Դաս 10․ Ուսուցչի նյութ

Հետևել Տիրոջ ապրող մարգարեներին

Վերականգնված ավետարանի հիմնարար ճշմարտությունն այն է, որ Տերը շարունակում է կանչել ապրող մարգարեներ՝ Իր ժողովրդին Իր կամքն ու վարդապետությունը հայտնելու համար: Այս դասի նպատակն է՝ ամրացնել Տիրոջ մարգարեներին համբերությամբ և հավատքով հետևելու ուսանողների պարտավորությունը։

Ուսուցման առաջարկներ

Տերը պատվիրում է Սրբերին ականջ դնել Իր մարգարեի խոսքերին։

Ցուցադրեք Եկեղեցու Նախագահի որևէ նկար և հարցրեք ուսանողներին, թե նրանք ինչ են մտածում կամ ինչ են զգում այդ նկարին նայելիս։

Ցուցադրեք Տասներկու Առաքյալների Քվորումից Երեց Ուլիսես Սոարեսի հետևյալ հայտարարությունը, որը գրված է նաև նախապատրաստական նյութում։

Երեց Ուլիսես Սոարես

Մարգարեներ ունենալը Իր զավակների հանդեպ Աստծո սիրո նշանն է: (Ուլիսես Սոարես, «Մարգարեները խոսում են Սուրբ Հոգու զորությամբ», Ensign կամ Լիահոնա, մայիս, 2018թ․, 99)։

• Ապրող մարգարեները ինչպե՞ս են Իր զավակների հանդեպ Աստծո սիրո նշան հանդիսանում: (Խրախուսեք ուսանողներին հիշել այն, ինչ նրանք ուսումնասիրել են նախապատրաստական նյութի բաժին 1-ում)։

Բացատրեք, որ Եկեղեցու կազմավորման օրը Մարգարե Ջոզեֆ Սմիթը հայտնություն ստացավ Տիրոջից, որտեղ պատվիրան և խոստում էր տրվում Իր Եկեղեցու անդամներին։ Ուսանողների հետ կարդացեք Վարդապետություն և Ուխտեր 21․4–5 հատվածները և ուշադրություն դարձրեք, թե Տերն ինչ էր պատվիրել, որ Եկեղեցու անդամներն անեն։

• Ի՞նչ ճշմարտություն կարող ենք սովորել Սրբերին տված Տիրոջ պատվիրանից։ (Օգտագործելով ուսանողների բառերը, բացահայտեք նմանատիպ մի սկզբունք․ Տերը պատվիրում է, որ մենք պետք է համբերությամբ ու հավատքով ընդունենք մարգարեի խոսքերը, ինչպես Իր բերանից:)

• Ինչո՞ւ է երբեմն մարգարեի խոսքերին ականջ դնելու և դրանք ընդունելու համար պահանջվում համբերություն և հավատք:

Ուսանողներին հրավիրեք դասարանով կամ փոքր խմբերով կարդալ հետևյալ սցենարը և քննարկել հետևյալ հարցերը.

Վերջին գերագույն համաժողովի մասին ընկերոջ հետ զրուցելիս, ձեր ընկերը պատմում է ձեզ այն մասին, որ դժվարանում է ընդունել Եկեղեցու ղեկավարներից մեկի կողմից ուսուցանված նյութը։ «Ի՞նչ պետք է անեմ, եթե համաձայն չեմ այն բանի հետ, որը մարգարեն է սովորեցրել», - հարցնում է նա:

• Ինչո՞ւ կարող է դա դժվարին իրավիճակ լինել Եկեղեցու անդամի համար:

• Ի՞նչ կարող եք ասել ձեր ընկերոջը, որպեսզի խրախուսեք նրան գործել համբերությամբ և հավատքով, քանի դեռ նա փորձում է լուծել իր մտահոգությունը: (Խրախուսեք ուսանողներին մտածել կամ կրկնել այն, ինչ նրանք սովորել են նախապատրաստական նյութի բաժին 2-ից)։

