Lēsoni 2 Naunau Teuteu ki he Kalasí

Ko e Tali ki he Kau Palōfita ʻa e ʻEikí

ʻoku malanga ʻa Līhai ki ha kakai tokolahi

Mahalo pē kuó ke mamata ki he tali kehekehe ʻa e kakaí ki he ngaahi pōpoaki ne ʻomi ʻe he kau palōfitá. Naʻe pehē foki mo e ngaahi tali kehekehe ʻa e kakai ʻo e Tohi ʻa Molomoná. Ko e hā te tau lava ʻo ako mei he kakai pea mo e kau palōfita ʻo e Tohi ʻa Molomoná fekauʻaki mo e tali ki he ʻEikí pea mo ʻEne ngaahi pōpoakí? ʻI hoʻo akó, fakakaukau ki he founga te ke tali ai ʻi he tui mo e talangofua lahi ange ki he folofola ʻa e ʻOtuá ʻa ia ʻoku fakafou mai ʻi Heʻene kau palōfitá.

Konga 1

ʻOku fakahaaʻi fēfē ʻe he ngaahi fakatokanga ʻa e kau palōfitá ʻa e ʻofa ʻa e ʻEikí kiate aú?

Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí:

Palesiteni Henelī B. ʻAealingi

Tupu mei he angalelei ʻa e ʻEikí, ʻokú Ne uiuiʻi ha kau tamaioʻeiki ke fakatokanga ki he kakaí telia e fakatuʻutāmakí. ʻOku toe faingataʻa mo mahuʻinga ange ʻa e uiuiʻi ke fakatokangá he ʻoku ʻikai fakakaukau e kakaí ia ʻoku moʻoni e ngaahi fakatokanga mahuʻinga taha ki he ngaahi fakatuʻutāmakí. (“T au Hiki Hake Hotau Leʻo ʻo e Fakatokangá,” Liahona, Sānuali 2009, 32)

fakaʻilonga, ako

Ako ke Teuteu ki he Kalasí

Lau ʻa e 1 Nīfai 1:4, ʻo kumi ki he tokotaha ʻa ia naʻe fekauʻi ʻe he ʻEikí ke fakatokanga ki he kakai ʻo Selusalemá pea ko e hā ʻa e pōpoaki naʻa nau ʻoatú.

Hangē ko e kau palōfita tokolahi kimuʻa ʻia Līhaí, naʻá ne lotu maʻá e kakai ʻo Selusalemá. Naʻe ikunaʻi leva ia ʻe he Laumālié peá ne mamata kia Sīsū Kalaisi ʻi ha meʻa-hā-mai. Naʻe fakahā ange ʻe he ʻEikí kia Līhai ha tohi pea kole ange kiate ia ke ne lau ia. (Vakai, 1 Nīfai 1:5–12.)

ko Līhai ʻi he funga moʻungá

fakaʻilonga, ako

Ako ke Teuteu ki he Kalasí

Lau ʻa e 1 Nīfai 1:13–14, ʻo kumi ki he me‘a naʻe mahino kia Līhai fekauʻaki mo e ʻEikí. Mahalo te ke fie fakaʻilongaʻi ʻa e meʻa naʻá ke maʻú.

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā D. Toti Kulisitofasoni

Ko e fakaʻaiʻai ko ia ke fai ʻa e leʻo ʻo e fakatokangá ko e ʻofá—ʻofa ki he ʻOtuá mo e ʻofa he kāingá. Ko e fakatokangá ke tokanga.(“Ko e Leʻo ʻo e Fakatokangá,” Liahona, Mē 2017, 109)

fakaʻilonga, ako

Ako ke Teuteu ki he Kalasí

Lau ʻa e 1 Nīfai 1:19–20, ʻo kumi ki he founga ne tali ʻaki ʻe he kakai ʻo Selusalemá ʻa e pōpoaki naʻe vahevahe ʻe Līhaí.

