Jepelļo̧k jān Anij im jelōt ko An; n̄an mej āinwōt n̄an mej ko rej ekkejelļo̧k n̄an wānōk. Lucifer im juon-m̧ōttan-jilu in inelep in lan̄ rekar ioon mej ilo jetōb ke kar jolaļļo̧k er jān lan̄ (K&B 29:36–37).
Mej ilo jetōb kar kajedetok ilo laļ jān Wōtlo̧k eo an Adam (Moses 6:48). Armej ro ewōr ļōmņak ko, naan ko, im jerbal ko renana rej mej ilo jetōb ilo iien eo rej mour ioon laļ (1 Tim. 5:6). Kōn Pinmuur eo an Jisōs Kraist im jān pokaki pedped ko im kain̄i ko an gospel eo, em̧m̧aan ro im kōrā ro remaron̄ erreo jān jero̧wiwi im anjo̧ ioon mej ilo jetōb.
Mej ilo jetōb ej barāinwōt bōk jikin ālikin mej eo an ānbwinnin kanniōk. Ro em̧ōj aer jerkakpeje im devil im enjeļ ro an renaaj ekajet jim̧or. Ro rekar make jum̧ae meram eo im m̧ool eo an gospel eo renaaj en̄taan kōn mej ilo jetōb. Mej in ekkā kōnono kake bwe ej mej eo kein karuo (Alma 12:16; Hil. 14:16–19; K&B 76:36–38).