1 Vakai, naʻe hoko ʻo pehē naʻe fuoloa siʻi hili ʻa e ʻoatu ʻe Molonai ʻa ʻene tohi ki he pule lahí, naʻá ne maʻu ha tohi meia ^aPeiholani, ko e pule lahi. Pea ko e ngaahi lea ʻeni ʻa ia naʻá ne maʻú:

2 Ko au, Peiholani, ʻa ia ko e pule lahi ki he fonua ní, ʻoku ou ʻoatu ʻa e ngaahi leá ni kia Molonai, ko e ʻeikitau pule ki he kau taú. Vakai, ʻoku ou pehē kiate koe, ʻe Molonai, ʻoku ʻikai te u fiefia ʻi homou ngaahi fuʻu ^afaingataʻaʻiá, ʻio, ʻoku fakamamahi ia ki hoku laumālié.

3 Kae vakai, ʻoku ʻi ai ʻa e niʻihi ʻoku nau fiefia ʻi homou ngaahi faingataʻaʻiá, ʻio, ʻo aʻu ki heʻenau angatuʻu ai kiate au, kae ʻumaʻā foki ʻa kinautolu ʻo hoku kakaí ʻa ia ko e kau ^atangata tauʻatāiná, ʻio, pea ko kinautolu ʻa ia kuo angatuʻú ʻoku nau fuʻu tokolahi fau.

4 Pea ko e faʻahinga ia kuo nau feinga ke toʻo meiate au ʻa e nofoʻanga ʻo e fakamāú pea ko kinautolu ia ʻa ia kuo fakatupu ʻa e angahala lahí ni; he kuo nau ngāue ʻaki ʻa e lea fakahekeheke lahi, ʻo nau kākaaʻi ʻa e loto ʻo e kakai tokolahi, ʻa ia ʻe hoko ko e tupuʻanga ʻo e faingataʻaʻia lahi ʻiate kitautolu; kuo nau taʻofi ʻa ʻemau ngaahi meʻakaí mo e nāunaú, pea kuo nau fakamanavaheeʻi ʻemau kau tangata tauʻatāiná ko ia kuo ʻikai ai te nau ō atu ai kiate kimoutolu.

5 Pea vakai, kuo nau kapusi au meiate kinautolu, pea kuó u hola ki he fonua ko Kitioné mo e kau tangata kotoa naʻá ku lava ʻo fakalotoʻí.

6 Pea vakai, kuó u ʻoatu ha tohi fanongonongo ʻi hono kotoa ʻo e potu fonua ko ʻení; pea vakai, ʻoku nau haʻu kiate kimautolu ʻi he ʻaho taki taha, mo ʻenau ngaahi mahafu taú, ke maluʻi honau fonuá mo ʻenau ^atauʻatāiná, pea sāuni homau ngaohikoviʻí.

7 Pea kuo nau haʻu kiate kimautolu, ʻo aʻu ki hono ngaohi ʻo kinautolu kuo nau tuʻu hake ʻo angatuʻu kiate kimautolú ke nau maluʻi ʻa kinautolu, ʻio, ʻo aʻu ki heʻenau ilifia kiate kimautolu ʻo ʻikai te nau loto-toʻa ke ō mai ke tau mo kimautolu.

8 Kuo nau puleʻi ʻa e fonuá, pe ko e kolo ko Seilahemalá; pea kuo nau fili ha tuʻi kiate kinautolu, pea kuó ne fai ha tohi ki he tuʻi ʻo e kau Leimaná, ʻa ia kuó ne fakapapau ai haʻane kau fakataha mo ia; pea ʻi he fakapapau ko iá kuó ne loto ai ke ne maluʻi ʻa e kolo ko Seilahemalá, pea ʻokú ne ʻamanaki ʻi he maluʻi ko iá ʻe malava ai ʻe he kau Leimaná ʻo ikuna ʻa hono toe ʻo e fonuá, pea ʻe fokotuʻu ia ko e tuʻi ki he kakaí ni hili hono ikuna ʻa kinautolu ʻe he kau Leimaná.

9 Pea ko ʻeni, kuó ke fakahalaʻi au ʻi hoʻo tohí, ka ʻoku tatau ai pē; ʻoku ʻikai te u ʻita, ka ʻoku ou fiefia ʻi he toʻa ʻa ho lotó. Ko au, Peiholani, ʻoku ʻikai te u kumi ki he mālohi, kae ngata pē ʻi he tauhi ʻa hoku nofoʻanga fakamāú koeʻuhí ke u maluʻi ʻa e ngaahi totonu mo e tauʻatāina ʻa hoku kakaí. ʻOku tuʻu maʻu hoku laumālié ʻi he tauʻatāina ko ia ʻa ia kuo ^afakatauʻatāinaʻi ai ʻa kitautolu ʻe he ʻOtuá.

