Դաս 26․ Ուսուցչի նյութ

Եկեղեցին արևմուտքում

Եկեղեցու հաստատումը Միացյալ Նահանգների արևմուտքում հավատքի ուշագրավ պատմություն է: Այս դասը ուսանողներին հնարավորություն կտա դասեր սովորել հավատարիմ Սրբերից, ովքեր իրենց հիմքը կառուցեցին Հիսուս Քրիստոսի վրա և իրենց կյանքը նվիրեցին Նրա արքայության կառուցմանը: Դա կօգնի ուսանողներին ավելի լավ հասկանալ Եկեղեցու պատմության այդ ժամանակաշրջանի մի ողբերգական իրադարձություն, որը ցուցադրում էր, թե մարդիկ ինչպես էին լրջորեն հեռացել Փրկիչի ավետարանից. Մաունթ Մեդոուսի ջարդը:

Ուսուցման առաջարկներ

Սրբերը շարունակում էին կառուցել Տիրոջ թագավորությունը հավատքի և զոհաբերության միջոցով:

Ցուցադրեք ուղեկցող գոբելենի պատկերը կամ ձերը բերեք դասարան: Համոզվեք, որ ուսանողները հասկանում են, որ գոբելենը ստեղծվում է շատ թելերի բարդ համակցությունների միահյուսումով, որը ստեղծում է գեղեցիկ նկար կամ պատկեր:

Մարգարեների և տաճարների գոբելեն

Հանձնարարեք որևէ ուսանողի կարդալ Յոթանասունից Երեց Սթիվեն Ե. Սնոուի հետևյալ խոսքերը, ով նախկինում ծառայել է որպես Եկեղեցու պատմաբան և մատենագիր:

Սթիվեն Ե. Սնոու

Եթե կարծում եք, որ Եկեղեցու պատմությունը խճանկար է կամ գոբելեն, ապա պետք է իմանաք նաև, որ այն ամենահարուստ ու գեղեցիկ բանն է, որը ես երբևէ տեսել եմ: Եթե դուք ուշադիր ուսումնասիրեք այն, ապա այդ գեղեցիկ խճանկարում կամ գոբելենում կգտնեք մի քանի յուրահատուկ թելեր, և եթե դուք դիպչեք կամ կենտրոնանաք այդ թելերի վրա, ապա բաց կթողնեք մեր պատմության հրաշալի ուղերձը: Եթե մի քայլ հետ գնաք և նայեք ամբողջ խճանկարին կամ գոբելենին, ապա կտեսնեք, որ այն շատ գեղեցիկ է: (Steven E. Snow, “Start with Faith: A Conversation with Elder Steven E. Snow,” Religious Educator, no. 3 [2013], 11)

Բացատրեք, որ արևմուտքում Եկեղեցու վաղ շրջանի պատմությունից կան հազարավոր պատմություններ հավատարիմ Սրբերի մասին, որոնց ջանքերը՝ հետևել Հիսուս Քրիստոսին և կառուցել Տիրոջ Եկեղեցին, ստեղծել են հավատքի մի գեղեցիկ գոբելեն:

Պարզեք, թե ո՞ր ուսանողը ո՞ր պատմությունն է կարդում նախապատրաստական նյութի բաժին 1-ից Յուրաքանչյուր պատմության համար հրավիրեք որևէ ուսանողի անել հետևյալը.

1. Ամփոփեք պատմությունը, որը նա կարդաց.

2. Բացատրեք, թե Վերջին Օրերի Սուրբը կամ Սրբերն ինչպես ցուցադրեցին իրենց հավատքը Հիսուս Քրիստոսի և Նրա վերականգնված ավետարանի հանդեպ:

3. Կիսվեք դասերով կամ սկզբունքներով, որոնք նա սովորեց պատմությունից:

Թույլ տվեք, որ մյուս ուսանողները, ովքեր կարդացել են նույն պատմությունը, ավելացնեն իրենց գաղափարները, նախքան հաջորդ պատմությանն անցնելը:

Մի քանի Վերջին Օրերի Սրբեր ծրագրեցին և իրականացրին Մաունթ Մեդոուսի ջարդը:

Ցուցադրեք ուղեկցող պատկերը և բացատրեք ուսանողներին, որ դա Մաունթ Մեդոուսի ջարդի հուշարձանն է, որը կառուցվել է Եկեղեցու կողմից հարավային Յուտայում: Բացատրեք, որ ցավոք Մաունթ Մեդոուսի ողբերգությունը տխրալի թել է՝ հյուսված Սրբերի պատմության մեջ:

Մաունթ Մեդոուսի հուշարձանը

Հարցրեք ուսանողներին, թե նրանք ինչ սովորեցին, երբ կարդացին Մաունթ Մեդոուսի ջարդի մասին: Համոզվեք, որ ուսանողները հասկանում են, որ 1857թ. սեպտեմբերի 11-ին մոտ 50-60 տեղական ոստիկաններ հարավային Յուտայից, որոնց աջակցում էին մի քանի ամերիկյան հնդիկ դաշնակիցներ, կոտորեցին մոտ 120 գաղթականների, ովքեր կառքերով ճամփորդում էին դեպի Կալիֆորնիա: Միայն 17 երեխաների խնայեցին:

• Ի՞նչ իրադարձություններ և ընտրություններ հանգեցրին Մաունթ Մեդոուսի ջարդին: (Անհրաժեշտության դեպքում ուսանողներին մի քանի րոպե տվեք վերանայելու նախապատրաստական նյութի բաժին 2-ը։)

