Ang mga Artikulo sa Pagtuo
sa Simbahan ni Jesukristo sa mga Santos sa Ulahing mga Adlaw

1 Nagatuo kami sa Dios, ang Amahan sa Kahangtoran, ug sa Iyang Anak, si Jesukristo, ug sa Espiritu Santo.

2 Nagatuo kami nga ang mga tawo pagasilotan sa ilang kaugalingong mga sala, ug dili tungod sa mga kalapasan ni Adan.

3 Nagatuo kami nga pinaagi sa Pag-ula ni Kristo, ang tanang tawo maluwas, pinaagi sa pagkamasulundon sa mga balaod ug sa mga ordinansa sa Ebanghelyo.

4 Nagatuo kami nga ang unang mga baroganan ug mga ordinansa sa Ebanghelyo mao ang: una, Pagtuo ni Ginoong Jesukristo; ikaduha, Paghinulsol; ikatulo, Bunyag pinaagi sa pagpaunlod alang sa kapasayloan sa mga sala; ikaupat, Pagpandong sa mga kamot alang sa gasa sa Espiritu Santo.

5 Nagatuo kami nga ang tawo kinahanglan gayod nga tawagon sa Dios, pinaagi sa propesiya, ug pinaagi sa pagpandong sa mga kamot niadtong adunay awtoridad, sa pagsangyaw sa Ebanghelyo ug sa pagpangalagad sa mga ordinansa niini.

6 Nagatuo kami sa samang kapunongan nga anaa sa Karaang Simbahan, nga mao ang mga apostoles, mga propeta, mga pastor, mga magtutudlo, mga ebanghelista, ug uban pa.

7 Nagatuo kami sa gasa sa mga pinulongan, propesiya, pagpadayag, mga panan-awon, pagpang-ayo, paghubad sa mga pinulongan, ug uban pa.

8 Nagatuo kami nga ang Biblia pulong sa Dios kon gihubad kini sa husto nga paagi; nagatuo usab kami nga ang Basahon ni Mormon pulong sa Dios.

9 Nagatuo kami sa tanang gipadayag sa Dios, sa tanang gipadayag Niya karon, ug kami nagatuo nga mopadayag pa siya og daghang dagko ug mahinungdanong mga butang kalabot sa Gingharian sa Dios.

10 Nagatuo kami sa tinuod gayod nga pagpundok sa Israel ug sa pagpahiuli sa Napulo ka Tribo; nga ang Zion (ang Bag-ong Jerusalem) pagatukoron sa kayutaan sa Amerika; nga si Kristo maghari sa personal mismo dinhi sa yuta; ug, nga ang yuta mabag-o ug makadawat sa iyang paraisohanon nga himaya.

11 Giangkon namo ang kahigayonan sa pagsimba sa Labing Makagagahom nga Dios sumala sa mga pagdiktar sa among kaugalingong tanlag, ug nagatugot sa tanang tawo sa samang kahigayonan, tugotan sila nga mosimba sa bisan unsang paagi, asa, kinsa ang gusto nila.

12 Nagatuo kami sa kamandoan ubos sa mga hari, mga presidente, mga magmamando, ug sa mga maghuhukom, sa pagsunod, pagtahod, ug sa pagpaluyo sa balaod.

13 Nagatuo kami sa pagkamatinuoron, pagkamatinud-anon, pagkaputli, pagkamanggiluy-on, pagka mahiyason, ug sa pagbuhat og maayo ngadto sa tanang katawhan; sa pagkatinuod, makasulti kami nga gisunod namo ang pagpahimatngon ni Pablo—Nagatuo kami sa tanang butang, kami nagalaom sa tanang butang, nakalahutay kami sa daghang butang, ug naglaom nga makahimo sa paglahutay sa tanang butang. Kon adunay mga butang nga mahiyason, matahom, o maayo og dungog o dalaygon, nagtinguha kami sa pagpangita niining mga butanga.