor. 14:1).
“Si Presidente Joseph Fielding Smith (1876–1972) mitudlo, ‘Ang tanang mga miyembro sa Simbahan kinahanglan nga maningkamot alang sa gasa sa panagna, alang sa ilang kaugalingong paggiya’ (Church History and Modern Revelation, 2 vols [1953], 1:201).”
Gibutang ni Pablo ang gasa sa panagna ibabaw sa gasa sa mga pinulongan tungod kay ang pagpanagna mao ang paglig-on sa Simbahan. Mipahayag siya nga ang gasa sa panagna sulod sa Simbahan ni Kristo adunay usa ka gamhanang epekto diha sa mga tumutuo ug mga dili tumutuo, naggiya kanila ngadto sa pagkakabig.
1 Mga Taga-Corinto 14:2–22
Unsa ang gasa sa mga pinulongan?
Ang espirituhanong gasa sa mga pinulongan mapakita kon ang Espiritu Santo nagdasig sa usa ka indibidwal sa “pagpamulong sa, pagsabot, o paghubad sa dili pamilyar nga mga pinulongan.” Ang Apostoles ug ang uban namulong sa “laing pinulongan” diha sa adlaw sa Pentecostes. Niining higayona, ang gasa sa pinulongan tataw pinaagi sa mga sulugoon sa Dios nga nagtudlo sa ebanghelyo sa mga pinulongan nga nahibaloan sa ilang mga tigpaminaw apan wala mahibaloi sa mga mamumulong. Laing paagi ang gasa sa pinulongan nga mahitabo mao kon ang usa ka tawo gidasig sa Espiritu sa pagpamulong sa usa ka pinulongan nga wala mahibaloi ngadto sa mamumulong o sa mga tigpaminaw. Kining ikaduha nga pagpakita sa gasa sa mga pinulongan ingon og gitinguha pag-ayo sa pipila ka mga miyembro sa Simbahan sa Corinto. Gipahimangnoan ni Pablo nga kini nga matang sa gasa sa mga pinulongan naghatag sa mga dili tumutuo sa ebidensya sa gahom sa Dios apan wala magtudlo o maglig-on sa mga Santos gawas kon tumanon ang piho nga mga kondisyon.
1 Mga Taga-Corinto 14:34–35
Ngano nga miingon si Pablo nga ang mga babaye kinahanglang magpakahilom sa simbahan?
Kini lisod mahibaloan ang tumong sa mga panudlo ni Pablo nga dili mahibaloan ang aktwal nga pangutana og ang mga kahimtang nga nakaaghat niini. Sa bisan unsa nga sitwasyon, sa unang mga panudlo ni Pablo niining sama nga sulat, wala siya magdili sa mga babaye sa pag-ampo o sa pagpanagna diha sa mga miting sa simbahan. Ang pipila sa mga iskolar mibati nga ang mga bersikulo 34–35 dili orihinal sa mga sinulat ni Pablo apan sa kadugayan mga pagdugang.
Ang Hubad ni Joseph Smith nagpuli sa pulong namulong ngadto sa nagmando diha sa duha nga mga bersikulo. Kining kausaban sa pulong nagsugyot sa posibilidad nga si Pablo misulay sa pagkorihir sa usa ka sitwasyon diin ang ubang mga babaye nga taga-Corinto wala magtarong atol sa mga tulumanon sa pagsimba o nagtinguha sa pag-agaw sa pagpangulo gikan sa mga lider sa pagkapari.
Unsa ang tataw gikan sa kasulatan sa Pagpahiuli ug sa buhing mga propeta mao ang bili sa pag-apil sa mga babaye sa mga miting sa Simbahan sa pag-ampo, pagsangyaw, pagdasig, ug pagpamatuod. Mitudlo si Presidente Nelson, “Isip usa ka matarong, natugahan nga babaye nga Santos sa Ulahing mga Adlaw, kamo makasulti ug makatudlo uban ang gahom ug awtoridad gikan sa Dios. Bisan pinaagi sa pag-awhag o panag-istorya, nagkinahanglan kami sa inyong tingog nga magtudlo sa doktrina ni Kristo. Nagkinahanglan kami sa inyong ideya diha sa mga konseho sa pamilya, ward, ug stake. Ang inyong pag-apil importante ug dili lang dayandayan!”
1 Mga Taga-Corinto 15:1–12
Ngano nga ang pipila sa mga Santos nga taga Corinto nagkigbisog sa doktrina sa Pagkabanhaw?
