Lēsoni 15 Naunau Teuteu ki he Kalasí

Teuteu ki he Hāʻele Mai ʻa Sīsū Kalaisí

Ko e Faiako ʻa Sīsū ʻi he Hemisifia Hihifó (Ko e ʻAʻahi ʻa Sīsū Kalaisi Ki he Ongo ʻAmeliká), tā ʻe John Scott

ʻE nofotaha ʻa e ʻiuniti ko ʻení ʻi he hā mo e ngāue ʻa Kalaisi ʻi he lotolotonga ʻo e “kakai Nīfaí” (3 Nīfai 11:1). ʻOku kau fakatouʻosi ʻi he kulupu ko ʻení e kau Nīfai mo e kau Leimana angatonu kuo ului ki he ʻEikí (vakai, 3 Nīfai 10:18–19). ʻI hoʻo fakakaukau ki he meʻa ne nau aʻusia mo e Fakamoʻuí, feinga ke fakatupulaki hoʻo fakamoʻoni ki Hono natulá, ngaahi ʻulungāngá, mo e misiona fakalangí.

Ko e konga ʻo e misiona fakalangi ʻo e ʻEikí ʻoku fai ki ai ʻa e ʻamanaki fiefiá ko ʻEne Hāʻele ʻAnga Ua Maí. Naʻe akoʻi ʻe Palesiteni ʻEselā Tafu Penisoni “ʻoku tau maʻu ʻi he Tohi ʻa Molomoná ha sīpinga ʻo e teuteu ki he Hāʻele ʻAnga Ua Maí ” (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014],164). Te ke maʻu ʻi he lēsoni ko ʻení ha faingamālie ke fakakaukau ki he founga hono ako ʻo e ngaahi kikite mo e ngaahi meʻa ne hoko kimuʻa ʻi he hā mai ʻa e Fakamoʻuí ʻi he lotolotonga ʻo e kakaí ni ke lava ai ke tokoniʻi koe ke ke teuteu ki Heʻene Hāʻele ʻAnga Ua Maí.

Konga 1

ʻOku ou mateuteu fēfē ki he Hāʻele ʻAnga Ua Mai ʻa Sīsū Kalaisí?

Naʻe tomuʻa kikiteʻi ʻe he kau palōfita ʻo e Tohi ʻa Molomoná ʻi ha ngaahi toʻu tangata lahi ‘a e hāʻele mai ʻa Sīsū Kalaisi ki he māmaní. ʻI ha taʻu ʻe ono kimuʻa ʻi hono ʻaloʻi mai ʻo Kalaisi ofi ki Pētelihemá, naʻe fekauʻi ʻe he ʻEikí ʻa Samuela ko e tangata Leimaná ke teuteuʻi e kau Nīfai fai angahalá ki he hāʻele mai ʻa Kalaisí. Naʻe kikiteʻi ʻe Samuela ha ngaahi fakaʻilonga lahi mo ha ngaahi meʻa fakaofo ʻe hoko ʻi hono ʻaloʻi mo e pekia ʻa Sīsū Kalaisí. (Vakai, Hilamani 13–15.)

Ko e Kikite ʻa Samuelá, tā fakatātaaʻi ʻe Walter Rane

fakaʻilonga, ako

Ako ke Teuteu ki he Kalasí

Lau ‘a e Hilamani 14:6–13, pea fakakaukau ki he ʻuhinga naʻe fakataumuʻa ai e pōpoaki ʻa Samuelá ke teuteuʻi ʻa e kau Nīfaí ki he hāʻele mai ʻa e Eikí.

