Lēsoni 12 Naunau Teuteu ki he Kalasí: Ko e Fie Maʻu ke Fanauʻi Foʻou Fakalaumālie Kitautolú
“Lēsoni 12 Naunau Teuteu ki he Kalasí: Ko e Fie Maʻu ke Fanauʻi Foʻou Fakalaumālie Kitautolu,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 12 Naunau Teuteu ki he Kalasí,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 12 Naunau Teuteu ki he Kalasí
Ko e Fie maʻu ke Fanauʻi Foʻou Fakalaumālie Kitautolú
ʻĪmisi
tokotaha ʻoku luelue ʻi ha loto ʻataʻatā
Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Tohi ʻa Molomoná ʻa ʻetau tohi fakahinohino ʻi heʻetau fononga ʻi he hala fononga mei he koví ki he leleí ke fakaleleiʻi mo faifeinga ke liliu hotau lotó” (“The Atonement and the Journey of Mortality,” Ensign, Apr. 2012, 40). ʻOku fakamatalaʻi ʻa e liliu ko ʻení ʻi he Tohi ʻa Molomoná ko e fanauʻi foʻou fakalaumālié, ko ha liliu ia ʻo e lotó, mo e ului. ʻI hoʻomou ako ʻeni ʻi hoʻomou teuteu ki he kalasí, fakakaukau ki he founga ʻe lava ke tokoniʻi ai koe ʻe hono moʻui ʻaki e tokāteline ʻo Kalaisí ke fakaloloto hoʻo uluí pea hoko ʻo hangē lahi ange ko Sīsū Kalaisí.
Konga 1
ʻE lava fēfē ke fakaloloto ʻeku uluí ʻi hono moʻui ʻaki e tokāteline ʻa Kalaisí?
ʻOku fakamatalaʻi ʻe he fakamatala nounou ko ʻení ʻa e meʻa ʻoku hoko ʻi he taimi ʻoku tau ului moʻoni aí.
ʻOku kau ʻi he ului moʻoní ʻa e liliu hotau ʻulungāngá, ka ʻoku ope atu ia ʻi he ʻulungāngá pē; ko ha liliu ʻi hotau natulá fakaʻaufuli. ʻOku fuʻu mahuʻinga fau pehē ia he ʻoku ui ia ʻe he ʻEikí mo ʻEne kau palōfitá ko ha fanauʻi foʻou, ko ha liliu ʻo e lotó, mo ha papitaiso ʻo e afí.. (“Conversion,” Gospel Topics, topics.ChurchofJesusChrist.org)
Hangē ko ʻení, hili hono ui ʻa ʻAlamā ko e Siʻí ʻe ha ʻāngelo ke fakatomalá, naʻá ne fuesia ha fakaʻiseʻisa lahi koeʻuhí ko ʻene ngaahi angahalá. ʻI he mamahi ʻa ʻAlamaá, naʻá ne tafoki ki he ʻEikí ki ha tokoni, naʻe fakamolemoleʻi ʻene ngaahi angahalá, pea naʻá ne aʻusia ha fanauʻi foʻou fakalaumālie (vakai, Mōsaia 27:11–23).
Lau ʻa e Mōsaia 27:25–26, ʻo kumi ʻa e meʻa naʻe akoʻi ʻe he ʻEikí kia ʻAlamā fekauʻaki mo e mahuʻinga ʻo ha fanauʻi foʻou fakalaumālie.
ʻOku ʻikai ke hoko noa pē ʻa e fānauʻi foʻou fakalaumālié, pe uluí. “Ko hoʻo uluí ko ha ola ia hoʻo ngaahi feinga māʻoniʻoni ke muimui ki he Fakamoʻuí. ʻOku kau ʻi he ngaahi feinga ko ʻení haʻo ngāue ʻaki hoʻo tui kia Sīsū Kalaisí, fakatomala mei he angahalá, papitaiso, maʻu ʻa e meʻafoaki ʻo e Laumālie Māʻoniʻoní, pea mo kātaki ki he ngataʻangá ʻi he tui [ko hono moʻui ʻaki e tokāteline ʻo Kalaisí]” (“Conversion,” Gospel Topics, topics.ChurchofJesusChrist.org).
ʻOku fakatātaaʻi ʻe he aʻusia ko ʻeni ʻa e kakai ʻo e Tuʻi ko Penisimaní e founga ʻoku iku ai hono moʻui ʻaki e tokāteline ʻa Kalaisí ki he fanauʻi foʻou fakalaumālie ko ʻení mo e ului ki he ʻEikí.
