Samuel Rikanaan ilo Kallim̧ur Em̧or
Ļeo nejin Elkena im Hanna, Samuel ekar ļotak ilo uwaakin jar ko an jinen (1 Sam. 1). Ke ekar juon ajri ekar pād ium̧win oņaake eo an Ilai, pris eo eutiej ilo tabernacle eo ilo Shailo (1 Sam. 2:11; 3:1). Irooj ar kūr Samuel ke ej em̧m̧an ded bwe en juon rikanaan (1 Sam. 3). Ālikin an mej Ilai, Samuel ekar erom juon rikanaan eļap im riekajet an Israel im ekar kōjepļaaktok kien, jokane, im kabun̄-jar eo ekkā aer kōm̧m̧ani n̄an āneo (1 Sam. 4:15–18; 7:3–17).
1 Samuel 28:5–20 ewōr ie juon bwebwenatoin kar kōro̧o̧ltok Samuel jān ro remej jān juon kōrā jetōb eaar juk ippān ilo Endor āinwōt an Kiin̄ Saul kar kajjitōk. Men in eban kar juon visōn jān Anij, kōnke juon kōrā jetōb ejuk ippān ak bar jet wāween ko kōn jetōb eban jelōte an juon rikanaan waļo̧ktok ilo an ļeo ak lio kajjitōke.
Bok ko 1 im 2 Samuel
Ilo jet Baibōļ, bok ko 1 im 2 Samuel rej juon wōt bok. Ilo ko jet rej ruo bok. Bok kein rej kitbuuji juon tōrean eo enan̄in 130 iiō aetokan, jān ļotak eo an Samuel m̧ae jidik iien im̧aan mej eo an Kiin̄ Devid.
Bok in 1 Samuel
Jebta 1–3 rej kōmmeļeļe bwe Irooj ar kaliaik im kajeik baam̧le eo an Ilai im kūr Samuel āinwōt juon pris eutiej im riekajet. Jebta 4–6 rej ekkōnono ekōjkan an kar tōptōp in kallim̧ur eo wōtlo̧k ļo̧k ilo pein riPilistia ro. Jebta 7–8 rej ļo̧o̧ke kakkōl ko an Samuel kōn an wōr anij riab raņ im juon kiin̄ enana. Jebta 9–15 rej kōmmeļeļeik kōpālpel e Saul im an tōl āinwōt juon kiin̄. Jebta 16–31 rej ba kōn bwebwenatoin Devid im an kar eddekļo̧k ilo kajoor—Samuel ar kapit Devid eo ekar m̧an Golaiat. Saul ar dike Devid, a Devid eaar m̧akoko in m̧ane Saul men̄e ekar wōr an iien em̧m̧an n̄an kar kōm̧m̧an āindein.
Bok in 2 Samuel
Bok in ewōr ie tipdikin iien tōl eo an Devid āinwōt kiin̄ an Juda im āliktata an aolepān Israel. Jebta 1–4 rej kwaļo̧k juon kakkōt aetok ikōtaan ro raar ļoore Devid, ālikin kar kōpālpel ej jān Juda, im ro raar ļoore Saul. Jebta 5–10 rej kwaļo̧k an Devid kar kanooj kajoorļo̧k iaolepān elōn̄ laļ ko. Jebta 11–21 rej kwaļo̧k wōtlo̧kļo̧k eo an Devid ilo kajoor in jetōb kōnke jero̧wiwi ko an im jum̧ae eo ilowaan wōt nokwe eo an. Jebta 22–24 rej kōmmeļeļeik kajjion̄ ko an Devid n̄an kōm̧m̧an kajim̧we ippān Irooj.