Job

Men̄e bok in ej kōn en̄taan eo an Job, ej jab kōmaattok uwaake kajjitōk eo etke Job (ak bar jabdewōt armej) emaron̄ en̄taan kōn metak im jako in baam̧le eo an im m̧weiuk ko an. Bok in ej kaalikkar bwe an wōr en̄taan ej jab aikuj meļeļein bwe juon armej ekar jero̧wiwi. Irooj emaron̄ kōjerbal en̄taan ko n̄an imminene, kajim̧we, im katakin im barāinwōt n̄an kaje (K&B 122).

Bok in emaron̄ ajej ilo emān m̧ōttan ko. Jebta 1–2 rej juon ijjino n̄an bwebwenato in. Jebta 3–31 rej kwaļo̧k juon lelkan in ekkōnono ko ikōtaan Job im jilu jeran. Jebta 32–37 ewōr ie ennaan ko an Eliu, eo jeran kein kāāmen, eo ar ņotaik Job kōn un ko jet reoktak jān un ko an ro jeran jilu m̧okta. Jebta 38–42 rej kōjjem̧ļo̧k bok in kōn juon naan in kapen n̄an Job ke kooj in an ilo mour ekar juon eo em̧m̧an jān jinoin.

Bok in Job ej katakin bwe eļan̄n̄e juon armej ewōr juon an jeļā ejim̧we kōn Anij im ej mour juon mour eo em̧m̧an n̄an Anij, enaaj em̧m̧anļo̧k an maron̄ kijenmej ilo mālejjon̄ ko renaaj itok ioon. Tōmak eo eban okpā an Job ej alikkar jān ennaan rot in “Men̄e e maron̄ m̧an eō, inaaj kōjatdikdik wōt ilo E” (Job 13:15). Job ej barāinwōt waļo̧k etan ilo Ezekiel 14:14; Jemes 5:11; Katak im Bujen Ko 121:10.