1 Adda, iti simbaan, dua a kinasaserdote, a dagitoy, ti ^aMelchizedek ken ti ^bAaron, a pakairamanan ti Kinasaserdote a Levitico.

2 No apay a naawagan ti umuna iti Kinasaserdote a Melchizedek gapu ta naindaklan a nangato a saserdote ni ^aMelchizedek.

3 Naawagan sakbay ti aldawna iti Nasantuan a Kinasaserdote, a naibatay iti ^aUrnos ti Anak ti Dios.

4 Ngem kas panagdaydayaw wenno ^apanagrukbab iti nagan ti Kangatuan iti Amin, tapno maliklikan ti pannakadagdagullit iti naganna, inawaganda, iti simbaan, kadagiti nagkauna nga aldaw, iti kinasaserdote a naipasurot ken ni Melchizedek, wenno iti Kinasaserdote a Melchizedek.

5 ^aNayon iti daytoy a kinasaserdote dagiti amin a pagturayan wenno pagakeman iti simbaan.

6 Ngem adda dua a dibision wenno dadakkel nga uluen—maysa ti Kinasaserdote a Melchizedek, ket ti Kinasaserdote nga Aaron wenno ^aLevitico ti sabali.

7 Adda ti pagakeman ti ^aelder iti babaen ti Kinasaserdote a Melchizedek.

8 Iggem ti Kinasaserdote a Melchizedek ti karbengan ti panguluen, ket addaan iti bileg ken ^apanangituray kadagiti amin a pagakeman iti simbaan iti amin a tawen iti lubong, a mangannong kadagiti naespirituan a banag.

9 Addaan iti karbengan ti ^aPanguluen ti Nangato a Kinasaserdote, babaen ti urnos a Melchizedek, a mangiturong kadagiti amin a pagakeman iti simbaan.

10 Adda ^akarbengan dagiti ^bnangato a saserdote babaen ti urnos ti Kinasaserdote a Melchizedek a mangiturong iti pagsaadanda, babaen ti panangimaton ti panguluen, a mangannong kadagiti naespirituan a banag, ken kasta met iti pagakeman ti elder, ti saserdote (ti urnos ti Levitico), maestro, diakono, ken kameng.

11 Adda karbengan ti elder a mangiturong a mangisaup no awan ti nangato a saserdote.

12 Annongen dagiti nangato a saserdote ken elder dagiti naespirituan a banag, a mainugot kadagiti katulagan ken bilin ti simbaan; ken adda karbenganda a mangiturong kadagitoy amin a pagakeman ti simbaan no awan dagiti sisasagana a nangatngato a mangituray.

13 Maawagan iti ^aKinasaserdote nga Aaron ti maikadua a kinasaserdote, gapu ta naitalek ken ni ^bAaron ken iti bukelna, nga agtultuloy kadagiti amin a kaputotanda.

14 No apay a naawagan iti nababbaba a kinasaserdote gapu ta ^amainayon iti nangatngato, wenno ti Kinasaserdote a Melchizedek, ket adda bilegna a mangannong kadagiti agpaay iti ruar nga ordinansa.

15 Ti ^apagobispuan ti panguluen daytoy a kinasaserdote, ken isu ti agiggem kadagiti tulbek wenno turay iti daytoy.

16 Awan ti asino man nga addaan iti umno a karbengan iti daytoy a takem, ti agiggem kadagiti tulbek daytoy a kinasaserdote, malaksid no ^apudno nga an-annabo ni Aaron.

17 Ngem iti kaadda ti turay ti nangato a saserdote iti Kinasaserdote a Melchizedek a mangiturong kadagiti amin a nababbaba a takem, mabalinna ti mangiturong iti takem ti obispo no awan ti masarakan a pudno nga an-annabo ni Aaron, no la ketdi matudingan ken mapatalgedan ken ^amaordenan iti daytoy a bileg babaen kadagiti ima ti ^bPanguluen ti Kinasaserdote a Melchizedek.

