1 Pea ko ʻeni naʻe hoko ʻo pehē naʻe ʻikai ke tuku ʻe Molonai ʻa e ngaahi teuteu ki he taú, pe ke maluʻi ʻo hono kakaí mei he kau Leimaná; he naʻá ne fekau ke kamata ʻe heʻene kau taú ʻi he kamataʻanga ʻo e taʻu hono uofulu ʻo e pule ʻa e kau fakamāú, ke nau kamata ke keli hake ha ngaahi fokotuʻunga kelekele ʻo takatakai ʻi he ngaahi kolo kotoa pē ʻi he fonuá hono kotoa ʻa ia naʻe maʻu ʻe he kau Nīfaí.

2 Pea naʻá ne fekau ke fokotuʻu hake ʻi he tumutumu ʻo e ngaahi fokotuʻunga kelekele ko ʻení ha ngaahi sinoʻi ʻakau, ʻio, ʻa e ngaahi ʻā ʻo e ngaahi ʻakau ʻo langa ke feʻunga mo hono māʻolunga ʻo ha tangata, ʻo takatakai ʻi he ngaahi koló.

3 Pea naʻá ne fekau ke fokotuʻu ʻi he funga ʻo e ngaahi ʻā ʻakau ko iá ha ngaahi ʻakau kuo fakamata māsila; pea naʻe mālohi ia mo māʻolunga.

4 Pea naʻá ne fekau ke langa ha ngaahi taua naʻe māʻolunga ange ʻi he ngaahi ʻā ʻakau māsila ko iá, pea naʻá ne tuʻutuʻuni ke langa ha ngaahi potu hūfanga ʻi he ngaahi funga taua ko iá, koeʻuhi ke ʻoua naʻa ʻi ai ha ngaahi maka mo e ngahau ʻa e kau Leimaná te nau lavea ai.

5 Pea naʻa nau mateuteu ke nau lava ʻo laku ʻa e ngaahi maka mei ʻolunga mei ai, ʻo fakatatau mo ʻenau faʻitelihá mo honau iví, ʻo tāmateʻi ia ʻe feinga ke haʻu ki he ngaahi ʻā ʻo e koló.

6 Naʻe pehē hono teuteuʻi ʻe Molonai ʻa e ngaahi kolotau ki he haʻu honau ngaahi filí, ʻo takatakai ʻi he kolo kotoa pē ʻi hono kotoa ʻo e fonuá.

7 Pea naʻe hoko ʻo pehē naʻe fekau ʻe Molonai ke ʻalu atu ʻene kau taú ki he feituʻu maomaonganoa ʻi he hahaké, ʻio, pea naʻa nau ō atu ʻo tuli ʻa e kau Leimana kotoa pē naʻe ʻi he feituʻu maomaonganoa ʻi he hahaké ki honau ngaahi fonua ʻonautolú, ʻa ia naʻe ʻi he tonga ʻo e fonua ko Seilahemalá.

8 Pea naʻe ʻalu hangatonu atu ʻa e fonua ko Nīfaí mei he tahi hahaké ki he hihifó.

9 Pea naʻe hoko ʻo pehē ʻi he hili hono tuli atu ʻe Molonai ʻa e kau Leimaná kotoa mei he feituʻu maomaonganoa ʻi he hahaké, ʻa ia naʻe ʻi he tokelau ʻo honau ngaahi fonuá ʻonautolú, naʻá ne fekau ke ʻalu ʻa e kakai ʻa ia naʻe ʻi he fonua ko Seilahemalá mo e fonua ofi ki aí, ki he feituʻu maomaonganoa ʻi he hahaké, ʻo aʻu ki he ngaahi ngataʻanga fonua ʻoku ofi ki he matātahí, ʻo maʻu ʻa e fonuá.

10 Pea naʻá ne tuku foki ha ngaahi kau tau ʻi he tongá, ʻi he ngaahi ngataʻanga fonua ʻo honau ngaahi fonua ʻonautolú, peá ne fekau ke nau langa ha ngaahi ^akolotau koeʻuhi ke nau maluʻi ʻenau ngaahi kau taú mo honau kakaí mei he nima ʻo honau ngaahi filí.

11 Pea ko ia naʻá ne motuhi atu ʻa e ngaahi kolotau kotoa pē ʻo e kau Leimaná ʻi he feituʻu maomaonganoa ʻi he hahaké, ʻio, kae ʻumaʻā foki ʻi he hihifó, ʻo ne keli kolo ʻi he ngataʻanga fonua ʻi he vahaʻa ʻo e kau Nīfaí mo e kau Leimaná, ʻi he vahaʻa ʻo e fonua ko Seilahemalá mo e fonua ko Nīfaí, ʻo fai mei he tahi hihifó, ʻo ʻalu atu ʻi he tafaʻaki ʻo e matavai ʻo e vaitafe ko Saitoné—pea maʻu ʻe he kau Nīfaí ʻa e fonua hono kotoa ʻi he fakatokelaú; ʻio, naʻa mo e fonua kotoa naʻe ʻi he fakatokelau ʻo e fonua ko Mahú, ʻo fakatatau ki heʻenau faʻitelihá.

