Lēsoni 16 Naunau ʻa e Faiakó

ʻOku Ngāue Fakaetauhi ʻa Sīsū Kalaisi ki he Tokotaha Taki Taha

ʻOku ʻomai ʻe he hā ʻa Sīsū Kalaisi ki he kau Nīfaí mo e kau Leimaná ha fakamoʻoni mālohi ki Hono faka-ʻOtuá. ʻI he ngāue fakaetauhi ʻa Sīsū ki he tokotaha taki taha, naʻá Ne tā ai e sīpinga ʻo e angaʻofá mo e manavaʻofá. ʻI he lēsoni ko ʻení, ʻe fakaafeʻi e kau akó ke nau feinga ke ʻiloʻi ha ngaahi founga kehekehe te nau lava ai ʻo haʻu kia Kalaisi mo maʻu ha fakamoʻoni fakataautaha loloto ange ko Ia honau Fakamoʻuí. ʻE toe fakakaukauʻi foki ʻe he kau akó ʻa e meʻa te nau lava ʻo fai ke muimui ai ki he founga ngāue fakaetauhi ʻa e Fakamoʻuí.

Ngaahi Fokotuʻu ki hono Akoʻí

Naʻe hā ʻa e Kalaisi toetuʻú ki he kau Nīfaí mo e kau Leimaná mo fakaafeʻi ke nau ala ki hono ngaahi mataʻikafo ʻi Hono ongo nimá mo e vaʻé.

Te ke lava ke kamata e lēsoní ʻaki hano fakaʻaliʻali ʻa e fakatātā ʻoku ʻoatu hení pea kole ki ha tokotaha ako ke ne fakamatalaʻi e ngaahi meʻa naʻe hoko ʻo iku ki he hā ʻa Sīsū Kalaisi ki he kau Nīfaí mo e kau Leimaná.

Tokotaha Taki Taha, tā ʻe Walter Rane

Fakaafeʻi e kau akó ke nau toe vakaiʻi e lea ʻa ʻEletā Sefilī R. Hōlani ʻi he konga 1 ʻo e naunau teuteú, pea ʻeke kiate kinautolu e ʻuhinga ne hoko ai e hā ʻa Sīsū Kalaisi ʻi he lotolotonga ʻo e kakaí ko e meʻa mahuʻinga taha ia ne hoko ʻi he Tohi ʻa Molomoná.

Kole ki he kau akó ke nau toe vakaiʻi e 3 Nīfai 11:13–17, ‘o sio ki he ngaahi lēsoni te tau lava ʻo ako mei he fakamatala ko ʻeni ʻo e fengāueʻaki ʻa Kalaisi mo e kakaí. Fakakaukauʻi pe ko fē ʻa e ngaahi fehuʻi ʻi heni te ke loto ke ʻeke ke tokoni ki hoʻo kau akó ke mahino mo nau fakaʻaongaʻi e meʻa kuo nau akó:

• Ko e hā ʻoku tau ako mei he ngaahi veesi ko ʻení kau ki he ʻulungaanga ʻo Sīsū Kalaisí?

• Te ke ongoʻi fēfē kapau naʻe fakaafeʻi koe ke ke ala ki he ngaahi matakafo ʻi he ongo nima mo e vaʻe ʻo e Fakamoʻuí?

• Ko e hā te tau lava ʻo ako ʻo kau ki he Fakamoʻuí mei Heʻene fakaafe ki he kakaí ke nau haʻu taha taha ʻo ala ki hono ngaahi matakafo ʻi Hono ongo nimá mo e vaʻé? (Kapau ‘e fie maʻu, fakamanatu ki he kau akó ko e kakai ʻe toko 2,500 ne ʻi aí.)

• ʻOku fakafofongaʻi fēfē ʻe he aʻusia ko ʻení ʻa e meʻa ʻoku fakaafeʻi mai ʻe Sīsū Kalaisi kiate kitautolu takitaha ke tau fakahokó? (Fakaʻaongaʻi e ngaahi tali ʻa e kau akó, ke ʻiloʻi ha moʻoni ʻoku faitatau mo e meʻá ni: ʻoku fakaafeʻi kitautolu ʻe Sīsū Kalaisi ke tau haʻu kiate Ia pea maʻu ha fakamoʻoni fakataautaha ko Ia ʻa hotau Fakamoʻuí.)