Malanga ʻa Līhai ʻi Selusalemá, tā fakatātaaʻi ʻe Del Parson

ʻI hotau kuongá ni, kuo ui ʻe he ʻEikí ha kau tangata ʻe toko 15 (ko e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá) ke hoko ko ha kau palōfita, kau tangata kikite, mo e kau tangata maʻu fakahā. Naʻe akoʻi ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo hono maʻu ha kau palōfita ʻi he māmaní:

ʻEletā ʻUlise Soālesi

Ko hono maʻu ʻo e kau palōfitá, ko ha fakaʻilonga ia ʻo e ʻofa ʻa e ʻOtuá ki Heʻene fānaú. ʻOku nau fakahā ki honau kakaí e ngaahi talaʻofa mo e natula totonu ʻo e ʻOtuá pea mo Sīsū Kalaisí. ….(“ ʻOku Lea ʻa e Kau Palōfitá ʻi he Mālohi ʻo e Laumālie Māʻoniʻoní,” Liahona, Mē 2018, 99)

Naʻe akoʻi foki ʻe Nīfai ko e Fakamo‘uí ko e uho ia ʻo e meʻa ʻoku akoʻi mo hiki ʻe he kau palōfitá.

fakaʻilonga, ako

Ako ke Teuteu ki he Kalasí

Lau ʻa e 2 Nīfai 25:26, ʻo kumi pe ko e hā ne akoʻi mo fakamoʻoni ai e kau palōfitá kia Sīsū Kalaisí.

fakaʻilonga, fakalaulauloto

Fakalaulauloto ke Teuteu ki he Kalasí

Kuo tokoniʻi fēfē ʻe he kau palōfitá ke fakamālohia hoʻo tui ki he Fakamoʻuí? Ko e hā ha ngaahi pōpoaki fakaepalōfita kimuí ni kuó ne tokoni‘i koe ke mahino lelei ange ʻa e natula ʻo e ʻOtuá mo Sīsū Kalaisí?

Konga 2

Te u ʻilo fēfē ʻoku fakafofongaʻi ʻe he palōfita moʻuí ʻa e ʻEikí?

Fakakaukauloto pe naʻe mei ongoʻi fēfē nai ke hoko ko e taha ʻo e fānau ʻa Līhaí ʻi he taimi naʻá ne fakahā ange ai ʻoku finangalo ʻa e ʻEikí ke nau mavahe mei honau ʻapí pea fononga ki he feituʻu maomaonganoá. ʻOkú ke pehē naʻá ke mei tali fēfē ʻa e pōpoaki ko ʻení?

fakaʻilonga, ako

Ako ke Teuteu ki he Kalasí

Lau ʻa e 1 Nīfai 2:11–13, 16–17, ʻo kumi ki he tali ʻa e ngaahi foha ʻo Līhaí kiate ia pea mo e pōpoaki ʻa e ʻEikí ke hola mei Selusalemá. Mahalo te ke fie fakaʻilongaʻi ʻa e meʻa naʻá ke maʻú.

Naʻe fakamatala ʻe Palesiteni ʻAealingi ʻo pehē:

Palesiteni Henelī B. ʻAealingi

ʻI he fāmili ʻo Līhaí, ko kinautolu pē naʻe tui pea maʻu ha fakahā fakafiemālié, naʻa nau lava ʻo mamata ki he fakatuʻutāmakí pea mo e hala ki he malú. Ko kinautolu naʻe ʻikai ke tuí, naʻe hangē ʻenau hiki ki he toafá ha fakakaukau valé, pea ʻikai ngata ai kae toe fakatuʻutāmaki foki. . (“Malu ʻi he Faleʻí,” Liahona, Sune 2008, 7)

fakaʻilonga, lekooti

Lekooti Hoʻo Ngaahi Fakakaukaú

Fakakaukau ke hiki ‘i hoʻo tohinoá ʻa e ngaahi tali ki he ngaahi fehuʻi ko ʻení: Ko e hā ʻe lava ke ke ako mei he ngaahi sīpinga ʻo e ngaahi foha ʻo Līhaí ʻe lava ke tataki ai hoʻo ngaahi tali ki he ngaahi akonaki fakaepalōfitá? Ko e fē ha taimi kuó ke maʻu ai ha fakamoʻoni ki hono ui ʻo ha palōfita pe ko ha pōpoaki ʻa ha palōfita?

