1 Ko ʻeni, ʻi he ^amāvae ʻa ʻĀmoni mo hono kāingá ʻi he ngataʻanga ʻo e fonua ʻo e kau Leimaná, vakai naʻe fai ʻe ʻĒlone ʻa ʻene fonongá ki he fonua naʻe ui ʻe he kau Leimaná ko Selūsalema, ko e fakahingoa ki he hingoa ʻo e fonua naʻe fāʻeleʻi ai ʻa ʻenau ngaahi kuí; pea naʻe mamaʻo atu ʻene tuʻú ʻo fehokotaki mo e ngaahi ngataʻanga fonua ʻo Molomoná.

2 Pea kuo hanga ʻe he kau Leimaná mo e kau ʻAmalekaí pea mo e kau ^aʻAmuloné ʻo langa ha fuʻu kolo naʻe ui ko Selūsalema.

3 Ko ʻeni ko e kau Leimaná ko e kakai akoʻingataʻa, ka ko e kau ʻAmalekaí mo e kau ʻAmuloné naʻa nau fefeka ange kinautolu; ko ia naʻa nau ueʻi hake ʻa e kau Leimaná ke nau fakafefeka honau lotó, pea ke nau tupulaki ʻo mālohi ʻi he fai angahalá mo e ngaahi anga-fakalieliá.

4 Pea naʻe hoko ʻo pehē naʻe aʻu atu ʻa ʻĒlone ki he kolo ko Selūsalemá, ʻo ne fuofua kamata ke malanga ki he kau ʻAmalekaí. Pea naʻe kamata ke ne malanga kiate kinautolu ʻi honau ngaahi fale lotú, he kuo nau langa ha ngaahi fale lotu ʻo tatau mo e ^akautaha ʻo e kau Nēhoá; he naʻe ʻi ai ʻa e tokolahi ʻo e kau ʻAmalekaí mo e kau ʻAmuloné naʻa nau kau ki he siasi ʻo e kau Nēhoá.

5 Ko ia, ʻi he hū atu ʻa ʻĒlone ki ha taha ʻo honau ngaahi fale lotú ke malanga ki he kakaí, pea lolotonga ʻene lea kiate kinautolú, ʻiloange naʻe tuʻu hake ha tangata ʻAmalekai, ʻo ne kamata ke fakakikihi mo ia, ʻo pehē: Ko e hā ʻa e meʻa kuó ke fakamoʻoniʻakí? Kuó ke mamata ki ha ^aʻāngelo? Ko e hā ʻoku ʻikai ke hā mai ai ha kau ʻāngelo kiate kimautolú? Vakai ʻikai ʻoku lelei tatau ʻa e kakaí ni mo ho kakaí?

6 ʻOkú ke toe pehē foki, te mau malaʻia kapau ʻe ʻikai te mau fakatomala. ʻOkú ke ʻiloʻi fēfē ʻa ʻemau ngaahi fakakaukaú mo e meʻa te mau faí? ʻOkú ke ʻiloʻi fēfē ʻoku ʻi ai ha ʻuhinga ke fakatomala? ʻOkú ke ʻiloʻi fēfē ʻoku ʻikai ko ha kakai ʻa kimautolu ʻoku māʻoniʻoni? Vakai, kuo mau langa ʻa e ngaahi potu tapu, pea ʻoku mau faʻa fakataha ke hū ki he ʻOtuá. ʻOku mau tui ʻe fakamoʻui ʻe he ʻOtuá ʻa e kakai fulipē.

7 Pea naʻe pehē ange ʻe ʻĒlone kiate ia: ʻOkú ke tui koā ʻe hāʻele mai ʻa e ʻAlo ʻo e ʻOtuá ke huhuʻi ʻa e faʻahinga ʻo e tangatá mei heʻenau ngaahi angahalá?

8 Pea naʻe pehē ange ʻe he tangatá kiate ia: ʻOku ʻikai ke mau tui ʻokú ke ʻiloʻi ha faʻahinga meʻa pehē. ʻOku ʻikai te mau tui ki he ngaahi talatukufakaholo laulaunoa ko iá. ʻOku ʻikai te mau tui ʻokú ke ʻilo ki he ngaahi ^ameʻa ʻe hoko maí, pea ʻikai foki te mau tui naʻe ʻiloʻi ʻe hoʻomou ngaahi tamaí pea mo ʻemau ngaahi tamaí foki ʻa e ngaahi meʻa naʻa nau lea ʻaki, ʻa ia naʻe kau ki he ngaahi meʻa ʻe hokó.

9 Ko ia naʻe kamata ʻa ʻĒlone ke fakamatala ʻa e ngaahi folofolá kiate kinautolu ʻo kau ki he hāʻele mai ʻa Kalaisí, kae ʻumaʻā foki ʻa e toetuʻu ʻo e pekiá, pea mo e ^aʻikai lava ke ʻi ai ha huhuʻi moʻó e faʻahinga ʻo e tangatá, kae ngata pē ʻi he hala mo e ngaahi mamahi ʻa Kalaisí, pea mo e ^bfakalelei ʻi hono lilingi hono taʻataʻá.

10 Pea naʻe hoko ʻo pehē ʻi heʻene kamata ke fakamatalaʻi ʻa e ngaahi meʻá ni kiate kinautolú, naʻa nau ʻita kiate ia, ʻo kamata ke manukiʻi ia; ʻo ʻikai te nau fie fanongo ki he ngaahi lea naʻá ne leaʻakí.

