Lēsoni 23 Naunau Teuteu ki he Kalasí

kakai lalahi kei talavou ʻoku nau lue mo pōtalanoa

Ko e Talangofua ki he Ngaahi Fekau ʻa e ʻOtuá

Te ke maʻu ha faingamālie ʻi he ʻiuniti ko ʻení ke fakakaukau ki he founga te ke lava ai ʻo falala ki he ʻOtuá. Ko ha ʻelemēniti mahuʻinga ʻo e falala ki he ʻOtuá ko e ako ke talangofua loto-fiemālie ki Heʻene ngaahi fekaú. ʻOkú ke fakamahuʻingaʻi fēfē hoʻo talangofua ki he ngaahi fekau ʻa e ʻOtuá? ʻOku ʻi ai ha fekau ʻokú ke sio ʻoku fuʻu faingataʻa kiate koe ke tauhi? ʻI hoʻo ako e Tohi ʻa Molomoná ʻo teuteu ki he kalasi hokó, fakalaulauloto ki he taumuʻa e ngaahi fekau ʻa e ʻOtuá mo e ngaahi tāpuaki te ke lava ʻo maʻu ʻi hoʻo feinga ke faʻifaʻitaki ki he sīpinga talangofua ʻa e Fakamoʻuí.

Konga 1

Ko e hā te u lava ʻo ako ʻo kau ki he talangofuá meia Sīsū Kalaisi?

ʻOku tau ako mei he Fuakava Foʻoú naʻe ʻalu ʻa Sīsū Kalaisi kia Sione Papitaiso ke papitaiso koeʻuhi ke na lava ʻo “fai ki he māʻoniʻoni kotoa pē” (Mātiu 3:13–17). Hangē ko hono lekooti ʻi he Tohi ʻa Molomoná, naʻe fakamatalaʻi ʻe Nīfai e ʻuhinga naʻe papitaiso ai ʻa Sīsū Kalaisi neongo naʻe ʻikai haʻane angahala (vakai, 2 Nīfai 31:6–7).

fakaʻilonga, ako

Ako ke Teuteu ki he Kalasí

Lau ʻa e 2 Nīfai 31: 6–7, 10, pea sio ki he ngaahi ʻulungaanga ʻo Sīsū Kalaisi naʻe fakahaaʻi mai ʻe Nīfaí.

Ko hono papitaiso ʻe Sione ʻa Sīsū Kalaisí.

ʻI he taimi naʻe hā mai ai ʻa Sīsū Kalaisi ki he kau Nīfaí ʻi he fonua ko Mahú, naʻá Ne fakamamafaʻi e mahuʻinga ʻo e talangofua ki he ngaahi fekau ʻa ʻEne Tamaí. Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Sefilī R. Hōlani

Mei he ngaahi pōpoaki kotoa ʻoku lava ke maʻu mei he takainga tohi ʻo e taʻengatá, ko e hā ʻa e folofola naʻe ʻomi [ʻe he Fakamoʻuí]? Naʻe fanongo ʻa e kau Nīfai faivelengá ki heʻene folofolá: “Ko au ko e maama mo e moʻui ʻa e māmaní; pea kuó u inu mei he ipu kona ko ia naʻe tuku ʻe he Tamaí kiate aú, pea kuó u fakaongoongoleleiʻi ʻa e Tamaí ʻi heʻeku toʻo kiate au ʻa e ngaahi angahala ʻa e māmaní, ʻa ia kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.” [3 Nīfai 11:11]. Ngaahi foʻi lea ʻe fitungofulu. Ko e uho ʻo hono misiona ʻi he māmaní. Talangofua mo mateakiʻi e finangalo ʻo e Tamaí, tatau ai pē pe ko e hā e kona ʻo e ipú pe fakamamahi e meʻa ke totongí. (Christ and the New Covenant [1997], 251)

ʻI he ofi ki he fakaʻosinga ʻo ʻEne ngāue fakafaifekau ʻi he kau Nīfaí, naʻe folofola e ʻEikí ʻo pehē, “Naʻá ku haʻu ki he māmaní ke fai ʻa e finangalo ʻo ʻeku Tamaí, koeʻuhi naʻe fekauʻi au ʻe heʻeku Tamaí” (3 Nīfai 27:13).

fakaʻilonga, fakalaulauloto

Fakalaulauloto ke Teuteu ki he Kalasí

Ko e hā te ke lava ‘o ako fekauʻaki mo e talangofuá mei he sīpinga ʻa Sīsū Kalaisí?

