Lēsoni 14 Naunau Teuteu ki he Kalasí: Hoko ko ha Meʻangāue ʻi he Toʻukupu ʻo e ʻOtuá
“Lēsoni 14 Naunau Teuteu ki he Kalasí: Hoko ko ha Meʻangāue ʻi he Toʻukupu ʻo e ʻOtuá,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 14 Naunau Teuteu ki he Kalasí,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 14 Naunau Teuteu ki he Kalasí
Hoko ko ha Meʻangāue ʻi he Toʻukupu ʻo e ʻOtuá
ʻĪmisi
talavou ʻokú ne vahevahe e Tohi ʻa Molomoná
Fakakaukau ki he tokolahi ʻo e kakai ʻokú ke vakai ki ai he ʻaho kotoa ʻoku ʻikai ke nau fiefia he ngaahi tāpuaki ʻo e ongoongolelei ʻo Sīsū Kalaisí. ʻE liliu fēfē nai ʻenau moʻuí kapau ne nau ako lahi ange fekauʻaki mo e palani ʻa e Tamai Hēvaní ki heʻenau fiefiá? ʻI hoʻo ako e ngaahi sīpinga ʻo e ngāue fakafaifekaú ʻi he Tohi ʻa Molomoná, lotua mo fakakaukau ki ha taha te ke lava ʻo vahevahe mo ia e ongoongoleleí. Manatuʻi ko hoʻo vahevahe ko ia e ongoongoleleí mo e niʻihi kehé, ʻokú ke kau ai ʻi hono tānaki fakataha ʻo ʻIsilelí.
Konga 1
ʻE tupulaki fēfē nai ʻeku loto holi ke vahevahe e ongoongoleleí ʻi hono fakaloloto ʻeku uluí?
Naʻe fakataha e ngaahi foha ʻe toko fā ʻo Mōsaiá (ʻĀmoni, ʻĒlone, ʻOmenā mo Himinai) mo ʻAlamā ko e Siʻí ʻi he taimi ne hā ange ai ha ʻāngelo ʻo fekau ia ke fakatomalá. Naʻe ongoʻi ʻe he kau tangata kotoa ʻe nimá ha mamahi lahi ʻi heʻenau ngaahi ngāué pea nau fakatomala mei heʻenau ngaahi angahalá pea ului ki he ʻEikí. ʻI he hili ʻenau uluí, “naʻa nau hoko ai ko ha ngaahi meʻangāue ʻi he toʻukupu ʻo e ʻOtuá ʻi hono fakatafoki mai ʻo e tokolahi ki he ʻiloʻi ʻo e moʻoní, ʻio, ki he ʻiloʻi ʻo honau Huhuʻí” (Mōsaia 27:36).
ʻĪmisi
fakaʻilonga, ako
Ako ke Teuteu ki he Kalasí
Lau ʻa e Mōsaia 28:1–3, ʻo kumi e founga ne takiekina ai ʻe he ului ʻa e ngaahi foha ʻo Mōsaiá ʻenau loto holi ke vahevahe e ongoongoleleí mo hoko ko ha ngaahi meʻangāue ʻi he toʻukupu ʻo e ʻOtuá.
Hili ha ngaahi taʻu ʻo e ngāue ʻa ʻĀmoni mo hongo ngaahi tokouá ʻi he lotolotonga ʻo e kau Leimaná, naʻá ne pehē ange kiate kinautolu: “Pea ko e tāpuaki ʻeni kuo foaki kiate kitautolú, kuo ngaohi kitautolu ke tau hoko ko e ngaahi meʻangāue ʻi he toʻukupu ʻo e ʻOtuá ki hono fakahoko ʻo e ngāue maʻongoʻongá ni” ʻo e fakamoʻuí (ʻAlamā 26:3).
Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí e meʻá ni fekauʻaki mo e founga ʻoku takiekina ai ʻe heʻetau uluí ʻa ʻetau loto holi ke vahevahe e ongoongoleleí.