18 Ti bileg ken panangituray ti nangatngato, wenno ti Kinasaserdote a Melchizedek, agiggem kadagiti ^atulbek dagiti amin a naespirituan a bendision ti simbaan—

19 Tapno maaddaan iti gundaway nga umawat kadagiti ^akinadatdatlag ti pagarian ti langit, tapno maluktan ti langit kadakuada, tapno makikaysa iti ^bsapasap a panagtitipon ken ti simbaan ti Inauna, ken tapno sagrapenna ti pannakikaysa ken ti kaadda ti Dios nga Ama, ken ni Jesus a ^cmangibabaet iti baro a katulagan.

20 Ti bileg ken turay ti nababbaba, wenno ti Kinasaserdote nga Aaron, agiggem kadagiti ^atulbek dagiti agserserbi nga anghel, ken mangannong kadagiti nababbaba nga ^bordinansa, ti surat iti ebanghelio, ti ^cpanagbuniag iti panagbabawi a para iti ^dpannakaugas ti basbasol, a mainugot kadagiti katulagan ken bilin.

21 Para iti kasapulan adda dagiti presidente, wenno mangimaton a dadaulo a maisagsagana, wenno matudingan manipud kadagiti maordenan a para kadagiti nadumaduma a takem kadagitoy dua a kinasaserdote.

22 Iti Kinasaserdote a ^aMelchizedek, tallo a ^bMangimaton a Nangato a Saserdote, a pinili ti ragup, a natudingan ken naordenan para iti dayta a takem, ken ^cpinasingkedan ti panagtalek, pammati, ken kararag ti simbaan ti mangbukel iti korum ti Panguluen ti Simbaan.

23 Matudingan dagiti ^asangapulo-ket-dua nga agdaldaliasat a mamagbaga a Sangapulo-ket-dua nga ^bApostol, wenno naisangsangayan a saksi iti nagan ni Cristo iti intero a lubong—kastoy ti pannakaigidiat iti annongen ken naituding kadakuada kadagiti sabali a dadaulo ti simbaan.

24 Ket mangbukelda iti korum, a maipatas iti panangituray ken bileg kadagiti tallo a presidente a naagapad iti ngato.

25 Natudingan met dagiti ^aPitopulo a mangikasaba iti ebanghelio, ken agbalin a naisangsangayan a saksi kadagiti Gentil ken iti intero a lubong—kastoy ti pannakaigidiat dagiti pagrebbengan iti akemda kadagiti sabali a dadaulo ti simbaan.

26 Ket mangbukelda iti korum, a maipatas iti panangituray kadagiti Sangapulo-ket-dua a naisangsangayan a saksi wenno dagiti kaag-agapad nga Apostol.

27 Ket tunggal pangngeddeng nga aramiden ti ania man kadagitoy a korum nasken a babaen ti sangsangkatunos a timekda; nga isu, tunggal kameng ti tunggal korum nasken nga umanamong kadagiti pangngeddeng, tapno adda bileg ken patalgedan ti tunggal maysa ti pangngeddengda—

28 Mabalin a mangbukel ti kaaduan iti korum no saan a mabalin a sangsangkatunos—

29 No saan a kastoy ti mapasamak, awan karbengan ti pangngeddengda nga umawat kadagiti pammendision a naaramid iti napalabas iti pangngeddeng ti korum dagiti tallo a presidente, a naordenan babaen ti urnos ti Melchizedek, ken nalinteg ken nasantuan a tattao.

30 Ti pangngeddeng dagitoy a korum, wenno ania man kadagitoy, nasken a maaramid iti awan pumadpad a ^akinalinteg, iti kinasanto, ken kinapakumbaba ti puso, kinaemma ken naunday a kinamanagitured, ken iti pammati, ken ^bsaguday, ken pannakaammo, panagteppel, kinaanus, kinadiosan, nainkabsatan a kinaimbag ken kinamanangngaasi;

31 Gapu ta ti kari ket, no aduanda kadagitoy a banag saandanto a ^amaawanan iti bunga iti pannakaammo iti Apo.

32 Ket no bilang saan a nainkalintegan ti pangngeddeng a maaramid dagitoy a korum, mabalin a maidatag iti dakkel nga ummong ti sumagmamano a korum, a buklen dagiti addaan iti turay a naespirituan iti simbaan; no saan awan ti mangsuppiat iti pangngeddengda.

