Jisōs Kraist

Kraist (naan in kajin Grik) im Messaia (naan in kajin Hibru) meļeļein “eo kar kapiti.” Jisōs Kraist ej M̧aanjien Jemān ilo jetōb (Hib. 1:6; K&B 93:21). E ej Nejin Emake Keotak in Jemān ilo kanniōk (Jon 1:14; 3:16). E ej Jeova (K&B 110:3–4) im kar kapit E m̧oktaļo̧k n̄an kūr eo An eļap m̧okta jān kōm̧anm̧an eo an laļ. Ium̧win tōl eo an Jemān, Jisōs ar kōm̧anm̧an laļ im aolep men otemjej ioon (Jon 1:3, 14; Moses 1:31–33). E eaar ļotak n̄an Meri ilo Betleem, mour juon mour ejjeļo̧k jero̧wiwi ie, im kar kōm̧m̧ane juon pinmuur eweeppān kōn jero̧wiwi ko an aolep armej jān kōto̧o̧rļo̧k bōtōktōkin im leļo̧k mour eo An ioon debwāāl (Matu 2:1; 1 Ni. 11:13–33; 3 Ni. 27:13–16; K&B 76:40–42). Eaar jerkak jān ro remej, im āindein kapen jerkakpeje eo an aolep armej. Kōn Pinmuur eo im Jerkakpeje eo an Jisōs, ro rej ukeļo̧k jān jero̧wiwi ko aer im pokake kien ko an Anij remaron̄ mour indeeo ippān Jisōs im Jemān (2 Ni. 9:10–12; 21–22; K&B 76:50–53, 62).

Jisōs Kraist ej armej eo eļaptata ar ļotak tok ioon laļ in. Mour eo an ej jon̄ok eo eweeppān kōn wāween eo aolep armej ren mour make. Aolep jar ko, kōjeraam̧m̧an ko, im kain̄i ko an priesthood reaikuj kōm̧m̧an ilo Etan. E ej Irooj in irooj raņ, Kiin̄ in kiin̄ raņ, Rikōm̧anm̧an, Rilo̧mo̧o̧r, im Anij eo an aolepān laļ.

Jisōs Kraist enaaj bar itok ilo kajoor im aiboojoj n̄an irooj ioon laļ ilo tōre in Meļļenium. Ilo raan eo āliktata, E enaaj ekajete aolep armej (Alma 11:40–41; JS—Matu 1).

Tukaduin mour eo An (ilo laajrak in men ko rekar bōk jikier)

