1 Ko ʻeni te tau foki ʻi heʻetau lekōtí kia ʻAmalekaia pea mo kinautolu naʻa nau ^ahola mo ia ki he feituʻu maomaonganoá; he vakai, kuó ne ʻave ʻa kinautolu ʻa ia naʻa nau hola mo iá, ʻo nau ʻalu atu ki he ^bfonua ko Nīfaí ʻi he lotolotonga ʻo e kau Leimaná, ʻo nau ueʻi hake ʻa e kau Leimaná ke nau ʻita ki he kakai ʻo Nīfaí, pea aʻu ki hono fai ʻe he tuʻi ʻo e kau Leimaná ha fanongonongo ʻi hono fonuá kotoa, ki hono kakai kotoa pē, ke nau toe kātoa mai ke ʻalu hake ke tauʻi ʻa e kau Nīfaí.

2 Pea naʻe hoko ʻo pehē ʻi hono ʻoatu ʻo e fanongonongó ʻiate kinautolú naʻa nau fuʻu manavahē lahi ʻaupito; ʻio, naʻa nau manavahē ke fakatupu-houhau ki he tuʻí, pea naʻa nau toe ilifia foki ke ʻalu atu ʻo tau mo e kau Nīfaí telia naʻa mole ai ʻenau moʻuí. Pea naʻe hoko ʻo pehē naʻe ʻikai te nau fie fai ia, pe ko e tokolahi ange ʻo kinautolu naʻe ʻikai, fie talangofua ki he ngaahi fekau ʻa e tuʻí.

3 Pea ko ʻeni naʻe hoko ʻo pehē naʻe houhau ʻa e tuʻí koeʻuhi ko ʻenau talangataʻá; ko ia naʻá ne tuku ai kia ʻAmalekaia ʻa e pule ki he konga ko ia ʻo ʻene kau tau ʻa ia naʻe talangofua ki heʻene ngaahi fekaú, peá ne fekau kiate ia ke ne ʻalu atu ʻo fakamālohiʻi ʻa kinautolu ke toʻo mahafu.

4 Ko ʻeni vakai, ko e meʻa ʻeni naʻe holi ki ai ʻa ʻAmalekaiá; he ko e tangata olo poto ʻaupito ia ʻi he fai koví ko ia naʻá ne fokotuʻu ai ʻa e fakakaukau ʻi hono lotó ke fakahifo ʻa e tuʻi ʻo e kau Leimaná mei hono taloní.

5 Pea ko ʻeni kuó ne maʻu ʻa e pule ki he ngaahi konga ko ia ʻo e kau Leimaná ʻa ia naʻa nau loto lelei ki he tuʻí; pea naʻá ne feinga ke maʻu ʻa e loto ʻo e faʻahinga ʻa ia naʻe ʻikai ke talangofuá; ko ia naʻá ne ʻalu atu ki he potu naʻe ui ko ^aʻOnaitá, he kuo hola ki ai ʻa e kau Leimaná kotoa pē; he naʻa nau ʻiloʻi ʻoku haʻu ʻa e kau taú, pea ʻi he mahalo ko ʻenau haʻú ke fakaʻauha ʻa kinautolu, ko ia naʻa nau hola ai ki ʻOnaita, ki he potu ʻo e ngaahi mahafu taú.

6 Pea kuo nau fili ha tangata ke hoko ko e tuʻi mo e taki kiate kinautolu, ʻo fakapapau honau ʻatamaí ʻi he loto-mālohi he ʻikai fakamālohiʻi ʻa kinautolu ke nau ʻalu ke tauʻi ʻa e kau Nīfaí.

7 Pea naʻe hoko ʻo pehē kuo nau kātoa fakataha mai ki he tumutumu ʻo e moʻunga ʻa ia naʻe ui ko ʻAnitipasí, ʻo teuteu ki he tau.

8 Ko ʻeni naʻe ʻikai ko e loto ʻa ʻAmalekaiá ke tauʻi ʻa kinautolu ʻo fakatatau ki he ngaahi fekau ʻa e tuʻí; kae vakai, ko hono lotó ke falala mai kiate ia ʻa e ngaahi kau tau ʻo e kau Leimaná, koeʻuhí ke ne lava ʻo fokotuʻu ia ko honau takimuʻá pea fakahifo ʻa e tuʻí mei he taloní pea maʻu ʻe ia ʻa e puleʻangá.

