សេចក្ដីផ្ដើម
ផែនការរបស់ព្រះវរបិតាសួគ៌
យើងបានរស់នៅឯស្ថានសួគ៌ជាមួយទ្រង់ ពីមុនពេលយើងមកកើតលើផែនដី ។ យើងគឺជាបុត្រាបុត្រីខាងវិញ្ញាណរបស់ទ្រង់ ហើយមានរូបកាយជាវិញ្ញាណ ។ យើងស្រឡាញ់ទ្រង់ ហើយទ្រង់ក៏ស្រឡាញ់យើងដែរ ។
ទំព័រ ៣៥៤
ព្រះវរបិតាសួគ៌បានបង្រៀនយើង អំពីផែនការរបស់ទ្រង់មានសម្រាប់យើង ។ ផែនការនោះមានឈ្មោះថា ផែនការនៃសេចក្តីសង្គ្រោះ ។ ប្រសិនបើយើងធ្វើតាមផែនការទ្រង់ យើងអាចក្លាយដូចព្រះវរបិតាសួគ៌ ។ ផែនការនោះតម្រូវឲ្យយើងមកកើតលើផែនដី ហើយទទួលបានរូបកាយសាច់ឈាម ។ យើងនឹងត្រូវបានសាកល្បងថា តើយើងនឹងជ្រើសរើសគោរពប្រតិបត្តិតាម ព្រះបញ្ញត្តិទាំងឡាយរបស់ព្រះដែរឬទេ ។
ផែនការនៃសេចក្ដីសង្គ្រោះ ផ្ដល់មធ្យោបាយមួយដើម្បីឲ្យយើងទៅរស់នៅជាមួយព្រះវរបិតាសួគ៌ម្ដងទៀត ។ យើងចាំបាច់ត្រូវគោរពព្រះបញ្ញត្តិទាំងឡាយ ។ ប៉ុន្តែយើងក៏នឹងត្រូវការជំនួយដែរ ។ យើងនឹងត្រូវការឲ្យអំពើបាបយើងបានដកចេញ ហើយយើងនឹងត្រូវការរូបកាយដែលបានរស់ឡើងវិញ ។ ដោយសារតែយើងមិនអាចដកយកអំពើបាបផ្ទាល់ខ្លួនយើងចេញ ឬ រស់ឡើងវិញដោយខ្លួនយើងបាន ទើបយើងត្រូវការព្រះអង្គសង្គ្រោះដើម្បីធ្វើកិច្ចការនេះសម្រាប់យើង ។
ព្រះវរបិតាសួគ៌បានជ្រើសរើសយកព្រះយេស៊ូវជាព្រះអង្គសង្គ្រោះរបស់យើង ។ ព្រះយេស៊ូវស្រឡាញ់ព្រះវរបិតាសួគ៌ ។ ព្រះយេស៊ូវក៏ស្រឡាញ់យើងដែរ ។ ទ្រង់បានសុខព្រះទ័យយាងមកប្រសូតលើផែនដី ដើម្បីបង្ហាញយើងអំពីរបៀបធ្វើជាមនុស្សសុចរិត ។ ទ្រង់នឹងបង្ហាញមាគ៌ាឲ្យយើងទាំងអស់គ្នាបានសង្គ្រោះ ។ ទ្រង់បានសុខព្រះទ័យរងទុក្ខជំនួសអំពើបាបរបស់យើង ។ ទ្រង់ក៏នឹងសុគត ហើយមានព្រះជន្មរស់ឡើងវិញ ដើម្បីឲ្យយើងនឹងរស់ឡើងវិញដែរ ។
សាតាំងក៏ចង់ធ្វើជាព្រះអង្គសង្គ្រោះរបស់យើងដែរ ។ ប៉ុន្តែវាមិនស្រឡាញ់ព្រះវរបិតាសួគ៌នោះទេ ។ វាមិនស្រឡាញ់យើងនោះទេ ។ វាចង់កែប្រែផែនការរបស់ព្រះវរបិតាសួគ៌ ដើម្បីវាអាចទទួលបានព្រះចេស្ដា និង សិរីរុងរឿងរបស់ព្រះវរបិតាសួគ៌ ។
បុត្រាបុត្រីខាងវិញ្ញាណមួយចំនួនរបស់ព្រះវរបិតាសួគ៌ បានជ្រើសរើសដើរតាមសាតាំង ។ ហេតុការណ៍នេះបានធ្វើឲ្យព្រះវរបិតាសួគ៌ក្រៀមក្រំព្រះទ័យ ។ ទ្រង់បានបណ្ដេញសាតាំង ព្រមទាំងអ្នកដើរតាមវាចេញពីស្ថានសួគ៌ ។ សាតាំងគឺជាអារក្ស ។ អារក្សព្រមទាំងវិញ្ញាណដែលបានដើរតាមវាចង់ឲ្យយើងប្រព្រឹត្តបាប ។
