“Lēsoni 17 Naunau ʻa e Faiakó: Ko e Kau ki he Siasi ʻo e ʻEikí,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 17 Naunau ʻa e Faiakó,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 17 Naunau ʻa e Faiakó
Ko e Kau ki he Siasi ʻo e ʻEikí
Hangē ko ia naʻá Ne fai ki hono kau muimui ʻi Palesitainé, naʻe fokotuʻu ʻe Sīsū Kalaisi Hono Siasí ʻi he lotolotonga ʻo e kau Nīfaí mo e kau Leimaná. Naʻá Ne ui ha kau ākonga ʻe toko hongofulu mā ua pea ʻoange kiate kinautolu ʻa e mafai ʻo e lakanga fakataulaʻeikí ke tataki ʻaki Hono Siasí. ʻE ʻoatu ʻe he lēsoni ko ʻení ha faingamālie ki he kau akó ke nau tokanga taha ki he ouau ʻo e sākalamēnití mo ʻiloʻi e meʻa ke nau fai ke hoko ia ko ha aʻusia ʻuhingamālie ange pea fakatefito ʻia Kalaisi. ʻE toe fakapapauʻi foki ʻe he kau akó ʻa e meʻa te nau lava ʻo fakahoko ke tokoniʻi ai e niʻihi kehé ke nau ongoʻi ʻoku nau kau mai pea fakafeohi ʻi honau ngaahi uōtí pe koló.
Ngaahi Fokotuʻu ki hono Akoʻí
ʻOku fakahoko ʻe Sīsū Kalaisi ʻa e sākalamēnití pea fekauʻi e kakaí ke nau faʻa fakataha pea ʻoua naʻa taʻofi ha taha ʻi haʻane kau mai ki heʻenau lotú.
Fakaʻaliʻali ʻa e ʻīmisi ko ʻení, pea fakamanatu ki he kau akó ko e konga e ngāue fakaetauhi ʻa Sīsū Kalaisi ki he kau Nīfaí mo e kau Leimaná, ko ʻEne foaki e mafai ʻo e lakakanga fakataulaʻeikí ki Heʻene kau ākonga ʻe toko hongofulu mā uá mo fokotuʻu Hono Siasí (vakai, 3 Nīfai 11:18–22; 12:1; 18:5, 37; 26:17–21).
-
Ko e hā ‘okú ke pehē ai naʻe mahuʻinga lahi ki he ʻEikí ke fokotuʻu Hono Siasí, ʻi he kuonga muʻá mo hotau kuonga ní foki? (Te ke lava ‘o fakaafeʻi e kau akó ke nau toe vakaiʻi e lea ʻa ʻEletā D. Toti Kulisitofasoni ʻi he konga 1 ʻo e naunau teuteú.)
Fakamahinoʻi ange neongo ʻoku ʻi ai ha ngaahi konga lahi ʻo e Siasí te tau lava ʻo ako lahi ange ki ai, ka ʻe nofotaha e lēsoni ko ʻení ʻi ha tafaʻaki pē ʻe ua. Fakaʻaliʻali ʻa e ngaahi fehuʻi ko ʻení, pea fakaafeʻi e kau akó ke nau fili ha fehuʻi ʻe ngalingali te nau toe fai ha fekumi lahi ange ki ai:
-
Ko e hā te u lava ʻo fai ke hoko ai e sākalamēnití ko ha konga mahuʻingamālie ange ʻo ʻeku aʻusia fakalotú?
-
Te u tokoni fēfē ke fokotuʻu ha aʻusia fiefia mo houngaʻia ange maʻá e kakai kotoa pē ʻi he siasí?
Ko Hono Fakatupulaki ʻEtau Founga Akoʻí mo e Akó
ʻE lava ke tokoni e ngaahi fealeaʻaki mo e ngāue ʻi he kulupu tokosiʻí ke fakaloloto ange e ako ʻa e kau akó. ʻOku faʻa malava ʻe he fanga kiʻi kulupu īkí ʻo fakafaingofuaʻi e kau mai ʻa ha kau ako tokolahi ange mo ʻoatu ha ʻātakai malu te nau lava ai ʻo fevahevaheʻaki ʻenau ngaahi fakakaukaú, ongó, mo e aʻusiá. ʻOku toe lava foki ke tokoni e fanga kiʻi kulupu īkí ki hono fakatupulaki ʻe he kau akó ʻa e ngaahi poto fakasōsiale mo fakafetuʻutakí. Ke tokoni ke maʻu ʻe he kau akó ha aʻusia mahuʻingamālie ʻi he fanga kiʻi kulupu īkí, mahalo ʻe tokoni hano ʻomi ʻo e ngaahi meʻá ni: (1) ngaahi maʻuʻanga tokoni hangē ko e ngaahi lea, ngaahi tatau ʻo e lea ʻi he konifelenisi lahí, pe ngaahi pepa tufa kehe, (2) ngaahi fakahinohino mahino mo e ngaahi fehu‘i fakatupu fakakaukau, mo (3) ha taimi lahi ki he fealēleaʻakí.
