ជំពូក ៩
ព្រះកុមារយេស៊ូវ
ព្រះយេស៊ូវបានចម្រើនព្រះជន្មដឹងក្ដីឡើង នៅក្រុងណាសារ៉ែត ។ ទ្រង់បានរៀនសេចក្ដីជាច្រើន ហើយបាន « មានកំឡាំងខាងវិញ្ញាណរឹតតែច្រើនឡើង … ហើយព្រះគុណនៃព្រះក៏សណ្ឋិតលើទ្រង់ផង » ។
កាលព្រះយេស៊ូវមានព្រះជន្ម ១២ ព្រះវស្សា ទ្រង់បានយាងទៅជាមួយយ៉ូសែប និង ម៉ារា នៅក្នុងក្រុមមនុស្សមួយក្រុម ដើម្បីទៅប្រារព្ធពិធីបុណ្យមួយនៅក្រុងយេរ៉ូសាឡិម ។ ពួកគេបានស្នាក់នៅទីនោះបួនប្រាំថ្ងៃ ។
កាលយ៉ូសែប និង ម៉ារា បានធ្វើដំណើរចាកចេញទៅផ្ទះវិញ ពួកគេបានគិតថា ព្រះយេស៊ូវបានយាងតាមក្រោយពួកគេទៅក្រុងណាសារ៉ែតជាមួយមិត្តភក្ដិរបស់ទ្រង់ ។ ប៉ុន្តែព្រះយេស៊ូវបានគង់នៅឯក្រុងយេរ៉ូសាឡិម ។
កាលយ៉ូសែប និង ម៉ារា បានស្វែងរកព្រះយេស៊ូវ ពួកគាត់រកទ្រង់ពុំឃើញឡើយ ។ គ្មាននរណាម្នាក់ក្នុងក្រុមរបស់ពួកគាត់បានឃើញទ្រង់ទេ ។ ដូច្នេះ យ៉ូសែប និង ម៉ារា បានត្រឡប់ទៅក្រុងយេរ៉ូសាឡិមវិញ ។ ពួកគេបានស្វែងរកព្រះយេស៊ូវអស់រយៈពេលបីថ្ងៃ ។ ពួកគេក្រៀមក្រំយ៉ាងខ្លាំង ។
ទីបំផុត ពួកគេបានរកឃើញព្រះយេស៊ូវនៅក្នុងព្រះវិហារបរិសុទ្ធ កំពុងជជែកជាមួយពួកអាចារ្យ ។ ទ្រង់កំពុងមានបន្ទូលឆ្លើយសំណួររបស់ពួកគេ ។ ពួកគេមានសេចក្ដីអស្ចារ្យចំពោះព្រះបញ្ញាញាណរបស់ព្រះយេស៊ូវ ។
ម៉ារាបានប្រាប់ព្រះយេស៊ូវថា នាង និង យ៉ូសែប បានមានសេចក្ដីបារម្ភអំពីទ្រង់ ។ ព្រះយេស៊ូវបានមានបន្ទូលតបថា ទ្រង់កំពុងធ្វើកិច្ចការរបស់ព្រះវរបិតាទ្រង់—ដែលជាកិច្ចការនៃព្រះ ។ យ៉ូសែប និង ម៉ារា ពុំយល់អំពីសេចក្ដីនោះឡើយ ។
ព្រះយេស៊ូវបានយាងទៅក្រុងណាសារ៉ែតវិញជាមួយយ៉ូសែប និង ម៉ារា ហើយបានស្ដាប់តាមឱវាទរបស់ពួកគាត់ ។
ព្រះយេស៊ូវបានរៀនអំពីកិច្ចការរបស់ព្រះវរបិតាសួគ៌ទ្រង់ កាន់តែច្រើ់នឡើងៗ ។
ទ្រង់បានចម្រើនវ័យធំឡើង ហើយរឹងមាំ ។
មនុស្សគ្រប់គ្នាស្រឡាញ់ទ្រង់ ។ ទ្រង់បានធ្វើតាមសេចក្ដីដែលព្រះសព្វព្រះទ័យឲ្យទ្រង់ធ្វើ ។
ព្រះស្រឡាញ់ទ្រង់ ។