12 Naʻe pehē ʻa e feinga ʻa Molonai, mo ʻene ngaahi kau taú, he naʻe fakaʻau ʻo tokolahi ange ʻi he ʻaho taki taha koeʻuhi ko e fakapapauʻi ʻo e maluʻi ʻa ia naʻe fakahā kiate kinautolu ʻe heʻene ngaahi ngāué, ke motuhi atu ʻa e ivi mo e mālohi ʻo e kau Leimaná mei honau ngaahi fonua ʻonautolú ke ʻoua naʻa nau maʻu ha mālohi ki honau ngaahi fonua ʻonautolú.

13 Pea naʻe hoko ʻo pehē naʻe kamata ʻe he kau Nīfaí ʻa e tuʻunga ʻo ha kolo, ʻo nau ui ʻa e hingoa ʻo e koló ko Molonai; pea naʻe ofi ia ki he tahi hahaké; pea naʻe ʻi he potu tongá ia ʻo ofi ki he ngataʻanga ʻo e ngaahi fonua ʻo e kau Leimaná.

14 Pea naʻa nau kamata foki ha tuʻunga ʻo ha kolo ʻi he vahaʻa ʻo e kolo ko Molonaí mo e kolo ko ʻĒloné, ʻo fehokotaki ʻa e ngaahi ngataʻanga ʻo ʻĒlone mo Molonaí; pea nau ui ʻa e hingoa ʻo e koló, pe ko e fonuá, ko Nīfaihā.

15 Pea naʻa nau kamata foki ʻi he taʻu pē ko iá ke langa ha ngaahi kolo lahi ʻi he tokelaú, ko e taha naʻe kehe hono langá naʻe ui ko Līhai, ʻa ia naʻe tuʻu ʻi he tokelaú ʻi he ngaahi ngataʻanga ʻo e matātahí.

16 Pea naʻe ʻosi pehē ʻa hono uofulu ʻo e taʻú.

17 Pea ko e ngaahi tuʻunga tuʻumālie ia naʻe ʻi ai ʻa e kau Nīfaí ʻi he kamataʻanga ʻo e taʻu hono uofulu mā taha ʻo e pule ʻa e kau fakamāú ki he kakai ʻo Nīfaí.

18 Pea naʻa nau fuʻu tuʻumālie ʻaupito, ʻo nau fakaʻau ʻo koloaʻia ʻaupito; ʻio, pea naʻa nau fakatokolahi pea naʻa nau fakaʻau ʻo mālohi ʻi he fonuá.

19 Pea ko ia ʻoku tau vakai ki hono lahi ʻo e ʻaloʻofa mo e angatonu ʻo e ngaahi ngāue kotoa pē ʻa e ʻEikí, ʻi hono fakahoko ʻene ngaahi folofola kotoa pē ki he fānau ʻa e tangatá; ʻio, ʻoku tau lava ʻo vakai kuo fakahoko ʻa ʻene ngaahi folofolá, ʻio ʻi he taimÍ ni, ʻa ia naʻá ne folofola ʻaki kia Līhai ʻo pehē:

20 ʻOkú ke monūʻia koe mo hoʻo fānaú; pea ʻe tāpuakiʻi ʻa kinautolu; kapau te nau tauhi ʻeku ngaahi fekaú te nau tuʻumālie ʻi he fonuá. Kae manatu, kapau ʻe ʻikai te nau tauhi ʻeku ngaahi fekaú ʻe ^amotuhi atu ʻa kinautolu mei he ʻao ʻo e ʻEikí.

21 Pea ʻoku tau vakai kuo fakamoʻoniʻi ʻa e ngaahi talaʻofá ni ki he kakai ʻo Nīfaí; he ko e meʻa ʻi heʻenau ngaahi fakakikihí mo ʻenau ngaahi fekeʻikeʻí, ʻio, ʻa ʻenau ngaahi fakapoó, mo ʻenau ngaahi vete koloá, mo ʻenau tauhi ʻotua loí, mo ʻenau ngaahi feʻauakí, mo ʻenau ngaahi anga-fakalielia, ʻa ia naʻe ʻiate kinautolú, kuo fakahoko ai kiate kinautolu ʻenau ngaahi taú mo honau ngaahi fakaʻauhá.