• Ko e hā te tau lava ʻo fakahoko ke tau haʻu ai kia Kalaisi pea maʻu haʻatau fakamoʻoni fakataautaha ko Ia ʻa hotau Fakamoʻuí? (Ki ha toe ngaahi fakakaukau lahi ange, mahalo ‘e tokoni ke toe vakaiʻi ʻe he kau akó e fakamatala ʻa ʻEletā Uolotā F. Konisālesi ʻi he konga 1 ʻo e naunau teuteú.)

Fakaafeʻi e kau akó ke nau toe vakaiʻi e ʻekitivitī ʻi he konga 1 ʻo e naunau teuteú ko e “Lekooti Hoʻo Ngaahi Fakakaukaú”. ʻOange ha kiʻi taimi ki he kau akó ke nau toe vakaiʻi e meʻa ne nau teuteú, pea fakaafeʻi ha kau ako tokosiʻi ke vahevahe e meʻa ne nau tohí. Ka faingamālie e taimí, te ke lava ‘o fakaafeʻi ha toko taha pe toko ua ʻi he kau akó ke ʻomi ha veesi mei he himi naʻa nau filí pea vahevahe e ʻuhinga ʻoku mahuʻinga mālie ai ia kiate kinautolú. Te mou toe lava foki ʻo hivaʻi fakataha e himí.

Fakakaukau ke fakaʻaliʻali e fehuʻi ko ʻení mo poupouʻi e kau akó ke nau fakalaulauloto mo lekooti ʻenau ngaahi fakakaukaú mo e ongó:

• Ko e hā te u lava ʻo fai ke fakamālohia ai ʻeku fakamoʻoni ko Sīsū Kalaisi ʻa hoku Fakamoʻuí?

ʻOku ngāue fakaetauhi ʻa Sīsū Kalaisi ki he fuʻu kakaí taki taha.

Fakamanatu ki he kau akó naʻe fakaafeʻi ʻe he Fakamoʻuí ʻa e fuʻu kakaí ʻi he fakaʻosinga e ʻaho ʻuluaki ʻo ʻEne ʻi he lotolotonga ʻo e kakaí, ke nau foki ki honau ʻapí mo teuteu ki Heʻene toe hāʻele mai he ʻaho hono hokó (vakai, 3 Nīfai 17:1–3).

Ko Hono Fakatupulaki ʻEtau Founga Akoʻí mo e Akó

Poupou‘i e kau akó ke nau ako mo muimui ki he sīpinga ʻa e Fakamoʻuí. Naʻe lea ʻa Palesiteni Tieta F. ʻUkitofa ʻi heʻene kei ʻi he Kau Palesitenisī ʻUluakí ki he kau faiako seminelí mo e ʻinisititiutí ʻo pehē, “ʻOku fie maʻu ʻe hotau kakai kei talavoú ke nau tui; ʻoku nau fakaʻamu ke ʻilo lahi ange ki he Fakamoʻuí” (“A Teacher of Godʻs Children,” Religious Educator, voliume 12, fika 3 [2011], 7). Ko e founga ʻe taha ʻe lava ke ʻilo lahi ange ai e kau akó ki he Fakamoʻuí ko e tukutaha e tokangá ʻi Heʻene sīpinga haohaoá. ʻI he ako ʻa e kau akó ki he sīpinga ʻa Sīsū Kalaisí, fakaafeʻi ke nau fakakaukau ki he meʻa te nau lava ʻo fakahoko ke muimui ai kiate Iá. Naʻe pehē ʻe ʻEletā Niila A. Mekisuele ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku hanga ʻe he muimui ko ʻení ʻo fakalahi fakahangatonu ʻetau ʻofa kia Sīsuú” (“Becoming a Disciple,” Ensign, June 1996, 12).

Vahevahe ʻa e kau akó ki ha fanga kiʻi kulupu iiki. Fakaafe‘i ke nau toe vakaiʻi e 3 Nīfai 17:5–9, 20–24 pea aleaʻi e founga ne ngāue fakaetauhi ai ʻa e Fakamoʻuí ki he kakaí. Lolotonga ʻenau fealeaʻakí, poupouʻi e kau akó ke fakakaukau ki he ngaahi founga kehekehe te nau lava ai ʻo fakakato e fakamatala ko ʻení: “ʻOku mau ngāue fakaetauhi hangē ko e Fakamoʻuí he taimi …”

Hili hano maʻu ʻe he kau akó ha taimi lahi ke nau feakoʻaki aí, kole ange ke nau vahevahe ha niʻihi ʻo e ngaahi founga ne nau fakakakato ai ʻa e fakamatala taʻe kakato ne ʻoatu kimuʻá. ʻI hono vahevahe ʻe he kau akó ʻenau fakamatalá, fakakaukau ke ʻeke ha niʻihi ʻo e ngaahi fehuʻi ko ʻení ke tokoni ki hono fakatupulaki ʻenau fealeaʻakí:

• Ko e hā e fatongia ʻo e ʻofá ʻi he ngāue fakaetauhí? (Mahalo te ke fie toe vakaiʻi e lea ʻa Palesiteni Siini B. Pingihami ʻi he konga 2 ʻo e naunau teuteú.)