10 Pea ko ʻeni, vakai, te mau feinga ke taʻofi ʻa e fai angahalá ʻo aʻu ki he lilingi toto. ʻE ʻikai te mau lilingi ʻa e toto ʻo e kau Leimaná ʻo kapau te nau nofo ʻi honau fonua ʻonautolú.

11 ʻE ʻikai te mau lilingi ʻa e toto ʻo hotau kāingá ʻo kapau ʻe ʻikai te nau angatuʻu, ʻo toʻo ʻa e heletā ke tauʻi ʻa kimautolu.

12 Te mau loto-fiemālie ke moʻulaloa ki he haʻamonga ʻo e nofo pōpulá ʻo kapau ʻoku hoa ia mo e fakamaau totonu ʻa e ʻOtuá, pe kapau te ne fekau kiate kitautolu ke fai pehē.

13 Kae vakai kuo ʻikai te ne fekau kiate kimautolu ke mau fakavaivaiʻi kimautolu ki homau ngaahi filí, ka ke mau ^afalala kiate ia, pea te ne fakahaofi ʻa kimautolu.

14 Ko ia, ʻe hoku tokoua ʻofeina, ko Molonai, tau taʻofi ʻa e koví, pea ko e kovi kotoa pē ʻoku ʻikai te tau lava ʻo taʻofi ʻaki ʻetau ngaahi leá, ʻio, ʻo hangē ko e ngaahi angatuʻú mo e ngaahi tafokí, tau ^ataʻofi ia ʻaki ʻetau ngaahi heletaá, koeʻuhí ke tau lava ʻo tauhi ʻetau tauʻatāiná, pea tau lava ai ʻo fiefia ʻi he fuʻu faingamālie lahi ʻo hotau siasí, mo e ngāue ʻa hotau Huhuʻí mo hotau ʻOtuá.

15 Ko ia, haʻu fakavavevave kiate au mo ha niʻihi ʻo hoʻo kau tangatá, pea tuku hono toé ke tokangaʻi ʻe Līhai mo Teanikumi; tuku kiate kinaua ʻa e mālohi ke angi ʻa e taú ʻi he potu ko ʻena ʻo e fonuá, ʻo fakatatau mo e ^aLaumālie ʻo e ʻOtuá, ʻa ia ko e laumālie foki ʻo e tauʻatāina ʻa ia ʻoku ʻiate kinauá.

16 Vakai kuó u ʻoatu ha ngaahi meʻakai mo e nāunau siʻi kiate kinautolu ke ʻoua naʻa nau mate kae ʻoua ke ke lava ʻo haʻu kiate au.

17 Tānaki fakataha ʻa e kau tau kotoa pē te ke lava ʻi hoʻo laka mai ki hení, pea te tau ō fakavavevave atu ki he kau angatuʻu ko iá, ʻi he māfimafi ʻo hotau ʻOtuá ʻo fakatatau ki he tui ʻa ia ʻoku ʻiate kitautolú.

18 Pea te tau maʻu ʻa e kolo ko Seilahemalá, koeʻuhi ke tau maʻu mo ha toe meʻakai ke ʻave atu kia Līhai mo Teanikumi; ʻio, te tau ʻalu atu ke tauʻi ʻa kinautolu ʻi he māfimafi ʻo e ʻEikí, pea te tau fakangata ʻa e fuʻu angahala lahí ni.

19 Pea ko ʻeni, ʻe Molonai, ʻoku ou fiefia ʻi he maʻu hoʻo tohí, he naʻá ku kiʻi hohaʻa pē ko e hā te mau faí, pe ʻe totonu kiate kimautolu ke mau ʻalu atu ʻo tauʻi homau kāingá.

20 Ka kuó ke pehē, kapau ʻe ʻikai te nau fakatomala kuo fekauʻi koe ʻe he ʻEikí ke ke ʻalu atu ʻo tauʻi ʻa kinautolu.

21 Tokanga ke ^afakamālohiʻi ʻa Līhai mo Teanikumi ʻi he ʻEikí; tala kiate kinaua ke ʻoua te na manavahē, he ʻe fakahaofi ʻa kinaua ʻe he ʻOtuá, ʻio, kae ʻumaʻā foki mo kinautolu kotoa pē ʻoku tuʻu maʻu ʻi he tauʻatāina ʻa ia kuo fakatauʻatāina ʻaki ʻa kinautolu ʻe he ʻOtuá. Pea ko ʻeni ʻoku ou fakaʻosi ʻeku tohi ki hoku tokoua ʻofeina, ko Molonaí.