22 Pea ko kinautolu ko ia naʻe tui faivelenga ʻi hono tauhi ʻo e ngaahi fekau ʻa e ʻEikí naʻe fakahaofi ʻi he taimi kotoa pē, lolotonga iá ko e ngaahi toko lau afe ʻo honau kāinga fai angahalá kuo tuku atu ki he nofo pōpulá, pe ke ʻauha ʻi he heletā, pe ke fakaʻauʻauhifo ʻi he taʻetui, ʻo nau fetuiaki mo e kau Leimaná.

23 Kae vakai naʻe teʻeki ke ʻi ai ha taimi ^afakafiefia ange ʻi he kakai ʻo Nīfaí, talu mei he ngaahi ʻaho ʻo Nīfaí, ʻo hangē ko e ngaahi ʻaho ʻo Molonaí, ʻio, ʻi he taimi ko ʻení, ʻi hono uofulu mā taha ʻo e taʻu ʻo e pule ʻa e kau fakamāú.

24 Pea naʻe hoko ʻo pehē naʻe fakaʻosi foki ʻa e taʻu hono uofulu mā ua ʻo e pule ʻa e kau fakamāú ʻi he melino; ʻio, kae ʻumaʻā foki mo hono uofulu mā tolu ʻo e taʻú.

25 Pea naʻe hoko ʻo pehē ʻi he kamataʻanga ʻo hono uofulu mā fā taʻu ʻo e pule ʻa e kau fakamāú, naʻe totonu foki ke ʻi ai ʻa e melino ʻi he kakai ʻo Nīfaí ka ne taʻeʻoua ha ^afakakikihi naʻe hoko ʻiate kinautolu ʻo kau ki he fonua ko Līhaí, pea mo e fonua ko Molianitoní, ʻa ia naʻe ofi ki he ngaahi ngataʻanga fonua ʻo Līhaí; ʻa ia naʻe fakatou tuʻu ʻi he ngaahi ngataʻanga ki he matātahí.

26 He vakai, naʻe ʻekeʻi ʻe he kakai ʻa ia naʻa nau maʻu ʻa e fonua ko Molianitoní ha konga ʻo e fonua ko Līhaí, ko ia naʻe kamata ke ʻi ai ʻa e fakakikihi lahi ʻi honau vahaʻá, ʻo aʻu ki he toʻo hake ʻe he kakai ʻo Molianitoní ha ngaahi mahafu ke tauʻi honau kāingá, pea naʻe fakapapau honau loto ke tāmateʻi ʻa kinautolu ʻaki ʻa e heletā.

27 Kae vakai, naʻe hola ʻa e kakai naʻa nau maʻu ʻa e fonua ko Līhaí ki he nofoʻanga tau ʻo Molonaí, ʻo nau kole kiate ia ke tokoni mai; he vakai ko kinautolu ʻoku nau maʻu ʻa e totonu ki aí.

28 Pea naʻe hoko ʻo pehē ʻi he ʻilo ʻe he kakai ʻo Molianitoní, ʻa ia naʻe taki ʻe ha tangata ko hono hingoá ko Molianitoni, kuo hola ʻa e kakai ʻo Līhaí ki he nofoʻanga tau ʻo Molonaí, naʻa nau fuʻu ilifia telia naʻa haʻu kiate kinautolu ʻa e kau tau ʻa Molonaí, ʻo fakaʻauha ʻa kinautolu.

29 Ko ia, naʻe fakalotoʻi ʻa kinautolu ʻe Molianitoni ke nau hola ki he fonua naʻe tuʻu ʻi he fakatokelaú, ʻa ia naʻe ʻufiʻufi ʻe he ngaahi anovai lalahi, ʻo nau maʻu ʻa e fonua naʻe ʻi he fakatokelaú.

30 Pea vakai, naʻa nau meimei fakahoko ʻa e fakakaukaú ni, (ʻa ia ko ha meʻa pango naʻe mei tupu ai ha tangi lāulau), kae vakai, koeʻuhi ko Molianitoní ko ha tangata loto-ʻita, ko ia naʻá ne ʻita ki ha taha ʻo ʻene kau kaunangá, ʻo ne ʻohofi ia, ʻo haha lahi ia.

31 Pea naʻe hoko ʻo pehē naʻá ne hola, ʻo ne ʻalu atu ki he ʻapitanga ʻo Molonaí, ʻo ne fakahā kia Molonai ʻa e meʻa kotoa ʻo kau ki he meʻa ko iá, kae ʻumaʻā foki mo ʻenau ngaahi fakakaukau ke hola ki he fonua fakatokelaú.