Naʻe akoʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ʻe lava e kau palōfitá ʻo tokoniʻi kitautolu ʻi he teuteu ki he hāʻele mai ʻa e ʻEikí:

ʻEletā Lōpeti D. Heili

Kimuʻa ʻi he pō toputapu ko ia ʻi Pētelihemá, naʻe teuteuʻi ʻe he ngaahi meʻa ne hoko ʻi he hisitōliá mo e ngaahi lea ʻa e kau palōfita ʻo e kuonga fakakosipeli kotoa peé ʻa e hala ki he fuofua hāʻele mai ʻa e ʻEikí pea mo ʻEne Fakaleleí. … ʻOku tau maʻu nai ʻa e mata ke mamata ki he ngaahi meʻa ʻoku hoko mo e ngaahi kikite ʻi hotau kuongá ʻoku nau teuteuʻi kitautolu ki he Hāʻele ʻAnga Ua Mai ʻa e Fakamoʻuí? (“Preparations for the Restoration and the Second Coming: ‘My Hand Shall Be over Thee,’” Liahona, Nōvema 2005, 92)

Ko e Hāʻele ʻAnga Ua Maí, tā fakatātaaʻi ʻe Harry Anderson

fakaʻilonga, ako

Ako ke Teuteu ki he Kalasí

Tuku ha kiʻi taimi ke ako ʻa e fakamatala ʻo e “Ngaahi Fakaʻilonga ʻo e Ngaahi Kuongá” ʻi he Fakahinohino ki he Ngaahi Folofolá (vakai, scriptures.ChurchofJesusChrist.org), ʻo fekumi ki he ngaahi meʻa kuo fakahā ʻe he kau palōfitá ʻi he ngaahi folofolá ko ha ngaahi fakaʻilonga ia ʻo e Hāʻele Anga Ua Mai ʻa e ʻEikí. Te ke fakatokangaʻi ʻoku lava ʻe ha niʻihi ʻo e ngaahi kikité ni ʻo fakatupu ha loto-hohaʻa pe manavasiʻi ʻi he kakaí. Ka neongo iá, ʻoku toe hanga ʻe he ngaahi fakaʻilonga fakaepalōfita ko ʻení ʻo fakahaaʻi mai e ʻofa ʻa e ʻOtuá ki Heʻene fānaú.

fakaʻilonga, fakalaulauloto

Fakalaulauloto ke Teuteu ki he Kalasí

Ko e hā ha akonaki fakaepalōfita pe fakaʻilonga ʻo e Hāʻele ʻAnga Ua Maí ʻokú ne ueʻi fakalaumālie koe ke ke teuteu lelei ange ai ki he toe hāʻele mai ʻa e ʻEikí? Ko e hā ha ngaahi liliu ʻe fie maʻu ke ke fakahoko ke ke ongoʻi mateuteu ange ai ki he toe hāʻele mai ʻa e Fakamoʻuí?

Konga 2

Ko e hā te u lava ʻo fai ke u tuʻu maʻu ʻi he taimi ʻoku ou fanongo ai ki he ngaahi pōpoaki ʻokú ne ʻomi ha loto-veiveiua ki hono fakalangi ʻo Sīsū Kalaisí mo hono moʻoni ʻo ʻEne Hāʻele ʻAnga Ua Maí?

Naʻe tui ha niʻihi ʻo e kau Nīfaí ki he ngaahi lea ʻa Samuelá. Ne fakafisingaʻi ʻe ha niʻihi e pōpoaki ʻa Samuelá mo feinga ke tāmateʻi ia ʻaki ha ngaahi maka mo e ngahau. Koeʻuhi naʻe ʻikai ke nau lava ʻo tāmateʻi iá, ne tokolahi ange ha niʻihi ne tui ki heʻene pōpoakí pea ne nau ʻalu kia Nīfai ke papitaiso kinautolu. Kimui ange ai, ʻi he taimi ne kamata ke hoko ai e ngaahi fakaʻilonga mo e ngaahi meʻa fakaofo ʻi hono ʻaloʻi ʻo Kalaisí, ne aʻusia ʻe he kakai tuí ha fiefia pea fakafefeka ʻe he kakai taʻe tuí honau lotó. (Vakai, Hilamani 16:1–15.)

