Ngaahi Folofolá
ʻAlamā 11


Vahe 11

ʻOku fakamatalaʻi ʻa e ngaahi mahuʻinga ʻo e lau paʻanga ʻa e kau Nīfaí—ʻOku fakakikihi ʻa ʻAmuleki mo Sisolome—ʻOku ʻikai fakamoʻui ʻe Kalaisi ʻa e kakaí ʻi heʻenau ngaahi angahalá—Ko kinautolu pē te nau mau ʻa e puleʻanga ʻo e langí ʻe fakamoʻuí—ʻE toe tuʻu hake ʻa e kakai kotoa pē ʻi he anga taʻe-faʻa-mate—ʻOku ʻikai ke toe ʻi ai ha mate hili ʻa e Toetuʻú. Taʻu 82 K.M. nai.

1 Ko ʻeni naʻe tuʻu ʻi he fono ʻo Mōsaiá ʻo pehē ko e tangata kotoa pē ʻoku hoko ko ha fakamaau ʻo e fonó, pe ko kinautolu kuo fili ko e kau fakamāú, ʻe maʻu ʻe kinautolu ʻa e totongi ʻo fakatatau ki hono fuoloa ʻo ʻenau ngāue ki hono fakamāuʻi ʻo kinautolu kuo ʻomi ki honau ʻaó ke fakamāuʻí.

2 Ko ʻeni kapau ʻoku moʻua ha tangata ʻi he paʻanga ki ha taha kehe, ʻo ʻikai te ne fie totongi ʻa ia ʻokú ne moʻua aí, ʻoku fai leva ha lāunga ki he fakamāú koeʻuhi ko ia; pea ʻoku ngāue ʻaki ʻe he fakamāú ʻa hono mafaí, ʻo ne fekau ha kau pule ke ʻomi ʻa e tangatá kiate ia; pea ʻokú ne fakamāuʻi ʻa e tangatá ʻo fakatatau ki he fonó pea mo e ngaahi fakamoʻoni naʻe ʻomi ke talatalaakiʻi ʻaki iá, pea ko ia naʻe fakamālohiʻi ai ʻa e tangatá ke totongi ʻa e meʻa naʻá ne moʻua aí, pe ʻe toʻo ʻene meʻa kotoa pē, pe ʻe kapusi ki tuʻa ia mei he kakaí ʻo hangē ko ha kaihaʻa mo e faʻao meʻa.

3 Pea naʻe totongi ʻa e fakamāú ʻo fakatatau ki hono fuoloa ʻo ʻene ngāué—Ko ha sēnine ʻo e koula ki he ngāue ʻo e ʻaho ʻe taha, pe ko ha sēnumi ʻo e siliva, ʻa ia ʻoku mahuʻinga tatau mo ha sēnine ʻo e koula; pea ʻoku fakatatau ʻeni mo e fono ʻa ia kuo fokotuʻú.

4 Vakai ko e ngaahi hingoa ʻeni ʻo ʻenau ngaahi konga koula kehekehé, mo ʻenau silivá, ʻo fakatatau ki honau mahuʻingá. Pea kuo fokotuʻu ʻa e ngaahi hingoá ʻe he kau Nīfaí, he naʻe ʻikai te nau lau paʻanga ʻo fakatatau ki he founga ʻo e kau Siu naʻe ʻi Selūsalemá; pea naʻe ʻikai foki te nau fua ʻo fakatatau ki he founga ʻo e kau Siú; ka naʻa nau liliu ʻenau laú mo ʻenau fuá ʻo fakatatau ki he loto mo e anga ʻo e nofo ʻa e kakaí ʻi he toʻu tangata taki taha, ʻo fai mai ki he pule ʻa e kau fakamaau ʻa ia kuo afokotuʻu ʻe he tuʻi ko Mōsaiá.

5 Ko hono anga foki ʻeni ʻo e ngaahi mahuʻinga ʻo ʻenau lau paʻangá—ko e sēnine ʻo e koula, mo e seone ʻo e koula, pea mo e sumu ʻo e koula, mo e limina ʻo e koula.

6 Ko ha sēnume ʻo e siliva, mo ha amanoa ʻo e siliva, mo ha ʻeseloma ʻo e siliva, pea mo ha ʻoniti ʻo e siliva.

7 Naʻe tatau ʻa e sēnume ʻo e silivá mo e sēnine ʻo e koulá, pea naʻe tatau taki taha ia mo e fua ʻe taha ʻo e paʻale, kae ʻumaʻā foki mo e fua ʻe taha ʻo e faʻahinga keleni kotoa pē.

