1 Pudno, kastoy ti kinuna ti Apo kenka, katulongak a Joseph Smith, magustuak unay ti daton ken dagiti pammigbigmo, nga inaramidmo; ta gapu iti daytoy intag-ayka, tapno maipakitak ti pagsiribak babaen dagiti ^anakapsut a banag iti daga.

2 Maawatko dagiti kararagmo kaniak; ket kas sungbatda kunak kenka, a matudinganka ita a dagus a mangted iti napasnek a panangiwaragawag iti ebangheliok, ken daytoy ^aistaka nga immulak a panuli a bato ti Zion, a mapasilengto babaen ti panangpalinis a maibatay iti langa ti palasio.

3 Maaramidto daytoy a waragawag kadagiti amin nga ^aari iti lubong, kadagiti uppat a sulina, iti madaydayaw a napili a presidente, ken iti nangato ti panagpampanunotna a gobernador iti pagilian a pagindegam, ken kadagiti amin a pagilian a naiwaraswaras iti adayo a dagdaga.

4 Maisurat koma iti espiritu ti ^akinaemma ken babaen ti bileg ti Espiritu Santo, nga addanto kenka iti kanito a pannakaisurat daytoy;

5 Ta maitedto kenka babaen ti Espiritu Santo tapno maammuan ti pagayatak maipanggep kadagidiay nga ari ken agturay, uray pay ti mapasamakto kadakuada iti dumteng a panawen.

6 Ta, adtoy, dandanin awagak ida a dumngeg iti lawag ken gloria ti Zion, ta dimtengen ti panawen a para kenkuana.

7 Awagam ngarud ida, iti napigsa a waragawag, ken babaen ti pammaneknekmo, a saanka nga agbuteng kadakuada, ta kasda la ^aruot, ket amin a gloriada kasla sabong a marsaak iti saan a mabayag, tapno mapanawanda met nga awan pakawan—

8 Ken mabalin a sarungkarak ida iti aldaw nga isasarungkar, inton waknitak ti rupa iti inyabbongko, a mangituding iti bingay dagiti mangidadanes kadagiti managinsisingpet, nga addanto ^aagngarngariet, no dida awaten dagiti katulongak ken ti pammaneknekko nga impalgakko kadakuada.

9 Ket manen, sarungkarakto ida ken paluknengek ti puspusoda, nga adu kadakuada ti agpaay iti pagimbaganyo tapno magun-odyo ti parabur kadagiti matada, tapno ^amasilawanda iti kinapudno, ken dagiti Gentil iti pannakaitan-ok wenno pannakaitag-ay ti Zion.

10 Ta nakaparpardas ti yaay ti aldaw nga isasarungkarko, iti ^aoras a diyo namnamaen; ket sadinonto ti pagtalgedan dagiti taok, ken pagtaklinan dagiti mabatinto?

11 Agriingkayo, O ar-ari ti daga! Umaykayo, O, umaykayo, nga imetyo dagiti balitok ken pirakyo, a pangtulong kadagiti taok, iti balay dagiti babbai nga annak ti Zion.

12 Ket manen, pudno kunak kadakayo, tulongannakayo koma ni katulongak a Robert B. Thompson a mangisurat iti daytoy a waragawag, ta maay-ayoak unay kenkuana, ket nasken ngarud a kaduayo;

13 Dumngeg koma, ngarud iti patigmaanyo, ket bendisionak iti di mabilang a bendision; agtalinaed koma a natulnog ken napudno kadagiti amin a banag manipud ita, ket agbalinto a naindaklan iti imatangko;

14 Ngem laglagipenna koma a dawatekto kenkuana ti ^apanagaywanna.

15 Ket manen, pudno kunak kenka, nagasat ni katulongak a ^aHyrum Smith; ta siak, ti Apo, ay-ayatek gapu iti ^bkinadalus ti panagpuspusona, ken gapu ta ipatpategna dagiti umno iti imatangko, kinuna ti Apo.

16 Manen, tulongannaka koma ti katulongak a ni John C. Bennett iti aramidmo a mangipatulod iti balikasko kadagiti ari ken tattao iti daga, ken bayabayennaka, sika a katulongak a Joseph Smith, iti kanito ti rigat; ket saan a masaaw ti gunggonana no umawat iti ^apamagbaga.

17 Ket naindaklanto gapu iti ayatna, ta agpaayto kaniak no aramidenna daytoy, kinuna ti Apo. Nakitakon dagiti aramid a naiwakasna, nga awatek no ituloyna, ket koronaakto kadagiti bendision ken naindaklan a dayag.

18 Ket manen, kunak kenka a pagayatak nga ituloyto ni katulongak a Lyman Wight ti mangasaba para iti Zion, iti espiritu ti kinaemma, nga ipudnonak iti lubong; ket itayabkonto nga ipangato a kas kadagiti payak dagiti ^aagila; ket magun-odnanto ti gloria ken dayaw para kenkuana ken para kaniak.