32 Ko ʻeni vakai, ko e kakai naʻe ʻi he fonua ko Mahú, pe ko Molonaí, naʻa nau manavahē naʻa ʻiloange kuo nau tokanga ki he ngaahi lea ʻa Molianitoní ʻo fakataha mo hono kakaí, pea te ne maʻu ʻa e ngaahi potu fonua ko iá, ʻa ia ʻe ʻai ai ʻa e tuʻunga ki ha ngaahi fakatuʻutāmaki ʻi he kakai ʻo Nīfaí, ʻio, ʻa ia ko e ngaahi meʻa ʻe langaki ai hano ikunaʻi ʻo ʻenau ^atauʻatāiná.

33 Ko ia naʻe fekau ai ʻe Molonai ke ʻalu ha kau tau mo honau ʻapitangá ke fetaulaki mo e kakai ʻo Molianitoní, ʻo taʻofi ʻenau hola ki he fonua fakatokelaú.

34 Pea naʻe hoko ʻo pehē naʻe ʻikai te nau fetaulaki mo kinautolu kae ʻoua kuo nau aʻu ki he ngaahi ngataʻanga ʻo e fonua ko ^aʻAuhá; pea naʻa nau fetaulaki ai mo kinautolu, ʻo ofi ki he kavelemotu ʻa ia naʻe aʻu atu ki he tahi ʻi he fonua fakatokelaú, ʻio, ʻi he matātahi, ʻi he hihifó mo e hahaké.

35 Pea naʻe hoko ʻo pehē ko e kau tau naʻe fekauʻi atu ʻe Molonaí, ʻa ia naʻe taki ʻe he tangata ko hono hingoá ko Teanikumi, naʻa nau fetaulaki mo e kakai ʻo Molianitoní; pea naʻe lahi fau ʻa e loto-fefeka ʻa e kakai ʻo Molianitoní, (he naʻe ueʻi hake honau lotó ʻe heʻene fai angahalá mo ʻene ngaahi lea fakahekeheké), ko ia naʻe kamata ai ha tau ʻi honau vahaʻá, ʻa ia naʻe tāmateʻi ai ʻa Molianitoni ʻe Teanikumi, ʻo ikunaʻi ʻene kau tau, mo ne puke pōpula ʻa kinautolu, pea foki ki he ʻapitanga ʻo Molonaí. Pea naʻe ʻosi pehē hono uofulu mā fā ʻo e taʻu ʻo e pule ʻa e kau fakamāú ki he kakai ʻo Nīfaí.

36 Pea naʻe anga pehē hono fakafoki mai ʻo e kakai ʻo Molianitoní. Pea ʻi heʻenau fuakava ke tauhi ʻa e melinó naʻe toe fakafoki ʻa kinautolu ki he fonua ko Molianitoní, pea naʻa nau fakataha ai mo e kakai ʻo Līhaí; pea naʻe toe fakafoki ʻa kinautolu ki honau ngaahi fonuá.

37 Pea naʻe hoko ʻo pehē ʻi he taʻu pē ko ia naʻe toe fokotuʻu ai ʻa e melinó ʻi he kakai ʻo Nīfaí, naʻe pekia ai ʻa Nīfaihā, ko e fakamaau lahi hono uá, pea kuó ne fakahoko ʻa e lakanga ʻo e fakamāú ʻi he angatonu haohaoa ʻi he ʻao ʻo e ʻOtuá.

38 Ka neongo iá, naʻá ne fakafisi ke tali ʻa e kole ʻe ʻAlamā ke ne tauhi ʻa e ngaahi lekooti mo e ngaahi meʻa ko ia ʻa ia naʻe lau ʻe ʻAlamā mo ʻene ngaahi tamaí ʻoku toputapu tahá; ko ia naʻe tuku ʻe ʻAlamā ʻa e ngaahi meʻa ko iá ki hono foha, ko Hilamaní.

39 Vakai, naʻe hoko ʻo pehē naʻe fili ʻa e foha ʻo Nīfaihaá ki he nofoʻanga fakamāú, ʻo fetongi ʻene tamaí; ʻio, naʻe fili ia ko e fakamaau lahi mo e pule ki he kakaí, ʻi ha fuakava mo e ouau toputapu ke fakamaau māʻoniʻoni, pea tauhi ʻa e melinó mo e tauʻatāina ʻa e kakaí, pea foaki kiate kinautolu ʻa honau ngaahi faingamālie toputapu ke hū ki he ʻEiki ko honau ʻOtuá, ʻio, ke poupouʻi mo maluʻi ʻa ʻenau tui ki he ʻOtuá ʻi he kotoa hono ngaahi ʻahó, pea ʻomi ʻa e kau fai angahalá ki he fakamaau ʻo fakatatau ki heʻenau hiá.

40 Ko ʻeni vakai, ko hono hingoá ko Peiholani. Pea naʻe nofo ʻa Peiholani ʻi he nofoʻanga ʻo ʻene tamaí, pea kamata ʻi he ngataʻanga ʻo e taʻu hono uofulu mā faá, ʻene pule ki he kakai ʻo Nīfaí.