Melkizedek Priesthood

Melkizedek Priesthood eo ej priesthood eo eutiejļo̧k ak eļapļo̧k; Priesthood eo an Aron ej priesthood eo ettāļo̧k. Melkizedek Priesthood eo ekitbuuji ki ko an kōjeraam̧m̧an ko an jetōb ilo Kabun̄ in. Kōn kain̄i ko an priesthood eo eutiejļo̧k kajoor in anij ej alikkar n̄an armej (K&B 84:18–25; 107:18–21).

Anij eaar kwaļo̧k priesthood in eutiejļo̧k n̄an Adam. Petriak ro im rikanaan ro ilo aolep kajjojo tōrean bōk eddo raar kabwijer maron̄ in (K&B 84:6–17). Kar etan m̧oktata Priesthood eo Ekwōjarjar, ālikin Ekkar eo an Nejin Anij. Tokālik kar jeļā kake bwe ej Melkizedek Priesthood (K&B 107:2–4).

Ke ro nejin Israel raar likjab n̄an mour ekkar n̄an jim̧we ko im bujen ko an Melkizedek Priesthood, Irooj ar bōke kien in eutiejļo̧k im leļo̧k n̄an er juon priesthood ettāļo̧k im juon kien ettāļo̧k (K&B 84:23–26). Men kein kar etaer Priesthood eo an Aron im kien Moses. Ke Jisōs ar itok n̄an laļ in Eaar kōjepļaaktok Melkizedek Priesthood eo n̄an riJu ro im kar jino kalōk Kabun̄ eo ilubwiljier. Ijoke, priesthood eo im Kabun̄ eo rekar bar jako kōn maroklep eo. Rekar tokālik bar jepļaaktok kōn Josep Smith Jr. (K&B 27:12–13; 128:20; JS—B 1:73).

Ilowaan wōt Melkizedek Priesthood eo rej opij ko an elder, pris utiej, petriak, Jiljilimjuonn̄oul, im Rijjilōk (K&B 107). Melkizedek Priesthood enaaj aolep iien juon m̧ōttan aelōn̄ eo an Anij ioon laļ in.

President eo an Kabun̄ eo an Jisōs Kraist im Armej ro Rekwōjarjar ilo Raan ko Āliktata ej president eo an Priesthood eo eutiej ak Melkizedek Priesthood eo, im ej kabwijer aolep ki ko rej ekkejelļo̧k n̄an aelōn̄ eo an Anij ioon laļ in. Kūr eo an President ej n̄an juon wōt em̧m̧aan ilo kajjojo iien, im e ej armej eo wōt ioon laļ in kōmālim e n̄an kōjerbali aolep ki ko an priesthood eo (K&B 107:64–67; 132:7).