8 Ko e seone ʻo e koulá naʻe liunga ua hono mahuʻingá ʻi hono mahuʻinga ʻo e sēniné.

9 Pea ko e sumu ʻo e koulá naʻe liunga ua hono mahuʻingá ʻi hono mahuʻinga ʻo e seoné.

10 Pea ko e limina ʻo e koulá naʻe tatau ʻa hono mahuʻingá mo e ngaahi meʻa ko iá kotoa.

11 Pea ko e ʻamanoa ʻe taha ʻo e silivá naʻe tatau mo e sēnume ʻe ua.

12 Pea ko e ʻeseloma ʻo e silivá naʻe tatau ia mo e sēnume ʻe fā.

13 Pea ko e ʻonití naʻe tatau ia mo hono mahuʻinga ʻo e ngaahi meʻa ko iá kotoa.

14 Ko e mahuʻinga foki ʻeni ʻo e ngaahi paʻanga iiki hifo ʻi heʻenau lau paʻangá—

15 ʻOku tatau ʻa e sipiloné mo hono vaeua ʻo e sēnume; ko ia ʻoku feʻunga ʻa e sipilone ʻe tahá mo e vaeua ʻo e fua ʻe taha ʻo e paʻale.

16 Pea ʻoku tatau ʻa e sipilumé mo hono vaeua ʻo e sipilone.

17 Pea ʻoku tatau ʻa e liá mo hono vaeua ʻo e sipilume.

18 Ko e ngaahi mahuʻinga foki ʻeni ʻo fakatatau ki heʻenau lau paʻangá.

19 ʻOku tatau foki ʻa e ʻanitione ʻo e koulá mo e sipilone ʻe tolu.

20 Ko ʻeni, ko e meʻa pē taha naʻe tokanga ki aí, ke maʻu ha tupu, koeʻuhi ko ʻenau maʻu ʻenau ngaahi totongi ʻo fakatatau ki hono fuoloa ʻo ʻenau ngāué, ko ia, naʻa nau ueʻi hake ai ʻa e kakaí ʻi he ngaahi fekeʻikeʻi mo e faʻahinga maveuveu kotoa pē pea mo e fai angahala, koeʻuhi ke fuoloa ange ai ʻenau ngāue ke maʻu ʻa ʻenau totongí, koeʻuhi ke nau amaʻu ʻa e paʻanga ʻo fakatatau mo e ngaahi tangi naʻe ʻomi kiate kinautolú; ko ia naʻa nau ueʻi hake ʻa e loto ʻo e kakaí ke nau ʻita kia ʻAlamā mo ʻAmuleki.

21 Pea naʻe kamata ʻe he Sisolome ko ʻení ke fakafehuʻi ʻa ʻAmuleki, ʻo pehē ange: Te ke tali mai muʻa kiate au ʻa e ngaahi fehuʻi ʻe niʻihi ʻa ia te u fai kiate koe? Ko e tangata poto foki ʻa Sisolome ʻi he ngaahi afilioʻi kākā ʻa e tēvoló, koeʻuhi ke ne fakaʻauha ʻa ia ʻoku leleí; ko ia, naʻá ne pehē ai kia ʻAmuleki: Te ke tali mai muʻa ʻa e ngaahi fehuʻi te u fai kiate koé?

22 Pea naʻe pehē ange ʻe ʻAmuleki kiate ia: ʻIo, kapau ʻe fakahā mai ʻe he aLaumālie ʻo e ʻEikí ʻa ia ʻoku ʻiate aú, ke u tali; koeʻuhi ʻe ʻikai te u lea ʻaki ha meʻa ʻoku faikehekehe mo e Laumālie ʻo e ʻEikí. Pea naʻe pehē ange ʻe Sisolome kiate ia: Vakai, ko e ʻoniti siliva ʻeni ʻe ono, pea te u ʻatu ʻeni kotoa pē maʻau ʻo kapau te ke fakafisinga ʻoku ʻi ai ha Tokotaha Fungani Māʻolunga.

23 Ko ʻeni naʻe pehē ange ʻe ʻAmuleki: ʻA koe, ʻa e afānau ʻo heli, ko e hā ʻokú ke bʻahiʻahiʻi ai aú? ʻIkai ʻokú ke ʻilo ʻoku ʻikai vaivai ʻa e kau māʻoniʻoní ki he ngaahi ʻahiʻahi pehē?

24 ʻOkú ke tui koā ʻoku ʻikai ha ʻOtua? ʻOku ou pehē kiate koe, ʻOku ʻikai, ka ʻokú ke ʻiloʻi ʻoku ʻi ai ha ʻOtua, ka ʻokú ke ʻofa lahi hake ki he apaʻanga ko ʻená ʻiate ia.