19 Tapno inton malpasna ti aramidna awatekto a mismo, a kas iti inaramidko iti katulongak a ni ^aDavid Patten, a kaduak ita iti daytoy a kanito, ken kasta met ni katulongak nga ^bEdward Partridge, ken kasta met ti lakayen a katulongak a ni ^cJoseph Smith, Sen., a nagtugaw iti makanawan ni ^dAbraham, ken nabendisionan ken naespirituan, ta isu ket kukuak.

20 Ket manen, pudno kunak kenka a saan a ^anasikap ni katulongak a George Miller; mabalin a pagtalkan gapu iti kinatulnog ti panagpuspusona; ket gapu iti ayatna iti pammaneknekko, ayatek, siak, nga Apo.

21 Kunak ngarud kenka, isaadko iti ulona ti pagtakeman a ^apagobispuan a kas iti katulongak a ni Edward Partridge, tapno maawatna ti pannangted-pateg iti balayko, tapno makaipaay iti bendision kadagiti nakurapay kadagiti taok, kinuna ti Apo. Awan koma ti tao a mangumsi iti katulongak a ni George, ta agdaydayawto kaniak.

22 Mangbangon koma ti katulongak a ni George, ken ti katulongak a ni Lyman, ken ti katulongak a ni John Snider, ken dadduma pay, iti ^abalay a maipanagan kaniak, a kas iti maysa nga ipakitanto ni katulongak a Joseph kadakuada iti lugar nga ipakitananto met kadakuada.

23 Ket balayto a pagdagusan, balay a sangbayanto dagiti ^aganggannaet a mabalin nga aggapu iti adayo; ngarud napintas koma a balay, a maikari nga awaten, tapno naan-anay ti pannakapaginana ti nabannog nga agbambaniaga ken natalged bayat ti panangipapusona iti balikas ti Apo; ken ti ^bpanuli a bato nga intudingko iti Zion.

24 Nadalusto a pagyanan daytoy a balay no mabangon babaen iti naganko, ken no saan nga ipalubos ti gobernador a maituding iti daytoy a serken ti rugit. Nasantuanto, wenno saanto nga agindeg ti Apo a Diosyo iti daytoy.

25 Ket manen, pudno kunak kadakayo, pasangbayenyo amin a santok nga aggapu iti adayo.

26 Ket mangibaonkayo kadagiti napartak a mensahero, wen, dagiti napili a mensahero, ket kunayo kadakuada: Umaykayo, nga itugotyo amin a balitokyo, ken pirakyo, ken dagiti napateg a batbatoyo, ken amin dagiti antigoyo; ken amin dagiti mannakaammo iti antigo, nga umay, mabalinda ti umay, ket mangitugotda iti parua, iti saleng, ken iti aruo, ken amin dagiti napateg a kayo iti daga;

27 Ken landok, ken kubre, ken tanso, ken zinc, ken amin dagiti napateg a gamengyo iti daga; ket mangbangonkayo iti ^abalay a mainagan kaniak, a ^bpagyanan ti Kangatuan.

28 Ta awan ti lugar a masarakan iti daga a mabalin nga umayanna ken ^aisublina manen kadakayo ti napukawyo, wenno impanawna, a kas iti pakabuklan ti kinasaserdote.

29 Ta awan ti puente a ^apamuniagan iti daga, tapno ^bmabuniaganda, dagiti santok nga agpaay kadagiti natay—

30 Ta kukua ti balayko daytoy nga ordinansa, ket diak maawat, kadagiti aldaw laeng ti kinakurapayyo, a diyo pannakabangon iti balayko.

31 Ngem bilinenkayo, dakayo amin a santok, a ^amangbangon iti balayko; ket ikkankayo iti umdas a panawen a mangbangon iti balayko; ket bayat daytoy a panawen awatekto ti panagbuniagyo.

32 Ngem adtoy, iti paggibusan daytoy a panawen saankonton nga awaten ti panangbuniagyo kadagiti minatayyo; ngem no diyo maaramid daytoy agingga iti paggibusan daytoy a panawen saankayonton a maawat a kas simbaan, a kaduayo dagiti minatayyo, kinuna ti Apo a Diosyo.

33 Ta pudno kunak kadakayo, a kalpasan ti kaadda ti umdas a panawenyo a mangbangon iti balayko, a pakaaramidan ti ordinansa ti panangbuniag kadagiti natay, ken narugian manipud pay idi sakbay a nabukel ti lubong, saan a maawat kaniak ti panangbuniagyo kadagiti minatayyo;

34 Ta iti daytoy ti nakayordenan dagiti ^atulbek ti nasantuan a kinasaserdote, tapno magun-odyo ti dayaw ken gloria.

35 Ket kalpasan daytoy a panawen, ti panangbuniagyo kadagiti natay, kadagiti nawarawara iti ganggannaet, saanda a maawat kaniak, kinuna ti Apo.

36 Ta nayorden nga iti Zion, ken dagiti istakana, ken iti Jerusalem, kadagiti lugar nga intudingko a ^apagkamangan, isudanto ti lugar a pangbuniaganyo kadagiti minatayyo.

