Lēsoni 10 Naunau ʻa e Faiakó: Fakatomalá mo e Fakamolemolé
“Lēsoni 10 Naunau ʻa e Faiakó: Fakatomalá mo e Fakamolemolé Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 10 Naunau ʻa e Faiakó,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 10 Naunau ʻa e Faiakó
Fakatomalá mo e Fakamolemolé
ʻOku ʻomi ʻe he Tohi ʻa Molomoná ha ngaahi fakakaukau makehe ki he tokāteline ʻo e fakatomalá mo e fakamolemolé. ʻOku fakahaaʻi mai ʻe he aʻusia ʻa ʻĪnosí, kakai ʻo e Tuʻi ko Penisimaní pea mo ʻAlamā ko e Siʻí ko e Fakamoʻuí ʻa hotau fakamolemoleʻiʻanga mo e nongaʻanga ʻo e fakakaukaú. ʻE maʻu ʻe he kau akó ʻi he lēsoni ko ʻení ha faingamālie ke aleaʻi e ngaahi fehuʻi fekauʻaki mo e founga ʻo e fakatomalá pea ako ke ʻiloʻi lelei ange ʻa e taimi kuo fakamolemoleʻi ai kinautolu ʻe he Fakamoʻuí. ʻE fakakaukau foki e fānau akó ki he founga ʻe lava ke hokohoko atu ai ʻenau fakatomalá mo hoko ʻo hangē lahi ange ko Sīsū Kalaisí.
Ngaahi Fokotuʻu ki hono Akoʻí
Ko hono fakamatalaʻi ʻe ʻAlamā e founga naʻá ne maʻu ai e fakamolemole ʻa e Fakamoʻuí.
Fakaʻaliʻali e fehuʻi ko ʻeni ʻe tolu ʻi ha ngaahi feituʻu kehekehe ʻi he loki akó. Fokotuʻutuʻu ha ngaahi sea ʻi ha foʻi siakale ʻo ofi ki he fehuʻi takitaha. Fakamahinoʻi ange ʻoku meimei tatau e ngaahi fehuʻi ko ʻení mo e ngaahi fehuʻi ʻi he vahe 1 ʻo e naunau teuteú.
ʻOku ʻuhinga nai ki he hā ʻa e fakatomalá? Ko e hā ha faleʻi te ke fakahoko ki ha taha kuó ne foua ha ngaahi sitepu ʻo e fakatomalá, ka ʻoku ʻikai ke ne ongoʻi ha meʻa makehe?
Te tau maʻu fēfē ʻa e mālohi ke liliu moʻoní? Ko e hā te ke talaange ki ha tokotaha ʻoku loto-foʻi koeʻuhí kuo nau mātuʻaki feinga mālohi ke lelei ange ka ʻoku nau kei fakahoko pē ʻa e ngaahi fehalaaki tatau?
Fēfē kapau ʻoku ongoʻi ʻe ha tokotaha ia kuo siva ʻene ʻamanakí? Te ke tokoni fēfē nai ki ha tokotaha ʻokú ne ongoʻi ʻoku ʻikai totonu ke toe tokanga ia ke fakatomala koeʻuhí ʻoku fuʻu kovi ʻene ngaahi angahalá ʻaʻana pea he ʻikai toe lava ke fakamolemoleʻi ia?
Fakaafeʻi e fānau akó ke nau fakakaukauloto ko ha kau faifekau kinautolu ʻoku nau teuteu ke tali ha taha ʻo e ngaahi fehuʻi ʻi ʻolungá ki haʻanau fiefanongo pe ʻoku nau teuteu ke tokoniʻi ha tokotaha ʻoku nau ʻofa ai ʻa ia ʻoku fāifeinga ke fakatomala. Kole ange leva ki he kau akó ke nau tangutu ʻi ha sea ʻo ʻofi ki he ngaahi fehuʻi ʻoku nau fie aleaʻí. Poupouʻi e kau akó ke fakaʻaongaʻi e fakamatala ʻo e aʻusia ʻa ʻAlamaá mo e ngaahi potufolofola kehe mei he Tohi ʻa Molomoná ʻa ia ʻe ala tokoni ke tali ʻenau ngaahi fehuʻí.
Vahe ha tokotaha ke hoko ko e taki fealēleaʻaki ʻo e kulupu takitaha, pea ʻoange ki he taki takitaha ha tatau ʻo e ngaahi fakahinohino ʻoku maʻu ʻi he ngataʻanga ʻo e naunau fakalēsoni ko ʻení. ʻOange maʻá e ngaahi kulupú ha taimi feʻunga ke nau fakahoko ha ngaahi fealēleaʻaki ʻuhingamālie.
Hili hono ʻange maʻá e kau akó ha taimi ke nau fealēleaʻakí, ʻe lava ke ke fakaafeʻi ha tokotaha tokoni ʻe taha pe lahi ange mei he kulupu takitaha ke ne fakahoko ha fakamatala nounou ʻo e meʻa ne ako ʻe heʻenau kulupú mo ongoʻi lolotonga ʻenau fealēleaʻakí.
