Lēsoni 15 Naunau ʻa e Faiakó

Teuteu ki he Hāʻele Mai ʻa Sīsū Kalaisí

ʻE ako e kau akó ʻi he ʻiuniti ko ʻení ki ha ngaahi meʻa mahuʻinga ne hoko mo e ngaahi akonaki fekauʻaki mo e ngāue ʻa Sīsū Kalaisi ʻi he lotolotonga ʻo e kau Nīfaí mo e kau Leimaná. ʻI hoʻo teuteu ko ia ke aleaʻi e naunau ʻi he ʻiuniti ko ʻení, kumi ha ngaahi founga ke tokoniʻi ai e kau akó ke fakatupulaki ʻenau fakamoʻoni ki Hono misiona fakalangí.

ʻE maʻu ʻe he kau akó ha faingamālie ʻi he lēsoni ko ʻení ke ako ki he founga ʻoku ʻomi ai ʻe he Tohi ʻa Molomoná ha sīpinga ʻo e teuteu ki he Hāʻele ʻAnga Ua Mai ʻa e Fakamoʻuí. Te nau fakakaukau ki he meʻa te nau lava ʻo fai ke ikunaʻi ai e ongoʻi tailiilí mo fakafepakiʻi e ngaahi pōpoaki te ne lava ʻo fakatupu ha loto-veiveiuá koeʻuhi ka nau lava ʻo ongoʻi mateuteu ange ki Heʻene toe hāʻele maí.

Ngaahi Fokotuʻu ki hono Akoʻí

ʻOku kikite ʻa e tangata Leimana ko Samuelá ki he ngaahi fakaʻilonga ʻe hoko kimuʻa pea toki ʻaloʻi mai ʻa Sīsū Kalaisí.

Ko e Hāʻele ʻAnga Ua Maí, tā ʻe Harry Anderson

Fakaʻaliʻali e fakatātā ʻoku ʻoatu heni ʻo e Hāʻele ʻAnga Ua Mai ʻa Sīsū Kalaisí, pea ʻeke:

• Ko e hā ha ngaahi fakaʻilonga pe ngaahi tūkunga ʻo e ngaahi ʻaho fakaʻosí mo e Hāʻele ʻAnga Ua Maí naʻe kikiteʻi te ne lava ʻo fakatupu ha ongoʻi tailiili ʻi he kakaí? (Kapau ʻe faigataʻaʻia e kau akó ʻi hono ʻiloʻi e ngaahi fakaʻilonga ʻo e ngaahi kuongá, te ke lava ʻo fakaafeʻi ke nau toe vakaiʻi nounou ʻa e fakamatala ki he “Ngaahi Fakaʻilonga ʻo e Ngaahi Kuongá” ʻi he Fakahinohino ki he Ngaahi Folofolá [vakai, scriptures.ChurchofJesusChrist.org].)

• Ko e hā te tau lava ʻo ako mei he foʻi moʻoni ʻoku fakahā kimuʻa ʻe he ʻEikí ʻa e ngaahi fakaʻilongá peá Ne toki hāʻele mai ki Hono kakaí?

• ʻE tokoniʻi fēfē kitautolu ʻe he Tohi ʻa Molomoná ke fakasiʻisiʻi ʻetau ongoʻi hohaʻá, kae mateuteu lelei ange, mo fiefia ange ki he toe hāʻele mai ʻa e ʻEikí ki he māmaní? (Mahalo te ke loto ke toe vakaiʻi e lea ʻa Palesiteni Penisoni ʻi he talateu ʻo e naunau teuteú.)

Ko Hono Fakatupulaki ʻEtau Founga Akoʻí mo e Akó

ʻOange ha faingamālie ki he kau akó ke nau fefakamālohiaʻaki. ʻOku ʻikai ko ʻetau faʻa fakataha pē ko e kau ākonga ʻa Sīsū Kalaisí ke tau ako maʻatautolu pē ka ke tau fetokoniʻaki mo fefakamālohiaʻaki (vakai, Molonai 6:4–5). Lolotonga e kalasí, kumi ha ngaahi founga ke fokotuʻu ai ha ngaahi faingamālie maʻá e kau akó ke nau fepōtalanoaʻaki fakatoʻu. Mahalo ko e taimi lelei ki he ngaahi fepōtalanoaʻaki ko ʻení ʻa e taimi ʻoku fakaafeʻi ai e kau akó ke nau talanoa mo ha taha pe fokotuʻu ha kiʻi kulupu fealeaʻaki. Lolotonga e ngaahi fealeaʻaki fakakalasí, tokanga ke ʻoua naʻá ke puleʻi e fepōtalanoaʻakí. Hangē ko ʻení, kimuʻa peá ke tali ha fehuʻi pe meʻa ʻoku tokanga ki ai ha taha ako, fakakaukau ke fakaafeʻi hono toʻú ke nau tomuʻa fai e talí. Poupouʻi e kau akó ke vahevahe ʻenau ngaahi aʻusiá, kae ʻikai ko hoʻo vahevahe atu pē ʻe koe hoʻo ngaahi aʻusia fakataautaha ʻokú ke saiʻia aí. ʻOua naʻá ke fakasio pē ki ha ngaahi faingamālie ke fakahoko ai hoʻo fakamoʻoní, ka ke ʻoange foki mo ha faingamālie ki he kau akó ke nau fakahoko ʻenau fakamoʻoní.