ʻĪmisi
Palesiteni Tāleni H. ʻOakesi
ʻOku ʻikai ko ha kavenga hono vahevahe e ongoongoleleí ka ko ha fiefiaʻanga. ʻOku ʻikai ko ha polokalama e meʻa ʻoku tau ui ko e “ngāue fakafaifekau ʻa e mēmipá,” ka ko ha tōʻonga moʻui ʻo e ʻofá mo e loto ke tokoniʻi kinautolu ʻi hotau ʻātakaí. Ko ha toe faingamālie ke fakamoʻoniʻi e ongo ʻoku tau maʻu ki he ongoongolelei ʻa hotau Fakamoʻuí kuo toe fakafoki maí. Hangē ko ia kuo akoʻi ʻe ʻEletā Petinaá, “Ko e fakamoʻoni mahuʻinga taha ʻo ʻetau uluí mo e ongo ʻoku tau maʻu ki he ongoongoleleí ʻi heʻetau moʻuí, ko ʻetau loto ke vahevahe ia ki he niʻihi kehé” [M. Russell Ballard, “Now Is the Time,” Liahona, Jan. 2001, 89]. (“Ko Hono Vahevahe ʻo e Ongoongolelei Kuo Fakafoki Maí,” Liahona, Nōvema 2016, 60)
ʻĪmisi
fakaʻilonga, fakalaulauloto
Fakalaulauloto ke Teuteu ki he Kalasí
Kumi ha sīpinga mei he folofolá pe hisitōlia ʻo e Siasí fekauʻaki mo e founga ne fakatupulaki ai ʻe he uluí e loto holi ʻa ha tokotaha ke hoko ko ha meʻangāue ʻi he toʻukupu ʻo e ʻOtuá mo vahevahe e ongoongoleleí. Haʻu mateuteu ki he kalasí ke vahevahe hoʻo sīpingá.
Konga 2
Te u lava fēfē ʻo hoko ko ha meʻangāue lelei ange ʻi he toʻukupu ʻo e ʻOtuá?
Naʻe fehangahangai e ngaahi foha ʻo Mōsaiá pea mo kinautolu ne nau ō fakatahá mo ha “kakai anga kaivao mo loto fefeka pea mo angafitaʻa” ʻi heʻenau ō atu ke akoʻi e kakai Leimaná (ʻAlamā 17:8, 14). ʻI heʻenau ngāue ʻiate kinautolú, ko e kau faifekaú ni “naʻa nau fepaki mo [ha] ngaahi faingataʻa lahi; naʻa nau kātakiʻi ha ngaahi meʻa lahi, ʻi honau sinó mo e ʻatamaí fakatouʻosi, ʻo hangē ko e fiekaiá, fieinuá mo e ongosiá, pea mo e feinga lahi foki ʻi he laumālie” (ʻAlamā 17:5).
ʻĪmisi
fakaʻilonga, ako
Ako ke Teuteu ki he Kalasí
Lau ʻa e ʻAlamā 17:2–3, 9–11, ʻo kumi e meʻa ne fakahoko ʻe he ngaahi foha ʻo Mōsaiá ke maʻu ai e laumālie ʻo e fakahaá mo teuteu ke hoko ko ha ngaahi meʻangāue lelei ange ʻi he toʻukupu ʻo e ʻOtuá. Fakakaukau ke fakaʻilongaʻi ʻa e meʻa ʻokú ke maʻú.
Ko e hā e ngaahi ngāue kuo tokoni lahi taha atu ke fakafeʻungaʻi koe ki he Laumālié ke hoko ko ha meʻangāue lelei ange ʻi he toʻukupu ʻo e ʻOtuá?
Konga 3
ʻE tokoniʻi fēfē au ʻe he Laumālié ke lelei ange ʻeku tokoni ki he niʻihi kehé mo vahevahe e ongoongoleleí?
Naʻe hoko e ngaahi foha ʻo Mōsaiá ko ha ngaahi meʻangāue ʻi he toʻukupu ʻo e ʻOtuá, ʻi he tokoni ke ʻomi ha tokolahi ʻo e kakai Leimaná ki he Fakamoʻuí. Ne fononga tokotaha ʻa ʻĀmoni ki he fonua ʻo ʻIsimelí pea naʻe haʻi mo ʻave ai ia ki he ʻao ʻo e Tuʻi ko Lamonaí. Naʻe ʻeke ʻe he tuʻí kia ʻĀmoni ʻene ngaahi fakaʻamú, pea ne tali ange ʻe ʻĀmoni ʻokú ne loto ke nofo ʻi he lotolotonga ʻo e kakai Leimaná, ʻo mahalo ʻi he kotoa ʻene moʻuí. Naʻe fakahoifua ʻeni ki he Tuʻí, pea ne hoko ʻa ʻĀmoni ko ha taha ʻo ʻene kau tamaioʻeikí. (Vakai, ʻAlamā 17:19–25.)
Naʻe ʻave ʻa ʻĀmoni ke ne tokangaʻi e fanga sipi ʻa e tuʻí. ʻI he feinga ʻa e kau kaihaʻá ke fakamoveteveteʻi e tākanga monumanu īkí, ne taʻofi kinautolu ʻe ʻĀmoni ʻaki ʻene meʻataá mo e heletaá. Naʻe ofo e kau kaihaʻá ʻi he mālohi ʻo ʻĀmoní pea nau hola. (Vakai, ʻAlamā 17:25, 33–38.)