11 Ko ia, ʻi heʻene vakai ʻoku ʻikai te nau fie fanongo ki heʻene ngaahi leá, naʻá ne ʻalu atu mei honau fale lotú, ʻo ne ʻalu atu ki ha kolo ʻa ia naʻe ui ko ʻAni-ʻAnitai, pea naʻá ne ʻilo ai ʻa Mulokai ʻoku lolotonga fai ʻene malanga ʻaki ʻa e folofolá kiate kinautolu; kae ʻumaʻā foki mo ʻAma mo hono kāingá. Pea naʻa nau fakakikihi mo ha kakai tokolahi ʻo kau ki he ongoongoleleí.

12 Pea naʻe hoko ʻo pehē naʻa nau vakai ʻe fakafefeka ʻe he kakaí ʻa honau lotó, ko ia naʻa nau ō mei ai, ʻo nau fononga ki he fonua ko Mitonaí. Pea naʻa nau malanga ʻaki ʻa e folofola ki he tokolahi, ka naʻe tui pē ʻa e tokosiʻi ki he ngaahi folofola naʻa nau akonakiʻakí.

13 Ka neongo iá, naʻe puke ʻa ʻĒlone mo ha niʻihi ʻo hono kāingá ʻo fakahū ki he fale fakapōpulá, ka ko honau niʻihi naʻe toe naʻa nau hola mei he fonua ko Mitonaí ki he ngaahi potu takatakaí.

14 Pea ko kinautolu ʻa ia naʻe fakahū ki he fale fakapōpulá naʻa nau ^afaingataʻaʻia ʻi ha ngaahi meʻa lahi, pea naʻe fakatauʻatāinaʻi ʻa kinautolu ʻe Lamōnai mo ʻĀmoni, pea naʻe fafangaʻi mo fakakofuʻi ʻa kinautolu.

15 Pea naʻa nau toe ʻalu atu ke malanga ʻaki ʻa e ongoongoleleí, ka naʻe pehē honau muʻaki fakahaofi mei he fale fakapōpulá, pea naʻe pehē ʻa ʻenau mamahiʻiá.

16 Pea naʻa nau ʻalu atu ki he potu kotoa pē ʻa ia naʻe tataki ʻa kinautolu ki ai ʻe he ^aLaumālie ʻo e ʻEikí, ʻo nau malanga ʻaki ʻa e folofola ʻa e ʻOtuá ʻi he fale lotu kotoa pē ʻo e kau ʻAmalekaí, pe ʻi he fakatahaʻanga kotoa pē ʻo e kau Leimaná ʻa ia naʻe fakangofua ke nau hū ki aí.

17 Pea naʻe hoko ʻo pehē naʻe kamata ke tāpuakiʻi ʻa kinautolu ʻe he ʻEikí, ko ia naʻa nau ^afakatafoki ai ha tokolahi ki he ʻiloʻi ʻo e moʻoní; ʻio, naʻa nau fakamahino ki ha tokolahi ʻa ʻenau ngaahi angahalá, pea mo e ngaahi talatukufakaholo ʻa ʻenau ngaahi tamaí, ʻa ia naʻe ʻikai totonú.

18 Pea naʻe hoko ʻo pehē naʻe foki mai ʻa ʻĀmoni mo Lamōnai mei he fonua ko Mitonaí ki he fonua ko ʻIsimelí, ʻa ia ko e fonua ʻo hona tofiʻá.

19 Pea naʻe ʻikai ke fie tuku ʻe he tuʻi ko Lamōnaí ʻa ʻĀmoni ke ne ngāue maʻana, pe hoko ko ʻene tamaioʻeiki.

20 Ka naʻá ne fekau ke langa ha ngaahi fale lotu ʻi he fonua ko ʻIsimelí; pea naʻá ne fekau ki hono kakaí, pe ko e kakai naʻe fakaongoongo ki heʻene pulé, ke nau fakataha kātoa mai.

21 Pea naʻá ne fiefia koeʻuhi ko kinautolu, ʻo ne ako kiate kinautolu ʻa e ngaahi meʻa lahi. Pea naʻá ne fakahā foki kiate kinautolu ko e kakai ʻa kinautolu ʻa ia ʻoku fakaongoongo kiate ia, pea ko ha kakai tauʻatāina ʻa kinautolu, pea ko ha kakai ʻa kinautolu ʻoku tauʻatāina mei he ngaahi fakamālohi ʻa e tuʻi, ko ʻene tamaí; he kuo tuku kiate ia ʻe heʻene tamaí ke ne puleʻi ʻa e kakai ʻa ia ʻoku ʻi he fonua ko ʻIsimelí, pea ʻi he fonua kātoa ʻoku takatakai ki aí.

22 Pea naʻá ne fakahā foki kiate kinautolu te nau maʻu ʻa e ^atauʻatāina ke hū ki he ʻEiki ko honau ʻOtuá ʻo fakatatau ki heʻenau faʻitelihá, ʻi he potu pē ʻoku nau ʻi aí, ʻo kapau ʻoku ʻi he fonua ʻa ia ʻoku fakaongo ki he pule ʻa e tuʻi ko Lamōnaí.

23 Pea naʻe malanga ʻa ʻĀmoni ki he kakai ʻo e tuʻi ko Lamōnaí; pea naʻe hoko ʻo pehē naʻá ne akonaki kiate kinautolu ʻa e ngaahi meʻa kotoa pē ʻi he ngaahi meʻa ʻoku kau ki he māʻoniʻoní. Peá ne enginaki tūkuingata kiate kinautolu ʻi he ʻaho kotoa pē; pea naʻa nau tokanga ki heʻene leá, ʻo nau ngāue faivelenga ʻi he fai ʻo e ngaahi fekau ʻa e ʻOtuá.