ជំនាន់ក្រោយព្រះគម្ពីរសញ្ញាថ្មី
ពួកទុច្ចរិតបានមានបំណងកែប្រែព្រះបញ្ញត្តិ ។ ពួកបរិសុទ្ធមួយចំនួនបានស្ដាប់តាមពួកគេ ។ មានមនុស្សជាច្រើនបានឈប់ជឿលើព្រះយេស៊ូវ ហើយពុំបានគោរពប្រតិបត្តិតាមព្រះបញ្ញត្តិទ្រង់ឡើយ ។
ពួកសាវក និង ពួកបរិសុទ្ធជាច្រើនត្រូវបានគេសម្លាប់ ។ គ្មាននរណាម្នាក់ត្រូវបានទុកជីវិតឲ្យនៅដឹកនាំសាសនាចក្រឡើយ ។ កូនសោបព្វជិតភាពត្រូវបានដកចេញពីផែនដី ។ មនុស្សគ្មានព្យាការីដឹកនាំពួកគេនោះទេ ។ សាសនាចក្រនៃព្រះយេស៊ូវគ្រីស្ទគ្មាននៅលើផែនដីទៀតឡើយ ។ សាវកពេត្រុស និង សាវកប៉ុលបានថ្លែងថាហេតុការណ៍នេះនឹងកើតឡើង ។
ម៉ាថាយ ២៣:៣៤, ២៤:៨–១០, រ៉ូម ៨:៣៦, កូរិនថូស ទី១ ៤:៩–១៣, ពេត្រុស ទី១ ៤:១២, Jesus the Christ ទំព័រ ៧៤៥–៧៤៦
រាប់រយឆ្នាំបានកន្លងផុតទៅ ។ មានសាសនាចក្រជាច្រើនបានរីកដុះដាលឡើង ។ គ្មានសាសនាចក្រណាមួយដែលមានសាវក ឬ បព្វជិតភាពរបស់ព្រះនោះទេ ។ គ្មានសាសនាចក្រណាមួយដែលជាសាសនាចក្រនៃព្រះយេស៊ូវគ្រីស្ទនោះទេ ។ ប៉ុន្តែពួកព្យាការីបានថ្លែងថា អស់រយៈ ពេលជាច្រើនឆ្នាំកន្លងផុតទៅ សាសនាចក្រនៃព្រះយេស៊ូវគ្រីស្ទនឹងមាននៅលើផែនដីវិញជាថ្មីម្ដងទៀត ។
ក្នុងឆ្នាំ ១៨២០ ក្មេងប្រុសម្នាក់ឈ្មោះ យ៉ូសែប ស៊្មីធ បានចង់ដឹងថាតើសាសនាចក្រណាមួយជាសាសនាចក្ររបស់ព្រះយេស៊ូវគ្រីស្ទ ។ គាត់បានដើរចូលទៅក្នុងព្រៃនៅជិតផ្ទះរបស់គាត់ ហើយបានអធិស្ឋាន ។ គាត់បានទូលសួរព្រះថាតើសាសនាចក្រណាមួយដែលពិត ។
ព្រះវរបិតាសួគ៌ និង ព្រះយេស៊ូវគ្រីស្ទបានយាងមកជួបយ៉ូសែប ស៊្មីធ ។ ព្រះអង្គសង្គ្រោះបានមានព្រះបន្ទូលប្រាប់យ៉ូសែបកុំឲ្យចូលរួមសាសនាចក្រណាមួយឲ្យសោះ ដោយសារតែគ្មានសាសនាចក្រណាមួយដែលជាសាសនាចក្ររបស់ទ្រង់ឡើយ ។
ព្រះបានសម្រេចព្រះទ័យនាំយកសាសនាចក្រនៃព្រះយេស៊ូវគ្រីស្ទ មកកាន់ផែនដីវិញតាមរយៈ យ៉ូសែប ស៊្មីធ ។ ព្រះបានបញ្ជូនទេវតាឲ្យមកប្រគល់បព្វជិតភាពដល់ យ៉ូសែប ស៊្មីធ ។ ទ្រង់បានជួយយ៉ូសែបបកប្រែព្រះគម្ពីរមរមន ។ នៅថ្ងៃទី ៦ ខែមេសា ឆ្នាំ ១៨៣០ សាសនាចក្រនៃព្រះយេស៊ូវគ្រីស្ទត្រូវបានរៀបចំឡើងនៅលើផែនដីម្ដងទៀត ។
គឺដូចជាព្រះយេស៊ូវបានជ្រើសរើសពួកសាវកដប់ពីរនាក់កាលទ្រង់បានគង់នៅលើផែនដីដែរ នោះព្រះបានជួយ យ៉ូសែប ស៊្មីធ ជ្រើសរើសសាវកដប់ពីរនាក់ ឲ្យជួយដល់លោកក្នុងការដឹកនាំសាសនាចក្រ ។ បុរសទាំងនេះបានទទួលអំណាចដើម្បីបង្រៀនដំណឹងល្អ និងដើម្បីសម្ដែងអព្ភូតហេតុ ។
ព្រះយេស៊ូវសព្វព្រះទ័យឲ្យមនុស្សគ្រប់គ្នាដឹងអំពីសាសនាចក្ររបស់ទ្រង់ ។ ទ្រង់មានបន្ទូលឲ្យ យ៉ូសែប ស៊្មីធ បញ្ជូនអ្នកផ្សព្វផ្សាយសាសនាទៅបង្រៀនមនុស្សទាំងពួង អំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ជាសាសនាចក្រដូចគ្នាដែលព្រះគ្រីស្ទបានរៀបចំកាលទ្រង់គង់លើផែនដី ។