37 Ket manen, pudno kunak kadakayo, kasano a maawatko ti ^apanangugasyo, malaksid no aramidenyo iti balay a binangonyo iti naganko?

38 Ta, iti daytoy a gapu ti nangbilinak ken ni Moises a nasken a mangbangon iti ^atabernakulo, a nasken a bunagenda iti langalang, ket mangbangonda iti ^bbalay iti naikari a daga, tapno maipalgak dagidiay nga ordinansa a nailemmeng manipud pay idi punganay ti lubong.

39 Ngarud, pudno kunak kadakayo, a ti ^apannakalanayo, ken pannakaugasyo, ken ^bpanamuniagyo kadagiti natay, ken ti ^csagrado a panagtitiponyo, ken dagiti pakalaglagipan iti ^dpanagsakripisioyo babaen kadagiti lallaki nga annak ni Levi, ken kadagiti orakuloyo kadagiti ^enasantuan a luglugaryo a nangawatanyo iti panagpapatang, ken dagiti alagaden ken pangngeddengyo, para iti pangrugian dagiti paltiing ken pannakaipasdek ti Zion, ken para iti ngayed, dayaw, ken talugading kadagiti amin a munisipiona, nayordenda babaen iti ordinansa ti nasantuan a balayko, a kanayon a maibilbilin kadagiti taok a bangonenda iti nasantuan a naganko.

40 Ket pudno kunak kadakayo, mabangon koma daytoy a balay babaen ti naganko, tapno maipalgakko sadiay dagiti ordinansak kadagiti taok;

41 Ta tagipatgek nga ^aipalgak iti simbaanko dagiti banag a nabayagen a ^bnaidulin idi pay la sakbay a nabukel ti lubong, bambanag maipapan iti dispensasion ti ^cpannakatungpal dagiti panawen.

42 Ket ^aipakitakto iti katulongak a ni Joseph amin dagiti banag a maipapan iti daytoy a balay, ken dagiti kinasaserdote, ken ti lugar a pakabangonannanto.

43 Ket bangonenyonto iti lugar a naamirisyo a pakabangonanna, ta dayta a disso ti napilik a pangbangonanyo.

44 No agtrabahokayo iti amin a kabaelanyo, idatonkonto dayta a disso tapno agbalin a ^anasantuan.

45 Ket no dumngeg dagiti taok iti timekko, ken iti timek dagiti ^akatulongak a tinudingak a mangidaulo kadagiti taok, adtoy, pudno kunak kadakayo, saandanto a mapapanaw iti lugarda.

46 Ngem no dida dumngeg iti timekko, wenno iti timek dagitoy tao a tinudingak, saandanto a mabendisionan, gapu ta rugitanda dagiti nasantuan a dagak, ken dagiti nasantuan nga ordinansak, ken dagiti dokumentok, ken dagiti nasantuan a balikas nga itedko kadakuada.

47 Ket mapasamakto a no mangbangonkayo iti balay babaen ti naganko, ket saanyo nga aramiden dagiti banag nga ibagak, diakto aramiden dagiti ^asapatak kadakayo, wenno tungpalen dagiti kari a namnamaenyo kadagiti imak, kinuna ti Apo.

48 Ta ^aidinto a bendision, wen, babaen kadagiti aramidyo, mangyeg iti lunod, pungtot, gura, ken panangukom kadagiti uloyo, babaen ti kinamaagyo, ken babaen dagiti makarimon nga aramidyo, nga ar-aramidenyo iti sangok, kinuna ti Apo.

49 Pudno, pudno, kunak kadakayo, a no mangtedak iti bilin iti asino man kadagiti lallaki nga annak ti tattao nga agtrabaho babaen ti naganko, ket dagidiay lallaki nga annak ti tattao mapanda a mangaramid iti amin a kabaelanda a mangipatungpal iti dayta nga aramid, ket saanda nga isardeng ti ^akinaregtada, ket umay dagiti kabusorda ket pengdanda ida a mangipatungpal iti dayta nga aramid, adtoy, ^bnasken kaniak a saanen a maituloy dayta nga aramid kadagiti ima dagiti lallaki nga annak ti tattao, ngem tapno mangawat kadagiti datonda.

50 Ket ^asarungkarakto ti basol ken labsing dagiti nasantuan a paglintegan ken bilinko kadagiti ulo dagiti tubeng iti aramidko, iti maikatlo ken maikapat a ^bkaputotan, no saanda nga ^cagbabawi, ket kaguradak, kinuna ti Apo a Dios.

51 Ngarud, daytoy ti gapu nga inawatko dagiti daton dagiti binilinko a mangbangon iti siudad ken ^abalay babaen ti naganko, iti ili ti ^bJackson, Missouri, ket tinubeng ida dagiti kabusorda, kinuna ti Apo a Diosyo.

52 Ket sungbatakto iti ^apanangukom, pungtot, ken gura, dung-aw, asug, ken panagngariet kadagiti uloda, iti maikatlo ken maikapat a kaputotan, no saanda nga agbabawi, ket kaguradak, kinuna ti Apo a Diosyo.