Ուսանողներին խնդրեք սուրբ գրություններից կիսվել սկզբունքներով և ճշմարտություններով, որոնք կարող էին օգնել այս բնակիչներին ուրիշ ընտրություններ կատարել: (Որոշ օրինակներ կարող են ընդգրկել՝ Առակաց 28.13, 3 Նեփի 12.24–25, 43–44, Վարդապետություն և Ուխտեր 64.9–11:)

• Մենք ի՞նչ դասեր կարող ենք սովորել Մաունթ Մեդոուսի ջարդի ողբերգությունից: (Կարող եք ուսանողների պատասխանները գրել գրատախտակին։)

Կարող եք ուսանողներին մի քանի րոպե հատկացնել, որպեսզի գրեն կամ ասեն, թե այս սկզբունքներն ինչպես կարող էին կանխել անհարկի տառապանքներն իրենց կյանքում:

Բացատրեք, որ քանի որ տեղական Եկեղեցու որոշ անդամներ ու ղեկավարներ պատասխանատու էին Մաունթ Մեդոուսի ջարդի կազմակերպման և իրագործման համար, որոշ մարդիկ թույլ տվեցին, որ այդ իրադարձությունը բացասական կերպով անդրադառնա ողջ Եկեղեցու մասին իրենց կարծիքի վրա։

• Ի՞նչ կարող եք ասել ինչ-որ մեկին, ով բացասական կարծիք ունի Եկեղեցու մասին Մաունթ Մեդոուսի ջարդի պատճառով: (Խրախուսեք ուսանողներին օգտագործել իրենց սովորածը նախապատրաստական նյութի բաժին 2-ից ։)

Հրավիրեք ուսանողներին կարդալ և գտնել որևէ սկզբունք Հելաման 5.12-ից: Ցուցադրեք հետևյալ խոսքերը. Հրավիրեք մի ուսանողի բարձրաձայն կարդալ այն և խնդրեք դասարանին փնտրել, թե այն ինչպես է լուսաբանում Հելաման 5.12-ում ուսուցանվող սկզբունքը:

Ջեյմս Սանդերսը Հիսուս Քրիստոսի Վերջին Օրերի Սրբերի Եկեղեցու անդամ է և Նենսի Սաֆրոնա Հաֆի ծոռը, այն երեխաներից մեկը, ով փրկվեց ջարդի ժամանակ: Եղբայր Սանդերսը կիսվել է ջարդի մասին իր զգացմունքներով. «Ես դեռևս ցավ եմ զգում, ես դեռևս բարկություն ու տխրություն եմ զգում, որ այդ ջարդը տեղի է ունեցել: … Բայց ես գիտեմ, որ այն մարդիկ, ովքեր արել են դա, պատասխանատու կլինեն Տիրոջ առաջ, և դա ինձ խաղաղություն է բերում»։ … Եղբայր Սանդերսը ասել է. «Իմացությունը, որ իմ նախնին սպանվել է ջարդերի ժամանակ, չի ազդել իմ հավատքի վրա, քանի որ այն հիմնված է Հիսուս Քրիստոսի վրա, ոչ թե Եկեղեցու որևէ անձնավորության վրա» (in Richard E. Turley Jr., “The Mountain Meadows Massacre,” Ensign, Sept. 2007, 21):

• Հելաման 5.12 հատվածում ուսուցանված սկզբունքն ինչպե՞ս է լուսաբանվում Ջեյմս Սանդերսի խոսքերում: (Ուսանողների պատասխաններից հետո գրատախտակին գրեք հետևյալ սկզբունքը. Կառուցելով մեր հավատքը Հիսուս Քրիստոսի և Նրա ավետարանի հիմքի վրա, կարող ենք օգնել մեզ ուժեղ մնալ, չնայած Եկեղեցու անդամների մարդկային թուլություններին:)

• Ինչպե՞ս կարող է Հիսուս Քրիստոսի հանդեպ մեր հավատքն օգնել մեզ, երբ մենք տեսնում կամ սովորում ենք օրինակներ, երբ Եկեղեցու անդամները թերանում են ապրել ավետարանի ուսմունքների համաձայն։

• Ի՞նչն է օգնում ձեզ կառուցել և պահել ձեր հավատքը Հիսուս Քրիստոսի հիմքի վրա:

Ուսանողներին ժամանակ տվեք մտածելու այդ մասին և գրի առնել, թե նրանք ինչ կանեն, որպեսզի պահպանեն և ամրապնդեն իրենց հավատքը Հիսուս Քրիստոսի և Նրա ավետարանի հանդեպ:

Վկայեք Փրկիչի ուսմունքներով ապրելու և մեր հավատքը Նրա և Նրա ավետարանի վրա հիմնելու կարևորության մասին, անկախ Եկեղեցու անդամների մարդկային թերություններից։ Երբ այդպես վարվենք, մենք կարող ենք օգնել առաջ տանել Քրիստոսի արքայությունը, ինչպես հավատարիմ ռահվիրա Սրբերն էին անում:

Հաջորդ անգամ

Հարցրեք ուսանողներին, արդյոք նրանց երբևէ հարցրել են, թե Եկեղեցին ինչու որոշ ժամանակով քահանայության իշխանություն և որոշ տաճարային արարողություններ չէր շնորհում աֆրիկական ծագում ունեցող սևամորթ անդամներին: Բացատրեք, որ հաջորդ դասին պատրաստվելիս ուսանողները հնարավորություն կունենան սովորել այս թեմայի մասին և առնչվող հայտնության մասին Պաշտոնական Հայտարարություն 2-ում, որի մասին մարգարեները կանխագուշակել էին երկար տարիների ընթացքում: Խնդրեք ուսանողներին պատրաստ գալ դասարան՝ քննարկելու իրենց սովորածը և այս թեմային վերաբերող իրենց հարցերը: