Benneg 43
Paltiing a naited babaen ni Joseph Smith a Propeta, iti Kirtland, Ohio, idi Pebrero 1831 (History of the Church, 1:154–156). Iti daytoy a panawen sumagmamano a kameng ti Simbaan ti rirriribuken dagiti tao nga agkunkuna a mammaltiingda. Nagdamag ti Propeta iti Apo ket naawatna daytoy a surat a naiturong kadagiti elder ti Simbaan. Maipapan ti umuna a paset kadagiti banag ti pannakaiwardas ti Simbaan; linaon ti naud-udi a paset ti ballaag nga ited dagiti elder kadagiti pagilian iti daga.
1–7, Dumteng laeng dagiti paltiing ken bilin babaen ti maysa a natudingan; 8–14, Mapasanto dagiti Santo babaen ti nasantuan a panagtignayda iti imatang ti Apo; 15–22, Naibaon dagiti elder a mangyararaw iti panagbabawi ken mangisagana kadagiti tao iti naindaklan nga aldaw ti Apo; 23–28, Awagan ti Apo dagiti tao babaen ti timekna ken babaen dagiti bileg ti nakaparsuaan; 29–35, Dumtengto ti Millennium ken ti pannakaigalut ni Satanas.
1 O imdenganyo, dakayo nga elder ti simbaanko, ket denggenyo dagiti balikas nga ibagak kadakayo.
2 Ta adtoy, pudno, pudno, kunak kadakayo, a naawatyon ti bilin a para iti paglintegan ti simbaanko, babaen kenkuana a tinudingak kadakayo a mangawat kadagiti bilin ken paltiing manipud iti imak.
3 Ket maipanamnama a maammuanyonto daytoy—nga awan ti sabali a natudingan kadakayo nga umawat kadagiti bilin ken paltiing agingga a maala, no agtungpal kaniak.
4 Ngem pudno, pudno, kunak kadakayo, nga awan ti sabali a matudingan iti daytoy a sagut malaksid no babaen kenkuana; ta no maala manipud kenkuana awanto ti bilegna malaksid ti panangtudingna iti sabali a mangisaup kenkuana.
5 Ket daytoy ti paglintegan kadakayo, a diyo awaten dagiti pannursuro ti asino man nga umasideg kadakayo a kas kadagiti paltiing ken bilin;
6 Ket itedko daytoy kadakayo tapno saankayo a maallilaw, tapno maammuanyo dagiti saan a naggapu kaniak.
7 Ta pudno kunak kadakayo, ta isu nga inordenak sumrekto iti ruangan ket maordenanto a kas iti imbagak idi kadakayo, a mangisuro kadagiti paltiing nga inawatyo ken awatenyonto babaen kenkuana a tinudingak.
8 Ket ita, adtoy, itedko kadakayo ti bilin, a no aguummongkayo a sangsangkamaysa iwanwan ken itandudoyo ti tunggal maysa, tapno maammuanyo no kasano ti panagtignayyo ken panangiwanwanyo iti simbaanko, no kasano ti panagtignayyo a maibatay kadagiti alagaden ti paglintegan ken bilinko, a naitedkon.
9 Ket kasta ti pannakaiwanwanyo iti paglintegan ti simbaanko, ket mapasantokayo iti inawatyo, ket ikumityo ti bagbagiyo nga agtignay a nasantuan iti imatangko—
10 A no la ketdi aramidenyo daytoy, mainayonto ti gloria iti pagarian a naawatyon. No diyo aramiden daytoy, maibabawinto daytoy, uray pay dayta naawatyon.
11 Ikkatenyo ti kinamanagbasol nga adda kadakayo; pasantuenyo ti bagbagiyo iti imatangko;
12 Ket no tarigagayanyo dagiti gloria iti pagarian, tudinganyo ti katulongak a ni Joseph Smith, Jun., ket itandudoyo iti imatangko babaen ti kararag ti pammati.
13 Ket manen, kunak kadakayo, a no tarigagayanyo dagiti datdatlag iti pagarian, ikkanyo iti taraon ken aruaten, ken ania man a banag a kasapulanna iti panangipatungpalna iti imbilinko kenkuana;
14 Ket no diyo aramiden agtalinaed kadakuada a nangawat kenkuana, tapno maisaganaak ti bagik kadagiti natarnaw a tao iti imatangko.
15 Kunak manen, imdenganyo dakayo nga elder ti simbaanko, a tinudingak: Saankayo a naibaon tapno pasursuruan, ngem tapno mangisuro kadagiti annak ti tattao iti bambanag nga impaimak kadakayo babaen ti bileg ti Espirituk;
16 Ket maisurokayo manipud iti ngato. Pasantuenyo ti bagbagiyo ket matalugadingankayo iti bileg, tapno maitedyo ti kas iti imbagak kadakayo.