ព្រះវរបិតាសួគ៌បានត្រាស់បង្គាប់ព្រះយេស៊ូវ ឲ្យបង្កើតផែនដីសម្រាប់យើង ។ ព្រះយេស៊ូវបានធ្វើដូចនោះ ។ ទ្រង់បានបង្កើតព្រះអាទិត្យ ព្រះចន្ទ និង តារាទាំងពួង ។ ទ្រង់បានបង្កើតរុក្ខជាតិ និង សត្វទាំងឡាយលើផែនដី ។ ឥឡូវយើងមានផែនដីដើម្បីមកចាប់កំណើត ជាទីកន្លែងដែលយើងនឹងមានរូបកាយសាច់ឈាម ។
មនុស្សជាច្រើនមកកើតលើផែនដី ។ ពួកគេមួយចំនួនជ្រើសរើសគោរពប្រតិបត្តិតាមព្រះបញ្ញត្តិរបស់ព្រះ ប៉ុន្តែមួយចំនួនទៀតមិនបានគោរពតាមទេ ។ ព្យាការីជំនាន់បុរាណបានបង្រៀនប្រជាជន អំពីផែនការរបស់ព្រះវរបិតាសួគ៌ និង អំពីព្រះយេស៊ូវគ្រីស្ទ ។
ព្យាការីបានមានប្រសាសន៍ថា ព្រះវរបិតារបស់ព្រះយេស៊ូវគឺជាព្រះវរបិតាសួគ៌ ។ ព្រះមាតាទ្រង់គឺជាស្ត្រីដ៏ប្រពៃមួយរូបឈ្មោះម៉ារា ។ ទ្រង់នឹងប្រសូតនៅភូមិបេថ្លេហិម ។
ព្យាការីបានមានប្រសាសន៍ថា មនុស្សជាច្រើននឹងមិនជឿថា ព្រះយេស៊ូវគឺជាព្រះអង្គសង្គ្រោះទេ ។ ទ្រង់មានលក្ខណៈដូចមនុស្សទូទៅទៀតដែរ ហើយគ្មានទ្រព្យសម្បត្តិហូរហៀរទេ ។ មនុស្សជាច្រើននឹងស្អប់ទ្រង់ ។
ព្យាការីក៏បានប្រាប់អំពី យ៉ូហាន បាទីស្ទ ដែរ ។ លោកនឹងមកចាប់កំណើតពីមុនព្រះយេស៊ូវ ដើម្បីប្រកាសប្រាប់ប្រជាជនអំពីទ្រង់ ។ យ៉ូហាននឹងធ្វើពិធីបុណ្យជ្រមុជទឹកថ្វាយព្រះយេស៊ូវ ។
ព្យាការីបានមានប្រសាសន៍ថា ព្រះយេស៊ូវនឹងមានព្រះទ័យសន្ដោស ហើយសម្ដែងអព្ភូតហេតុជាច្រើន ។ ពីមុនទ្រង់សុគត ព្រះយេស៊ូវនឹងរងទុក្ខជំនួសអំពើបាបនៃមនុស្សទាំងអស់ ដើម្បីកុំឲ្យពួកគេរងទុក្ខប្រសិនបើពួកគេប្រែចិត្ត ។
ព្យាការីជាច្រើនបានដឹងថា ព្រះយេស៊ូវគ្រីស្ទដែលជាព្រះអង្គសង្គ្រោះយើង នឹងត្រូវគេឆ្កាង ។ ទ្រង់នឹងត្រូវគេដំដែកគោលភ្ជាប់ទៅនឹងឈើឆ្កាង ហើយលះបង់ព្រះជន្មទ្រង់សម្រាប់យើង ។
បីថ្ងៃក្រោយមក ទ្រង់នឹងមានព្រះជន្មរស់ឡើងវិញ ។ ព្រះវិញ្ញាណទ្រង់នឹងផ្គុំជាមួយព្រះកាយទ្រង់វិញ ។ ដោយសារតែព្រះយេស៊ូវសុគត ហើយរស់ឡើងវិញ នោះយើងទាំងអស់គ្នាក៏នឹងរស់ឡើងវិញដែរ ។
ព្រះគម្ពីរសញ្ញាថ្មីបង្ហាញថា ពាក្យពេចន៍របស់ព្យាការីគឺត្រឹមត្រូវ ។ នេះគឺជាដំណើររឿងរបស់ព្រះយេស៊ូវគ្រីស្ទ និង សាវករបស់ទ្រង់ ។ ទ្រង់ និង ពួកគេបានរស់នៅឯដែនដីសន្យា ។ មនុស្សជាច្រើនដែលរស់នៅទីនោះ ត្រូវបានហៅថា ពួកសាសន៍យូដា ។ ពួកសាសន៍រ៉ូម៉ាំងបានលុកលុយដែនដីបរិសុទ្ធ ហើយពួកគេបានគ្រប់គ្រងលើពួកសាសន៍យូដា ។