9 Pea vakai, naʻe hoko ʻo pehē naʻá ne tuʻutuʻuni ke fokotuʻu ʻe heʻene kau taú ʻa honau ngaahi fale fehikitakí ʻi he teleʻa naʻe ofi ki he moʻunga ko ʻAnitipasí.

10 Pea naʻe hoko ʻo pehē ʻi heʻene poʻuli hifó naʻá ne fekau atu ha kau talafekau fufū ki he moʻunga ko ʻAnitipasí, ʻo kole ki he taki ʻo e faʻahinga naʻe ʻi he moʻungá, ʻa ia ko hono hingoá ko Lehonitai, ke ne ʻalu hifo ki he talalo moʻungá, he naʻá ne fakaʻamu ke talanoa mo ia.

11 Pea naʻe hoko ʻo pehē ʻi he maʻu ʻe Lehonitai ʻa e pōpoakí naʻá ne manavahē ke ʻalu hifo ki he talalo moʻungá. Pea naʻe hoko ʻo pehē naʻe toe fekau atu ʻa ʻAmalekaia ko hono tuʻo uá, ʻo kole kiate ia ke haʻu. Pea naʻe hoko ʻo pehē naʻe ʻikai ʻalu hifo ʻa Lehonitai; peá ne fekau atu ko hono tuʻo tolú.

12 Pea naʻe hoko ʻo pehē ʻi he ʻilo ʻe ʻAmalekaia he ʻikai te ne lava ʻo fakalotoʻi ʻa Lehonitai ke ʻalu hifo mei he moʻungá, naʻa ne ʻalu hake ki he moʻungá, ʻo ofi ki he nofoʻanga ʻo Lehonitaí; ʻo ne fekau atu ko hono tuʻo fā haʻane pōpoaki kia Lehonitai, ʻo kole ke ne ʻalu hifo, pea ke ne ʻomi ʻa ʻene kau leʻó mo ia.

13 Pea naʻe hoko ʻo pehē ʻi he ʻalu hifo ʻa Lehonitai mo ʻene kau leʻó kia ʻAmalekaiá, naʻe kole kiate ia ʻe ʻAmalekaia ke ne haʻu mo ʻene kau taú ʻi he poʻulí, ʻo ʻākilotoa ʻa e kau tangata ko iá ʻi honau ngaahi nofoʻangá, kuo tuku kiate ia ʻe he tuʻí ke ne puleʻí, pea te ne tukuange ʻa kinautolu ki he nima ʻo Lehonitaí, ʻo kapau te ne fakanofo ia (ko ʻAmalekaia) ko e pule hono ua ki he kau tau kotoa pē.

14 Pea naʻe hoko ʻo pehē naʻe ʻalu hifo ʻa Lehonitai mo ʻene kau tangatá ʻo nau ʻākilotoa ʻa e kau tangata ʻa ʻAmalekaiá, ko ia ʻi he teʻeki ai ke nau ʻā hake ʻi he maʻa ʻa e ʻahó kuo ʻākilotoa ʻa kinautolu ʻe he ngaahi kau tau ʻa Lehonitaí.

15 Pea naʻe hoko ʻo pehē ʻi heʻenau vakai kuo ʻākilotoa ʻa kinautolú, naʻa nau kole kia ʻAmalekaia ke ne fakangofua ke nau kau fakataha mo honau kāingá, koeʻuhi ke ʻoua naʻa fakaʻauha ʻa kinautolu. Ko ʻeni ko e meʻa tofu pē ʻeni naʻe holi ki ai ʻa ʻAmalekaiá.

16 Pea naʻe hoko ʻo pehē naʻá ne tukuange ʻene kau tangatá, ^aneongo ʻa e ngaahi fekau ʻa e tuʻí. Ko ʻeni ko e meʻa foki ʻeni naʻe fie maʻu ʻe ʻAmalekaiá, koeʻuhi ke ne lava ʻo fakahoko ʻene ngaahi fakakaukau ke fakahifo ʻa e tuʻí mei hono taloní.

17 Ko ʻeni ko e anga foki ʻo e kau Leimaná, kapau ʻe tāmateʻi ʻa honau pule lahí, pea fili ʻa e pule hono uá ke ne hoko ko honau pule lahí.