Ko Samuela ko e Tangata Leimaná ʻi he Funga ʻAá (Ko e Kikite ʻa Samuela ko e Tangata Leimaná), tā ʻe Arnold Friberg

fakaʻilonga, ako

Ako ke Teuteu ki he Kalasí

Lau ʻa e Hilamani 16:13–23 pea fakakaukau ke fakaʻilongaʻi e ngaahi foʻi lea pe ngaahi kupuʻi lea ʻokú ne fakamatalaʻi e founga ne fakatupu ai ʻe he kakai taʻe tuí e veiveiua ki he ngaahi fakaʻilonga ki hono ʻaloʻi mai ʻo Kalaisí.

Naʻe lea ʻa Palesiteni Poni L. ʻOsikasoni, ko e Palesiteni Lahi kimuʻa ʻo e Kau Finemuí ki he ngaahi leʻo fakaveiveiuá ʻo pehē:

Palesiteni Poni L. ʻOsikasoni

ʻOku fie maʻu pē ke hokohoko atu ʻetau kai [ʻi he fua ʻo e ʻakau ʻo e moʻuí] pea ʻoua naʻa tau muimui kiate kinautolu ʻoku nau fakakata ʻaki ʻetau ngaahi tuí pe ko kinautolu ʻoku fiefia hono ʻai ke tau ongoʻi veiveiuá pe niʻihi ʻoku nau fakaangaʻi e kau taki ʻo e Siasí mo e tokāteliné. Ko ha fili ia ʻoku tau fakahoko fakaʻaho—ke fili ʻa e tuí kae ʻikai ko e veiveiuá.. (“ʻOku Ou Tui Nai?” Liahona, Mē 2016, 89)

fakaʻilonga, fakalaulauloto

Fakalaulauloto ke Teuteu ki he Kalasí

Ko e hā ha ngaahi pōpoaki kuó ke fanongo ai naʻe fakataumuʻa ke ne fakatupu ha loto-veiveiua kia Sīsū Kalaisi, ko ʻEne kau taki kuo filí, pe ko Hono Siasi kuo fakafoki maí?

fakaʻilonga, ako

Ako ke Teuteu ki he Kalasí

ʻI hoʻo fakakaukau ki he ngaahi pōpoaki fakaveiveiua kuó ke fanongo aí, lau ʻa e 3 Nīfai 1:4–15, 22 pea fekumi ki he founga ne kei tuʻu ʻaliʻaliaki ai ha niʻihi ʻo e kakai tuí neongo hono lumolumaʻi ʻenau tuí ʻe he kakai taʻe tuí.

Naʻe akoʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi meʻá ni fekauʻaki mo e tuʻu maʻu ʻi heʻetau tui kia Sīsū Kalaisí:

ʻEletā D. Toti Kulisitofasoni

Ke vilitaki ʻo tuʻu maʻu mo tuʻu ʻaliʻaliaki ʻi he tui ʻa Kalaisí, ʻoku fie maʻu ke fakatōloloto e ongoongolelei ʻo Sīsū Kalaisí ki he loto mo e laumālie ʻo ha taha, ʻo ʻuhingá ke ʻikai hoko e ongoongoleleí ko ha taha pē ʻo e ngaahi tākiekina ʻi ha moʻui ʻa ha taha, ka ko e tefitoʻi meʻa ia ʻoku nofo taha ai ʻene moʻuí mo e ʻulungāngá. …

Manatu maʻu pē ki he talaʻofa ʻo e ngaahi meʻa lelei ka hoko maí, ʻi he taimí ni mo e hili ʻení, kiate kinautolu ʻoku tuʻu maʻu mo tuʻu ʻaliʻaliaki ʻi he tui ʻa Kalaisí. (“Tuʻu Maʻu mo Tuʻu ʻAliʻaliaki ʻi he Tui ʻa Kalaisí,” Liahona, Nōvema 2018, 31, 33)

fakaʻilonga, fakalaulauloto

Fakalaulauloto ke Teuteu ki he Kalasí

Ko e hā te ke fai ke tuʻu ʻaliʻaliaki ai ʻi hoʻo tui kia Kalaisí ʻi hoʻo teuteu ki Heʻene toe hāʻele mái?

