Luk
Rijeje eo an Gospel eo an Luk im bok in Jerbal ilo Kallim̧ur Ekāāl im juon mijenede m̧ōttan Paul. Ekar ļotak n̄an jemān im jinen riGrik im ekar juon taktō (Kol. 4:14). Luk ekar ļap jeļāļo̧kjeņ eo ippān. E eaar kwaļo̧k kadkadin bwe ej juon m̧ōttan Rijjilōk Paul ke eaar kobaļo̧k ippān Paul ilo Troas (Jerb. 16:10–11). Luk ekar barāinwōt pād ippān Paul ilo Pilippai ioon ito-itak eo āliktata an Paul n̄an Jerusalem (Jerb. 20:6), im rein ruo rekar ippān doon m̧ae kar tōkeakļo̧k ilo Rom. Luk ekar barāinwōt pād ippān Paul ilo kalbuuj eo an kein karuo ilo Rom (2 Tim. 4:11). Bwebwenato ej ba ke ekar mej kōn tōmak eo an.
Gospel eo an Luk
Juon bwebwenato eo Luk eaar je kōn Jisōs Kraist im ministry eo An ioon laļ in. Bok in Jerbal ko an Rijjilōk Ro ej juon eddeļo̧k in Gospel eo an Luk. Luk eaar likūt juon bwebwenato ekanooj em̧m̧an kar an je kōn ministry eo an Jisōs, im jakem̧aantak Jisōs āinwōt jim̧or Rilo̧mo̧o̧r an jim̧or riJu im ro riAelōn̄ Ko. Eaar jeje eļap kōn katak ko an Jisōs im kōm̧m̧an ko An. Ilo Luk jej bōk wōt bwebwenato ko kōn loļo̧k ko an Gebriel n̄an Zakeraias im Meri (Luk 1); loļo̧k eo an seperd ro n̄an nin̄nin̄ Jisōs (Luk 2:8–18); Jisōs ilo tampeļ eo ke ej jon̄oulruo iiō dettan (Luk 2:41–52); jiljilimjuonn̄oul kar kappe im jilkinļo̧k er (Luk 10:1–24); Jisōs ej menokadu bōtōktōk (Luk 22:44); An Jisōs ekkōnono ippān riko̧o̧t eo ioon debwāāl eo (Luk 23:39–43); im an Jisōs m̧ōn̄ā ek im hōnni ālikin An Jerkakpeje (Luk 24:42–43).
Kōn juon laajrak in men ko reļļap ilo mour eo an Jisōs Kraist kōm̧eļeļeik ilo Gospel eo an Luk, lale Bōrokuk in Gospel ko ilo appendix eo.