33 Dagiti Sangapulo-ket-dua ti Agdaldaliasat a Mangimaton a Nangato a Konseho, a mangiturong iti nagan ti Apo, babaen ti panangimaton ti Panguluen ti Simbaan, a mayalubog iti linteg ti langit; a mangbangon iti simbaan, ken mangtimon kadagiti amin a pakaseknan ti nasao kadagiti amin a pagilian, umuna kadagiti ^aGentil sa maikadua kadagiti Hudio.

34 Aggunay dagiti Pitopulo iti nagan ti Apo, babaen ti panangiturong dagiti ^aSangapulo-ket-dua wenno ti agdaldaliasat a nangato a konseho, iti panagbangon iti simbaan ken pannakatimon dagiti amin a pakaseknan ti isu met laeng kadagiti amin a pagilian, umuna kadagiti Gentil sa kalpasanna kadagiti Hudio;

35 Dagiti Sangapulo-ket-dua iti pannakaibaonda, nga iggemda dagiti tulbek, a panglukat iti ridaw babaen ti pannakaipakdaar ti ebanghelio ni Jesucristo, ket umuna kadagiti Gentil sa kalpasanna kadagiti Hudio.

36 Dagiti nakasagana a ^anangato a konseho, kadagiti istaka ti Zion, mangbukelda iti korum a maipatas ti panangituray kadagiti pakaseknan ti simbaan, iti amin a pangngeddengda, iti korum ti panguluen, wenno kadagiti agdaldaliasat a nangato a konseho.

37 Mangbukel ti nangato a konseho iti Zion iti korum a maipatas iti panangituray iti pakaseknan ti simbaan, kadagiti amin a pangngeddengda, kadagiti konseho ti Sangapulo-ket-dua kadagiti istaka ti Zion.

38 Pagrebbengan dagiti agdaldaliasat a nangato a konseho ti mangtuding kadagiti ^aPitopulo, no kasapulanda ti pannarabay, a mangsupusop kadagiti sumagmamano a pakaitudingan para iti pannakaikasaba ken pannakaiwanwan ti ebanghelio, a saanen a dagiti pay sabali.

39 Pagrebbengan dagiti Sangapulo-ket-dua, kadagiti amin a dadakkel a sanga ti simbaan, ti mangorden kadagiti ^aministro ti ebanghelio, ta maibatangdanto kadakuada babaen ti paltiing—

40 Napaneknekan ti urnos daytoy a kinasaserdote a maipaima manipud iti ama sa iti anak, ket nainkalintegan nga agpaay kadagiti nagtaud a mismo iti napili a bukel, a nakaaramidan dagiti kari.

41 Nairugi daytoy nga urnos kadagiti aldaw ni ^aAdan, ket dimteng kadagiti ^bkapuonan iti sumaganad a wagas:

42 Manipud ken ni Adan agingga ken ni ^aSet, nga inordenan ni Adan idi agtawen iti innem-a-pulo-ket-siam, ken binendisionanna tallo a tawen sakbay ti ipapatayna (ni Adan), ket inawatna ti kari ti Dios babaen ti amana, a dagitinto an-annabona ti pilien ti Apo, ken tapno mataginayondanto agingga iti kanibusanan ti daga;

43 Gapu ta ^anaan-anay a tao (ni Set), ken ^bkalanglangana ti amana, isu a kasla kapadana ti amana iti amin a banag, ken ti la tawenna ti pakailasinan kenkuana.

44 Naordenan ni Enos idi agtawen iti sangagasut ken tallopulo-ket-uppat a tawen ken uppat a bulan, babaen kadagiti ima ni Adan.

45 Inawagan ti Dios ni Cainan iti langalang idi agtawen iti uppat-a-pulo; ket nasabatna ni Adan iti panagdaliasatna a mapan iti Shedolamak. Agtawen iti walopulo-ket-pito idi maordenan.

46 Agtawen ni Mahalalel iti uppat-a-gasut ken siam-a-pulo-ket-innem ken pito nga aldaw idi ordenan ni Adan, ken nangbendision pay kenkuana.