ʻI he malanga fakaʻosi ʻa e Tuʻi ko Penisimaní, naʻá ne akoʻi ko kitautolú kotoa ko ha “kau tamaioʻeiki taʻeʻaonga” pea ʻoku tau “moʻua taʻengata” ki he ʻOtuá (Mōsaia 2:21–25, 34). Naʻá ne fakamoʻoni leva ʻe lava ke huhuʻi kitautolu ʻo fakafou pē ʻia Sīsū Kalaisi. ʻI he ongo ʻa e pōpoakí ni ki he kakai ʻo e Tuʻi ko Penisimaní, ne nau tō ki he kelekelé ʻi he loto-ʻapasia mo e ofo lahi (vakai, Mōsaia 3:17–4:2).
ʻĪmisi
fakaʻilonga, ako
Ako ke Teuteu ki he Kalasí
Lau ʻa e Mōsaia 4:2–3, ʻo kumi e founga naʻe fakaʻaongaʻi ai ʻe he kakai ʻo e Tuʻi ko Penisimaní e tokāteline ʻo Kalaisí pea mo e ngaahi tāpuaki ne nau maʻú.
ʻOku tau ako mei he Mōsaia 4 hili hono maʻu ʻe he kakai ʻo e Tuʻi ko Penisimaní ha fakamolemole ʻo ʻenau ngaahi angahalá, naʻá ne akoʻi kinautolu ke tui ki he ʻOtuá pea moʻui ʻi he tui koeʻuhí ke nau “tauhi maʻu ai pē ha fakamolemole ʻo [ʻenau] ngaahi angahalá” (veesi 12). ʻI he ʻosi e malanga ʻa e Tuʻi ko Penisimaní, naʻá ne loto ke ʻilo pe naʻe tui e kakaí ki he meʻa naʻá ne akoʻí (vakai, Mōsaia 5:1).
ʻĪmisi
fakaʻilonga, ako
Ako ke Teuteu ki he Kalasí
Lau ʻa e Mōsaia 5:2–7, ʻo kumi e meʻa ne fakahoko ʻe he ʻEikí maʻá e kakai ʻo e Tuʻi ko Penisimaní ʻi heʻenau fakaʻaongai e tokāteline ʻo Kalaisí ʻi heʻenau moʻuí.
Naʻe lea ʻaki ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá e ngaahi meʻá ni fekauʻaki mo e fanauʻi foʻou fakalaumālié:
ʻĪmisi
ʻEletā D. Toti Kulisitofasoni
Mahalo te ke fehuʻi, Ko e hā ʻoku ʻikai hoko vave ange ai kiate au ʻa e fuʻu liliu lahi ko ʻeni ʻo e lotó? ʻOku totonu ke ke manatuʻi e sīpinga fakaofo ʻa e kakai ʻo e Tuʻi ko Penisimaní, ʻAlamā, mo ha niʻihi kehe ʻi he folofolá—neongo ʻene fakaofó, ka ʻoku ʻikai ko e meʻa maʻu pē ia ʻoku hokó. [vakai, Ezra Taft Benson, “A Mighty Change of Heart,” Ensign, Oct. 1989, 2–5]. Ko e tokolahi ʻo kitautolu, ʻoku hoko fakakongokonga mai ʻa e liliú ia pea ʻi ha taimi lōloa. Ko e fanauʻi foʻoú, ʻoku ʻikai tatau ia mo hono fanauʻi fakaesino kitautolú, ko ha founga pē ia ka ʻoku ʻikai ko ha ngāue. Pea ko ʻetau fakahoko leva e founga ko iá, ko e tefitoʻi taumuʻa ia ʻo ʻetau ʻi he moʻui fakamatelié.
