Karolo ea 97
Ts’enolo e fanoeng ka Moporofeta Joseph Smith, Kirtland, Ohio, ka la 2 Phato 1833. Ts’enolo ena e sebetsana ka kotloloho le litaba tsa Bahalaleli Zion, Jackson County, Missouri, e le karabo potsong ea Moporofeta ho Morena bakeng sa tlhahisoleseling ka sekolo sa baporofeta Missouri. Litho tsa Kereke Missouri ka nako ena li ne li le ka tlas’a litlhoriso tse kholo, ‘me ka la 23 Phupu 1833, li ne li qobelletsoe ho tekena tumellano ea ho tloha Jackson County.
1–2, Bahalaleli ba bangata ba Zion (Jackson County, Missouri) ba hlohonolofatsoa bakeng sa ho ts’epahala ha bona; 3–5, Parley P. Pratt o thooletsoa bakeng sa mesebetsi ea hae Zion; 6–9, Ba bolokang lilekane tsa bona ba amoheloa ke Morena; 10–17, Ntlo e lokela ho ahoa Zion moo ba hloekileng lipelong ba tla bona Morena; 18–21, Sione ke ba hloekileng lipelong; 22–28, Sione e tla pholoha kotlo ea Morena haeba e ts’epahala.
1 Kannete ke re ho lona metsoalle ea ka, ke bua ho lona ka lentsoe la ka, esita le lentsoe la Moea oa ka, hore nke ke le bonts’e thato ea ka malebana le baena ba lona lefats’eng la Zion, ba bangata bao ruri ba nang le boikokobetso ‘me ba batlang ka mafolofolo ho ithuta bohlale le ho fumana ‘nete.
2 Kannete-nete ke re ho lona, ho lehlohonolo ba joalo, hobane ba tla fumana; hobane ‘na, Morena, ke bonts’a mohau ho bohle ba bonolo, le holim’a bohle bao ke ba batlang, hore nke ke lokafatsoe ha ke ba tlisa kahlolong.
3 Bonang, ke re ho lona, malebana le sekolo se Sione, ‘na, Morena, ke khahloa haholo hore ho be le sekolo Sione, ‘me le ke mohlanka oa ka Parley P. Pratt, hobane o hlola ka ho ‘na.
4 ‘Me ha feela a tsoelapele ho hlola ka ho ‘na o tla tsoelapele ho okamela sekolo se lefats’eng la Sione ho fihlela ke fana ho eena litaelo tse ling.
5 ‘Me ke tla mo hlohonolofatsa ka litlhohonolofatso tse menahaneng, ho manolla mangolo ‘ohle a halalelang le liphiri le ho isa tlhakisetsong ea sekolo le ea kereke Sione.
6 ‘Me ho masalla a sekolo, ‘na, Morena, ke ikemiselitse ho bonts’a mohau; leha ho le joalo, ho na le ba tlamehang ho khalengoa, ‘me mesebetsi ea bona e tla tsebahatsoa.
7 Selepe se behiloe metsong ea lifate; ‘me sefate se seng le se seng se sa hlahising tholoana e molemo se tla rengoa fats’e ‘me se lahleloe mollong. ‘Na, Morena, ke boletse.
8 Kannete ke re ho lona, bohle har’a bona ba tsebang lipelo tsa bona lia ts’epahala, me li robehile, ‘me meea ea bona e soabile, ‘me ba ikemiselitse ho latela lilekane tsa bona ka sehlabelo—ee, sehlabelo se seng le se seng seo ‘na, Morena ke tlang ho se laela—ba amoheloa ke ‘na.
9 Hobane ‘na, Morena, ke tla etsa hore ba hlahise joaloka sefate se behang haholo se lenngoeng mobung o motle, pela molatsoana o hloekileng, o hlahisang litholoana tse ntle tse ngata.
10 Kannete ke re ho lona, hore ke thato ea ka hore ntlo e lokela ho ahoa bakeng sa ka lefats’eng la Sione, joaloka moralo oo ke o faneng ho lona.