47 Agtawen ni Jared iti dua-gasut idi ordenan ni Adan, ken nangbendision pay kenkuana.

48 Agtawen ni ^aEnoc iti duapulo-ket-lima idi ordenan ni Adan; ken agtawen iti innem-a-pulo-ket-lima idi bendisionan ni Adan.

49 Ket nakitana ti Apo, ken nagkaduada a nagna, ket nagtultuloy nga adda iti imatangna; ket ^anakikadua iti Dios iti tallo gasut ken innem-a-pulo-ket-lima a tawen, a namagbalin kenkuana nga agtawen iti uppat-a-gasut ken tallopulo idi ^bmabaliwan.

50 Agtawen ni ^aMatusalem iti sangagasut idi ordenan ni Adan.

51 Agtawen ni Lamec iti tallopulo-ket-dua idi ordenan ni Set.

52 Agtawen ni ^aNoe iti sangapulo idi ordenan ni Matusalem.

53 Tallo a tawen sakbay ti ipapatay ni Adan, inawaganna da Set, Enos, Cainan, Mahalalel, Jared, Enoc, ken Matusalem, nga agpapada a ^anangato a saserdote, a kadua dagiti nabati nga an-annabona a nalinteg, iti tanap ti ^bAdan-ondi-Ahman, ket sadiay ti nangtedanna kadakuada iti naudi a bendisionna.

54 Ket nagparang kadakuada ti Apo, ket timmakderda ken binendisionanda ni ^aAdan, ket inawaganda iti ^bMiguel, ti prinsipe, ti arkanghel.

55 Ket nangted ti Apo iti liwliwa ken ni Adan, ket kinunana kenkuana: Insaadka a pangulo; adunto a pagilian ti umasideg kenka, ket sikanto ti ^aprinsipeda iti agnanayon.

56 Ket nagtakder ni Adan iti tengnga ti taripnong; ket, nupay pinakapsuten ti adu a tawen, gapu iti pannakapnona iti Espiritu Santo, ^aimpadtona ti mapasamakto kadagiti an-annabona kadagiti sumarsaruno a kaputotan.

57 Naisurat amin dagitoy a banag iti libro ni Enoc, ket mapaneknekanto iti umno a panawen.

58 Pagrebbengan pay dagiti ^aSangapulo-ket-dua, ti ^bmangorden ken mangurnos kadagiti amin a dadaulo ti simbaan, a mainugot iti paltiing nga agkuna:

59 Iti simbaan ni Cristo iti daga a Zion, mainayon kadagiti ^apaglintegan ti simbaan maipapan iti aramid ti simbaan—

60 Pudno, kunak kadakayo, kinuna ti Apo ti Pangen, nasken nga adda dagiti ^amangimatmaton nga elder a mangimaton kadagiti adda takemna nga elder;

61 Ken kasta met dagiti ^asaserdote a mangimaton kadagiti adda takemna a saserdote;

62 Ken kasta met dagiti maestro a ^amangimaton kadagiti adda takemna a maestro, iti umarngi a wagas, ken kasta met dagiti diakono—

63 Gapuna, manipud iti diakono agingga iti maestro, ken manipud iti maestro agingga iti saserdote, ken manipud iti saserdote agingga iti elder, sumagmamano a kas natudingan, a maibatay kadagiti katulagan ken bilin ti simbaan.

64 Kalpasanna umay ti Nangato a Kinasaserdote, nga isu ti kaindaklan iti amin.

65 Gapuna, nasken unay nga adda matudingan iti Nangato a Kinasaserdote a mangimaton iti kinasaserdote, ket maawaganto iti Presidente ti Nangato a Kinasaserdote ti Simbaan;

66 Wenno, iti sabali a pannao, ti ^aMangimatmaton a Nangato a Saserdote iti Nangato a Kinasaserdote ti Simbaan.

67 Manipud iti daytoy met laeng umay ti panangannong kadagiti ordinansa ken bendision iti simbaan, babaen ti ^apanangipatay kadagiti dakulap.