… Tau maʻu e sākalamēnití ʻi he moʻui taau he uike takitaha pea hokohoko atu e kole ki he Laumālie Māʻoniʻoní ke ne toʻo fakaʻaufuli meiate kitautolu ha faʻahinga fakaʻilonga pē ʻo e taʻemaʻá. ʻOku ou fakamoʻoni atu ʻi hoʻomou hokohoko atu ʻi he hala ʻo e fanauʻi foʻou fakalaumālié, ʻe hanga ʻe he ʻaloʻofa ʻo e fakalelei ne fai ʻe Sīsū Kalaisí, ʻo toʻo atu ʻa hoʻo ngaahi angahalá pea mo e mele ʻo e ngaahi angahala ko iá pea ʻe mole atu mo e fakamānako ʻo e fakatauvelé, pea te mou hoko ʻo māʻoniʻoni ʻia Kalaisi, he ko Ia mo ʻetau Tamaí, ʻokú Na māʻoniʻoni.. (“Fanauʻi Foʻoú,” Liahona, Mē 2008, 78)
Naʻe akoʻi ʻe Poni L. ʻOsikasoni, ko e Palesiteni Lahi mālōlō ʻo e Kau Finemuí:
ʻĪmisi
Palesiteni Poni L. ʻOsikasoni
ʻOku fie maʻu ke tau feinga kotoa ke liliu hotau lotó mo e natulá ke ʻoua naʻa tau toe holi ke muimui ki he founga ʻa e māmaní ka ke fakahōifua pē ki he ʻOtuá. Ko e liliu moʻoní ko ha founga ia ʻoku fakahoko ʻi ha vahaʻataimi pea kau ai mo ha loto fiemālie ke tui. … ʻOku fie maʻu ke ngāueʻi maʻu pē mo fakaʻaho. (“ʻOku ou Tui Nai?” Liahona, Mē 2016, 88)
ʻĪmisi
fakaʻilonga, lekooti
Lekooti Hoʻo Ngaahi Fakakaukaú
Konga 2
Te u lava fēfē ʻo fakahaaʻi ki he ʻEikí ʻoku ou fie maʻu moʻoni ke aʻusia ha liliu ʻo e lotó?
Fakakaukau ki he meʻa te tau lava ʻo ako mei he sīpinga ʻa e kau ʻAnitai-Nīfai-Līhaí fekauʻaki mo e fakamātoato moʻoni ʻi he feinga ke aʻusia mo tauhi moʻoni ha liliu lahi ʻo e lotó. Ne hoko e kakai ko ʻeni ʻa ia ne hoko ko ha kakai Leimana ki muʻá ko ha “kakai anga-kaivao mo loto-fefeka mo anga-fitaʻa; ko ha kakai naʻe manako ʻi he fakapoongi ʻo e kau Nīfaí, pea mo e kaihaʻa mo e vete ʻo ʻenau koloá” (ʻAlamā 17:14). Ka ne maʻu ʻe he kakai ʻAnitai-Nīfai-Līhaí ʻa e ongoongolelei ʻo Sīsū Kalaisí ʻi he taimi ne akoʻi ai kinautolu ʻe ʻAmoni mo hono ngaahi tokouá, pea ko e tokolahi ʻo kinautolu “naʻe ului ki he ʻEikí, naʻe ʻikai ke nau toe hē” (ʻAlamā 23:6).
ʻĪmisi
fakaʻilonga, ako
Ako ke Teuteu ki he Kalasí
Lau ʻa e ʻAlamā 24:9–11, 15, 19, ʻo kumi ʻa e meʻa ne fakahoko ʻe he kakai ʻAnitai-Nīfai-Līhaí ke fakamālohia ʻenau ului ki he ʻEikí.
Naʻe lea ʻa ʻEletā Petinā fekauʻaki mo e liliu lahi ʻo e lotó ʻa ia ne aʻusia ʻe he kakai ko ʻení ʻo pehē:
ʻĪmisi
ʻEletā Tēvita A. Petinā
ʻOku fie maʻu ha meʻa lahi ange ʻi he tui pē mo e ʻiló ke tuku hifo e “ngaahi mahafu ʻoku [tau tauhi ʻo] angatuʻu ʻakí” hangē ko e siokitá, hīkisiá, mo e talangataʻá. ʻOku muʻomuʻa ʻa e tuí, loto fakatōkilaló, fakatomalá, mo e fakavaivaiʻi kitautolú, ʻi hono siʻaki ʻo e ngaahi mahafu ʻoku tau angatuʻu ʻakí. ʻOku tau kei maʻu nai ha ngaahi mahafu ʻoku tau angatuʻu ʻaki ke ne taʻofi kitautolu mei haʻatau ului ki he ʻEikí? Kapau ʻoku ʻio, ta ʻoku fie maʻu ke tau fakatomala he taimí ni pē. (“Ului ki he ʻEikí,” Liahona, Nōvema 2012, 108–9)
ʻĪmisi
fakaʻilonga, fakalaulauloto
Fakalaulauloto ke Teuteu ki he Kalasí
Ko e hā ha ngaahi “meʻatau ʻo e fakafepakí” te ne ala taʻofi koe mei hono aʻusia ha liliu ʻo e lotó?