Fie Ako Lahi Ange? (Fili pē)

Ko e hā naʻe akoʻi ʻe Sīsū Kalaisi ki he kau Nīfaí mo e kau Leimaná ʻo kau ki Heʻene Hāʻele ʻAnga Ua Maí?

Te ke lava ʻo lau ʻi he 3 Nīfai 24–25 ʻa e ngaahi lea ʻa e palōfita ko Malakaí mei he Fuakava Motuʻá, ʻa ia naʻe fekau ʻe he ʻEikí ke fakakau ʻi he Tohi ʻa Molomoná. ʻE lava ke tokoni e ngaahi akonakí ni ki heʻetau teuteu ki he Hāʻele ʻAnga Ua Maí. ʻOku ʻomai ʻi he (Vahe 45 ʻo e Tohi Lēsoni ʻo e Tohi ʻa Molomoná Maʻá e Fānau Akó [(tohi lēsoni ʻo e Potungāue Ako ʻa e Siasí, 2009), 331–36] ha ngaahi fakamatala ʻe ʻaonga ki he ngaahi vahe ko ʻení.

Ko e hā te u lava ʻo fai ke fakalahi hoku mālohi ke ikunaʻi ʻaki ʻa e loto-veiveiuá?

ʻEletā Hiuko Monitoiā

Naʻe fai mai ʻe ʻEletā Hiuko Monitoiā ʻo e Kau Fitungofulú ha faleʻi ʻi heʻene fakamatala ko e “Ko Hono Ikunaʻi ʻo e Fakatuʻutāmaki ʻo e Loto-Veiveiuá” (Liahona, Sepitema 2017, 46–49), ki he founga ke taʻofi ʻaki e loto-veiveiuá mei heʻene fakavaivaiʻi ʻetau tui kia Sīsū Kalaisi mo ʻEne ongoongoleleí.

Te tau lava ʻo fakatupulaki hotau mālohi ke ikunaʻi e loto-veiveiuá ʻaki e ʻamanaki lelei ʻi he tui ki Heʻene Hāele ʻAnga Ua Maí. Fanongo ki hono hivaʻi ʻe he Kuaea ʻa e Tāpanekalé ʻi he Temipale Sikueá ʻa e “When He Comes Again (ʻO Ka Ne Ka Toe Haʻú)” (4:12) mei he konifelenisi lahi ʻo ʻOkatopa 2013, pea fakakaukauloto pē ʻe anga fēfē e taimi ʻe toe hāʻele mai ai e Fakamoʻui ʻo e māmaní.

Ko fē te u lava ʻo ako lahi ange ai ki he lea ʻa e kau palōfita ʻo onopōní kau ki he Hāʻele ʻAnga Ua Maí?

ʻEletā D. Toti Kulisitofasoni

Naʻe fakahoko mai ʻe ʻEletā Kulisitofasoni ha enginaki taimi tonu te ne tokoniʻi kitautolu ʻi heʻetau teuteu ki he Hāʻele ʻAnga Ua Maí ʻi heʻene lea “Teuteu ki he Toe Hāʻele Mai ʻa e ʻEikí” (Liahona, Mē 2019, 81–84).

Palesiteni Tāleni H. ʻOakesi

ʻI he lea ʻa Palesiteni Tāleni H. ʻOakesi ʻo e Kau Palesitenisī ʻUluakí “Preparation for the Second Coming” (Liahona, Mē 2004, 7–10), naʻá ne lave fekauʻaki mo e ngaahi fakaʻilonga ʻo e ngaahi kuongá mo e founga te tau lava ai ʻo teuteu ki he hāʻele mai ʻa e ʻEikí.