ជំពូក ៣
យ៉ូហាន បាទីស្ទបានចាប់កំណើត
ម៉ារាបានទៅសួរសុខទុក្ខអេលីសាបិត ។ ព្រះវិញ្ញាណបរិសុទ្ធបានមានបន្ទូលប្រាប់អេលីសាបិតថា ម៉ារានឹងក្លាយជាមាតារបស់ព្រះយេស៊ូវគ្រីស្ទ ។ ម៉ារា និង អេលីសាបិត បានថ្លែងអំណរគុណដល់ព្រះដែលបានប្រទានពរដល់ពួកគេ ។ ម៉ារាបានស្នាក់នៅជាមួយអេលីសាបិតអស់រយៈពេលបីខែ ។ បន្ទាប់មក ម៉ារាក៏បានត្រឡប់ទៅផ្ទះនៅឯក្រុងណាសារ៉ែតវិញ ។
កូនប្រុសរបស់អេលីសាបិតបានចាប់កំណើត ។ មិត្តភក្ដិ និង ក្រុមគ្រួសាររបស់គាត់មានចិត្តរីករាយ ។ ពួកគេបានគិតថា ទារកនោះគួរតែមានឈ្មោះដូចឪពុករបស់ខ្លួនគឺ សាការី ។ ប៉ុន្តែ អេលីសាបិតពោលថា ឈ្មោះទារកនេះគួរតែដាក់ឈ្មោះថា យ៉ូហាន ។ មនុស្សគ្រប់គ្នាមានសេចក្ដីអស្ចារ្យ ។
មានគេសួរសាការីថា តើទារកនេះគួរមានឈ្មោះអ្វី ។ សាការីនៅតែមិនអាចនិយាយបាន ដូច្នេះ លោកបានសរសេរថា « វាឈ្មោះយ៉ូហាន » ។
បន្ទាប់មក សាការីអាចនិយាយបានឡើងវិញ ។ លោកបានពេញទៅដោយព្រះវិញ្ញាណបរិសុទ្ធ ។ លោកបានមានប្រសាសន៍ប្រាប់ប្រជាជនថា ព្រះយេស៊ូវគ្រីស្ទនឹងប្រសូតមកឆាប់ៗនេះ ហើយយ៉ូហាននឹងរៀបចំមនុស្សថ្វាយទ្រង់ ។
យ៉ូហានបានចម្រើនវ័យឡើង ហើយបានក្លាយជាព្យាការីដ៏អស្ចារ្យ ។ លោកបានបង្រៀនប្រជាជនអំពីព្រះយេស៊ូវគ្រីស្ទ ។