17 Imdenganyo, ta, adtoy, asidegen ti naindaklan nga aldaw ti Apo.
18 Ta dumteng ti aldaw a yebkasto ti Apo ti timekna manipud iti langit; agkintayegto ti langit ken agarigenggento ti daga, ket umawengto ti trumpeta ti Dios iti atiddog ken napigsa, ket kunananto kadagiti matmaturog a pagilian: Bumangon ken agbiagkayo a sasanto; agtalinaedkayo a managbasol ken maturogkayo agingga nga umawagakto manen.
19 Gapuna patibkerenyo dagiti lomoyo di la ket mamin-ano ta mairamankayo kadagiti nadangkes.
20 Agtimekkayo iti napigsa ket dikayo agpangngadua. Awaganyo dagiti pagilian nga agbabawida, nataengan man wenno ubbing, sibabalud man wenno siwawaya, a kunayo: Isaganayo ti bagbagiyo para iti naindaklan nga aldaw ti Apo;
21 Ta no siak, a maysa a tao, agtimekak iti napigsa ket awagankayo nga agbabawi, ket kaguradak, anianto ti kunayo no dumteng ti aldaw a gumluong dagiti gurruod iti amin a suli ti daga, a makisao kadagiti amin a sibibiag, a kunana—Agbabawikayo, ket agsaganakayo para iti naindaklan nga aldaw ti Apo?
22 Wen, ket manen, inton maisaplit dagiti kimat manipud iti daya nga agpalaud, ket manabsiit ti timekda kadagiti amin a sibibiag, ken mangtitileng kadagiti lapayag dagiti makangngeg, a mangibaga kadagitoy a balikas—Agbabawikayo, ta dumtengen ti naindaklan nga aldaw ti Apo?
23 Ket manen, yebkasto ti Apo ti timekna manipud iti langit, nga agkuna: Imdenganyo, O dakayo a pagilian iti daga, ket denggenyo dagiti balikas dayta Dios a nangparsua kadakayo.
24 O, dakayo a pagilian iti daga, kasano ti kasansan ti panangummongko kadakayo a sangsangkamaysa a kas iti panangummong ti pamusian kadagiti piekna iti sirok ti payakna, ngem dakayo saan!
25 Kasano ti kasansan ti panangawagko kadakayo babaen ti ngiwat dagiti katulongak, ken ti panagserserbi dagiti anghel, ken ti timekko a mismo, ken ti dulluog dagiti gurruod, ken dagiti manabsiit a kimat, ken ti banesbes dagiti bagyo, ken ti dalagudog dagiti ginggined, ken dagiti napigsa a tudo ti uraro, ken ti asug dagiti gawat ken angol iti tunggal kita, ken ti napigsa nga aweng ti trumpeta, ken babaen ti timek ti pangngeddeng, ken babaen ti timek ti panangngaasi iti agmalmalem, ken babaen ti timek ti kinadayag ken dayaw ken dagiti kinabaknang ti agnanayon a biag, ket maisalakankayo iti awan inggana a pannakaisalakan, ngem dakayo saan!
26 Adtoy, dimtengen ti aldaw, a napnon ti kopa ti pungtot iti gurak.
27 Adtoy, pudno kunak kadakayo, a dagitoy ti balikas ti Apo a Diosyo.
28 Gapuna, agtrabahokayo, agtrabahokayo iti bangkagko iti maudi a gundaway—iti maudi a gundaway awaganyo dagiti agindeg iti daga.
29 Ta iti naikeddeng a panawenko umayakto iti daga a mangukom, ket masubbotto dagiti taok ket agturaydanto iti daga a kaduak ida.
30 Ta ti naindaklan a Millennium, a nasaok babaen ti ngiwat dagiti katulongak, umayto.
31 Ta maigalutto ni Satanas, ket inton makaruk-at manen agturayto laeng iti ababa a panawen, sa kalpasanna dumtengton ti panungpalan ti daga.
32 Ket isu nga agbibiag iti kinalinteg agbalbaliwto iti apagkirem, ket mapukawto ti daga a kasla lamuten ti apuy.
33 Ket pumanawto dagiti nadangkes nga agturong iti di maiddep nga apuy, ket awan ti tao a makaammo iti paggibusanda iti daga, wenno makaammonto, agingga nga umayda kaniak a maukom.
34 Imdenganyo dagitoy a balikas. Adtoy, Siak ni Jesucristo, ti Mangisalakan iti lubong. Italimengyo dagitoy a banag iti puspusoyo, ket pagtalinaedenyo iti panunotyo dagiti kinangayed ti agnanayon.
35 Agparbengkayo. Tungpalenyo ti amin a bilinko. Pudno a kasta. Amen.