Revelesōn eo an Jon

Bok eo āliktata ilo Kallim̧ur Em̧or, im ej ejaak jān juon revelesōn kar leļo̧k n̄an Jon Rijjilōk eo. E kar kōtļo̧k bwe en lo bwebwenato in laļ in, eļaptata raan ko āliktata (Rev. 1:1–2; 1 Ni. 14:18–27; K&B 77). Revelesōn eo an Jon barāinwōt etan Kwaļo̧k (Apocalypse).

Jon ar bōk revelesōn in ilo raan eo an Irooj ioon aelōn̄ in Patmōs (Rev. 1:9–10), iturin wōt jidik parijet in Esia, ej jab ettoļo̧k jān Epesōs. Lukkuun jejjet in raan eo an revelesōn in ejjeļo̧k ejeļā kake.

Ki ko n̄an meļeļe bok in em̧ōj kobaiki ilo 1 Nipai 14:18–27 im Katak im Bujen Ko 77 (Ether 4:15–16).

Jebta 1–3 rej juon kadkad eo n̄an bok in im lōta ko n̄an im̧ōn jar ko jiljilimjuon ilo Esia. Jon ar jei lōta kein n̄an jipan̄ Ro Rekwōjarjar mejaļ jet apan̄. Jebta 4–5 rej ļo̧o̧ke visōn ko Jon ar bōki im rej kaalikkar aiboojoj im jim̧we in kajoor eo an Anij im Kraist. Ilo jebta 6–9, 11, Jon ar ļo̧o̧ke an lo juon bok em̧ōj sili kōn jiljilimjuon sil ko, kajjojo sil ej bōk jikin juon to̧ujin iiō ko in bwebwenatoin laļ in. Jebta kein eļap wōt aer ekkōnono kōn men ko reļļap rej pād ilo sil eo kein kajiljilimjuon (lale Rev. 8–9; 11:1–15). Jebta 10 ej kōmmeļeļeik bok eo Jon ar kan̄e. Bok eo ej bōk jikin juon mijen ilo raan ko rej itok im enaaj kar kōm̧m̧ane. Jebta 12 ej ļo̧o̧ke juon visōn kōn nana eo ekar ijjino ilo lan̄ ke Setan ar jum̧ae im kar jolaļļo̧k. Tariņae eo ekar ijjino ijeņ ej wōnm̧aanļo̧k wōt im kōm̧m̧an ioon laļ. Ilo jebta 13, 17–19, Jon ekar kōmmeļeļe kōn aelōn̄ in kiin̄ ko ioon laļ renana im Setan ej peeki im eaar ļo̧o̧ke jem̧ļo̧k eo aer, ekobaik ko̧kkure eo āliktata an nana. Jebta 14–16 rej kōmmeļeļeik weeppān eo an Ro Rekwōjarjar ilubwiljin nana eo m̧oktaļo̧k wōt jidik jān Itok eo Kein Karuo an Kraist. Jebta 20–22 rej kōmmeļeļeik Meļļenium eo, jikin kwelo̧k eo ewūlio Jerusalem Ekāāl, im men ko reļļap āliktata ilo bwebwenatoin laļ in.