Daniel
Lukkuun armej eo eļap ekkōnono kake ilo bok in Daniel ilo Kallim̧ur Em̧or, juon rikanaan an Anij im juon armej in tōmak eļap.
Ejjeļo̧k jabdewōt meļeļe jejeļā kōn jemān im jinen, men̄e āinwōt eļak waļo̧k ilo jeje e ekar juon armej in rajimjim (Dan. 1:3). Kar bōk e juon rikōm̧akoko n̄an Babilon, ijo eaar bōke āt in Belshazzar (Dan. 1:6–7). Daniel im bar jilu rikalbuuj rekar m̧akoko in m̧ōn̄ā men ko kijen kiin̄ eo kōn un ko rejelōt kabun̄ eo aer (Dan. 1:8–16).
Daniel ar wiini jouj eo an Nebukadnezar im Daraiōs jān wōt kajoor in ukōti tōņak ko (Dan. 2; 4; 6). Eaar barāinwōt kōnono jān im ukōti jeje ko ikiin m̧weo (Dan. 5). Rikōjdat ro an rekar kōttōbalbal ņae e, im kar joļo̧k e ilo juon ron̄ in ļaioon ko, a Irooj ar oņaake mour eo an (Dan. 6).
Bok in Daniel
Bok in ewōr ruo ajej ko ie: jebta 1–6 rej bwebwenato ko kōn Daniel im ro jilu m̧ōttan; jebta 7–12 rej visōn in kanaan ko Daniel eaar loi. Bok in ej katakin kōn aorōkin m̧ool n̄an Anij im ej kwaļo̧k bwe Irooj ej kōjeraam̧m̧an ro rej tiljek.
Juon kuņaan bok in eļap ej ukok eo an tōņak eo an Kiin̄ Nebukadnezar. Ilo tōņak eo, aelōn̄ eo an Anij ilo raan ko āliktata ej waļo̧k āinwōt juon ejm̧aan eo m̧wijiti jān juon toļ. Ejm̧aan eo enaaj dāpilpil m̧aanļo̧k m̧ae an koobrak aolepān laļ (Dan. 2; lale barāinwōt K&B 65:2).