18 Pea naʻe hoko ʻo pehē naʻe fekau ʻe ʻAmalekaia ki ha toko taha ʻo ʻene kau tamaioʻeikí ke ne ʻoange fakasiʻisiʻi ʻa e meʻa fakakona ʻi he meʻakai ʻa Lehonitaí ke ne mate ai.

19 Ko ʻeni, ʻi he mate ʻa Lehonitaí, naʻe fili ʻe he kau Leimaná ʻa ʻAmalekaia ke ne hoko ko honau taki mo honau ʻeikitau lahí.

20 Pea naʻe hoko ʻo pehē naʻe laka atu ʻa ʻAmalekaia mo ʻene ngaahi kau taú (he kuó ne fakahoko ʻa e ngaahi meʻa naʻá ne holi ki aí) ki he fonua ko Nīfaí, ki he kolo ko Nīfai, ʻa ia ko e kolo mahuʻinga tahá.

21 Pea naʻe hāʻele mai ki tuʻa ʻa e tuʻí ke fakafetaulaki kiate ia mo ʻene kau leʻó, he naʻá ne mahalo kuo fakahoko ʻe ʻAmalekaia ʻa ʻene ngaahi fekaú, pea kuo tānaki fakataha mai ʻe ʻAmalekaia ʻa e fuʻu kau tau tokolahi pehē ke ʻalu ʻo tauʻi ʻa e kau Nīfaí.

22 Kae vakai, ʻi he hāʻele mai ki tuʻa ʻa e tuʻí ke feʻiloaki mo iá naʻe fekau ʻe ʻAmalekai ke ʻalu atu ʻa ʻene kau tamaioʻeikí ʻo fakafetaulaki ki he tuʻí. Pea nau ō atu ʻo punou hifo ʻi he ʻao ʻo e tuʻí, ʻo hangē ka fakaʻapaʻapa kiate ia koeʻuhi ko hono māʻolungá.

23 Pea naʻe hoko ʻo pehē naʻe mafao atu ʻe he tuʻí ʻa hono toʻukupú ke fokotuʻu hake ʻa kinautolu, ʻo hangē ko e anga ʻo e kau Leimaná, ko ha fakaʻilonga ʻo e melino, ʻa ia ko e anga kuo nau maʻu mei he kau Nīfaí.

24 Pea naʻe hoko ʻo pehē ʻi heʻene fokotuʻu hake ʻa e ʻuluaki tangatá mei he kelekelé, vakai naʻá ne hokaʻi ʻa e tuʻí ʻi hono mafú; ʻo ne tō ki he kelekelé.

25 Ko ʻeni naʻe hola ʻa e kau tamaioʻeiki ʻa e tuʻí; pea naʻe hiki hake ʻa e kalanga ʻa e kau tamaioʻeiki ʻa ʻAmalekaiá, ʻo pehē:

26 Vakai, ko e kau tamaioʻeiki ʻa e tuʻí kuo nau hokaʻi ia ʻi hono mafú, pea kuó ne tō, pea kuo nau hola; vakai, mou omi ʻo mamata.

27 Pea naʻe hoko ʻo pehē naʻe fekau ʻe ʻAmalekaia ki heʻene fuʻu kau taú ke nau laka atu ʻo mamata ki he meʻa kuo hoko ki he tuʻí; pea ʻi heʻenau aʻu atu ki he potu ko iá, ʻo ʻiloʻi ʻa e tuʻí kuo tō ʻi hono taʻataʻá, naʻe ʻai ʻe ʻAmalekaia ke hangē ʻokú ne ʻitá, ʻo ne pehē: ʻIlonga ia naʻe ʻofa ki he tuʻí, tuku ke ne ʻalu atu, ʻo tuli ʻene kau tamaioʻeikí ke tāmateʻi ʻa kinautolu.

28 Pea naʻe hoko ʻo pehē ko kinautolu kotoa pē naʻe ʻofa ʻi he tuʻí, naʻa nau ʻalu atu, ʻi heʻenau fanongo ki he ngaahi lea ní ʻo nau tuli ʻa e kau tamaioʻeiki ʻa e tuʻí.

29 Ko ʻeni, ʻi he mamata ʻa e kau tamaioʻeiki ʻa e tuʻí ʻoku tuli ʻa kinautolu ʻe ha kau taú, naʻa nau toe manavahē, ʻo nau hola ki he feituʻu maomaonganoá, ʻo ʻalu atu ki he fonua ko Seilahemalá, ʻo fakataha mo e ^akakai ʻo ʻĀmoní.

