ជំពូក ១៤
នីកូដេម
នីកូដេមគឺជាមនុស្សក្នុងក្រុមពួកសាសន៍យូដាមួយក្រុម ដែលត្រូវបានហៅថា ពួកផារីស៊ី ។ គាត់ក៏ជាចៅហ្វាយម្នាក់របស់ពួកសាសន៍យូដាដែរ ។ ពួកផារីស៊ីជាច្រើនមិនបានជឿថា ព្រះបានបញ្ជូនព្រះយេស៊ូវគ្រីស្ទមកទេ ។ ប៉ុន្តែ នីកូដេមបានជឿ ដោយសារតែអព្ភូតហេតុដែលព្រះយេស៊ូវបានធ្វើ ។
នីកូដេមបានមកទូលជាមួយព្រះអង្គសង្គ្រោះនាយប់មួយ ។ ព្រះយេស៊ូវបានមានព្រះបន្ទូលប្រាប់ថា គ្មាននរណាម្នាក់អាចចូលក្នុងនគរព្រះបានដោយមិនបានកើតម្ដងទៀតនោះទេ ។
នីកូដេមពុំយល់អំពីសេចក្ដីនោះឡើយ ។ តើមនុស្សម្នាក់អាចកើតម្ដងទៀតបានយ៉ាងដូចម្ដេច ? ព្រះអង្គសង្គ្រោះបានមានបន្ទូលពន្យល់ថា ទ្រង់កំពុងមានបន្ទូលអំពីកិច្ចការខាងវិញ្ញាណ ។ ដើម្បីកើតម្ដងទៀត មនុស្សម្នាក់ត្រូវតែទទួលពិធីបុណ្យជ្រមុជនៅក្នុងទឹក ហើយទទួលព្រះវិញ្ញាណបរិសុទ្ធ ។
ព្រះយេស៊ូវមានបន្ទូលពន្យល់ថា ទ្រង់ត្រូវបានបញ្ជូនមកផែនដីនេះ ដើម្បីជួយយើងទាំងអស់គ្នាឲ្យត្រឡប់ទៅរកព្រះវរបិតាសួគ៌វិញ ។ ទ្រង់បានមានបន្ទូលថា ទ្រង់នឹងរងទុក្ខជំនួសអំពើបាបរបស់យើង ហើយសុគតលើឈើឆ្កាង ដើម្បីយើងអាចមានជីវិតដ៏នៅអស់កល្បជានិច្ច ។
ទ្រង់បានមានបន្ទូលថា យើងចាំបាច់ត្រូវជឿលើទ្រង់ ហើយជ្រើសរើសផ្លូវត្រូវ ។ ប្រសិនបើយើងធ្វើអ្វីដែលត្រូវ យើងនឹងរស់នៅក្នុងនគរព្រះជារៀងរហូត ។