Ļamļam eo jān e armej raar erom kanniōk ioon laļ in. Ke Adam im Iv rekar kān̄e leen wōjke eo kōmo̧iki, rekar erom kanniōk, meļeļein, rej dien jero̧wiwi im mej. Adam ekar erom “kanniōk eo m̧oktata” ioon laļ (Moses 3:7). Revelesōn in raan ko āliktata ej kaalikkar bwe Wōtlo̧k eo ej juon kōjeraam̧m̧an im bwe Adam im Iv reaikuj in kautiej er āinwōt jemān im jinen aolepān laļ in.
Wōtlo̧k eo ekar juon bun̄tōn eo aikuji ilo eddekļo̧k eo an armej. Kōnke Anij ekar jeļā ke Wōtlo̧k eo enaaj kar bōk jikin, Eaar kōm̧m̧an karōk ilo mour eo m̧okta kōn juon Rilo̧mo̧o̧r. Jisōs Kraist ekar itok ilo ioļapļap in iien n̄an pinmuur kōn Wōtlo̧k eo an Adam im barāinwōt kōn jero̧wiwi ko an kajjojo armej eļan̄n̄e renaaj ukeļo̧k.