30 Pea ko e kau tau naʻa nau tuli ʻa kinautolú naʻa nau liu mai, he naʻe taʻeʻaonga ʻenau tuli ʻa kinautolú; pea naʻe maʻu pehē ʻe ʻAmalekaia ʻi heʻene kākaá ʻa e loto ʻo e kakaí.

31 Pea naʻe hoko ʻo pehē ʻi he ʻaho hono hokó, naʻá ne hū atu ki he kolo ko Nīfaí mo ʻene ngaahi kau taú, ʻo ne maʻu ʻa e koló.

32 Pea ko ʻeni naʻe hoko ʻo pehē ʻi he hili ʻa e fanongo ʻa e kuiní, kuo feia ʻa e tuʻí—he kuo fekau atu ʻe ʻAmalekaia ha talafekau ki he kuiní ʻo fakahā kiate ia kuo fakapoongi ʻa e tuʻi ʻe heʻene kau tamaioʻeikí, pea kuó ne tuli ʻa kinautolu ʻaki ʻene ngaahi kau taú, ka naʻe taʻeʻaonga, pea kuo nau hola ʻo hao—

33 Ko ia, ʻi he maʻu ʻe he kuiní ʻa e tala ní, naʻá ne fekau atu kia ʻAmalekaia, ʻo kole ke ne fakamoʻui ʻa e kakai ʻo e koló; peá ne kole foki kiate ia ke ne haʻu kiate ia; peá ne kole foki kiate ia ke ne ʻomi mo ia ha kau fakamoʻoni ke fakamoʻoni ki he pekia ʻa e tuʻí.

34 Pea naʻe hoko ʻo pehē naʻe ʻave ʻe ʻAmalekaia ʻa e tamaioʻeiki pē ko ia naʻá ne fakapoongi ʻa e tuʻí, mo kinautolu kotoa pē naʻe ʻiate iá, pea nau ō atu ki he kuiní, ʻi he potu naʻá ne meʻa aí; pea naʻa nau fakamoʻoniʻi kotoa pē kiate ia, naʻe feia ʻa e tuʻí ʻe heʻene kau tamaioʻeiki ʻaʻaná; pea naʻa nau pehē foki: Kuo nau hola; he ʻikai koā ʻoku fakamoʻoniʻi ai ʻenau koví? Pea ko ia, naʻa nau fakafiemālieʻi ʻa e kuiní ʻo kau ki he pekia ʻa e tuʻí.

35 Pea naʻe hoko ʻo pehē naʻe feinga ʻa ʻAmalekaia ke manako ʻiate ia ʻa e kuiní, peá ne maʻu ia kiate ia ko hono uaifi; pea ko ia ʻi heʻene kākā, mo e tokoni ʻa ʻene kau tamaioʻeiki olopotó, naʻá ne maʻu ʻa e puleʻangá; ʻio, naʻe fakahā ko e tuʻi ia ʻi hono kotoa ʻo e fonuá, ʻi he kakai kotoa pē ʻo e kau Leimaná, ʻa ia naʻe ^akau ai ʻa e kau Leimaná mo e kau Lēmiuelá mo e kau ʻIsimelí, mo e faʻahinga kotoa kuo angatuʻu mei he kau Nīfaí ʻo fai mei he pule ʻa Nīfaí ʻo aʻu ki he taimi lolotongá.

36 Ko ʻeni, ʻi he maʻu ʻe he kau ^aangatuʻu ko ʻení, ʻa e fakahinohino tatau mo e fakamatala tatau mo e kau Nīfaí, ʻio, kuo akonekina ʻa kinautolu ʻi he ^bʻilo tatau ʻo e ʻEikí, ka neongo iá, ko e meʻa ʻe ngali kehe ke fakahā, naʻe ʻikai fuoloa mei heʻenau mavahe atú kuo nau hoko ʻo loto-fefeka ange pea ʻikai fie ^cfakatomala, mo anga kaivao lahi ange, mo angakovi mo fekai ange ʻi he kau Leimaná—ʻo nau tali lelei ʻa e ngaahi talatukufakaholo ʻa e kau Leimaná; pea naʻa nau tuku kinautolu ki he fakapikopiko, mo e faʻahinga holi kovi fakakakano kotoa pē; ʻio, ʻo ngalo ʻaupito ʻiate kinautolu ʻa e ʻEiki ko honau ʻOtuá.