Ļotak im mijen eo an Jisōs em̧ōj kar kanaani im̧aanļo̧k, Luk 1:26–38 (Ais. 7:14; 9:6–7; 1 Ni. 11).
Eaar ļotak, Luk 2:1–7 (Matu 1:18–25).
Eaar m̧wijm̧wij, Luk 2:21.
Kar kwaļo̧k E ilo tampeļ eo, Luk 2:22–38.
Ri kanpel ro rar loļo̧k E, Matu 2:1–12.
Josep im Meri raar ko ippān n̄an Ijipt, Matu 2:13–18.
Kar bōktok e n̄an Nazeret, Matu 2:19–23.
Eaar loļo̧k tampeļ eo ke ej jon̄oulruo iiō dettan, Luk 2:41–50.
Ekar wōr jatin em̧m̧aan im kōrā ro, Matu 13:55–56 (Mark 6:3).
Eaar peptaij, Matu 3:13–17 (Mark 1:9–11; Luk 3:21–22).
Kar kapo E jān devil, Matu 4:1–11 (Mark 1:12–13; Luk 4:1–13).
Eaar kūr ro rikaļooran, Matu 4:18–22 (Matu 9:9; Mark 1:16–20; 2:13–14; Luk 5:1–11, 27–28; 6:12–16; Jon 1:35–51).
Eaar Kōmālim ro Jon̄oulruo, Matu 10:1–4 (Mark 3:13–19; Luk 6:12–16).
Kōm̧m̧ane Sermon eo ioon Toļ eo, Matu 5–7.
Kanaane mej eo im jerkakpeje eo An make, Matu 16:21 (Matu 17:22–23; 20:17–19; Mark 8:31; 9:30–32; 10:32–34; Luk 9:22; 18:31–34).
Eaar kōjakkōlkōl, Matu 17:1–9 (Mark 9:2–8; Luk 9:28–36).
Eaar jilkinļo̧k jiljilimjuonn̄oul ro, Luk 10:1–20.
Kōm̧m̧ane deļo̧n̄ ilo anjo̧ eo An ilo Jerusalem, Matu 21:1–11 (Mark 11:1–11; Luk 19:29–40; Jon 12:12–15).
Eaar jinoe kwōjkwōj eo, Matu 26:26–29 (Mark 14:22–25; Luk 22:19–20).
Eaar en̄taan im jar ilo Getsemane, Matu 26:36–46 (Mark 14:32–42; Luk 22:39–46).
Kar ketake, jibwe, im eļļo̧k jān E, Matu 26:47–56 (Mark 14:43–53; Luk 22:47–54; Jon 18:2–13).
Eaar debwāāl, Matu 27:31–54 (Mark 15:20–41; Luk 23:26–28, 32–49; Jon 19:16–30).
Eaar jerkakpeje, Matu 28:1–8 (Mark 16:1–8; Luk 24:1–12; Jon 20:1–10).
Eaar waļo̧k ālikin An jerkakpeje, Matu 28:9–20 (Mark 16:9–18; Luk 24:13–48; Jon 20:11–31; Jerb. 1:3–8; 1 Kor. 15:5–8).
Eaar wanlōn̄ļo̧k n̄an lan̄, Mark 16:19–20 (Luk 24:51–53; Jerb. 1:9–12).

Aiboojoj eo an Jisōs Kraist

An Kraist irooj ilo iien Meļļenium

An Kraist mour m̧okta jān mour in

An Kraist waļo̧k ālikin mour in

Ke em̧ōj an Jisōs jerkak, Eaar waļo̧kļo̧k m̧oktata n̄an Meri, Mark 16:9 (Jon 20:11–18).
Jisōs ar etetal im ekkōnono ippān ruo ian rikaļoor ro ioon iaļ eo n̄an Emmeōs, Luk 24:13–34.
Jisōs ar waļo̧kļo̧k n̄an Rijjilōk Ro, ro rekar un̄ūr pein im neen, Luk 24:36–43 (Jon 20:19–20).
Jisōs ar waļo̧kļo̧k n̄an Tomas, Jon 20:24–29.
Jisōs ar waļo̧kļo̧k n̄an rikaļoor ro ilo lom̧aļon Taibiriōs, Jon 21:1–14.
Jisōs ar jerbal ium̧win en̄oul raan ālikin An jerkakpeje, Jerb. 1:2–3.
Stipen ar lo Jisōs ej jutak ianbwijmaron̄ in pein Anij, Jerb. 7:55–56.
Jisōs ar waļo̧kļo̧k n̄an Saul, Jerb. 9:1–8 (JS—Ukok, Jerb. 9:7; Jerb. 26:9–17).
Elōn̄ļo̧k jān 500 armej raar loe Kraist, 1 Kor. 15:3–8.

Bōk etan Jisōs Kraist iood

Kam̧ool bwe kom̧ij m̧ōņōņō in bōk ioomi etan Kraist jān peptaij, 2 Ni. 31:13.
Ikōņaan bwe kom̧in bōk ioomi etan Kraist, Mosa. 5:6–12 (Mosa. 1:11).
Jabdewōt eo ekar kōņaan bōk ioer etan Kraist raar kobaļo̧k ilo Kabun̄ eo an Anij, Mosa. 25:23.
Aolep ro rekar m̧ool ritōmak ilo Kraist rekar bōk ioer etan Kraist, Alma 46:15.
Kōjām in lan̄ epeļļo̧k n̄an ro rej tōmak ilo etan Jisōs Kraist, Hil. 3:28.
Em̧ōņōņō eo lo an tiljek n̄an Eta ilo n̄an raan eo āliktata, Ether 4:19.
Rem̧ōņōņō in bōk ioer etan Nejin, Moro. 4:3 (K&B 20:77).