25 Pea ko ʻeni kuó ke loi ʻi he ʻao ʻo e ʻOtuá kiate au. Naʻá ke pehē mai kiate au—Vakai ki he ʻoniti ʻeni ʻe ono ko ʻení, ʻa ia ʻoku fuʻu mahuʻinga, te u ʻatu ia maʻau—ka naʻe toka ʻi ho lotó ke taʻofi ia ʻo ʻikai foaki kiate au; pea koe holi pē ʻa ho lotó ke u fakafisinga ʻa e ʻOtua moʻoni mo moʻuí, koeʻuhi ke ke maʻu ai ha ʻuhinga ke fakaʻauha au. Pea ko ʻeni vakai, ko e meʻa ʻi he fuʻu angahalá ni te ke maʻu hoʻo totongí.

26 Pea naʻe pehē ange ʻe Sisolome kiate ia: ʻOkú ke pehē koā ʻoku ʻi ai ha ʻOtua moʻoni mo moʻui?

27 Pea naʻe pehē ʻe ʻAmuleki: ʻIo, ʻoku ʻi ai ha ʻOtua moʻoni mo moʻui.

28 Pea naʻe pehē ʻe Sisolome: ʻOku tokolahi ʻa e ʻOtuá ʻi he toko tahá?

29 Pea tali ange ʻe ia, ʻOku ʻikai.

30 Ko ʻeni naʻe toe pehē ʻe Sisolome kiate ia: ʻOkú ke ʻiloʻi fēfē ʻa e ngaahi meʻá ni?

31 Peá ne pehē ange: Kuo fakahā ʻe ha aʻāngelo ʻa e ngaahi meʻá ni kiate au.

32 Pea toe pehē ange ʻe Sisolome: Ko hai ia ʻe hāʻele maí? Ko e ʻAlo ia ʻo e ʻOtuá?

33 Peá ne pehē ange kiate ia, ʻIo.

34 Pea naʻe toe pehē ange ʻe Sisolome: Te ne fakamoʻui koā ʻa hono kakaí ʻi aheʻenau ngaahi angahalá? Pea naʻe tali ange ʻe ʻAmuleki, ʻo ne pehē kiate ia: ʻOku ou pehē kiate koe, ʻe ʻikai, he ʻoku ʻikai ke ne lava ʻo fakaʻikaiʻi ʻa ʻene folofolá.

35 Ko ʻeni naʻe pehē ange ʻe Sisolome ki he kakaí: Tokanga ke mou manatuʻi ʻa e ngaahi meʻa ni; he naʻá ne pehē ʻoku ʻi ai ha ʻOtua pē taha; ka ʻoku pehē mai ʻe ia ʻe hāʻele mai ʻa e ʻAlo ʻo e ʻOtuá, ka ʻe ʻikai te ne fakamoʻui ʻa hono kakaí—ʻo hangē kuo ʻiate ia ʻa e mafai ke fekauʻi ʻa e ʻOtuá.

36 Ko ʻeni, naʻe toe pehē ange kiate ia ʻe ʻAmuleki: Vakai kuó ke loi, he ʻokú ke pehē ne u lea ʻo hangē ʻoku ʻiate au ʻa e mafai ke fekauʻi ʻa e ʻOtuá ko e meʻa ʻi heʻeku pehē ʻe ʻikai te ne fakamoʻui ʻa hono kakaí ʻi heʻenau ngaahi angahalá.

37 Pea ʻoku ou toe pehē kiate koe ʻoku ʻikai ke ne lava ʻo fakamoʻui ʻa kinautolu ʻi heʻenau ngaahi aangahalá; he ʻoku ʻikai te u lava ke fakaʻikaiʻi ʻa ʻene folofolá, pea kuó ne folofola ʻoku bʻikai lava ke maʻu ʻe ha meʻa taʻemaʻa ʻa e cpuleʻanga ʻo e langí; ko ia, ʻe lava fēfē ke fakamoʻui ʻa kimoutolu, kae ʻoua kuo mou maʻu ʻa e puleʻanga ʻo e langí? Ko ia, ʻe ʻikai lava ke fakamoʻui ʻa kimoutolu ʻi hoʻomou ngaahi angahalá.

38 Ko ʻeni naʻe toe pehē ange ʻe Sisolome kiate ia: Ko e Tamai Taʻengatá moʻoni ʻa e ʻAlo ʻo e ʻOtuá?

39 Pea naʻe pehē kiate ia ʻe ʻAmuleki: ʻIo, ko e aTamai Taʻengata moʻoni ia ʻo e langí mo e māmaní pea mo e ngaahi meʻa bkotoa pē ʻoku ʻi aí; ko e tupuʻangá ia mo e ikuʻangá, ko e ʻuluakí mo e ki muí;

40 Pea te ne hāʻele mai ki he amāmaní ke bhuhuʻi hono kakaí; pea te ne cfua kiate ia ʻa e ngaahi maumau-fono ʻanautolu ʻoku tui ki hono huafá; pea ko e faʻahinga ʻeni ʻe maʻu ʻa e moʻui taʻengatá, pea ʻoku ʻikai hoko ʻa e fakamoʻuí ki ha tokotaha kehe.

