Benneg 137
Ti parmata a naited ken ni Joseph Smith a Propeta, iti templo iti Kirtland, Ohio, idi 21 ti Enero 1836 (History of the Church, 2:380–381). Pasken daytoy a pannakaannong dagiti ordinansa iti talugading a kas iti pannakaipalgakda.
1–6, Makita ti Propeta ni kabsatna nga Alvin iti celestial a pagarian; 7–9, Maipalgak ti doktrina ti pannakaisalakan dagiti natay; 10, Maisalakan amin nga ubbing iti celestial a pagarian.
1 Nalukatan ti langit kadakami, ket nakitak ti celestial a pagarian ti Dios, ken ti gloria nga adda sadiay, no sibabagi wenno saan diak maibaga.
2 Nakitak ti awan kaaspingna a pintas ti ruangan a serkan dagiti agtawid iti dayta a pagarian, a kasla iti agkutkutikot a darang ti apuy;
3 Kasta met ti dumardarang a trono ti Dios, a nagtugawan ti Ama ken ti Anak.
4 Nakitak dagiti napintas a kalsada dayta a pagarian, a kasla aglanglanga a naparaigidan iti balitok.
5 Nakitak da Ama Adan ken Abraham; ken ti amak ken ti inak; ni kabsatko nga Alvin, a nabayagen a matmaturog;
6 Ket nagsiddaawak no kasano a nakagun-od iti tawid iti dayta a pagarian, iti pannakakitak a pimmanaw iti daytoy a biag sakbay a naaramat ti Apo ti imana a mangummong iti Israel iti maikadua a gundaway, ken saan pay a nabuniagan a para iti pannakaugas ti basbasol.
7 Kasta ti yaay ti timek ti Apo kaniak, a nagkuna: Amin a natay a di pay nakaammo iti daytoy nga ebanghelio, a nangawat koma no napalubosanda a nagbati, agtawiddanto iti celestial a pagarian ti Dios;
8 Kasta met dagiti amin a matayto manipud ita a di makaammo iti daytoy, a nangawat koma iti daytoy a sipupuso, agtawiddanto iti dayta a pagarian;
9 Ta siak, ti Apo, ukomekto dagiti amin a tao a maibatay kadagiti aramidda, a maibatay iti tarigagay ti puspusoda.
10 Ken kasta met a nakitak nga amin nga ubbing a matay sakbay a madanonda ti tawen a mabalindan ti agsungbat maisalakanda iti celestial a pagarian iti langit.