ʻI he ʻilo ʻe he Tuʻi ko Lamonaí ki hono lava lelei ʻe ʻĀmoni ʻo maluʻi ʻene tākanga monumanu īkí, naʻá ne ofo mo fifili pe ko ʻĀmoni ʻa e “Laumālie Lahi ʻa ia ʻokú ne fekauʻi ʻa e ngaahi fuʻu tautea lalahi pehē ki he kakaí ni” (ʻAlamā 18:2). ʻI he “fonu ʻa ʻĀmoni ʻi he Laumālie ʻo e ʻOtuá” (veesi 16), naʻá ne lava ke ʻiloʻi e ngaahi fakakaukau ʻa e tuʻí, fakafiemālieʻi ʻene ngaahi hohaʻá, pea kamata ke akoʻi kiate ia e ongoongoleleí (vakai, ʻAlamā 18:15–24).
ʻĪmisi
fakaʻilonga, ako
Ako ke Teuteu ki he Kalasí
Lau ʻa e ʻAlamā 18:33–35, pea fakakaukau ki he meʻa te ke lava ʻo ako meia ʻĀmoni fekauʻaki mo e hoko ko ha meʻangāue ʻi he toʻukupu ʻo e ʻOtuá.
Naʻe tui e Tuʻi ko Lamonaí ki he ngaahi lea ʻa ʻĀmoní peá ne ului ki he ongoongolelei ʻo Sīsū Kalaisí. Naʻe lava foki ke akoʻi ʻe ʻĀmoni e uaifi ʻo Lamonaí mo e kau tamaioʻeiki ʻa e tuʻí. Naʻe tui honau tokolahi ki he ngaahi akonaki ʻa ʻĀmoní mo fakamoʻoniʻi “kuo liliu honau lotó” (ʻAlamā 19:33). Koeʻuhí ko e hoko ʻa ʻĀmoni ko ha meʻangāue ʻi he toʻukupu ʻo e ʻOtuá, “naʻe kamata pehē ʻa e ngāue ʻa e ʻEikí ʻi he [konga ko ia ʻo e] kau Leimaná” (ʻAlamā 19:36).
Neongo he ʻikai tatau ʻetau ngaahi aʻusiá mo ʻĀmoní, ka te tau lava ʻo fakahoko ha faikehekehe ʻi he moʻui ʻa e niʻihi kehé ʻi he taimi ʻoku tau teuteuʻi ai kitautolu ke hoko ko ha meʻangāue ʻi he toʻukupu ʻo e ʻOtuá.
Naʻe fakamatalaʻi ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá e founga ʻe lava ke tau vahevahe ai mo e niʻihi kehé ʻa e ongoongoleleí:
ʻĪmisi
ʻEletā Tieta F. ʻUkitofa
Tatau ai pē pe ko e fē ha feituʻu ʻokú ke ʻi ai ʻi he māmaní, ʻoku lahi e ngaahi faingamālie ke vahevahe ai e ongoongo fakafiefia ʻo e ongoongolelei ʻo Sīsū Kalaisí ki he kakai te ke fetaulaki, ako, nofo fakataha pe ngāue mo feohi fakataha mo iá. …
Ko e hā pē ha founga ʻe ngali fakanatula mo angamaheni kiate koé, vahevahe ki he kakaí e ʻuhinga ʻoku mahuʻinga ai kiate koe ʻa Sīsū Kalaisi mo Hono Siasí. …
ʻOua ʻe fakangatangata pē ʻetau lotú maʻá e kau faifekaú ke nau ʻilo ʻa kinautolu kuo filí. Lotua fakaʻaho ʻaki ho lotó kotoa ke ke ʻilo ʻa kinautolu ʻe lava ʻo haʻu ʻo mamata,haʻu ʻo tokoni, pea haʻu ʻo nofó. (“Ngāue Fakafaifekaú: Ko Hono Vahevahe e Meʻa ʻI ho Lotó,” Liahona, Mē 2019, 15, 17)
ʻĪmisi
fakaʻilonga, fakalaulauloto
Fakalaulauloto ke Teuteu ki he Kalasí
Ko e hā ha ngaahi meʻa ʻe niʻihi kuó ke fakahoko ke vahevahe e ongoongoleleí ʻi ha ngaahi founga “fakanatula mo lelei”? Ko hai ʻokú ke fakakaukau ki ai ʻi he taimi ʻokú ke fakakaukau ai ke fakaafeʻi ha tokotaha ke haʻu ke ofi ange ki he Fakamoʻuí? Ko e hā te ke ala fakahoko ke hoko ko ha meʻangāue ʻi he toʻukupu ʻo e ʻEikí ʻi hono tokoniʻi ʻa kinautolu ʻokú ke fakakaukau ki aí?