Nataho kini ngadto ni Pablo nga ang ubang mga indibidwal sa Corinto nagtudlo nga walay Pagkabanhaw sa mga patay. Samtang ang sulat ni Pablo wala magpasabot sa rason ngano, mga miyembro sa Simbahan mahimong na-impluwensiya pinaagi sa mga pagtulun-an sa mga Epicureo ug sa mga Saduceo, kinsa mituo nga walay kinabuhi human sa pagkamatay. O tingali ang mga Santos misugod sa pagtipon og mga ideya nga nagsugyot nga ang pisikal nga lawas naghupot og gamay nga bili ug ilabay sa sunod nga kinabuhi.
1 Mga Taga-Corinto 15:20, 23
Sa unsa nga paagi nga si Jesukristo “ang unang bunga” sa Pagkabanhaw?
Sumala sa Balaod ni Moises, ang usa ka mag-uuma mohalad sa iyang unang bugkos sa mga tangkay sa lugas, ang unang mga bunga sa iyang pag-ani, isip usa ka paghalad ngadto sa Ginoo. Ang paghalad naghimatuod nga ang Dios mao ang tinubdan sa tanang mga panalangin. Ang unang bunga nagpakita isip usa ka garantiya sa ani nga moabot. Gigamit ni Pablo ang imahe sa “inunahan sa unang mga abut” samtang iyang gihulagway ang Pagkabanhaw sa Manluluwas. Sama nga ang unang mga bunga sa mag-uuma mao ang labing una sa daghang mga bunga nga pagaanihon, si Jesukristo mao ang una sa tanang mga binuhat nga pagabanhawon. Gikuha Niya ang mga babag alang sa tanan nga mabanhaw gikan sa patay.
1 Mga Taga-Corinto 15:29
Nganong naghisgot si Pablo ngadto sa bunyag alang sa patay?
Kini nga tudling nagpaila nga ang mga bunyag alang sa patay gipahigayon sa panahon ni Pablo. Gigamit niya ang ordinansa sa bunyag alang sa patay sa panghimatuod sa katinuod sa Pagkabanhaw. Nagtubag sa kang Pablo nga “mahagitong pangutana,” si Presidente Howard W. Hunter miingon: Nganong kamo nagpahigayon og puli nga mga bunyag alang niadtong kinsa patay kon walay pagkabanhaw? Ang kasaysayan nagpamatuod sa kamatuoran sa pagpraktis sa pagbunyag alang niadtong kinsa namatay nga wala makabenepisyo niini nga ordinansa. … Walay kahulogan ang maong mga ordinansa gawas kon adunay pagkabanhaw. Walay importante kon walay pagkabanhaw; ang tanan matapos diha sa kangitngit sa kamatayon.”
Ang kahibalo kabahin sa plano sa Dios alang sa katubsanan sa patay napahiuli sa atong panahon. Gitudlo ni Presidente Jeffrey R. Holland nga “ang naandang buhat sa mga buhi sa paghalad og makaluwas nga mga ordinansa alang sa namatay na nila kaliwatan … [makapakita uban] sa kaanindot sa pagpakabana sa usa ka mahigugmaong Dios alang sa tanan Niyang mga anak sa kalibotan dili igsapayan kon kanus-a man sila nabuhi ug bisan diin sila namatay.”
1 Mga Taga-Corinto 15:35–44
Sa unsang paagi ang mortal nga mga lawas lahi gikan sa nabanhaw nga mga lawas?
Gitudlo ni Pablo nga ang nabanhaw nga lawas sa usa ka tawo malahi gikan sa ilang mortal nga lawas. Sa paghulagway niini nga punto, naghisgot siya sa pagtanom sa usa ka liso ug sa katapusan mag-ani sa tibuok tanom. Ang gitanom nga liso sama sa mortal nga lawas. Ang migitib nga liso nga naglambo ngadto sa usa ka tanom sama sa usa ka nabanhaw nga lawas. Kita karon adunay yutan-ong mga lawsas, apan sa Pagkabanhaw, kita adunay langitnong mga lawas. Ang atong “kinaiyanhong lawas,” mipahayag si Pablo, mahimong usa ka “espirituhanong lawas” diha sa Pagkabanhaw. Gitudlo ni Joseph Fielding smith, “Human sa pagkabanhaw gikan sa pagkamatay ang atong mga lawas mahimong espiritwal nga mga lawas, apan mahimo kining pisikal nga mga lawas, mga lawas nga nahinloan, apan mahimo hinoon kining mga lawas nga adunay unod ug mga bukog, … ug mahimo silang imortal ug dili gayod mamatay.”
1 Mga Taga-Corinto 15:39–44
Unsa nga mga kalainan ang maanaa tali sa nabanhaw nga mga lawas?
Namatikdan ni Pablo nga adunay mga kalainan tali sa nabanhaw nga mga lawas, ingon nga adunay mga kalainan tali sa mga lawas sa mga tawo ug niadtong nagkalainlaing mga matang sa mga hayop. Gipasabot usab niya nga sa ilang himaya ug kaanindot, ang langitnong mga lawas lahi gikan sa yutan-ong mga lawas sama lamang sa adlaw, bulan, ug mga bitoon magkalahi sa himaya.