Konga 3

Ko e hā te u lava ʻo ako mei he founga na‘e tali ʻaki ai ʻe he kakai ʻo e Tohi ʻa Molomoná ʻa e ngaahi pōpoaki ʻa e ʻEikí ʻa ia naʻe fakafou mai ʻi he kau palōfitá?

fakaʻilonga, ako

Ako ke Teuteu ki he Kalasí

Fili ha taha pe lahi ange ʻo e ngaahi sīpinga ko ʻeni ʻo ha palōfita ʻokú ne fakahoko mai ha pōpoaki mei he ʻEikí. ʻI hoʻo akó, sio ki he anga e fakafeangainga ʻa e kakaí. Feinga ke ʻiloʻi ʻa e ngaahi tefitoʻi moʻoni ʻokú ke ako fekauʻaki mo e tali ki he kau palōfitá. Fakakaukau ke hiki ʻa e ngaahi tefitoʻi moʻoni ʻokú ke maʻú pea ʻomi ia ki he kalasí.

• Tuʻi ko Penisimaní: Ngaahi Lea ʻa Molomona 1:17–18; Mōsaia 2:9; 4:1–3

• ʻApinetai: Mōsaia 12:1, 9; 13:1–3; 15:11; 17:11–20

• ʻAlamā: Mōsaia 17:1–4; 18:1–3, 14–16

• Nīfai, foha ʻo Hilamaní: Hilamani 7:11–13, 17–20; 8:4, 7–9

• Samuela: Hilamani 13:2–5, 8, 11; 16:1–3, 6–7, 15–18

Lolotonga ʻene hoko ko e Tokoni ʻUluaki ʻi he Kau Palesitenisī Lahi ʻo e Kau Finemuí, naʻe akoʻi ʻe Sisitā Kalo F. Makongikī ʻa e ngaahi meʻá ni:

Sisitā Kalo F. Makongikī

ʻOku ʻi ai ha fili ke tau fai. Te tau lava ʻo fili ke tukunoaʻi, vaʻinga ʻaki, taʻetokaʻi, pe fakafepakiʻi ʻa e ngaahi lea ʻa Kalaisi kuo lea ʻaki ʻe Heʻene kau tamaioʻeiki kuo fakanofó. Ka kuo akoʻi mai ʻe he Fakamoʻuí ko kinautolu ʻoku nau fai peheé ʻe tuʻusi ʻa kinautolu mei Heʻene kakai ʻo e fuakavá [vakai, 3 Nīfai 20:23]. …

… ʻOfa ke tau fili ke tuʻu mo e kau palōfitá pea moʻui ʻo fakatatau mo ʻenau ngaahi leá kae ʻoua kuo tau hoko ʻo taha ʻi he tuí, fakahaohaoaʻi ʻia Kalaisi, pea fonu ʻi he ʻilo ki he ʻAlo ʻo e ʻOtuá. (“Moʻui ʻo Fakatatau mo e Lea ʻa e Kau Palōfitá,” Liahona, Nōvema 2014, 79)

Fie Ako Lahi Ange? (Fili pē)

Ko e hā ʻoku akoʻi mai ʻe he ngaahi hingoa ʻo e tangata kikité mo e ʻAposetoló fekauʻaki mo e fatongia ʻo ha palōfitá?

Ke ʻilo lahi ange fekauʻaki mo e fatongia ʻo ha palōfita ko ha tangata kikité, ako ʻa e Mōsaia 8:16–18.

ʻE anga fēfē haʻaku lava ke fakatokangaʻi mo maʻu ʻeku fakamoʻoni ki he kau palōfita ʻo onopōní?

Mamataʻi e foʻi vitiō ʻo e Tohi ʻa Molomoná “Ko e lotua ʻe Nīfai ʻa Leimana mo Lemiuelá (1 Nīfai 2:8–24)” (6:02) ke vakai ki he founga naʻe maʻu ai ʻe Nīfai ha fakamahino ʻoku moʻoni ʻa e meʻa naʻe lea ʻaki heʻene tamaí.

ʻEletā Niila L. ʻEnitaseni

ʻOku akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene lea “Ko e Palōfita ʻa e ʻOtuá” (Liahona, Mē 2018, 24–27), fekauʻaki mo e fatongia ʻo e kau palōfitá, mo ʻenau holi ke ʻomai kitautolu ki he Fakamoʻuí, pea mo ʻetau malava ko ia ke tau ʻiloʻi ʻiate kitautolu pē ʻoku ui kinautolu ʻe he ʻOtuá.