Konga 2

Ko e hā ha ngaahi founga ʻe tāpuekina ai au ʻi hono tauhi e ngaahi fekau ʻa e ʻOtuá?

Hili ha taimi nounou mei he mavahe ʻa Līhai mo hono fāmilí mei Selusalema ki he feituʻu maomaonganoá, naʻe kamata ke lāunga ʻa Leimana mo Lemiuela ki heʻena tamaí. Naʻe loto-mamahi ʻa Nīfai ʻi he loto-fefeka ʻa hono ongo taʻoketé, ʻo ne lotua kinaua. ʻI he tali ki heʻene lotú, naʻe akoʻi ʻe he ʻEikí kia Nīfai ha foʻi moʻoni mahuʻinga ki he talangofuá. (Vakai, 1 Nīfai 2:11–12, 18–21.)

ʻoku lotu ʻa Nīfaí

fakaʻilonga, ako

Ako ke Teuteu ki he Kalasí

Lau ‘a e 1 Nīfai 2:20–21, pea fekumi ki he meʻa ne ako ʻe Nīfai fekauʻaki mo e talangofuá.

Naʻe lea ʻa Pīsope Sēlati Kōsei, ko e Pīsope Pulé ki he talaʻofa mei he folofola ko ʻení ʻo pehē:

Pīsope Sēlati Kōsei

ʻOku mahuʻinga e talaʻofa ko ʻení ki he talanoa mo e ngaahi akonaki ʻo e Tohi ʻa Molomoná. ʻOku hā ia ʻi he ngaahi veesi kehekehe ʻe 18, pea ʻi ha tohi ʻe fitu mei hono ngaahi tohi ʻe 15. Neongo ʻoku natula fakalaumālie e tāpuaki ʻo e koloaʻia ʻoku lave ki ai e ngaahi tohi ko ʻení, ka ʻoku kau foki ai mo e malava ke fiefia e kakai ʻa e ʻOtuá ʻi he tupulaki fakaʻekonōmiká pea mo moʻui fakafalala pē kiate kinautolu. (“Ko e Ngaahi Fakavaʻe Fakalaumālie ki he Tuʻunga Moʻui Fakafalala Pē ʻa e Siasí Kiate Kitá ʻi he Ngaahi Meʻa Fakapaʻangá,” Liahona, ʻAokosi 2018, 46)

ʻoku malanga ʻa e Tuʻi ko Penisimaní mei he funga tauá

ʻI he ʻamanaki ke hala e Tuʻi ko Penisimaní, naʻá ne tānaki fakataha mai ʻa hono kakaí ke fakahoko ha malanga fakaʻosi. Naʻa né akoʻi mei he konga ʻo ʻene malangá ko kitautolu kotoa ko e “kau tamaio‘eiki taʻeʻaonga” pea te tau moʻua maʻu pē ki he ʻOtuá (Mōsaia 2:20–21). Naʻe akoʻi ʻe he Tuʻi ko Penisimaní ʻa e ʻuhinga ʻoku fie maʻu ai ʻe he ʻOtuá ke tau tauhi ʻEne ngaahi fekaú, koeʻuhí ko e tuʻunga hotau moʻuá.

fakaʻilonga, ako

Ako ke Teuteu ki he Kalasí

Lau e Mōsaia 2:22, 41, pea fakakaukau ki he anga hono fakafaingamālieʻi kitautolu ʻe he talangofua ki he ngaahi fekau ʻa e ʻOtuá ke tau aʻusia ai e angalelei ʻa e ʻOtuá.