Bōran Kabun̄ eo

Jekjek ko ak kakōļļe ko kōn Kraist

Ebel ar ajeļo̧k m̧aanje in mennin mour ko an, Jen. 4:4 (Moses 5:20).
Kwōn bōk ļeo nejūm̧ emake Aisak, im katok kake e kōn juon katok, Jen. 22:1–13 (Jekab 4:5).
Irooj ar jiron̄ ro nejin Israel n̄an katok kōn lamb ko ejjeļo̧k jorrāān ippāer, Ex. 12:5, 21, 46 (Bōn. 9:12; Jon 1:29; 19:33; 1 Pit. 1:19; Rev. 5:6).
En̄in ej pilawā eo me Irooj ar lewōj n̄an kom̧ n̄an kan̄e, Ex. 16:2–15 (Jon 6:51).
Kwōn den̄ļo̧ke dekā eo, im enaaj itok dān jān e, bwe armej ro ren maron̄ idaak, Ex. 17:6 (Jon 4:6–14; 1 Kor. 10:1–4).
Kidu goat eo enaaj bōk ioon aolep nana ko aer, Liv. 16:20–22 (Ais. 53:11; Mosa. 14:11; 15:6–9).
Moses ar kotake juon jedpānit brass n̄an lo̧mo̧o̧ren aolep ro rej reilo̧k n̄an e, Bōn. 21:8–9 (Jon 3:14–15; Alma 33:19; Hil. 8:14–15).
Jona eaar pād ilujeen ek eo jilu raan, Jona 1:17 (Matu 12:40).

Kanaan ko kōn ļotak im mej eo an Jisōs Kraist

Maron̄

Jisōs eaar katakin āinwōt juon eo ewōr an maron̄, Matu 7:28–29 (Mark 1:22).
Eo Nejin Armej ewōr an kajoor ioon laļ n̄an jeorļo̧k jero̧wiwi ko, Matu 9:6.
Jisōs ar jiron̄ jetōb ettoon ko kōn maron̄ im rekar pokake E, Mark 1:27 (Luk 4:33–36).
Jisōs ar kapit jon̄oulruo n̄an bōk kajoor, Mark 3:14–15.
Naan eo an Jisōs ekar ippān kajoor, Luk 4:32.
Jemān eaar kappe aolep ekajet n̄an Nejin, Jon 5:22, 27.
Anij ar kapit Jisōs kōn Jetōb Kwōjarjar im kōn kajoor, Jerb. 10:38.
Kraist eaar ekkapit m̧oktaļo̧k jān pedped ko an laļ, 1 Pit. 1:20 (Ether 3:14).
Kraist ewōr ippān ki ko an hell im an mej, Rev. 1:18.

Naan in kam̧ool eo kar kwaļo̧k kōn Jisōs Kraist

Riekajet

Waanjon̄ok eo an Jisōs Kraist

M̧ae an juon armej ļoore waanjon̄ok eo an Nejin Anij emour, ejjab maron̄ mour, 2 Ni. 31:16.
Ikōņaan bwe kom̧in weeppān em̧ool āinwōt N̄a, 3 Ni. 12:48.
Men in kom̧ naaj iien otemjej lale n̄an kōm̧m̧ane, em̧ool āinwōt Iaar kōm̧m̧an, 3 Ni. 18:6.
Iaar likūt juon waanjon̄ok n̄an kom̧, 3 Ni. 18:16.
Jerbal ko me kom̧ ar lo Aō kōm̧m̧ani men kein kom̧ naaj kōm̧m̧ani barāinwōt, 3 Ni. 27:21, 27.
Rikaļoor ro rem̧ool an Jisōs Kraist renaaj āinwōt E, Moro. 7:48.