Nipai ļeo Nejin Nipai ļeo Nejin Hilamōn

Juon bok jeje jān Nipai, ļeo nejin Nipai, ilo Bok in Mormon. Jebta 1–10 rej kwaļo̧k kūrm̧ool in kanaan ko kōn itok eo an Irooj. Kakōļļe eo kōn ļotak eo an Kraist em̧ōj kar leļo̧ke; armej ro rekar ukeļo̧k; a rekar bar ro̧o̧lļo̧k n̄an nana. Āliktata lan̄ ko, m̧akūtkūt in laļ ko, im kōto ko reļļap, im ko̧kkure eļap rekar kaalikkare mej eo an Kraist. Jebta 11–28 rej ļo̧o̧ke itok eo an Kraist n̄an aelōn̄ in Amedka kan. En̄in ej lukkuun m̧ōttan eo eaorōktata in ilo bok in 3 Nipai. Elōn̄ ian naan ko an Kraist rej āinwōt ko ilo sermon ko An kar ļo̧o̧ki ilo Baibōļ eo (n̄an waanjon̄ok, Matu 5–7 im 3 Ni. 12–14). Jebta 29–30 ren naan ko an Mormon n̄an laļ ko ilo raan ko āliktata.

Bok in ewōr wōt en̄oul ruwatimjuon eoon ko ie, aolep rej pād ilo juon wōt Jebta, mekarta ekar kitbuuji enan̄in jilubukwi iiō in bwebwenato eo an riNipai (Ā.K. 34–321). Elōn̄ epepen in rijeje ro, ekobaik Nipai, rekar letok kuņaer n̄an ļo̧o̧k in. Eoon 1–19 rej kōnono bwe ālikin loļo̧k eo an Kraist eo em̧ōj an jerkakpeje aolep riNipai im riLeman ro rekar oktak tok n̄an gospel eo. Aenōm̧m̧an, iakwe, im jokane rekar irooj. Jilu rikaļoor in riNipai ro, ro Kraist ekar kōtļo̧k bwe ren pād wōt ioon laļ m̧ae Itok eo An Kein Karuo (3 Ni. 28:4–9), rekar jipjipan̄ armej ro. Nipai eaar likūt ļo̧o̧k eo n̄an ļeo nejin Amos. Eoon 19–47 rej ļo̧o̧k eo kōn ministry eo an Amos (84 iiō) im eo an ļeo nejin Amos (112 iiō). Ilo Ā.K. 201, juwa eaar jino kōjerkak apan̄ ko ilubwiljin armej ro, ro rekar ajeje er ilo ellaajrak ko im jinoi kabun̄ ko reriab n̄an bōk eļapļo̧k (4 Ni. 1:24–34).

Eoon ko āliktata in 4 Nipai rej kwaļo̧k bwe armej ro rekar bar ro̧o̧l ļo̧k n̄an nana (4 Ni. 1:35–49). Ilo Ā.K. 305, Amos ļeo nejin Amos ar mej im ļeo jatin Ammaron ar ņooji ļo̧o̧k ko rekwōjarjar n̄an kōjparoki. Ammaron tok ālik eaar jakiļo̧k ļo̧o̧k ko n̄an Mormon, eo ar ļo̧o̧ke elōn̄ men ko reļļap ilo iien mour ko an make innām kakkobabaiki (Morm. 1:2–4).