Benneg 11
Paltiing a naited babaen ni Joseph Smith a Propeta para iti kabsatna a ni Hyrum Smith, iti Harmony, Pennsylvania, idi Mayo 1829 (History of the Church, 1:39–46). Naawat daytoy a paltiing babaen ti Urim ken Tumim a sungbat iti pakaasi ken panagdamag ni Joseph. Ipaawat ti History of the Church a naawat daytoy a paltiing kalpasan ti pannakaisubli ti Kinasaserdote nga Aaron.
1–6, Magun-odto dagiti agtartrabaho iti bangkag ti pannakaisalakan; 7–14, Sapulen ti pagsiriban, iyararaw ti panagbabawi, agtalek iti Espiritu; 15–22, Tungpalen dagiti bilin ken adalen ti balikas ti Apo; 23–27, Saan a pagtallikudan ti espiritu ti pammaltiing ken ti pammadto; 28–30, Agbalin nga annak ti Dios dagiti umawat ken ni Cristo.
1 Dandanin dumteng ti naindaklan ken nakaskasdaaw nga aramid kadagiti annak ti tattao.
2 Adtoy, siak ti Dios; denggem ti balikasko, a napartak ken nabileg, natadtadem ngem iti dua ti tademna nga espada, a mamagsina kadagiti nagsusuopan ken pata; ngarud denggem ti balikasko.
3 Adtoy, purawen ti kataltalonan a pagapitan; ngarud, asino man nga agtarigagay nga agani bay-am nga ipakanna ti kumpayna iti amin a kabaelanna, ket agani nga agmalmalem, tapno mayurnonganna ti kararuana iti agnanayon a pannakaisalakan iti pagarian ti Dios.
4 Wen, asino man a mangipakan iti kumpayna ket agani, isu met laeng ti inawagan ti Dios.
5 Ngarud, no agdawatka kaniak umawatka; no agtuktokka malukatanka.
6 Ita, kas dinawatmo, adtoy, kunak kenka, tungpalem dagiti bilinko, ket ikalikagummo a yeg ken ipasdek ti pagsayaatan ti Zion.
7 Dika agsapul iti kinabaknang ngem ti pagsiriban; ket, adtoy, maiparangto kenka dagiti kinadatdatlag ti Dios, ket kalpasanna bumaknangkanto. Adtoy, baknang ti addaan iti agnanayon a biag.
8 Pudno, pudno, kunak kenka, kas iti panagtarigagaymo kaniak ti maaramidto kenka; ket, no tarigagayam, sikanto ti pakaigapuan ti maaramid nga adu a kinaimbag iti daytoy a kaputotan.
9 Awan ti sabali nga ibagam iti daytoy a kaputotan no di panagbabawi. Tungpalem dagiti bilinko, ken tumulongka iti pannakaidanon ti aramidko, a maibatay kadagiti bilinko, ket mabendisionankanto.
10 Adtoy, addaanka iti sagut, wenno maaddaanka iti sagut no tarigagayam kaniak a sipapammati, a naimpusuan, a mamati iti bileg ni Jesucristo, wenno iti bilegko a makisasao kenka;
11 Ta, adtoy, siak ti agsao; adtoy, siak ti silaw nga agrimat iti kasipngetan, ket babaen ti bilegko itedko kenka dagitoy a balikas.
12 Ket ita, pudno, pudno, kunak kenka, itdem ti panagtalekmo iti dayta nga Espiritu a mangidalan iti panagaramid iti nasayaat—wen, nga agaramid iti nainkalintegan, a magna a sipapakumbaba, a mangukom a sililinteg; ket daytoy ti Espirituk.
13 Pudno, pudno, kunak kenka, itdekto kenka ti Espirituk, a mangpalawag iti panunotmo, a mangpunno iti kararuam iti rag-o;
14 Ken kalpasanna maammuamto, wenno babaen daytoy maammuamto, amin a banag a tarigagayam kaniak, a maipanggep kadagiti banag iti kinalinteg, iti pammati a panamatim kaniak a maawatmonto.
15 Adtoy, bilinenka a dimo ipagarup a naawaganka a mangikasaba agingga a maawaganka.
16 Agurayka pay bassit, agingga a maawatmo ti balikasko, ti batok, ti simbaanko, ken ti ebangheliok, tapno maammuam nga awan duadua ti doktrinak.
17 Ken kalpasanna, adtoy, a maibatay kadagiti tarigagaymo, wen, a maibatay pay iti pammatim maaramidto kenka.
18 Tungpalem dagiti bilinko; tenglem ti riknam; agdawatka iti Espirituk;
19 Wen, kumpetka kaniak a sipupuso, tapno makatarabayka a mangyeg iti lawag kadagiti banag a nasaon—wen, ti pannakaipatarus ti aramidko; aganuska agingga a maiwakasmo.
20 Adtoy, daytoy ti aramidem, ti panangtungpalmo kadagiti bilinko, wen, iti amin a kabaelam, panunot ken pigsam.
21 Dimo gamgamen nga ipakdaar ti balikasko, ngem umuna a gamgamem a magun-odmo ti balikasko, kalpasanna lumukayton ti dilam; samonto, no tarigagayam, magun-odmo ti Espirituk ken ti balikasko, wen, ti bileg ti Dios a mangallukoy kadagiti tao.
22 Ngem ita tenglem ti riknam; adalem ti balikasko a nayeg kadagiti annak ti tattao, ken kasta met nga adalem ti balikasko a mayegto kadagiti annak ti tattao, wenno ti maipatpatarus ita, wen, agingga a magun-odmo amin nga itedko kadagiti annak ti tattao iti daytoy a kaputotan, ket kalpasanna mainayonton ti amin a banag ditoy.
23 Adtoy sika Hyrum, anakko; sapulem ti pagarian ti Dios, ket mainayonto ti amin a banag a maibatay iti dayta a nainkalintegan.
24 Bangonem iti batok, ti ebangheliok;
25 Dimo tallikudan ti espiritu ti pammaltiing, wenno ti espiritu ti panagipadto, ta ay-ayto ti mangtallikud kadagitoy a banag;
26 Ngarud, salimetmetam iti pusom agingga iti panawen a kayatko a papanmo.
27 Adtoy, agsaoak iti amin nga addaan iti nasayaat a tarigagay, ken nangipakan iti kumpayda a pagani.
28 Adtoy, siak ni Jesucristo, ti Anak ti Dios. Siak ti biag ken ti silaw ti lubong.
29 Siak met laeng ti immay iti bukbukodko ket awan ti immawat kaniak;
30 Ngem pudno, pudno, kunak kenka, a kas iti kaadu ti mangawat kaniak, isuda ti ikkak iti bileg nga agbalin nga annak ti Dios, a kas kadagiti mamati iti naganko. Amen.