53 Ket daytoy aramidek a pagariganyo, a pangliwliwa kadakayo maipanggep kadagiti amin a nabilin a mangipatungpal kadagiti aramid ket tinubeng ida dagiti ima dagiti kabusorda, ken babaen ti panangirurumen, kinuna ti Apo a Diosyo.

54 Ta siak ti Apo a Diosyo, ket isalakankonto amin dagiti kabsatyo a ^anatarnaw ti panagpuspusona, ken ^bnapapatay iti daga ti Missouri, kinuna ti Apo.

55 Ket manen, pudno kunak kadakayo, bilinenkayo manen a mangbangon iti ^abalay babaen ti naganko, uray iti daytoy a lugar, tapno ^bmaipaneknekyo a mismo kaniak a napudnokayo iti amin a banag nga ibilinko kadakayo, tapno bendisionankayo, ket koronaankayo iti dayaw, saan nga ipapatay, ken agnanayon a biag.

56 Ket ita kunak kadakayo, maipanggep iti balay a ^apagdagusan nga imbilinko a bangonenyo a pagdagusan dagiti ganggannaet, mabangon koma babaen ti naganko, ket mainagan koma ti naganko iti daytoy, ket maikkan koma ditoy iti lugar ti katulongak a ni Joseph ken ti balayna, iti tunggal kaputotan.

57 Ta ti pananglanak iti ulona, maipaayto koma met ti bendisionna iti ulo dagiti an-annabona.

58 Ket kas nasaok ken ni ^aAbraham maipanggep kadagiti kakabsat iti daga, a kas iti ibagak ken ni katulongak a Joseph: Kenka ken iti ^bbukelmo ti pakabendisionanto dagiti kakabsat iti daga.

59 Ngarud, maikkan koma ni Joseph ken ti bukelna a sumarsaruno kenkuana iti pagyanan iti dayta a balay, iti tunggal kaputotan, iti agnanayon nga awan inggana, kinuna ti Apo.

60 Ket mapanaganan koma dayta a balay iti Balay iti Nauvoo; ket naragsak koma a pagyanan ti tao, ken paginanaan dagiti nabannogan nga agdaldaliasat, tapno maipamaysana ti dayag ti Zion, ken ti dayag daytoy, ti panulina a bato;

61 Tapno maawatna met ti balakad manipud kadagiti impatugawko nga agbalin a kasla ^amula a nalatak, ken kas ^bagwanwanawan kadagiti bakudna.

62 Adtoy, pudno kunak kadakayo, urnosen koma ti katulongak a ni George Miller, ken ti katulongak a ni Lyman Wight, ken ti katulongak a ni John Snider, ken ti katulongak a ni Peter Haws, ti bagbagida, ket mangtudingda koma iti maysa kadakuada iti presidente ti korumda iti panggep a mangbangon iti dayta a balay.

63 Ket mangbukelda koma iti pagalagadan, tapno makaawatda iti puonan para iti pannakabangon dayta a balay.

64 Ket saandanto nga umawat iti nababbaba ngem limapulo a doliar a bingay iti puonan iti dayta a balay, ket mapalubosandanto nga umawat iti sangapulo-ket-lima a ribu a doliar manipud iti maysa a tao para iti puonan iti dayta a balay.

65 Ngem saandanto a mapalubosan nga umawat iti nasursurok ngem sangapulo-ket-lima a ribu a doliar a puonan manipud iti maysa a tao.

66 Ken saandanto a mapalubosan nga umawat iti nakurkurang ngem sangapulo-ket-lima a ribu a doliar a bingay iti puonan manipud iti maysa a tao iti dayta a balay.

67 Ket saandanto a mapalubosan nga umawat iti asino man a tao, a kas mamuonan iti daytoy a balay, malaksid no agbayad daytoy iti puonanna kadakuada iti kanito nga awatenna ti puonanna;

68 Ket kas maikanatad iti gatad ti puonan a bayadanna kadakuada umawatto iti puonan iti dayta a balay; ngem no awan ti ibayadna kadakuada awanto ti awatenna a puonan iti dayta a balay.

69 Ket no asino man nga agbayad iti puonan kadakuada agbalinto a puonan iti dayta a balay, para kenkuana, ken para iti kaputotanna a sumarsaruno, iti tunggal kaputotan, no la ketdi iggemna wenno dagiti agtawid kenkuana dayta a puonan, ken dida ilako wenno yakar manipud kadagiti imada babaen ti bukodda a pagayatan wenno aramid, no aramidenyo ti pagayatak, kinuna ti Apo a Diosyo.

70 Ket manen, pudno kunak kadakayo, no umawat ni katulongak a George Miller, ken ni katulongak a Lyman Wight, ken ni katulongak a John Snider, ken ni katulongak a Peter Haws, iti ania man a puonan, iti kuarta, wenno iti sanikua a katukad ti gatad ti kuarta, saandanto a mangilatang iti paset dayta a puonan a para iti ania man a kasapulan, para laeng iti dayta a balay.