Fakaafeʻi e kau akó ke nau fokotuʻu ha ngaahi kulupu iiki (toko tolu pe toko fā ki he kulupu) mo kinautolu naʻa nau fili ʻa e fehuʻi tatau. ʻOange ki he kulupu takitaha ha laʻipepa tufa ʻoku fekauʻaki mo ʻenau fehuʻí. (ʻOku maʻu lōua e laʻipepa tufá ʻi he fakaʻosinga ʻo e lēsoni ko ʻení.) Fakaafeʻi e kau akó ke nau fakaʻaongaʻi e ngaahi fehuʻi mo e maʻuʻanga tokoni ʻi he laʻipepa tufá ke fakatupulakiʻaki ha fepōtalanoaʻaki lelei. ʻI he fepōtalanoaʻaki ʻa e ngaahi kulupú, mahalo te ke lava ʻo takai holo ʻi he lokí ʻo fai ha fakahinohino mo ha tokoni ʻo ka fie maʻu.
Hili hono ʻoange ki he ngaahi kulupú ha taimi lahi ke aleaʻi ʻenau tefitó, fakaafeʻi ha kau ako ke nau vahevahe mo e kalasí ha niʻihi ʻo e ngaahi tefitoʻi moʻoni ne nau ako mei he ngaahi akonaki ʻa e Fakamoʻuí ki he kakaí. Mahalo ʻe tokoni ke tukutaha hoʻo tokangá ʻi he tefito ʻe taha ʻi ha kiʻi taimi siʻi pea toki hoko atu ki he tefito hono hokó.
Mahalo ʻe lava ke ʻiloʻi ʻe he kau akó ha ngaahi tefitoʻi moʻoni hangē ko ʻení:
-
ʻI he taimi ʻoku tau maʻu ai e sākalamēnití, ʻoku tau fakamoʻoni ai ki he Tamai Hēvaní ʻa ʻetau loto-lelei ke manatu maʻu pē kia Sīsū Kalaisi mo talangofua ki Heʻene ngaahi fekaú.
-
ʻI heʻetau maʻu ʻa e sākalamēnití mo feinga ke manatua maʻu pē ʻa Sīsū Kalaisí, te tau maʻu leva ʻa e Laumālie Māʻoniʻoní.
-
ʻOku fekauʻi kitautolu ʻe he ʻEikí ke talitali lelei mo fakakau e fānau kotoa ʻa e ʻOtuá mo tokoniʻi kinautolu ke haʻu kiate Ia.
ʻI hono ʻiloʻi ko ia ʻa e ngaahi tefitoʻi moʻoní, mahalo te ke kole ki he kau akó ke hiki kinautolu ʻi he palakipoé. Fakakaukau ke kole ki he kau akó ke vahevahe haʻanau faʻahinga fakakaukau pe fehuʻi fekauʻaki mo ha taha ʻo e ngaahi tefitoʻi moʻoni ko ʻení.
Fakaʻaliʻali ʻa e ngaahi fehuʻi ko ʻení, pea fakaafeʻi e kau akó ke fili ha fehuʻi ʻe taha pe fakatoloua ke nau fakalaulauloto ki ai. Te ke lava ʻo poupouʻi e kau akó ke nau hiki ha faʻahinga fakakaukau mo ha ngaahi ueʻi ʻoku nau maʻu.
-
Ko e hā te u fai ke u mateuteu ai ki hono maʻu ʻo e sākalamēnití pea ʻai ke hoko ia ko ha aʻusia mahuʻingamālie ange mo fakatefito ʻia Kalaisi?
-
Ko e hā te u fai ke tokoniʻi e niʻihi kehé ke nau ongoʻi ʻoku nau kau mo talitali lelei kinautolu ki he Siasi ʻo Sīsū Kalaisí?
Ki he Kalasi Hokó
Fakaafe‘i e kau akó ke nau fakakaukau ki ha niʻihi ʻo e ngaahi tūkunga ʻi he māmani ʻoku nau nofo aí ʻe lava ke ne fakafaingataʻaʻiaʻi hono moʻui ʻaki ʻo e ongoongoleleí. Poupou‘i e kau akó ke nau ako e naunau teuteu ki he kalasi hokó, ʻo kumi e meʻa te nau lava ʻo ako mei he ngaahi sīpinga ʻa e kakai mei he Tohi ʻa Molomoná ne nau feinga ke moʻui angatonu neongo ʻenau ʻi ha ʻātakai fai angahalá.
Ko Hono Tāpuakiʻi ʻo e Sākalamēnití
Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó—Lēsoni 17
Fakahinohino Maʻá e Kau Taki Fealēleaʻakí
Fakaʻaongaʻi ʻa e ngaahi fakahinohino ko ʻení ke tokoni ki he fealeaʻaki ʻa e kau mēmipa ʻi hoʻo kulupú. Poupouʻi e kau mēmipa kotoa pē hoʻo kulupú ke nau kau mai. Neongo ia, ʻoku ʻikai totonu ke ongoʻi haʻisia ha taha ke vahevahe ʻene fakakaukaú.
