1 Pudno, kastoy ti kuna ti Apo kadakayo a katulongak, maipanggep iti ^apangngarig ti trigo ken ruruot:

2 Adtoy, pudno kunak, ti talon ti lubong, ket dagiti apostol dagiti agmulmula iti bukel;

3 Ket kalpasan ti pannaturog dagiti nabileg a mangidaddadanes iti simbaan, dagiti kimmalilis iti kinapudno, dagiti mannakiabig, uray pay ti ^aBabilonia, a nangpainum iti amin a pagilian iti kopana, a kabusor ti panagpuspusoda, a kas ken ni Satanas, nagturayda—adtoy, immulana dagiti ruot; gapuna, rinimbawan dagiti ruot dagiti trigo ket inyabogna ti ^bsimbaan iti langalang.

4 Ngem adtoy, kadagiti ^amaudi nga aldaw, nga itan a rinugian ti Apo a yeg ti balikas, ket nabaludbod ti panagrangpayana uray no naganus pay—

5 Adtoy, pudno kunak kadakayo, umar-araraw dagiti ^aanghel iti Apo iti aldaw ken rabii, a sisasagana ken agur-uray a maibaon nga ^bagani iti kataltalonan;

6 Ngem kinuna ti Apo kadakuada, diyo pay la parparuten dagiti ruot bayat ti kaganus ti mula (ta pudno a nakapsut pay ti pammatiyo), amangan la ketdi ta madadaelyo met ti trigo.

7 Ngarud, bay-anyo nga aggiddan a dumakkel dagiti trigo ken ruot agingga a mabalinen ti agani; kalpasanna unaenyo nga anien dagiti trigo manipud kadagiti ruot, ket kalpasan ti pananganiyo kadagiti trigo, adtoy ket kitaenyo, sisasaganan a mareppet dagiti ruot, ket mabalinen a puoran ti talon.

8 Ngarud, kastoy ti kinuna ti Apo kadakayo, a nakaituloyan ti ^akinasaserdote babaen ti kapuonan dagiti ammayo—

9 Ta nainkalintegankayo nga ^aagtawid, a maibatay iti lasag, ket ^bnailemmeng iti lubong a naisurot ken ni Cristo iti Dios—

10 Ngarud nagtalinaed ti biagyo ken ti kinasaserdote, ket nasken nga agtalinaed kadakayo ken iti kapuonanyo agingga iti ^apannakaisubli dagiti amin a banag a nagtaud kadagiti ngiwat dagiti amin a nasantuan a propeta manipud idi punganay ti lubong.

11 Ngarud, mabendisionankayo no itultuloyyo iti kinaimbagko, ti ^alawag kadagiti Gentil, ken babaen daytoy a kinasaserdote, ti mangisalakan kadagiti taok nga ^bIsrael. Imbaga ti Apo daytoy. Amen.