71 Ket no mangilatangda iti paset dayta a puonan iti sadino man, para laeng iti dayta a balay, nga awan ti pammalubos ti mamuonan, ket dida bayadan iti mamimpat iti gatad ti puonan nga inlatangda iti sadino man, para laeng iti dayta a balay, mailunoddanto, ket mapapanawdanto iti lugarda, kinuna ti Apo a Dios; ta siak, ti Apo, ti Dios, ket saan a ^amaang-angaw iti ania man kadagitoy a banag.

72 Pudno kunak kadakayo, agbayad koma ti katulongak a ni Joseph iti puonan kadakuada para iti pannakabangon dayta a balay, a kas namnamaenna a nasayaat; ngem saan a kabaelan ti katulongak a ni Joseph ti agbayad iti nasursurok ngem sangapulo-ket-lima a ribu a doliar a puonan iti dayta a balay, wenno nababbaba ngem limapulo a doliar; wenno asino man a tao, kinuna ti Apo.

73 Ken adda met dagiti sabsabali a mangayat a mangammo iti pagayatak maipanggep kadakuada, ta dinamagda kaniak.

74 Ngarud, kunak kadakayo maipanggep iti katulongak a ni Vinson Knight, no aramidenna ti pagayatak mangikabil koma iti puonan iti dayta a balay a para kenkuana, ken para iti kaputotanna a sumarsaruno, iti tunggal kaputotan.

75 Ket ipukkawna koma ti timekna a nabayag ken napigsa, iti ummong dagiti tao, a ^amangipakaasi iti pagsayaatan dagiti nakurapay ken agkasapulan; ket saan koma nga agkamtud, wenno aglulok ti pusona; ket ^bawatekto ti datonna, ta saandanto a para kaniak a kas daton ni Cain, ta isu ti kukuak, kinuna ti Apo.

76 Agrag-o koma ti kaamaanna ket ilaksidda ti puspusoda iti rigat; ta isu ti pinili ken dinutokak, ket maraemto iti tengnga ti balayna, ta pakawanek amin a basolna, kinuna ti Apo. Amen.

77 Pudno kunak kadakayo, mangikabil koma met ti katulongak a ni Hyrum iti puonan iti dayta a balay iti namnamaenna a nasayaat, para kenkuana ken iti kaputotanna a sumarsaruno, iti tunggal kaputotan.

78 Mangikabil koma ti katulongak a ni Isaac Galland iti puonan iti dayta a balay; ta siak, ti Apo, ipatpategko gapu iti trabaho nga inwakasna, ket pakawanek amin a basolna; ngarud, malaglagipto koma ti bingayna iti dayta a balay iti tunggal kaputotan.

79 Mairaman koma kadakayo a natudingan ti katulongak a ni Isaac Galland, ket ordenan ti katulongak a ni William Marks, ken bendisionanna, a sumurot iti katulongak a ni Hyrum a mangipatungpal iti aramid a paaramid kadakuada ni katulongak a ni Joseph, ket mabendisionandanto iti adu.

80 Agbayad koma ti katulongak a ni William Marks iti puonan iti dayta a balay, iti namnamaenna a nasayaat, para kenkuana ken iti kaputotanna, iti tunggal kaputotan.

81 Agbayad koma ti katulongak a ni Henry G. Sherwood iti puonan iti dayta a balay, iti namnamaenna a nasayaat, para kenkuana ken iti sumarsaruno a bukelna, iti tunggal kaputotan.

82 Agbayad koma ni katulongak a William Law iti puonan iti dayta a balay, para kenkuana ken iti sumarsaruno a bukelna, iti tunggal kaputotan.

83 No aramidenna ti pagayatak saanna koma nga ipan ti kaamaanna iti dumaya a dagdaga, a kas iti Kirtland; nupay kasta, siak, ti Apo, bangonekto ti Kirtland, ngem siak, ti Apo, adda panaplit nga insaganak kadagiti agindeg sadiay.

84 Ket ti katulongak a ni Almon Babbitt, adu dagiti banag a diak magustuan; adtoy, tinarigagayanna ti mangbukel iti konsehona iti laksid ti konseho nga inordenak, nga isu dayta Panguluen ti Simbaanko; ket nangikabil iti ^abimmalitok a baka a pagdaydayawan dagiti taok.

85 Awan koma ti tao a ^apumanaw iti daytoy a lugar nga immay ditoy a mangpadas a mangtungpal kadagiti bilinko.

86 No agindegda ditoy agindegda koma kaniak; ket no matayda matayda koma kaniak; ta ^aaginanadanto kadagiti amin a trabahoda ditoy, ket ituloydanto dagiti aramidda.

87 Ngarud, agtalek koma kaniak ti katulongak a ni William, ket isardengna ti agdandanag maipanggep iti kaamaanna, gapu iti sakit iti daga. ^aNo ay-ayatendak, tungpalenyo dagiti bilinko; ket ti sakit iti daga ^bagbanagto para iti gloriayo.

