Ilaija

Juon rikanaan ilo Kallim̧ur Em̧or eo eaar ro̧o̧l tok ilo raan kein n̄an liļo̧k ki ko an kajoor in sil eo ioon Josep Smith im Oliver Cowdery. Ilo raan ko an, Ilaija eaar jerbal ilo Aelōn̄ in Kiin̄ in Israel eo Ituiōn̄ (1 Kiin̄ 17–22; 2 Kiin̄ 1–2). Eaar kanuij ļap tōmak eo an ilo Irooj im eļap kile kōn elōn̄ mennin bwilōn̄ ko. Kōnke ekar kajjitōk, Anij Eaar bōbrae an wōt ium̧win 3½ iiō. Eaar kōjerkak juon ļaddik jān ro remej im kūr laļtak kijeek jān lan̄ (1 Kiin̄ 17–18). Armej rein riJu rej kōttar wōt an Ilaija ro̧o̧ltok, āinwōt an Malakai kar kanaan ke enaaj kar (Mal. 4:5). E ej pād wōt ilo an juon eo em̧ōj karuwaineneiki n̄an Kwōjkwōj in Kijoone ko an riJu, ijo juon kōjām ej peļļo̧k im juon jea epojak iien otemjej im kōttar e.

Rikanaan Josep Smith ar ba bwe Ilaija eaar kabwijer kajoor in sil eo an Melkizedek Priesthood eo im ekar rikanaan eo āliktata n̄an kabwijere m̧okta jān iien ko an Jisōs Kraist. Eaar waļo̧k ioon Toļ in Kōjakōlkōl ippān Moses im likūt ki ko an priesthood eo ioon Piter, Jemes, im Jon (Matu 17:3). E eaar bar waļo̧k, ippān Moses im ro jet, ilo Eprōl 3, 1836, ilo Kirtland Ohio Tampeļ eo lilo̧k ejja ki kein wōt ioon Josep Smith im Oliver Cowdery (K&B 110:13–16). Aolep men kein rekar ilo m̧aanjāppopo n̄an Itok eo Kein Karuo an Irooj, āinwōt kar kōnono kake ilo Malakai 4:5–6.

Kajoor eo an Ilaija ej kajoor in sil eo an priesthood eo im jān ke men ko lukwōji ak kōtļo̧ki ioon laļ rej lukwōji ak kōtļo̧ki ilo lan̄ (K&B 128:8–18). Ro karejeran kāālet in Irooj ioon laļ rainin ewōr ippāer kajoor in sil in kōm̧m̧ani kain̄i in lo̧mo̧o̧ren ko an gospel eo n̄an ro remour im ro remej (K&B 128:8).