Em̧ Nuknuk

M̧weo im̧ōn Irooj, ijo jikin an Israel kabun̄-jar ilo iien Diwōjļo̧k eo jān Ijipt. Em̧ nuknuk ekar lukkuun juon tampeļ edik im remaron̄ kar rupe im bar kalōke. Ro nejin Israel raar kōjerbale em̧ nuknuk m̧ae iien eo kar kalōke tampeļ eo an Solomon (K&B 124:38).

Anij ar kwaļo̧ke jon̄ok eo an em̧ nuknuk eo n̄an Moses (Ex. 26–27), im ro nejin Israel raar kalōk e ekkar n̄an jon̄ok eo (Ex. 35–40). Ke em̧ nuknuk eo eaar dedeļo̧k, juon kōdo̧ ekar kalbubuuk em̧ nuknuk eo, im aiboojoj an Irooj ar koobrake em̧ nuknuk eo (Ex. 40:33–34). Kōdo̧ eo ekar juon kakōļļe in an Anij pād ijo. Ilo bon̄, āin jekjekin wōt juon kijeek. Ke kōdo̧ eo ekar pād ioon em̧ nuknuk eo, ro nejin Israel raar kamp. Ke eaar em̧m̧akūt, rekar em̧m̧akūt ippān (Ex. 40:36–38; Bōn. 9:17–18). Ro nejin Israel raar bōke em̧ nuknuk eo ippāer ilo iien jebwābwe ilo āne jem̧aden im ilo aer kab bōke āneen Kenean. Ālikin bōke Kenean, em̧ nuknuk eo ekar pād ilo Shailo, jikin eo Irooj eaar kāālete (Josh. 18:1). Ālikin an ro nejin Israel kar kalōke tampeļ eo an Solomon, em̧ nuknuk eo ekar maat im jako jān bwebwenato.

Irooj im Aiseia raar kōjerbale em̧ nuknuk eo āinwōt juon kakōļļeen jikin kwelo̧k ko in Zaion im Jerusalem ilo iien Itok eo an Irooj Kein Karuo (Ais. 33:20; Moses 7:62).