ជំពូក ៣៣
ការបង្ហាញខ្លួនក្នុងសិរីល្អ ៖ ការប្រែរូប
ព្រះយេស៊ូវបាននាំពេត្រុស យ៉ាកុប និង យ៉ូហាន ទៅលើកំពូលភ្នំដ៏ខ្ពស់មួយដើម្បីអធិស្ឋាន ។
នៅពេលព្រះយេស៊ូវបានអធិស្ឋាន នោះសិរីល្អនៃព្រះបានគ្រប់ដណ្ដប់ទ្រង់ ។ ព្រះភក្ត្រទ្រង់ភ្លឺចែងចាំងដូចព្រះអាទិត្យ ។ ព្យាការីក្នុងព្រះគម្ពីរសញ្ញាចាស់ពីររូបគឺ ម៉ូសេ និង អេលីយ៉ាស បានបង្ហាញខ្លួនដល់ទ្រង់ ។ ពួកលោកបានទូលជាមួយទ្រង់ អំពីការសុគត និង ការមានព្រះជន្មរស់ឡើងវិញដែលនឹងមកដល់ ។
កាលព្រះយេស៊ូវកំពុងអធិស្ឋាន នោះពួកសាវកបានដេកលក់ ។
កាលពួកគេបានក្រោកឡើង ពួកគេបានឃើញសិរីនៃព្រះយេស៊ូវគ្រីស្ទ ម៉ូសេ និង អេលីយ៉ាស ។ ពួកគេបានឮព្រះសូរសៀងរបស់ព្រះវរបិតាសួគ៌ថ្លែងទីបន្ទាល់ថា « នេះជាកូនស្ងួនភ្ងាយើង ជាទីពេញចិត្តយើងណាស់ ចូរស្តាប់តាមចុះ » ។
ពួកសាវកបានភ័យញ័រ ហើយបានដួលទៅលើដី ។ ព្រះយេស៊ូវបានពាល់ពួកគេ ដោយបន្ទូលថា កុំភ័យឡើយ ។ នៅពេលពួកគេងើយមើលទៅលើ នោះសារទូតសួគ៌ាបានយាងទៅផុតហើយ ។ ព្រះយេស៊ូវមានបន្ទូលប្រាប់ពួកសាវកកុំឲ្យប្រាប់នរណាឲ្យសោះ នូវហេតុការណ៍ដែលពួកគេបានឃើញ ដរាបដល់ទ្រង់បានសុគត ហើយមានព្រះជន្មរស់ឡើងវិញ ។