68 Gapuna, saan a maipatas ti takem ti obispo iti daytoy; ta takem ti ^aobispo ti mangannong kadagiti amin a naindagaan a banag;

69 Nupay kasta nasken a mapili ti obispo manipud iti Nangato a ^aKinasaserdote, malaksid no ^bpudno nga an-annabo ni Aaron;

70 Ta malaksid no pudno nga an-annabo ni Aaron saanna a mabalin ti agiggem kadagiti tulbek dayta a kinasaserdote.

71 Nupay kasta, ti nangato a saserdote, a nasao, a mainugot iti urnos ti Melchizedek, mabalin a mapatalgedan iti pannakaisuro dagiti naindagaan a banag, nga ammoda dagitoy babaen ti Espiritu ti kinapudno;

72 Ken kasta met nga agbalin nga ^aukom iti Israel, a mangaramid kadagiti pakaseknan ti simbaan, a mangukom kadagiti agbasol babaen ti pammaneknek a maidatag kenkuana a maibatay kadagiti paglintegan, babaen ti mamalbalakadna, a pinilina wenno piliennanto kadagiti elder ti simbaan.

73 Daytoy ti pagrebbengan ti obispo a saan a pudno nga an-annabo ni Aaron, ngem naordenan iti Nangato a Kinasaserdote babaen ti urnos ti Melchizedek.

74 Kasta ti panagbalinnanto nga ukom, nga isu ti ukom ti kaaduan kadagiti agindeg iti Zion, wenno iti istaka ti Zion, wenno iti ania man a sanga ti simbaan a pakapatalgedannanto iti daytoy a panagserbi, agingga iti pannakapalawa ti bedbeddeng ti Zion ket nasken unay nga adda manen sabali nga obispo wenno ukom iti Zion wenno iti sadino man.

75 Ket no adda sabali nga obispo a matudingan kastanto met ti tignayna iti takemna.

76 Ngem adda di masupring a kalintegan ti pudno nga an-annabo ni Aaron iti panguluen iti daytoy a kinasaserdote, kadagiti ^atulbek daytoy naespirituan a panagserbi, a siwawaya nga agakem iti takem ti obispo, nga awanan iti mamagbaga, malaksid no ti Presidente ti Nangato a Kinasaserdote, babaen ti urnos ti Melchizedek, mabista, nga agtugaw nga ukom ti Israel.

77 Ket ti pangngeddeng ti ania man kadagitoy a konseho, mayalubog iti bilin nga agkuna:

78 Manen, pudno, kunak kadakayo, ti kapatgan a pakaseknan ti simbaan, ken dagiti ^akarikutan a kaso ti simbaan, no awan ti pannakapnek iti pangngeddeng ti obispo wenno dagiti ukom, maipaima ken maituyang iti konseho ti simbaan, iti ^bPanguluen ti Nangato a Kinasaserdote.

79 Ket adda bileg ti Panguluen ti konseho ti Nangato a Kinasaserdote a mangtuding iti sabali pay a nangato a saserdote, a sangapulo-ket-dua, a manarabay a kas mamagbaga; ket kasta ti kaadda ti bileg ti Panguluen ti Nangato a Kinasaserdote ken dagiti mamagbaga a mangeddeng iti pammaneknek a maibatay kadagiti paglintegan ti simbaan.

80 Ket kalpasan daytoy a pangngeddeng awanton ti pakalaglagipan iti imatang ti Apo; ta daytoy ti kangatuan a konseho iti simbaan ti Dios, ken maudi a pangngeddeng kadagiti di pagkikinnaawatan kadagiti naespirituan a banag.

81 Awan ti asino man a kameng ti simbaan a di sakupen daytoy a konseho ti simbaan.

82 Ket no bilang agbasol ti Presidente ti Nangato a Kinasaserdote, addanto pakalaglagipan kenkuana iti imatang ti kaaduan a konseho ti simbaan, a tarabayento dagiti sangapulo-ket-dua a mamagbaga ti Nangato a Kinasaserdote;

83 Ket tinto pangngeddengda kenkuana ti pagpatinggaan ti di panagkikinnaawatan maipanggep kenkuana.

84 Ngarud, awanto ti isalsalumina ti ^alinteg ken dagiti paglintegan ti Dios, tapno maaramid ti amin a banag iti naurnos ken naulimek a wagas iti imatangna, a maibatay iti kinapudno ken kinalinteg.