Niadtong Pebrero 1832 si Propeta Joseph Smith ug Sidney Rigdon nakadawat og panan-awon diin ilang nakita ang tulo ka ang-ang sa himaya, sugod niadtong kinsa nagdawat sa celestial nga ganti:
“Kini mao sila kansang mga lawas mga celestial, kansang himaya ingon niana sa adlaw, gani ang himaya sa Dios, ang labing halangdon sa tanan. …
“Ug usab, kami nakakita sa kalibotan nga terrestrial, ug tan-awa ug sud-onga, kini mao sila kinsa anaa sa terrestrial, kansang himaya lahi gikan nianang simbahan sa Unang Natawo kinsa nakadawat sa kahingpitan sa Amahan, gani ingon sa bulan nga lahi gikan sa adlaw. …
Ug usab, kami nakakita sa himaya sa telestial, kansang himaya ingon niana sa ubos nga gingharian, gani ingon sa himaya sa mga bitoon nga lahi gikan niana nga himaya sa bulan.”
Human niya madawat kini nga panan-awon, si Propeta Joseph Smith nadasig sa pag-usab sa 1 Mga Taga-Corinto 15:40 niini nga paagi: “Ug usab mga lawas nga celestial, ug mga lawas nga terresrial, ug mga lawas nga telestial; apan ang himaya sa celestial, usa; ug ang terrestrial, lain; ug ang telestial, lain.”
1 Mga Taga-Corinto 15:45, 47, 49–53
Kinsa ang unang Adan ug ang kataposang Adan?
Ang Adan sa literal nga paagi nagpasabot nga “tawo.” Kini sama sa ngalan nga gihatag sa Dios ngadto “sa unang lalaki.” Nailhan usab si Adan isip si Miguel. Tungod sa Pagkapukan ni Adan ug ni Eva, atong nadawat ang mortal nga mga lawas. Si Jesukristo mao “ang kataposang Adan” o “ang ikaduhang tawo” tungod kay Siya mao ang unang nabalhin sa espirituhanong paagi (nabanhaw) ug nakadawat ug usa ka nahimaya nga lawas. Ang mga lihok sa unang Adan (uban sa Pagkapukan) ug ni Jesukristo (uban sa Pag-ula ug Pagkabanhaw) ang duha gikinahanglan alang sa atong kaluwasan.
Si Presidente Jeffrey R. Holland mitudlo: “Isip usa sa Iyang gi-orden nga mga saksi, ako mopahayag ning buntag sa Pasko sa Pagkabanhaw nga si Jesus nga Nazaretnon mao ang Manluluwas sa kalibotan, ang “katapusang Adan,” ang Tigsulat ug Maghihingpit sa atong hugot nga pagtuo, ang Alpha ug Omega sa kinabuhing dayon. ‘Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi’ [1 Mga Taga-Corinto 15:22], mipahayag si Pablo.”
Pagkat-on pa og Dugang
Ang Pagkabanhaw
-
Mga Hilisgotan ug mga Pangutana, “Pagkabanhaw,” Librarya sa Ebanghelyo
-
Reyna I. Aburto, “Ang Lubnganan Walay Kadaogan,” Liahona, Mayo 2021, 85–86
-
Jeffrey R. Holland, “Asa ang Hustisya, Gugma, ug Kalooy Mag-abut,” Liahona, Mayo 2015, 104–6
-
D. Todd Christofferson, “Ang Pagkabanhaw ni Jesukristo,” Liahona, Mayo 2014, 111–14
Mga Babaye sa Simbahan
-
Russell M. Nelson, “Usa ka Hangyo ngadto sa Akong mga Sister,” Liahona,Nob. 2015, 95–98
-
M. Russell Ballard, “Ang Mahinungdanong Tahas sa Kababayen-an,” Liahona, Mar. 2021, 8–11
-
2024 Tibuok Kalibotan nga Debosyonal sa Relief Society, Marso 17, 2024, broadcasts.ChurchofJesusChrist.org.
-
Topics and Questions, “Women in the Church,” Gospel Library
Media
Mga Bidyo
“Resurrection of the Dead” (1:44)
“You Are the Women He Foresaw” (3:15)
Mga Imahe
Ang Pagkabanhaw ni Jesukristo
He is Not Here [Wala Siya Dinhi], ni Walter Rane
He is Risen [Nabanhaw Siya], ni Greg Olsen
The Resurrection [Ang Pagkabanhaw], ni Harry Anderson
The Trumpet Shall Sound [Ang Trumpeta Motingog], ni J. Kirk Richards
Ang bunyaganan sa Rome Italy Temple