11 Ee, etsang hore e ahoe ka potlako, ka boshome ba batho ba ka.
12 Bonang, bona ke boshome le sehlabelo seo ‘na, Morena, ke se batlang matsohong a bona, hore ho ke ho be le ntlo e aheloang ‘na bakeng sa poloko ea Sione—
13 E le sa sebaka sa teboho bakeng sa bahalaleli bohle, le sebaka sa taelo ea bohle ba bitsetsoang mosebetsi oa boruti lipitsong tsohle tse ‘maloa tsa bona le liofisi;
14 Hore ba ke ba phethahatsoe kutloisisong ea boruti ba bona, ka mohopolo, ka motheo, le ka thuto ea tumelo, linthong tsohle malebana le ‘muso oa Molimo lefats’eng, linotlolo tsa ‘muso oo o ileng oa fanoa holim’a lona.
15 ‘Me ha feela batho ba ka ba aha ntlo bakeng sa ka ka lebitso la Morena, ‘me ba se ke ba lumella eng kapa eng e lits’ila ho tla ka ho eona, hore e se ke ea silafatsoa, khanya ea ka e tla lula ho eona.
16 Ee, ‘me khanya ea ka e tla ba teng, hobane ke tla tla ho eona, ‘me bohle ba hloekileng lipelong ba tlang ho tla ho eona ba tla bona Molimo.
17 Empa haeba e silafalitsoe, ha ke na ho tla ho eona, ‘me khanya ea ka ha e na ho ba teng; hobane ha ke na ho tla ka hare ho litempele tse sa hloekang.
18 ‘Me, joale, bonang, haeba Sione a etsa lintho tsena, o tla atleha, ‘me a ikatise, ‘me a fetohe ea khanyang haholo, ea moholo haholo, ‘me ea ts’abehang haholo.
19 ‘Me lichaba tsohle tsa lefats’e li tla mo hlonepha, ‘me li tla re: Ruri Sione ke motse oa Molimo oa rona, ‘me ruri Sione a ke ke ea oela, leha e le ho tlosoa sebakeng sa hae, hobane Molimo o teng, ‘me letsoho la Morena le teng;
20 ‘Me o ikanne ka matla a sefutho sa hae ho ba poloko ea hae le tora ea hae e phahameng.
21 Ka baka leo, kannete, joana ho rialo Morena, lesang Sione e nyakalle, hobane hona ke Sione—ba hloekileng pelong; ka baka leo, lesang sione e nyakalle, ha bohle ba khopo ba tla siama.
22 Hobane talimang, le bone, boiphetetso bo tla ka potlako holim’a ba senang bomolimo joaloka sefefo; ‘me ke mang ea tla se phonyoha?
23 Seoa sa Molimo se tla feta bosiu le mots’eare, ‘me tlaleho ea sona e tla khathatsa batho bohle; ee, ha se na ho emisa ho fihlela Morena a e-tla;
24 Hobane khalefo ea Morena e chesehela khahlanong le manyala a bona le bokhopo bohle ba mesebetsi ea bona.
25 Leha ho le joalo, Sione o tla phonyoha haeba a latela ho boloka lintho tsohle tseo ke mo laetseng tsona.
26 Empa haeba a ke ke a boloka eng kapa eng eo ke mo laetseng, ke tla mo etela ho latela mesebetsi eohle ea hae, ka mahlomola a bohloko, ka lefu la seoa, ka seoa, ka sabole, ka boiphetetso, ka mollo o timetsang.
27 Leha ho le joalo, etsang hore ho baloe lekhetlong lena litsebeng tsa hae, hore, ‘na, Morena, ke amohetse nehelo ea hae; ‘me haeba a ke ke a hlola a etsa sebe ha ho e ‘ngoe ea lintho tsena e tlang ho tla holim’a hae;
28 ‘Me ke tla mo hlohonolofatsa ka litlhohonolofatso, ‘me ke menahanye litlhohonolofatso holim’a hae, le holim’a meloko ea hae ka mehla le mehla, ho rialo Morena Molimo oa lona. Amen.