Naʻe aʻusia ʻe ʻĪnosi, kakai ʻo e Tuʻi ko Penisimaní mo ʻAlamā ʻa e fiefia ʻo e faʻa fakamolemolé.
Kole ki he kau akó ke nau fakakaukau pe kuo nau fifili nai pe ko ha kakai ʻoku nau ʻilo, ki he founga ke ʻilo ai pe kuo fakamolemoleʻi kinautolu ʻe he Fakamoʻuí pe ʻikaí. Fakaafeʻi e kau akó ke fekumi ʻi he ʻĪnosi 1:4–8; Mōsaia 4:1–3; mo e ʻAlamā 36:19–21, ʻo kumi ha ngaahi founga ke ʻilo ai kuo fakamolemoleʻi kitautolú.
Ko Hono Fakatupulaki ʻEtau Founga Akoʻí mo e Akó
Fakatokangaʻi e mālohi ʻo e founga akoʻi ʻoku fakatefito ʻia Kalaisí. Naʻe pehē ʻe Seti H Uepi, pule ʻo e Seminelí mo e ʻInisititiuti Fakalotú, ki he kau faiakó: “Ko e founga mahuʻinga pē taha ʻe lava ke tau tokoni ai ke fakatupulaki ʻa e tuí ʻi he toʻu tangata kei tupu haké ko hono fokotuʻu kakato ʻa Sīsū Kalaisi ko e uho ʻo ʻetau akoʻí mo e akó ʻaki hono tokonia e kau akó ke nau ʻiloʻi Ia, ke ako meiate Ia, pea ke feinga taʻetūkua ke hoko ʻo hangē ko Iá.” (“ʻOku Mau Lea ʻia Kalaisi, ʻOku Mau Fiefia ʻIa Kalaisi” [lea naʻe fakahoko ʻi he fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune, 2018], ChurchofJesusChrist.org). ʻI hoʻo teuteu ke faiakó, fehuʻi hifo kiate koe: ʻE anga fēfē haʻaku tokoni ki he kau akó ke nau ʻiloʻi lelei ange, ʻofa mo muimui he Fakamoʻuí ʻo fakafou ʻi he aʻusia fakaako ko ʻení?
Ko e ngaahi lea pe ngaahi kupuʻi lea fē ʻi he ngaahi veesi ko ʻení naʻe makehe kiate koé? Ko e ha hono ʻuhinga ʻokú ke pehē naʻe makehe ai kiate koe e ngaahi kupuʻi lea ko iá?
Ko e hā ʻoku mahuʻinga ai ke tau tui mo tali ʻoku finangalo lelei, malava mo vilitaki ʻa Sīsū Kalaisi ke fakamolemoleʻi ʻetau ngaahi angahalá mo toʻo ʻetau ongoʻi halaiá? (ʻE lava ke ke fakaafeʻi e kau akó ke nau toe vakaiʻi e konga tolu ʻo e naunau teuteú.)
Te tau lava fēfē ʻo ʻiloʻi kuo fakamolemoleʻi ʻe he Fakamoʻuí ʻetau ngaahi angahalá? (Tokoni ki he kau akó ke nau ʻiloʻi ha tefitoʻi moʻoni hangē ko ʻení ʻI he taimi ʻoku tau fakatomala fakamātoato ai mo tui kia Sīsū Kalaisí, ʻokú Ne fakamolemoleʻi mo tāpuekina kitautolu ʻaki ʻa e fiefia mo e nonga ʻa e fakakaukaú.)
Ko e fē ha taimi kuó ke aʻusia ai ʻa e fiefia mo e nonga ʻo e fakamolemole mei he ʻEikí, pea naʻe takiekina fēfē nai ʻe he aʻusiá ni hoʻo moʻuí? (Poupouʻi e kau akó ke nau talanoa fekauʻaki mo ʻenau ngaahi ongo kau ki he fakamolemolé kae ʻikai ko ʻenau ngaahi angahalá.) Ko e hā hoʻo fakakaukau mo e ngaahi ongo fekauʻaki mo e tuʻunga malava mo e finangalo lelei ʻa e Fakamoʻuí ke fakamolemoleʻi koé?
Lolotonga hoʻomou fealēleaʻakí, mahalo ʻe ʻaonga kiate koe ke vahevahe e fakamatala ko ʻeni ʻa ʻEletā Niila L. ʻEnitasení:
ʻĪmisi
ʻEletā Niila L. ʻEnitaseni
Kiate kinautolu ʻoku fakatomala moʻoni ka ʻoku hangē ʻoku teʻeki ke nau ongoʻi tauʻatāiná; mou hokohoko atu hono tauhi e ngaahi fekaú. ʻOku ou palōmesi atu, ʻe hoko mai e tauʻatāiná ʻo fakatatau ki he finangalo ʻo e ʻEikí. ʻOku fie maʻu foki ʻe he fakamoʻuí ha taimi.Fakatomala… Koeʻuhí Ke u Fakamoʻui ʻa Kimoutolu,” Liahona, Nōvema 2009, 42)
Fakatokangaʻi ange: Ko e fānau ko ia ʻoku nau ongoʻi loto-foʻi fekauʻaki mo e fakatomalá koeʻuhí ʻoku teʻeki ola lelei ʻenau feingá, fakahoko maʻanautolu ha lea poupou pea fakaafeʻi kinautolu ke hokohoko atu ʻenau tafoki ki he ʻEikí pea ʻe lava foki ke nau vahevahe ʻenau ngaahi hohaʻá ki heʻenau pīsopé.