Ko e hā te u lava ʻo fai ke hoko ai e sākalamēnití ko ha konga mahuʻingamālie ange ia ʻo ʻeku aʻusia fakalotú?
Toe vakaiʻi ʻa e 3 Nīfai 18:6–12; 20:8–9 mo e ngaahi akonaki meia ʻEletā Tēvita A. Petinā mo D. Toti Kulisitofasoni ʻi he konga 2 ʻo e naunau teuteú. Hili iá pea aleaʻi leva e ngaahi fehuʻi ko ʻení:
-
Ko e hā e meʻa ʻoku tau fakamoʻoniʻi ki he Tamai Hēvaní ʻi he taimi ʻoku tau maʻu ai e sākalamēnití?
-
Ko e hā ha ngaahi founga ʻoku lava ai ʻe he sākalamēnití ʻo ʻai ke tau ofi ange ai ki he Fakamoʻuí? ʻOku makehe fēfē hoʻo moʻuí ʻi he taimi ʻokú ke tokanga taha ange ai kia Sīsū Kalaisi mo ongoʻi ofi ange ai kiate Iá?
-
Fakatatau ki he fakamatala ʻa ʻEletā Petinā mo Kulisitofāsoní, ʻoku totonu ke tokoni fēfē ʻe he sākalamēnití ʻetau moʻuí mo e ʻulungāngá ʻi he uike takitaha? ‘E ʻi ai nai ha taha ʻe loto-fiemālie ke fakamoʻoni ki he ngaahi tāpuakí ni mei haʻanau aʻusia tonu?
-
Ko e hā ha meʻa kuó ne tokoniʻi lahi taha koe ke hoko e sākalamēnití ko ha aʻusia ʻoku mahuʻinga mālie mo fakatefito ʻia Kalaisi?
© 2021 ʻe he Intellectual Reserve, Inc. Maʻu ʻa e ngaahi totonu fakalao kotoa pē.
Ko Hono Tāpuakiʻi ʻo e Sākalamēnití
Ko Hono Talitali Lelei ʻo e Kakai Kotoa pē ki he Siasí
Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó—Lēsoni 17
Fakahinohino Maʻá e Kau Taki Fealēleaʻakí
Fakaʻaongaʻi e ngaahi fakahinohino ko ʻení ke tokoni ki he fealeaʻaki ʻa e kau mēmipa hoʻo kulupú. Poupouʻi e kau mēmipa kotoa pē hoʻo kulupú ke nau kau mai. Neongo ia, ʻoku ʻikai totonu ke ongoʻi haʻisia ha taha ke vahevahe ʻene fakakaukaú.
Te u tokoni fēfē ke fokotuʻu ha aʻusia fiefia mo houngaʻia ange maʻá e kakai kotoa pē ʻi he siasí?
Mahalo te ke fie kamata ʻaki hoʻomou fealeaʻakí hano kumi ha ngaahi ʻuhinga angamaheni ʻe niʻihi ki he ʻuhinga ʻoku ongoʻi liʻekina ai e kakaí ʻi honau uōtí pe koló. Tuku ha taimi ke toe vakaiʻi e 3 Nīfai 18:22–25 mo e lea ‘a Sisitā Kalo F. Makongikī ʻi he konga 3 ‘o e naunau teuteú. Hili iá pea aleaʻi leva e ngaahi fehuʻi ko ʻení:
-
Ko e hā ha ngaahi akonaki mo e ngaahi tefitoʻi moʻoni mei he ngaahi veesi ko ʻení ʻokú ke pehē ʻoku mahuʻinga ke mahino ki he kāingalotu kotoa pē ʻo e Siasí? Ko e hā hono ʻuhingá?
-
Ko e hā ʻoku mahuʻinga taha kia koe ʻi he lea ʻa Sisitā Makongikií? Ko e hā ʻene ʻuhinga kiate koe ʻa e “vakai ki he [niʻihi kehé] ʻo hangē ko Kalaisí”? (Kalo F. Makongikī, “Lifting Others” [vitiō], ChurchofJesusChrist.org).
-
Ko e hā ha ngaahi sīpinga mei he moʻui ʻa e Fakamoʻuí ʻokú ne fakahaaʻi ai ʻEne hōifua ke talitali lelei mo fakakau mai e fānau kotoa ʻa e ʻOtuá ʻo tatau ai pē pe ko e hā honau tūkungá?
-
Te tau muimui fēfē ki he sīpinga ʻa e Fakamoʻuí ke fakakau mo tali lelei ange e kāingalotu mo e kau ʻaʻahi ʻoku nau ʻahia hotau ngaahi uōtí pe koló? Ko e hā kuo fai ʻe he kakaí ke tokoniʻi koe ke ke ongoʻi ʻokú ke kau mo talitali lelei koe ki he siasí?
© 2021 ʻe he Intellectual Reserve, Inc. Maʻu ʻa e ngaahi totonu fakalao kotoa pē.
Ko Hono Talitali Lelei ʻo e Kakai Kotoa pē ki he Siasí