41 Ko ia ʻe nofo maʻu ʻa e kau angahalá ʻo hangē kuo aʻikai fai ha huhuʻí, kae ngata pē ʻi hono vete ange ʻo e ngaahi haʻi ʻo e maté; he vakai, ʻoku haʻu ʻa e ʻaho ʻe toe tuʻu ai ʻa e kakai bfulipē mei he maté ʻo tutuʻu ʻi he ʻao ʻo e ʻOtuá, pea ʻe cfakamāuʻi ʻa kinautolu ʻo fakatatau ki heʻenau ngaahi ngāué.

42 Ko ʻeni, ʻoku ʻi ai ha mate ʻoku ui ko ha mate fakasinó, pea ʻe vete ʻe he pekia ʻa Kalaisí ʻa e ngaahi ahaʻi ʻo e mate fakasino ko ʻení, koeʻuhi ke fokotuʻu hake ʻa e kakai fulipē mei he mate fakasinó ni.

43 ʻE toe afakatahaʻi ʻa e sinó pea mo e laumālié ʻi hono anga-haohaoá; ʻe toe fakafoki ʻa e alangá mo e hokotanga huí fakatouʻosi ki hono tuʻunga totonú, ʻo hangē foki ko hotau anga ʻi he taimi ní; pea ʻe taki mai ʻa kitautolu ke tutuʻu ʻi he ʻao ʻo e ʻOtuá, ʻo ʻiloʻi ʻo hangē foki ʻoku tau ʻiloʻi ʻi he taimi ní, pea bmanatuʻi lelei ʻa ʻetau cangahala kotoa pē.

44 Ko ʻeni, ʻe hoko ʻa e toe fakafoki ko ʻeni ki he kakai fulipē, ʻa e kakai motuʻa mo e kau talavou fakatouʻosi, ʻa e pōpula mo e tauʻatāina fakatouʻosi, ʻa e tangata mo e fefine, ʻa e kau fai angahala mo e kau māʻoniʻoni, pea naʻa mo e tuʻoni louʻulu ʻe tahá ʻe ʻikai mole ia mei honau ʻulú; ka ʻe toe afakafoki ʻa e meʻa kotoa pē ki hono tuʻunga haohaoá, ʻo hangē ʻoku ʻi aí ni iá, pe ʻoku ʻi he sinó, pea ʻe ʻomi ʻa kinautolu ke nau fakamatala ʻi he ʻao ʻo e fakamaau ʻo Kalaisi ko e ʻAló, mo e ʻOtua ko e bTamaí, pea mo e Laumālie Māʻoniʻoní, ʻa ia ko e ʻOtua Taʻengata pē ʻe ctaha, ke dfakamāuʻi ʻo fakatatau ki heʻenau ngaahi ngāué, pe ʻoku lelei ia pe kovi.

45 Ko ʻeni, vakai, kuó u lea kiate kimoutolu ʻi he mate ʻo e sino fakamāmaní, kae ʻumaʻā foki ʻa e atoetuʻu ʻo e sino fakamāmaní. ʻOku ou pehē kiate kimoutolu, ʻe bfokotuʻu hake ʻa e sino fakamāmaní ni ko ha sino ctaʻe-faʻa-mate, ʻa ia ko e pehē ko e toe tuʻu hake mei he maté, ʻio, mei he ʻuluaki maté ki he moʻui, koeʻuhi ke ʻoua naʻa nau toe dmate; pea fakataha honau laumālié mo honau sinó, pea ʻe ʻikai ke toe fakamavaheʻi; ko ia ʻe hoko hono kotoa ʻo e sinó ʻo efakalaumālie mo taʻe-faʻa-mate, koeʻuhi ke ʻoua naʻa nau toe lava ʻo ʻilo ʻa e ʻauʻauhá.

46 Ko ʻeni, ʻi he fakaʻosi ʻe ʻAmuleki ʻa e ngaahi lea ní, naʻe toe kamata ke ʻohovale ʻa e kakaí, pea naʻe kamata foki ʻa Sisolome ke tetetete. Pea naʻe ʻosi pehē ʻa e ngaahi lea ʻa ʻAmulekí, kae kehe ko ia pē ʻeni kuó u tohí.