ʻOange ha taimi maʻá e kau akó ke vakavakaiʻi ʻenau moʻuí pea ke feinga ke ʻiloʻi ha faʻahinga meʻa pē ʻoku fie maʻu ke nau fakatomala mei ai. Fakaafeʻi e fānaú ke lekooti ha faʻahinga ongo pē ʻoku nau maʻu.
Vahevahe hoʻo fakamoʻoni ki he tokāteline ʻo e fakatomalá mo e fakamolemolé. Fakakaukau ke fakaafeʻi e fānaú ke vahevahe foki ʻenau ngaahi fakamoʻoní.
Ki he Kalasi Hokó
ʻEke ki he fānaú e ngaahi founga kuo faitāpuekina ai kinautolu ʻe heʻenau ngaahi fuakava ʻi he papitaisó mo e ngaahi fuakava kehé. Fakaafeʻi kinautolu ʻi heʻenau ako ʻa e naunau teuteu ki he kalasi hokó, ke fakakaukau fekauʻaki mo honau hala ʻo e fuakavá pea mo e founga ʻoku haʻi ai kinautolu ʻe hono fakaʻapaʻapaʻi ʻenau ngaahi fuakavá ki he Fakamoʻuí mo Hono mālohí.
Fealēleaʻaki Faka-Kulupu Iiki Fekauʻaki mo e Fakatomalá
Ngaahi Akonaki mo e Tokāteline ʻo e Tohi ʻa Molomoná Tohi Naunau ʻa e Faiakó—Lēsoni 10
Fakamatala maʻá e taki fealēleaʻakí: Kātaki ʻo fakaʻaongaʻi e fakahinohino ko ʻení ke fakahoko ha fealēleaʻaki mo e kau mēmipa hoʻo kulupú. Poupouʻi e kau mēmipa kotoa hoʻo kulupú ke nau kau atu. Ka neongo ia, ʻoua naʻa fakamālohiʻi, ʻoku ʻikai totonu ke ongoʻi ʻe ha tokotaha ʻoku fakakounaʻi ke ne vahevahe ha meʻa.
Fakaafeʻi e kau mēmipa ʻo e kulupú ke fakaʻaongaʻi ha ngaahi miniti siʻi ke toe vakaiʻi ʻa e vahe 1 ʻo e naunau teuteú pea mo e ngaahi potufolofola ko ʻení (vakai, Mōsaia 27:35; ʻAlamā 36:12–13, 17–21, 24). Kole ki he kau akó ke kumi e ngaahi tefitoʻi moʻoni ʻoku fekauʻaki mo e fehuʻi hoʻo kulupú. Fakaafeʻi foki e kau mēmipa ʻo e kulupú ke nau mateuteu ke vahevahe ha faʻahinga potufolofola kehe pē kuo nau maʻu ʻi heʻenau teuteu ki he kalasi ko ʻení.
Fakakaukauʻi fakataha pe ko fē ʻi he ngaahi fehuʻi ko ʻení ʻe mahuʻinga taha ke aleaʻi ʻe hoʻomou kulupú: Ke mahino lelei ange ʻa e ngaahi fakakaukau ko ʻení, mahalo ʻe lelei ange ke aleaʻi lelei ha foʻi fehuʻi ʻe taha pe ua ʻi haʻamou feinga ke aleaʻi kotoa e ngaahi fehuʻí.
Ko e hā ʻa e ngaahi tefitoʻi moʻoni te tau lava ʻo ako mei he aʻusia ʻa ʻAlamaá ʻoku felāveʻi mo ʻetau fehuʻí? Ko e hā ha ngaahi founga kuo faitāpuekina ai koe ʻe he ngaahi tefitoʻi moʻoni ko ʻení?
Ko e hā mo ha toe potufolofola pe akonaki mei he Tohi ʻa Molomoná ʻe ala tokoni ke tali ʻa e fehuʻi ko ʻení? Kuo tokoniʻi fēfē nai koe ʻe he ngaahi moʻoni naʻe akoʻi ʻi he ngaahi potufolofola ko ʻení ke ke aʻusia e mālohi ʻo e fakatomalá?
Ko e hā e fatongia ʻo Sīsū Kalaisi ʻi heʻetau fakatomalá? ʻOkú ke ongoʻi fēfē nai fekauʻaki mo e finangalo lelei ʻa e Fakamoʻuí ke fakamolemoleʻi hoʻo ngaahi angahalá?