88 Mapan koma ipakdaar ti katulongak a ni William ti agnanayon nga ebangheliok iti napigsa a timek, ken napnuan rag-o, kas iti panangtignayto kenkuana ti ^aEspirituk, kadagiti agindeg iti Warsaw, ken kasta met kadagiti agindeg iti Carthage, ken kasta met kadagiti agindeg iti Burlington, ken kasta met kadagiti agindeg iti Madison, ket aguray a siaanus ken sireregta iti ad-adu a pannakaiwanwan iti sapasap a taripnongko, kinuna ti Apo.

89 No aramidennanto ti pagayatak imdenganna koma manipud ditoy ti balakad ni katulongak a Joseph, ket iti matgedanna ^amatulonganna dagiti nakurapay, ken ipablaakna ^bti baro a patarus ti nasantuan a balikasko kadagiti agindeg iti daga.

90 Ket no aramidennanto daytoy ^abendisionakto iti nakaad-adu a bendision, tapno saan a mabaybay-an, wenno masarakan dagiti bukelna nga ^bagdawdawat iti taraon.

91 Ket manen, pudno kunak kadakayo, matudingan koma ti katulongak a ni William, maordenan, ken mapusgan a mamagbaga ti katulongak a ni Joseph, iti kuarto ti katulongak a ni Hyrum, tapno maala ti katulongak a ni Hyrum ti takem ti Kinasaserdote ken ^aPatriarka, nga intuding kenkuana ti amana, babaen ti bendision ken kasta met a babaen ti kalintegan;

92 Tapno manipud ita isunton ti agiggem kadagiti tulbek ti bendision ti ^akinapatriarka kadagiti ulo dagiti amin a taok.

93 Tapno asino man a bendisionanna mabendisionanto, ken asino man nga ^ailunodna mailunodto; tapno ania man a ^bpagkappengenyo iti daga mapagkappengto iti langit; ken ania man a warwaranyo iti daga mawarwaranto iti langit.

94 Ket manipud iti daytoy a kanito tudingak nga agbalin a propeta, ken ^amammadto, ken mammaltiing ti simbaanko, kasta met ti katulongak a ni Joseph;

95 Tapno agtignay met a maidanggay ken ni katulongak a Joseph; ken umawat iti balakad manipud iti katulongak a ni Joseph, a mangipakitanto kenkuana kadagiti ^atulbek a mabalin a dawaten ken awatenna, ket makoronaanto iti umasping a bendision ken gloria, ken dayaw, ken kinasaserdote, ken sagut ti kinasaserdote, a naminsan a naited ken ti katulongak a ni ^bOliver Cowdery;

96 Tapno paneknekan ni katulongak a Hyrum dagiti banag nga ipakitakto kenkuana, tapno agbalinto a nakallalagip ti naganna iti tunggal kaputotan, iti agnanayon nga awan inggana.

97 Awaten koma met ti katulongak a ni William Law dagiti tulbek a pakadawatan ken pakaawatanna iti bendision; ^aagpakumbaba koma kaniak, ken awanan iti ^bkinasikap, ket awatennanto ti Espirituk, nga isu ti ^cMangliwliwa, a mangipakitanto kenkuana iti kinapudno dagiti amin a banag, ken mangtedto kenkuana, iti dayta nga oras, iti sawennanto.

98 Ket kumuyogto kenkuana dagitoy a ^atanda—^bagasannanto dagiti masaksakit, paksiatennanto dagiti sairo, ken maisalakanto kadagiti mangipaay kenkuana iti makapatay a sabidong;

99 Ket maitundanto kadagiti dana a saan a pakatukkawan dagiti ^anagita nga uleg iti mukodna, ket ikapetnanto iti arapaap ti ^bpampanunotna a kas iti payak dagiti agila.

100 Ket ania no pagayatak a pagungarenna dagiti natay, dina koma pengdan ti timekna.

101 Ngarud, yikkis koma ti katulongak a ni William ket awan sardengna, a sirarag-o ken siraragsak, ken addaan iti panagdayaw kenkuana a nakatugaw iti trono iti agnanayon nga awan inggana, kinuna ti Apo a Diosyo.

102 Adtoy, kunak kadakayo, adda misionko a nakasagana ken ti katulongak a ni William, ken ti katulongak a ni Hyrum, ket para kadakuada laeng; ket agbati koma ti katulongak a ni Joseph iti balay, ta kasapulan. Ipakitakto dagiti nabati kalpasanna. Pudno a kasta. Amen.

103 Ket manen, pudno kunak kadakayo, no pagserbiannak ti katulongak a ni ^aSidney ken agbalin a mamagbaga ti katulongak a ni Joseph, tumakder koma ket umay ken agakem iti takemna, ket agpakumbaba iti imatangko.

104 Ket no idiayaannak iti maawat a daton, ken pammigbig, ket agtalinaed kadagiti taok, adtoy, siak, ti Apo a Diosyo, agasakto tapno maimbagan; ket ipukkawnanto manen ti timekna iti kabambantayan, ket agbalinto a ^apannakangiwatko iti imatangko.

105 Umay koma ket itiponna ti kaamaanna kadagiti kaarruba a pagyanan ti katulongak a ni Joseph.

106 Ket iti panagdaliasatna ipigsana koma ti timekna a kas iti aweng ti trumpeta, ket ballaaganna dagiti agindeg iti daga a liklikanda ti dumteng nga unget.

