ជំពូក ៤៣
ព្រះយេស៊ូវប្រោសឡាសារឲ្យរស់ឡើងវិញ
បុរសម្នាក់ឈ្មោះឡាសារបានរស់នៅភូមិបេថេនី ជាមួយបងប្អូនស្រីរបស់គាត់ឈ្មោះ ម៉ារា និង ម៉ាថា ។ ព្រះយេស៊ូវស្រឡាញ់ឡាសារ និង បងប្អូនស្រីរបស់គាត់ ហើយពួកគេក៏ស្រឡាញ់ព្រះយេស៊ូវដែរ ។
ឡាសាបានធ្លាក់ខ្លួនឈឺខ្លាំង ។ ព្រះអង្គសង្គ្រោះបានគង់នៅក្រុងមួយទៀត ។ ម៉ារា និង ម៉ាថាបានបញ្ជូនពាក្យទៅទូលព្រះយេស៊ូវថា ឡាសារឈឺហើយ ។
ព្រះអង្គសង្គ្រោះមានបន្ទូលប្រាប់ពួកសិស្សទ្រង់ ឲ្យទៅជាមួយទ្រង់ដើម្បីជួយឡាសារ ។ ពួកសិស្សភ័យខ្លាចមិនចង់ទៅភូមិបេថេនីទេ ។ ទីនោះនៅជិតក្រុងយេរ៉ូសាឡិម ។ មនុស្សខ្លះនៅក្រុងយេរ៉ូសាឡិមចង់ធ្វើគុតព្រះយេស៊ូវ ។
ព្រះយេស៊ូវមានបន្ទូលប្រាប់ពួកសិស្សទ្រង់ថា ឡាសារស្លាប់ហើយ ។ ទ្រង់បានមានបន្ទូលថា ទ្រង់នឹងប្រោសគាត់ឲ្យរស់ឡើងវិញ ។ អព្ភូតហេតុនេះនឹងជួយពួកសិស្សទ្រង់ឲ្យដឹងថា ទ្រង់គឺជាព្រះអង្គសង្គ្រោះ ។ ព្រះយេស៊ូវបានយាងទៅភូមិបេថេនី ។ កាលទ្រង់បានទៅដល់ទីនោះ ឡាសារបានស្លាប់អស់រយៈពេលបួនថ្ងៃហើយ ។
ម៉ាថាបានទូលប្រាប់ព្រះយេស៊ូវថា ឡាសារច្បាស់ជាមិនបានស្លាប់ទេបើទ្រង់យាងមកឲ្យបានឆាប់ជាងនេះ ។ ព្រះយេស៊ូវមានបន្ទូលថា ឡាសារនឹងរស់ឡើងវិញ ។ ទ្រង់មានបន្ទូលសួរថាតើម៉ាថាជឿលើទ្រង់ឬទេ ។ ម៉ាថាបានទូលថា ព្រះពរ ។ នាងបានដឹងថា ព្រះយេស៊ូវគឺជាព្រះអង្គសង្គ្រោះ ។
ម៉ាថាបានចេញពីព្រះយេស៊ូវទៅនាំបងស្រីរបស់នាង ម៉ារា ។ ម៉ារាក៏បានទៅជួបព្រះយេស៊ូវដែរ ។ មានមនុស្សជាច្រើនបានទៅតាមនាង ។ ម៉ារាបានលុតជង្គង់ចុះ ហើយយំនៅទៀបព្រះបាទរបស់ព្រះអង្គសង្គ្រោះ ។ បណ្ដាជនដែលបានទៅជាមួយនាងក៏បានយំដែរ ។ ព្រះយេស៊ូវមានបន្ទូលសួរថាតើសពរបស់ឡាសារនៅណា ។
ព្រះយេស៊ូវបានយាងទៅរូងថ្ម ដែលឡាសារត្រូវបានបញ្ចុះ ។ មានថ្មមួយផ្ទាំងបាំងនៅពីមុខនោះ ។ ទ្រង់មានបន្ទូលប្រាប់ឲ្យគេប្រមៀលថ្មនោះចេញ ។
ព្រះយេស៊ូវបានងើយព្រះភក្ត្រឡើងលើ ។ ទ្រង់ថ្លែងអំណរគុណព្រះវរបិតាសួគ៌ ដែលព្រះសណ្ដាប់សេចក្ដីអធិស្ឋានរបស់ទ្រង់ ។
បន្ទាប់ពី ព្រះយេស៊ូវមានបន្ទូលខ្លាំងៗប្រាប់ឲ្យឡាសារចេញពីរូងថ្មមក ។ ឡាសារបានដើរចេញមក ។ មនុស្សជាច្រើនដែលបានឃើញអព្ភូតហេតុនេះ ឥឡូវបានជឿថា ព្រះយេស៊ូវគឺជាព្រះអង្គសង្គ្រោះ ។