ko ha talavou ʻoku malimali

Naʻe akoʻi ʻe Palesiteni Siini B. Pingihami ko e Palesiteni Lahi ʻo e Fineʻofá ʻa e taumuʻa ʻo e ngaahi fekau ʻa e ʻOtuá ʻo pehē:

Palesiteni Siini B. Pingihami

Ko e hā ʻoku ʻomi ai ʻe he ʻOtuá kiate kitautolu e ngaahi fekaú? ʻOku fakataumuʻa nai ia ke haʻihaʻi ʻaki kitautolu, ʻo pōpula kiate Ia? Ko hono ʻaí ke toʻo ha faʻahinga faingamālie ke tau fiefia ai ʻi he māmaní? ʻIkai, ʻoku tonu ʻa hono fehangahangaí: ʻoku tuku mai ʻe he ʻOtuá kiate kitautolu e ngaahi fekaú koeʻuhi ko ʻEne ʻofa ʻiate kitautolú. ʻOkú Ne finangalo ke ʻoua naʻa tau loto-mamahi, mamahi, mo fakaʻiseʻisa. ‘Okú Ne ʻafioʻi ko e founga pē ke fiefia moʻoni ai ʻi he moʻuí ni mo maʻu e fiefia taʻe-fakangatangata ʻi he moʻui ka hokó ko e muimui ki he sīpinga ʻa Sīsū Kalaisi ʻo e talangofua ki he ngaahi fono ʻa e ʻOtuá. (“Obedience Brings Blessings” [address given at Brigham Young University–Hawaii commencement, Apr. 21, 2018], speeches.byuh.edu)

fakaʻilonga, aleaʻi

Aleaʻi ke Teuteu ki he Kalasí

Aleaʻi mo ha kaungāmeʻa pe ha mēmipa ʻo e fāmilí, e founga kuo tāpuekina ai hoʻo moʻuí ʻi he talangofua ki he ngaahi fekau ʻa e ʻOtuá.

Konga 3

Ko e hā te u lava ʻo ako fekauʻaki mo e talangofuá mei he kau tau kei talavoú?

Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku mahuʻinga e tauhi faivelenga ki he ngaahi fekau ʻa e ʻOtuá ki hono maʻu ʻo e Laumālie Māʻoniʻoní.” Naʻá ne tuhu leva ki he kau tau kei talavoú ko ha sīpinga ia ʻo e talangofuá mo pehē ʻoku “totonu ke tau feinga ke tatau mo [kinautolu]” (“Maʻu ʻa e Laumālie Māʻoniʻoní,” Ensign pe Liahona, Nōvema 2010, 96, 97).

Ko e kau tau kei talavoú ko e fānau ia ʻa e kau Leimana ne ului ki he ʻEikí hili hono akoʻi kinautolu ʻe he ngaahi foha ʻo Mōsaiá. Naʻe ui e kau Leimana ko ʻení ko e kakai ʻo ʻĀmoní pe ko e kau ʻAnitai-Nīfai-Līhaí. Hili ʻenau uluí, naʻe palōmesi e kau ʻAnitai-Nīfai-Līhaí ki he ʻOtuá he ʻikai pe ke nau toe ala ki heʻenau mahafu taú. (Vakai, ʻAlamā 23:4–7, 16–17.) Kimui ange ai, na‘e fili honau ngaahi fohá, ʻa ia naʻe ʻikai ke nau fakahoko e fuakava ko ʻení ke nau kau ki he kautau ʻa e kau Nīfaí ʻo maluʻi honau fonuá. Naʻe loto e kau tau kei talavoú ke hoko ʻa Hilamani ko honau taki. Naʻe lahi ha ngaahi tau mo e kau Leimaná ne nau kau ki ai. Neongo na‘e lahi ʻenau lavelaveá, ka naʻe fakaofo ʻa e ʻikai ke mate hanau taha ʻi he taú. (Vakai, ‘Alamā 53:10–19; 57:22–25; 58:39.)