107 Tulonganna koma ti katulongak a ni Joseph, ken kasta met a tulongan koma ti katulongak a ni William Law ti katulongak a ni Joseph, a mangaramid iti napasnek a ^apanangiwaragawag kadagiti ari iti daga, a kas iti nasaok idin kadakayo.

108 No aramiden ti katulongak a ni Sidney ti pagayatak, saanna koma nga ikkaten ti kaamaanna iti ^adumaya a daga, ngem baliwanna koma ti pagyananda, a kas iti nasaokon.

109 Adtoy, diak pagayatan nga agsapulto iti pakaisalakanan ken pagkamangan iti ruar ti siudad nga intudingko kadakayo, nga isu ti siudad ti ^aNauvoo.

110 Pudno kunak kadakayo, a kas ita, no denggenna ti timekko, pagsayaatanna. Pudno a kasta. Amen.

111 Ket manen, pudno kunak kadakayo, agbayad koma ti katulongak a ni Amos Davies iti puonan kadagiti tinudingak a mangbangon iti balay a pagdagusan, a kas iti Balay iti Nauvoo.

112 Aramidenna koma daytoy no adda bingayna; ket dumngeg koma iti pamagbaga ni katulongak a Joseph, ket agtrabaho kadagiti bukodna nga ima tapno magun-odna ti panagtalek dagiti tao.

113 Ket no mapaneknekanna ti bagina a napudno kadagiti amin a banag a maitalekto kenkuana, wen, uray ti bassit a banag, agbalinto a ^amangituray iti adu;

114 ^aIpakumbabana koma ngarud ti bagina tapno maitan-ok. Pudno a kasta. Amen.

115 Ket manen, pudno kunak kadakayo, no tungpalen ni katulongak a Robert D. Foster ti timekko, mangbangon koma iti balay a para iti katulongak a ni Joseph, a maibatay iti kontrata a nagtulaganda, a kas iti pannakalukatto ti ridaw kenkuana no kasapulan.

116 Ket ibabawina koma amin a kinamaagna, ket kawesanna ti bagina iti ^akinamanangngaasi; ket isardengna ti agaramid iti dakes, ket isardengna amin dagiti nadagsen a panagsasaona;

117 Ken agbayad met iti puonan kadagiti korum iti Balay iti Nauvoo, para kenkuana ken ti kaputotanna a sumarsaruno, iti tunggal kaputotan;

118 Ken dumngeg iti balakad da katulongak a Joseph, ken Hyrum, ken William Law, ken kadagiti agturay a tinudingak a mangikabil iti pamuon ti Zion; ket pagsayaatannanto iti agnanayon nga awan inggana. Pudno a kasta. Amen.

119 Ket manen, pudno kunak kadakayo, awan koma ti tao nga agbayad iti puonan iti korum iti Balay iti Nauvoo no saanto a mamati iti Libro ni Mormon, ken kadagiti paltiing nga intedko kadakayo, kinuna ti Apo a Diosyo;

120 Ta dayta nga ^aagarup kapadpada daytoy yaay ti dakes, ket maipaayanto iti panangilunod ket saan a bendision, kinuna ti Apo a Diosyo. Pudno a kasta. Amen.

121 Ket manen, pudno kunak kadakayo, umisu koma ti panueldo ti korum iti Balay iti Nauvoo iti amin a panagtrabahoda iti pannakaipatakder ti Balay iti Nauvoo; ket matungpal koma ti nagtutulaganda a sueldo, a maibatay iti presiona.

122 Ket yabaga koma ti tunggal tao a nagbayad iti puonan ti panagpapada ti sueldo, no kasapulan, a para iti tulongda, kinuna ti Apo; no saan, ti panagtrabahoda mainayonto a puonanda iti dayta a balay. Pudno a kasta. Amen.

123 Pudno kunak kadakayo, itdek ita kadakayo dagiti ^adadaulo a kameng ti Kinasaserdotek, tapno maipaima kadakayo dagiti ^btulbek, nga isu ti Kinasaserdote babaen ti urnos ni ^cMelchizedek, a maibatay iti bilin ti Bugbugtong nga Anakko.

124 Umuna, itdek kadakayo ni Hyrum Smith a ^apatriarkayo, nga agiggem iti ^bpammatalged a bendision iti simbaanko, nga isu ti ^ckari ti Nasantuan nga Espiritu, a ^dpakapatalgedanyo iti aldaw ti pannakasubbot, tapno saankayo a matnag iti ania man nga ^eoras a dumteng kadakayo ti sulisog.

125 Itdek kadakayo ti katulongak a ni Joseph a mangiturong nga elder iti amin a simbaanko, nga agipatpatarus, nga mammaltiing, a ^amammadto, ken propeta.

126 Itdek kenkuana a mamagbaga ti katulongak a ni Sidney Rigdon ken ti katulongak a ni William Law, tapno buklen daytoy ti korum ken Umuna a Panguluen, nga umawat kadagiti ^aorakulo para iti intero a simbaan.