Fakaʻaliʻali e fehuʻi ko ʻení: Fakatatau ki he Hilamani 14:9–13, ko e hā naʻe haʻu ai ʻa Samuela ʻo malanga mo kikite ki he kau Nīfaí?

Fakakaukau ke fakaafeʻi e kau akó ke nau ngāue fakahoa ki hono ako e potu folofola kuo vahé mo aleaʻi e founga te nau tali ai e fehuʻí. Fakaafeʻi ha niʻihi tokosiʻi ʻo e kau akó ke nau vahevahe ʻa e meʻa ne nau akó. Fakatatau ki he ngaahi fakamatala ʻa e kau akó, fakakaukau pe ko fē ʻi he ngaahi fehuʻi ko ʻení te ke ala ʻeke ke tokoniʻi ai e kau akó ke nau teuteu ke fakaʻaongaʻi e meʻa ʻoku nau akó:

• ʻE liliu fēfē ʻetau moʻuí ʻi heʻetau ʻilo mo tui ki he ngaahi fakaʻilonga mo e ngaahi meʻa fakaofo ʻo e hāʻele mai ʻa Kalaisí? (ʻOange ha taimi ki he kau akó ke nau aleaʻi ai e ngaahi fehuʻi ko ʻení, pea fakaafeʻi leva kinautolu ke vahevahe ʻenau fakakaukaú mo e toenga ʻo e kalasí. Tokoniʻi e kau akó ke nau ʻiloʻi ha tefitoʻi moʻoni tatau mo e meʻá ni: Ko hono ʻiloʻi mo fakatokangaʻi ʻo e ngaahi fakaʻilonga ʻo e hāʻele mai ʻa Kalaisí ʻe lava ke tokoni ia ʻi hono tākiekina kitautolu ke tui kiate Ia mo fakatomala mei heʻetau ngaahi angahalá.)

• Ko e hā ʻoku totonu ke hanga ai ʻe he ngaahi fakaʻilonga mo e ngaahi meʻa fakaofo ʻoku fekauʻaki mo e Hāʻele ʻAnga Ua Mai ʻa e ʻEikí ʻo fakatupulaki ʻetau ʻamanaki leleí kae ʻoua te ne fakalahi ʻetau loto-tailiilí? Ko e hā ha ngaahi founga ʻoku fakahaaʻi mai ʻe he ngaahi fakaʻilonga mo e ngaahi meʻa fakaofo kau ki he Hāʻele ʻAnga Ua Maí e ʻofa mo e tokanga ʻa e ʻOtuá ki Heʻene fānaú?

• Ko e hā ha akonaki fakaepalōfita pe fakaʻilonga ʻo e Hāʻele ʻAnga Ua Maí kuó ne ueʻi fakalaumālie koe ke teuteu lelei ange ki he toe hāʻele mai ʻa e ʻEikí? (Ke tokoni ke vakai e kau akó ki he anga hono fakahaaʻi mai e ʻofa ʻa e ʻOtuá ʻi hotau kuongá, te ke lava ke fakaafeʻi kinautolu ke vahevahe pe kumi ki he meʻa ne toki akoʻi mai ʻe he kau palōfita mo e kau ʻaposetolo moʻuí kau ki he teuteu ki he toe hāʻele mai ʻa e ʻEikí.)

Fakaʻaliʻali e fakamatala ko ʻeni meia ʻEletā D. Toti Kulisitofasoni:

ʻEletā D. Toti Kulisitofasoni

ʻUluakí, pea ʻoku mahuʻinga ki he toe hāʻele mai ʻa e ʻEikí, ʻa e ʻi ai ʻi he māmaní ha kakai naʻa nau teuteu ke talitali Ia ʻi Heʻene hāʻele maí. (“Teuteu ki he Toe Hāʻele Mai ʻa e ʻEikí,” Ensign pe Liahona, Mē 2019, 82)

ʻOange ha kiʻi taimi ki he kau akó ke nau fakalaulauloto mo hiki ʻenau ngaahi fakakaukau fekauʻaki mo e fehuʻi ko ʻení:

• Ko e hā ʻoku fie maʻu ke ke kamata fakahoko pe taʻofi hono fakahokó koeʻuhi kae lava ke ke ongoʻi mateuteu lelei ange ai ke talitali ʻa Sīsū Kalaisi ʻi Heʻene hāʻele maí?

ʻOku siviʻi e tui ʻa e kakai tuí ʻi heʻenau tatali fakaʻutumauku ki hono fakakakato ʻo e ngaahi fakaʻilonga ne kikiteʻí.

Fakakaukau ke vahevahe e kalasí ki ha fanga kiʻi kulupu fealeaʻaki. Fakaafeʻi e kulupu takitaha ke nau toe vakaiʻi fakataha e Hilamani 16:13–22 mo e 3 Nīfai 1:4–15, 22, ʻo kumi ki he founga naʻe ueʻi ai ʻe Sētane ʻa e loto-veiveiuá ki hono ʻaloʻi mai ʻo e Fakamoʻuí mo e anga e fakafeangainga ʻa e kau tui faivelengá ki aí. Hili ha taimi feʻunga, fakaafeʻi ha taha mei he kulupu takitaha ke vahevahe e meʻa naʻá ne maʻú. ʻI hono vahevahe ʻe he kau akó ʻenau fakakaukaú, fakakaukau ke ʻeke ha niʻihi pe kotoa ʻo e ngaahi fehuʻí ni ke tokoni ki hono fakaloloto hoʻo fealēleaʻaki fakakalasí:

• ʻOku fakaʻaongaʻi fēfē e ngaahi founga tatau ko ʻení ki hono fakamafola ʻo e veiveiuá ʻi hotau kuongá ni?

• Ko e hā naʻe fakahoko ʻe he kau Nīfai mo e kau Leimana ʻe niʻihi ke nau tuʻu maʻu ai he taimi ne nau fehangahangai ai mo e loto-veiveiuá mo e fakafepaki mei he kakai taʻe tuí? (Mahalo ʻe lava ke ke fakaʻaliʻali ha tefitoʻi moʻoni hangē ko ʻení: ʻE lava ke tokoniʻi kitautolu ʻe he falala ki he ʻEikí mo sio fakamamaʻu ki Heʻene hāʻele maí ke tau tali ʻaki ʻi he tui ʻa e veiveiuá mo e fakamahamahaló.)

• Ko e hā te tau lava ʻo fakahoko ke fakapapauʻi ai te tau tuʻu maʻu mo tuʻu ʻaliʻaliaki ʻi heʻetau ʻamanaki atu ki he Hāʻele ʻAnga Ua Mai ʻa Sīsū Kalaisí? (Fakakaukau ke toe vakaiʻi e ngaahi fakamatala ʻa Palesiteni Poni L. ʻOsikasoni mo ʻEletā D. Toti Kulisitofasoni ʻi he konga 2 ʻo e naunau teuteú.)

• Kuo tokoniʻi fēfē koe ʻe he falala ki he ʻEikí he taimi ʻokú ke fehangahangai ai mo e puputuʻú mo e ngaahi pōpoaki ʻoku malava ke ne fakatupu e loto-veiveiuá? Te tau lava ʻo fetokoniʻaki fēfē ke tuʻu ʻaliʻaliaki ʻi heʻetau teuteu ki he toe hāʻele mai ʻa e ʻEikí?

Fakaafeʻi e kau akó ke nau fakalaulauloto fakalongolongo ki he meʻa ne nau ako mo ongoʻi kau kia Sīsū Kalaisi mo e Hāʻele ʻAnga Ua Maí ʻi heʻenau teuteu mo kau mai ki he kalasi ko ʻení. Hili ia pea ʻoange ha taimi ki he kau akó ke vahevahe ai ʻenau fakamoʻoni ki he ʻEikí mo e ʻamanaki lelei ʻoku nau maʻu ʻi heʻenau ʻiloʻi te Ne toe hāʻele maí.

Ki he Kalasi Hokó

Fakamatalaʻi ange ʻi he lolotonga e kalasi hono hokó, ʻe maʻu ʻe he kau akó e faingamālie ke nau fakakaukau ki he meʻa ʻe hoko ʻi he taimi te nau nofo ai ʻi he ʻao ʻo e Fakamoʻuí pea feohi mo Iá. ʻI hono ako ʻe he kau akó e naunau teuteu ʻa e kalasi, fakaafeʻi ke nau kumi e meʻa te nau lava ʻo ako kau ki he natulá mo e ʻulungaanga ʻo Sīsū Kalaisi mei Heʻene ngāue ʻi he lotolotonga ʻo kinautolu ʻi he ongo ʻAmeliká.