• ʻOkú ke pehē ko e hā e ʻuhinga naʻe maʻu ai ʻe he Fakamoʻuí e fiefiá mei he ngāue fakaetauhí? Ko e fē nai ha taimi naʻá ke ongoʻi fiefia ai ʻi haʻo tokoniʻi ha taha ne faingataʻaʻia?

• Ko e hā ʻoku hoko ai e ongoʻi manavaʻofá ko ha konga mahuʻinga ia ʻo e ngāue fakaetauhí? Ko e fē ha taimi kuó ke ongoʻi ai e manavaʻofa ʻa e Fakamoʻuí ʻo fakafou mai ʻi he ngāue fakaetauhi ʻa ha taha kehe? Kuo anga fēfē haʻo fakaaʻu atu e manavaʻofa ʻa Kalaisí ki he niʻihi kehé ʻo fakafou ʻi hoʻo ngaahi ngāue fakaetauhí?

• Te tau tokoniʻi fēfē ha taha ke ne aʻusia e mālohi faifakamoʻui ʻo e ʻEikí ʻi heʻetau ngāue fakaetauhí?

Ke tokoni ki he kau akó ke fakaʻaongaʻi e meʻa ne nau ako kau ki he ngāue fakaetauhí, fakakaukau ke vahevahe ʻa e ngaahi tūkunga ko ʻení:

Ko ʻAlehanituloó ko ha taautaha lalahi kei talavou. Kuó ne maʻu ha fakaafe ke ngāue fakaetauhi kia Papilō mo Hōsea. Kuó ne faʻa talanoa mo Papilō ʻi he lotú ka kuo teʻeki ai pē ke fetaulaki ia mo Hōsea. Hili e talanoa mo e palesiteni e kōlomu ʻa e kaumātuʻá, ʻoku ʻilo ʻe ʻAlehanitulō ʻoku ʻi ai e palopalema fakamoʻui lelei ʻa Papilō peá ne ʻosi talaange ʻe Hōsea ia ki he pīsopé ʻoku ʻikai tokanga ia ke haʻu ki he lotú he taimí ni. ʻOku fie fakahoko ʻe ʻAlehanitulō hono fatongiá ka ʻoku ʻikai ke ne fakapapauʻi pe ʻe kamata fēfē.

Fakaafeʻi e kau akó ke nau vakai ki he sīpinga ʻa e Fakamoʻuí pea vahevahe ha faleʻi te nau ala ʻoatu kia ʻAlehanitulō. Poupouʻi foki e kau akó ke vahevahe ʻenau ngaahi aʻusia fakataautaha ki he ngāue fakaetauhí.

Fakamanatu ki he kau akó ʻi hono teuteu ʻo e lēsoni ko ʻení, naʻe fakaafeʻi nautolu ke nau fakakaukau ki ha taha te nau lava ʻo ngāue fakaetauhi ki ai (vakai, konga 2 ’o e naunau teuteú). Fakaafeʻi e kau akó ke nau fakakaukau ki he tūkunga ʻo e tokotahá ni. Hili ia pea tuku ha kiʻi taimi ki he kau akó ke nau fakalaulauloto mo lekooti ʻenau fakakaukau ki he fehuʻi ko ʻení:

• Ko e hā te ke fai ke muimui ai ki he sīpinga ʻa e Fakamoʻuí mo ngāue fakaetauhi ki he tokotaha ko ʻení ʻi he angaʻofa mo e manavaʻofá?

Ki he Kalasi Hokó

Fakaafeʻi e kau akó ke nau fakakaukau ki he ngaahi pole ʻoku fehangahangai mo e kāingalotú pe kau fiefanongó ʻi he taimi ʻoku nau ongoʻi ai ʻoku ʻikai tali kinautolu ʻe he kāingalotu kehe ʻo e Siasí. Poupouʻi hoʻo kau akó ke nau ako e naunau teuteu ki he kalasi hokó, ʻo fekumi ki he founga te tau lava ai ʻo tokoni ki he niʻihi kehé ke nau ongoʻi ʻoku talitali lelei e taha kotoa pē ki he Siasi ʻo Sīsū Kalaisí.