ជំពូក ៥០
ការបង្រៀនផ្សេងៗទៀតនៅអាហារយប់ថ្ងៃចុងក្រោយ
បន្ទាប់ពីបានបរិភោគហើយ ព្រះយេស៊ូវមានបន្ទូលប្រាប់ពួកសាវកទ្រង់ថា ពួកគេត្រូវស្រឡាញ់គ្នាទៅវិញទៅមក ដូចទ្រង់ស្រឡាញ់ពួកគេដែរ ។ ប្រសិនបើពួកគេធ្វើដូចនេះ មនុស្សគ្រប់គ្នានឹងដឹងថា ពួកគេគឺជាសិស្សរបស់ទ្រង់ ។
ទ្រង់មានបន្ទូលថា ប្រសិនបើពួកសាវកស្រឡាញ់ទ្រង់ ពួកគេនឹងគោរពព្រះបញ្ញត្តិទ្រង់ ។ ទ្រង់មានបន្ទូលសន្យាថា ពួកគេនឹងទទួលអំណោយទាន ជាព្រះវិញ្ញាណបរិសុទ្ធ ។ ព្រះវិញ្ញាណបរិសុទ្ធនឹងបង្រៀនពួកគេ គ្រប់យ៉ាងដែលពួកគេចាំបាច់ត្រូវដឹង ។ ព្រះវិញ្ញាណបរិសុទ្ធនឹងជួយពួកសាវកឲ្យចងចាំ កិច្ចការទាំងឡាយដែលព្រះយេស៊ូវបានបង្រៀនពួកគេ ។
ព្រះយេស៊ូវបានមានបន្ទូលថា ទ្រង់គឺដូចជាដើមទំពាំងបាយជូរ ។ រីឯពួកសិស្សទ្រង់គឺដូចជាមែកទំពាំងបាយជូរ ។ មានតែមែកដែលនៅជាប់នឹងដើមប៉ុណ្ណោះ ទើបអាចបញ្ចេញផ្លែបាន ។
ព្រះយេស៊ូវមានបន្ទូលសន្យាពួកសាវកថា ប្រសិនបើពួកគេរស់នៅតាមដំណឹងល្អ ផ្លែផ្ការបស់ពួកគេ ( លទ្ធផលការងារ ) នឹងស្ដែងចេញមកបានល្អ ។ ប្រសិនបើពួកគេមិនធ្វើតាមទ្រង់ទេ ពួកគេនឹងដូចជាមែកដែលបានកាត់ចេញពីដើម ហើយមិនបញ្ចេញអ្វីទាំងអស់ ។
ព្រះយេស៊ូវគ្រីស្ទបានអធិស្ឋាន សូមឲ្យពួកសិស្សទ្រង់បានរួបរួមគ្នា ។ ទ្រង់សព្វព្រះទ័យឲ្យពួកគេបង្រៀនមនុស្សឲ្យជឿលើទ្រង់ ហើយឲ្យដឹងថា ព្រះវរបិតាសួគ៌ស្រឡាញ់ពួកគេ ។
បន្ទាប់មក ព្រះយេស៊ូវ និង ពួកសាវកបានច្រៀងទំនុកចម្កើង រួចក៏ចេញពីបន្ទប់ទៅ ។