Benneg 96
Paltiing a naited ken ni Joseph Smith a Propeta, a mangipakita iti pannakabukel ti siudad wenno istaka ti Zion iti Kirtland, Ohio, idi 4 ti Hunio 1833, a pagarigan dagiti Santo iti Kirtland (History of the Church, 1:352–353). Taripnong ti pasken dagiti nangato a saserdote, ket kangrunaan a napagsasaritaan ti pannakailako ti daga, a managan iti talon a French, a tinagikua ti Simbaan iti asideg ti Kirtland. Gapu ta saan a makapagtutunos ti taripnong no asino ti mangaywan iti talon, nagnanamingan ti amin a saludsodenda iti Apo ti maipanggep iti daytoy a banag.
1, Mapapigsa ti Istaka ti Zion iti Kirtland; 2–5, Bingaybingayen ti obispo dagiti tawid para kadagiti Santo; 6–9, Agkameng ni John Johnson iti sangsangkamaysa a timpuyog.
1 Adtoy, kunak kadakayo, adtoy ti sirib, a pakaammuanyo no kasano ti panagtignayyo maipanggep iti daytoy a banag, ta nasken kaniak a mapapigsa daytoy aistaka nga intuyangko para iti pannakapapigsa ti Zion.
2 Ngarud, bay-anyo a ni katulongak a Newel K. Whitney ti mangiwardas iti lugar a naipanagan kadakayo, nga intuyangko a pakabangonan ti nasantuan a balayko.
3 Ket manen, mabingaybingay koma a lote, a maibatay iti sirib, a para iti pagimbagan dagiti agsapsapul iti tawid, a kas mapagnanaminganyo.
4 Ngarud, imutektekanyo tapno makitayo daytoy a banag, ket dayta paset a napateg a pagsayaatan ti atimpuyogko, para iti panggep a mangidanon iti balikas kadagiti annak ti tattao.
5 Ta adtoy, pudno kunak kadakayo, daytoy ti kaskenan kaniak, tapno maidanon ti balikasko kadagiti annak ti tattao, iti panggep a mangparukma iti puspuso dagiti annak ti tattao a para iti pagimbaganyo. Pudno a kasta. Amen.
6 Ket manen, pudno kunak kadakayo, nainsiriban ken nasken kaniak, a ni katulongak a John Johnson nga inawatko ti datonna, ken nangngegak ti kararagna, inkariak iti agnanayon a biag no la ketdi tungpalenna dagiti bilinko manipud ita.
7 Ta isu ket kaputotan ni aJose ken makiranud iti parabur ti kari a naited kadagiti ammana—
8 Pudno kunak kadakayo, nasken kaniak nga isu ket agbalin a kameng ti timpuyog, tapno makatulong a mangidanon iti balikasko kadagiti annak ti tattao.
9 Ngarud ordenanyo iti daytoy a bendision, ket agsukisok a sireregta a mangrisut kadagiti utang kadagiti balay a nakainagananyo, tapno makapagtaeng sadiay. Pudno a kasta. Amen.