127 Itdek kadakayo ti katulongak a ni ^aBrigham Young nga agbalin a presidente dagiti Sangapulo-ket-dua nga agdaldaliasat a konseho;

128 A dagiti ^aSangapulo-ket-dua nga agiggem kadagiti tulbek a manglukat iti panangituray iti pagariak kadagiti uppat a suli ti daga, ket kalpasan dayta ^bmangidanon iti balikasko iti tunggal nabiag.

129 Isuda da Heber C. Kimball, Parley P. Pratt, Orson Pratt, Orson Hyde, William Smith, John Taylor, John E. Page, Wilford Woodruff, Willard Richards, George A. Smith;

130 ^aInnalak ni ^bDavid Patten; adtoy, awanen ti makaagaw kenkuana iti kinasaserdotena; ngem, pudno kunak kadakayo, adda sabali a matudingan iti isu met laeng nga akem.

131 Ket manen, kunak kadakayo, itdek kadakayo ti ^anangato a konseho, para iti panuli a bato ti Zion—

132 A da, Samuel Bent, Henry G. Sherwood, George W. Harris, Charles C. Rich, Thomas Grover, Newel Knight, David Dort, Dunbar Wilson—innalak ni Seymour Brunson; awan ti tao a makaala iti kinasaserdotena, ngem mabalin nga adda sabali a matudingan iti isu met laeng a kinasaserdote a mangisaup kenkuana; ket pudno kunak kadakayo, maordenan koma ti katulongak a ni Aaron Johnson iti daytoy nga akem a sukatna—David Fullmer, Alpheus Cutler, William Huntington.

133 Ket manen, itdek kadakayo ni Don C. Smith a presidente ti korum dagiti nangato a saserdote;

134 A nakairugian ti ordinansa para iti panggep a pakaikarian dagiti matudinganto a presidente wenno katulongan iti nadumaduma a ^aistaka a naiwaras iti ganggannaet;

135 Ket mabalinda met ti agdaliasat no pilienda, ngem maordenanda ketdi a presidente; daytoy ti pagtakeman ti akemda, kinuna ti Apo a Diosyo.

136 Itdek kenkuana da Amasa Lyman ken Noah Packard a mamagbagada, tapno makaiturongda iti korum dagiti nangato a saserdote ti simbaanko, kinuna ti Apo.

137 Ket manen, kunak kadakayo, itdek kadakayo da John A. Hicks, Samuel Williams, ken Jesse Baker, a ti kinasaserdoteda mangiturong iti korum dagiti ^aelder, a korum a narugian para kadagiti agpapaay a ministro, nupay kasta, makapagdaliasatda, maordenanda pay nga agbalin nga agpapaay a ministro iti simbaanko, kinuna ti Apo.

138 Ket manen, itdek kadakayo da Joseph Young, Josiah Butterfield, Daniel Miles, Henry Herriman, Zera Pulsipher, Levi Hancock, James Foster, a mangiturong iti korum dagiti ^apitopulo;

139 A korum a narugian a para kadagiti agdaldaliasat nga elder a mangpaneknek iti naganko iti intero a lubong, sadino man a pakaibaonan dagiti agdaldaliasat a nangato a konseho, dagiti apostolko, maibaondanto a mangisagana iti dalan iti imatangko.

140 Ti paggidiatan daytoy a korum ken ti korum dagiti elder ket ti maysa ti agtultuloy nga agdaldaliasat, ket ti sabali ti agtultuloy a mangimaton kadagiti simbaan; adda pagrebbengan ti maysa nga agtultuloy a mangimaton, ket ti maysa awan ti pagrebbenganna a mangimaton, kinuna ti Apo a Diosyo.

141 Ket manen, kunak kadakayo, itdek kadakayo da Vinson Knight, Samuel H. Smith, ken Shadrach Roundy, no awatenna, a mangiturong iti ^apagobispuan; naited kadakayo iti libro ti ^bDoktrina ken Katulagan ti pakaammuan iti nasao a pagobispuan.

142 Ket manen, kunak kadakayo, ni Samuel Rolfe ken dagiti mamagbagana para kadagiti saserdote, ken presidente dagiti maestro ken dagiti mamagbagana, ken kasta met ti presidente dagiti diakono ken dagiti mamalbalakadna, ken kasta met ti presidente ti istaka ken dagiti mamagbagana.

143 Naitedko kadakayo dagiti nasao a pagtakeman, ken dagiti tulbekda, a tumulong ken mangiwanwan, para iti aramid iti panagserbi ken iti ^apannakaan-anay dagiti santok.

144 Ket itedko kadakayo ti bilin, a nasken a punnuenyo amin dagitoy a pagtakeman ken ^aanamonganyo dagiti nagan a dinakamatko, wenno suppiatenyo ida iti sapasap a taripnongko;

145 Ken nasken nga isaganayo dagiti kuarto a para kadagiti amin a pagtakeman ti balayko no bangonenyo babaen ti naganko, kinuna ti Apo a Diosyo. Pudno a kasta. Amen.