Kau Tau Kei Talavou ʻe Toko Ua Afé, tā ʻe Arnold Friberg

fakaʻilonga, ako

Ako ke Teuteu ki he Kalasí

Lau e ʻAlamā 57: 21, 27; 58:40. ʻI he vakai ʻo ope atu mei he puipuituʻa ʻo ha fepakipaki fakakautau, sio ki he meʻa te ke lava ʻo ako ʻo kau ki he talangofuá mei he ngaahi sīpinga ʻa e kau tau kei talavoú.

Naʻe fai ʻe Palesiteni Lāsolo M. Nalesoni e faleʻi ko ʻení ki he ngaahi mātuʻá fekauʻaki mo e mahuʻinga ʻenau akoʻi e talangofuá ki heʻenau fānaú:

Palesiteni Lāsolo M. Nalesoni

Akoʻi ange ʻa e tui ke tauhi kotoa e ngaahi fekau ʻa e ʻOtuá, ʻi he ʻilo pau ʻoku ʻomi kinautolú ke faitāpuekina ʻEne fānaú mo nau fiefia ai [vakai, 2 Nīfai 2:25]. Fakatokanga ange te nau fetaulaki mo ha kakai ʻoku nau filifili pē ʻa e fekau ke nau tauhí pea nau liʻaki leva e toenga ʻoku nau fili ke maumauʻí. ʻOku ou ui ʻeni ko e talangofua filifilí. He ʻikai ola lelei e faʻahinga filifili ia ko ʻení. ʻE iku ia ki he mamahí. ʻOku tau tauhi e ngaahi fekau kotoa ʻa e ʻOtuá heʻetau teuteu atu ke feʻiloaki mo Iá. ʻOku fie maʻu e tuí ka te talangofua ki ai, pea ʻe fakamālohia e tui ko iá ʻi hono tauhi ʻEne ngaahi fekaú.. (“Fehangahangai mo e Kahaʻú ʻi he Tui,” Ensign pe Liahona, Mē 2011, 34)

ʻE ʻi ai e taimi te tau ongoʻi lomekina ʻi heʻetau feinga ke tauhi kotoa e ngaahi fekau ʻa e ʻOtuá. Ke tokoni ke mahino kiate kitautolu e founga ʻe lava ke fakatupulaki ai ʻe he Fakamoʻuí ʻetau malava ke talangofuá, naʻe akoʻi ʻe ʻEletā Petinā ʻo pehē:

ʻEletā Tēvita A. Petinā

Kāinga, ʻoku mātuʻaki mahuʻinga kiate kitautolu hono kotoa ke tau manatu ko e fakalakalaka ko ia ki ha tuʻunga māʻolunga ange mo fakalaumālie lahi angé ʻoku ʻikai lavaʻi ia ʻi ha vilitaki fakataautaha, loto fakapapauʻi ange, mo loto-toʻa lahi ange; ka mei he mālohi fakaivia ʻo e Fakalelei ʻa e ʻEiki ko Sīsū Kalaisí. (“In a State of Happiness (Mormon 7:7)” [Brigham Young University–Idaho devotional, Jan. 6, 2004], byui.edu)

fakaʻilonga, fakalaulauloto

Fakalaulauloto ke Teuteu ki he Kalasí

Makatu‘unga ʻi he meʻa kuó ke ako ʻo kau ki he talangofuá ʻi he lēsoni ko ʻení, ko e hā ha faleʻi te ke ʻoange ki ha taha ʻoku faingataʻaʻia ʻi hono tauhi e ngaahi fekaú?

Fie Ako Lahi Ange? (Fili pē)

Ko fē te u ako lahi ange ai ʻo kau ki he ngaahi tāpuaki ʻo e talangofuá?

ʻOku akoʻi ʻe Palesiteni Tōmasi S. Monisoni ʻoku fakaava ʻi he muimui ki he sīpinga talangofua ʻa e ʻEikí e ngaahi tāpuaki maʻongoʻonga taha ʻa e ʻOtuá (mei he lea ko e “ʻOku ʻOmi ʻe he Talangofuá ʻa e Ngaahi Tāpuakí,” Ensign pe Liahona, Mē 2013, 89–92).

ʻE lava ke maluʻi fēfē au ʻe he talangofua kakató mei he fakatuʻutāmakí?