• Ի՞նչն է ձեզ օգնել, որ Տիրոջ մարգարեներին հետևեք համբերությամբ և հավատքով։ Կամ ի՞նչ եք սովորել ընտանիքի անդամից կամ ընկերոջից, որի հետ դուք խոսել եք այդ հարցի վերաբերյալ (ինչպես առաջարկվում է նախապատրաստական նյութի բաժին 2-ում )։

Գրատախտակին գրեք (կամ ցուցադրեք) հետևյալ անավարտ սկզբունքը․ Երբ մենք համբերությամբ ու հավատքով ականջ ենք դնում Տիրոջ մարգարեներին …

Ուսանողների հետ կարդացեք Վարդապետություն և Ուխտեր 21․6 և ուշադրություն դարձրեք Տիրոջ խոստացած օրհնությանը՝ համբերությամբ ու հավատքով Նրա մարգարեներին հետևելիս։

• Ձեր կարծիքով ի՞նչ է նշանակում, որ «դժոխքի դռները չեն հաղթի ձեզ այո», որ «Տեր ձեր առջևից կցրի խավարի զորությունները», որ «երկինքները կցնցվեն՝ ձեր բարիքի համար»։ (Ուսանողների պատասխանները գրեք գրատախտակին՝ անավարտ սկզբունքի տակ)։

• Որո՞նք են Տիրոջ մարգարեների վերջին ուսմունքները, որոնք կարող են պաշտպանել մեզ խավարի զորություններից և ստիպել, որ երկինքները ցնցվեն մեր բարիքի համար: (Կարող եք նախապատրաստել մի քանի օրինակներ, որ կիսվեք դրանցով)։

• Ե՞րբ է մարգարեների խորհուրդներին համբերությամբ և հավատքով հետևելու ձեր պատրաստակամությունը առաջ բերել այդ օրհնություններից մի քանիսը:

Ուսանողներին ժամանակ տվեք, որ աղոթքով խորհեն, թե ինչ կարող են անել՝ Տիրոջ մարգարեներին ավելի մեծ համբերությամբ և հավատքով հետևելու համար: Դա իր մեջ կարող է ներառել այն, թե նրանք ինչպես կարող են ավելի լիարժեք գործել ըստ մարգարեական վերջին հրավերների և խորհուրդների: Հրավիրեք ուսանողներին գրի առնել այն մտքերն ու տպավորությունները, որոնք նրանք ստանում են։ Խրախուսեք նրանց գործել համաձայն հուշումների, որոնք ստանում են Հոգուց։

Տիրոջ մարգարեները ստանում են հայտնություն և հայտարարում են վարդապետություն ամբողջ Եկեղեցու համար:

Հորդորեք ուսանողներին հիշել Հայրամ Փեյջի և նրա քարի հետ ունեցած փորձառությունը նախապատրաստական նյութի ուսումնասիրությունից:

• Ի՞նչ խնդիրներ էին առաջացրել Հայրամ Փեյջի ենթադրյալ հայտնությունները Եկեղեցու անդամների համար:

Հիշեցրեք ուսանողներին, որ Հայրամ Փեյջը ոչ միայն պնդում էր, որ ստանում է հայտնություն Եկեղեցու համար, այլ նաև նրա ենթադրյալ հայտնությունները հակասում էին սուրբ գրություններում ուսուցանվող վարդապետությանը և նախկինում Ջոզեֆ Սմիթի կողմից ստացված հայտնություններին: Հայրամ Փեյջի հայտնությունները ընդունողների թվում էին Ուիթմերների և Օլիվեր Քաուդերիի ընտանիքի անդամները:

Կարդացեք Վարդապետություն և Ուխտեր 28.1-7 հատվածները և ուշադրություն դարձրեք Օլիվեր Քաուդերիին և Եկեղեցու անդամներին տված Տիրոջ ուսմունքներին։ Նշեք, որ հատված 7 -ում նշված «խորհուրդները» վերաբերում են «հոգևոր ճշմարտություններին, որոնք տրվում են միայն հայտնությամբ» (Սուրբ գրքերի ուղեցույց, «Աստծո խորհուրդները», scriptures.ChurchofJesusChrist.org)։

• Ի՞նչ ճշմարտություններ կարող ենք սովորել այս հատվածներից այն մասին, թե ով կարող է հայտնություն ստանալ ամբողջ Եկեղեցու համար։ (Ուսանողները կարող են բացահայտել մի շարք ճշմարտություններ, ներառյալ հետևյալը. Միայն նրանք, ովքեր ունեն Եկեղեցին ղեկավարելու բանալիներ, իրավունք ունեն ստանալ հայտնություն և վարդապետություն հաստատել ամբողջ Եկեղեցու համար)։

• Ինչպե՞ս կարող է այդ ճշմարտությունն օգնել մեզ, որ այլևս չխաբվենք։

Բացատրեք, որ Տիրոջ ընտրյալ մարգարեների ուսմունքների մեջ Եկեղեցու պատմության ողջ ընթացքում մեծ հետևողականություն է պահպանվում: Այնուամենայնիվ, որոշ անդամներ կարող են մտածել, թե ինչ պետք է անեն, երբ հանդիպեն Եկեղեցու ղեկավարի կողմից նախկինում արված որևէ հայտարարության, որը կարծես անհամատեղելի է այսօրվա ուսուցանվող վարդապետության հետ:

• Ի՞նչ սկզբունքներով կարող ենք առաջնորդվել, որ ճանաչենք Տիրոջ վարդապետությունը, ինչպես ուսուցանել են Նրա ապրող մարգարեները: (Կարող եք ուսանողներին հրավիրել վերանայելու Երեց Դ. Թոդ Քրիստոֆերսոնի և Նիլ Լ․ Անդերսենի հայտարարությունները նախապատրաստական նյութի բաժին 3-ում)։

Որպես քննարկման մաս, դուք կարող եք կիսվել Նախագահ Ռասսել Մ. Նելսոնի հետևյալ խոսքերով.

Նախագահ Ռասսել Մ. Նելսոն

Դուք գուցե միշտ չհասկանաք ապրող մարգարեի ամեն հայտարարությունը: Բայց, երբ դուք գիտեք, որ մարգարեն մարգարե է, դուք կարող եք մոտենալ Տիրոջը խոնարհությամբ և հավատով և խնդրել ձեր սեփական վկայությունը նրա վերաբերյալ, ինչ Նրա մարգարեն հրապարակել է: (Russell M. Nelson, “Stand as True Millennials,” Ensign, Oct. 2016, 31)

Կարող եք դասը եզրափակել՝ կիսվելով ապրող մարգարեների և համբերությամբ ու հավատքով նրանց հետևելու օրհնությունների մասին ձեր վկայությամբ։

Հաջորդ անգամ

Բացատրեք, որ հաջորդ դասին կանդրադառնան մի թեմայի, որի մասին Նախագահ Ռասել Մ. Նելսոնը խոսել է որպես՝ «այսօր Երկրի վրայի մեծագույն մարտահրավերի, մեծագույն նպատակի, և մեծագույն աշխատանքի մասին» («Իսրայելի հույսը» [համաշխարհային հոգևոր հավաք, հունիս 3, 2018թ], ներդիր՝ New Era և Ensign, 4–5, ChurchofJesusChrist.org, շեղագրերն ըստ բնօրինակի)։ Հրավիրեք ուսանողներին ուսումնասիրել հաջորդ դասի նախապատրաստական նյութը և պատրաստ եղեք քննարկել Իսրայելը հավաքելու մեծ գործին մասնակցելու նպատակներն ու օրհնությունները։