Karolo ea 83
Ts’enolo e fanoeng ka Moporofeta Joseph Smith, Independence, Missouri, ka la 30 ‘Mesa 1832. Ts’enolo ena e ile ea amoheloa ha Moporofeta a ne a lutse lekhotleng le baena ba hae.
1–4, Basali le bana ba na le tokelo holim’a banna le bo-ntate ba bona bakeng sa ts’ehetso ea bona; 5–6, Bahlolohali le likhutsana ba na le tokelo holim’a kereke bakeng sa ts’ehetso ea bona.
1 Kannete, ho rialo Morena, ho tlatseletsa melaong ea kereke malebana le basali le bana, bao e leng ba kereke, ba lahlehetsoeng ke banna kapa bo-ntate ba bona:
2 Basali ba na le tokelo ho banna ba bona bakeng sa tlhokomelo, ho fihlela banna ba bona ba e-shoa; ‘me haeba ba fumanoa e se batloli ba tla ba le boena ka kerekeng.
3 ’Me haeba ba sa ts’epahale ba ke ke ba ba le boena ka kerekeng; empa ba ka sala holim’a mafa a bona ho latela melao ea naha.
4 Bana bohle ba na le tokelo holim’a batsoali ba bona bakeng sa tlhokomelo ea bona ho fihlela ba le lilemong.
5 ’Me kamorao ho moo, ba na le tokelo holim’a kereke, kapa ka mantsoe a mang holim’a ntlo ea polokelo ea Morena, haeba batsoali ba se na seo ba ka ba nehang sona e le lefa.
6 ’Me ntlo ea polokelo e tla bolokoa ka nyehelo ea kereke; ‘me bahlolohali le likhutsana ba tla hlokomeloa, joaloka mafutsana. Amen.