85 Ket manen, pudno kunak kadakayo, pagrebbengan ti presidente iti takem ti ^adiakono nga imatonan dagiti sangapulo-ket-dua a diakono, a makiinnusay kadakuada, ken ^bmangisuro kadakuada iti pagrebbenganda, a mangitan-ok iti tunggal maysa, a kas naited a maibatay kadagiti katulagan.

86 Ken kasta met ti pagrebbengan ti presidente iti takem dagiti ^amaestro ket mangimaton kadagiti duapulo-ket-uppat a maestro, ken makiinnusay kadakuada, a mangisuro kadakuada kadagiti pagrebbenganda iti takemda, a kas naited kadagiti katulagan.

87 Kasta met ti pagrebbengan ti presidente ti Kinasaserdote nga Aaron ket mangimaton kadagiti uppat-a-pulo-ket-walo a ^asaserdote, ken makiinnusay kadakuada, a mangisuro kadakuada kadagiti pagrebbenganda iti takemda, a kas naited kadagiti katulagan—

88 Nasken nga ^aobispo daytoy a presidente; ta daytoy ti maysa kadagiti pagrebbengan daytoy a kinasaserdote.

89 Manen, ti pagrebbengan ti presidente daytoy a takem dagiti ^aelder ket mangimaton kadagiti siam-a-pulo-ket-innem nga elder, ken makiinnusay kadakuada, ken mangisuro kadakuada a maibatay kadagiti katulagan.

90 Naisalsalumina daytoy a panguluen kadagiti pitopulo, ket naisangrat para kadagiti saan nga ^aagdaliasat iti intero a lubong.

91 Ket manen, ti pagrebbengan ti Presidente ti takem ti Nangato a Kinasaserdote ket ^amangimaton iti sibubukel a simbaan, ken agbalin a kas ken ni ^bMoises—

92 Adtoy, nainsiriban daytoy; wen, ti agbalin a ^amammadto, ^bmammaltiing, agipatpatarus, ken ^cpropeta, ta adda kenkuana amin a ^dsagut ti Dios nga impaayna iti ulo ti simbaan.

93 Ket maibatay daytoy iti parmata a nangipakita iti urnos ti ^aPitopulo, tapno maaddaanda iti pito a presidente a mangimaton kadakuada, a mapili iti bilang dagiti pitopulo;

94 Ket ti maikapito a presidente kadagitoy a presidente ti mangimaton kadagiti innem;

95 Ket mangpili dagitoy pito a presidente iti sabali pay a pitopulo malaksid ti umuna a pitopulo a pakaibilanganda, ken mangimaton kadakuada;

96 Ken kasta met ti sabali pay a pitopulo, agingga a pito a mamimpitopulo, no kasapulan iti panagtrabaho iti bangkag.

97 Ket dagitoy a pitopulo ti ^aagdaldaliasat a ministro, kadagiti Gentil nga umuna ken kadagiti pay Hudio.

98 Idinto a dagiti sabali a dadaulo ti simbaan, a saan a maibilang kadagiti Sangapulo-ket-dua, wenno kadagiti Pitopulo, awananda iti sungsungbatan nga agdaliasat iti amin a pagilian, ngem nasken nga agdaliasat kas ipalugodto dagiti paspasamakda, nupay kasta mabalinda ti agiggem iti nangato ken adda rebbengenna a pagtakeman iti simbaan.

99 Gapuna, ita adalen koma ti tunggal tao ti ^apagrebbenganna, ken agtignay iti takem a nakaitudinganna, iti amin a ^bkinaregta.

100 Isu a ^asadut saanto a maibilang a ^bmaikari a tumakder, ket isu a di mangadal iti pagrebbenganna ket agparang a saan a maanamongan saanto a maibilang a maikari a tumakder. Pudno a kasta. Amen.